1. ¿Kasa talataka atuma waaʼin?

KEEʼIREESÜ naaʼin Jeʼwaa talatüinjatüin waaʼin, makalaka naapüin wamüin wainma kasa. Naapüin wamüin kata oʼuu otta waʼwaajüin nia süka nürütkeʼerüin waya sünainmüin tü iküleesia shiimainkat (Sal. 144:15; Juan 6:44). Nüküjüin wamüin alin waya nüpüla otta nükaaliinjeenain waya süpüla ayatüinjanain waʼyataain nümüin (Jer. 31:3; 2 Cor. 4:16). Maaʼulu yaa, müshii suluʼukai waaʼin wanee paʼaraiisü süka nnojoluin kasain choʼujaain sümüin tü wanoulakat otta eeshii wamaa wawalayuu aipüralii maʼin. Otta aneerü wakuwaʼipa nutuma Jeʼwaa soʼu palitchon kaʼi.

2. ¿Kasa eejiraaka amaa waneeinnua anoujüshii?

² Mayaainjeʼe wainmain tü kasa talatüinjatkalü atuma naaʼin na anoujüshiikana nünain Jeʼwaa, eesü süntüle suluʼumüin naaʼin mojutüin naya saaʼin namüin. Eejiraashii naya sümaa tia. Naashin nayakana nnojoishii kasain anain apüla naya otta nnojotsü kasain anain apüla tü naʼyataainkat nümüin Maleiwa. Sutuma müin tü suluʼukat naaʼin, eesü suwataale suluʼumüin nekii nnojolin süpüla talatüinjachin wanee wayuu soʼu wainma juya. Naashin nayakana, nnojotsü eein wanee kaʼi talatakalü oʼu naya (Ecl. 11:8).

3. ¿Jamüsü süntaka suluʼumüin naaʼin na wawalayuukana mojutüin naya?

³ ¿Jamüsü süntaka suluʼumüin naaʼin na wawalayuukana mojutüin naya? Eesü süpüla shiain sutuma nnojoluin shikeraajüin tü  keeʼireekat naaʼin, sutuma tü nachiʼrakat jee shiale sutuma tü laülawaakat (Sal. 71:9; Prov. 13:12; Ecl. 7:7). Soto waaʼin wanee kasa: eʼrüt maʼin wayumüin tü waaʼinkat. Eesü süntüle suluʼumüin waaʼin jashichin wamüin Maleiwa saaʼujee tü waainjalakat mayaainjeʼe nnojoluin müin shia (Jer. 17:9; 1 Juan 3:20). Niperulajüin Satanaa na wayuu aʼyataakana nümüin Maleiwa. Eeshii na wayuu wanaawakana aaʼin nümaa Satanaa, makalaka naküjüin wamüin nnojoluin kasain anain apüla waya; maʼaka nüküjüin shia Elifaz nümüin Job. ¡Alawaa neʼe tia! (Job 4:​18, 19.)

4. ¿Kasa wekirajaainjatka anain?

⁴ Naashin Jeʼwaa nnojoishii niyüülajüin na wayuu mojukana aaʼin (Sal. 23:4). Nükaaliinjüin naya sükajee tü Wiwüliakat. Tü Nünüikikat Maleiwa, «pülasü shia nutuma Maleiwa süpüla ajaʼttiraa kasa eeka ichein». Maʼaka saaʼin tü kasa mojusü jülüjakat waaʼin wachiki wayakana (2 Cor. 10:​4, 5, NM). Anashii wekirajaale sünain tü waaʼinrajatkat süpüla sükaaliinjüin waya tü Wiwüliakat sünain nnojoliinjanain mojutüin waya wamüinjiraa. Ekirajaayakat tüü, süpülajatü sütütüleʼerüin waaʼin wayakana otta na waneeinnua.

5. ¿Kasa naaʼinrajatka wanee wayuu süpüla kojutüin nia nümüinjiraa?

⁵ Nüküjüin chi aluwataaushikai Pablo wanee pütchi akaaliinjeechika wanee wayuu süpüla kojutüin nia nümüinjiraa. Müshi nia namüin na anoujüshii chajanakana Corinto: «Anakaja müleka jiyaawatüle saaʼu tü jaaʼinrakat waneʼewaire jukua süpüla jütüjaainjatüin saaʼu müleka shiimüinre sünain jaaʼinrüin tü nüchekakat Cristo jüpüleerua» (2 Cor. 13:5). Süpüla watüjaain saaʼu müleka waaʼinrüle tü nüchekakat Kürisüto, wanaʼlüinjatü wakuwaʼipa müleka pansaale sümaa tü shikirajakalü anain tü Wiwüliakat. Pansaainjatü wakuwaʼipa sümaa süpüshuaʼa tü nuluwataakalü anain Maleiwa, nnojotsü shiainjatüin neʼe waaʼinrüin tü anakat saaʼin wamüin (Sant. 2:​10, 11).

6. ¿Jamüsü wanaʼlüinjatka wakuwaʼipa müleka shiimainre pansaain sümaa tü nüchekakat Kürisüto? (Piirakaa sümüin tü ayaakua suluʼukat süpana 12.)

⁶ Eeshi pümüle: «Nnojotsü tanaʼlüinjatüin takuwaʼipa müleka pansaale shia sümaa tü nüchekakat Kürisüto süka tatüjaain saaʼu sünain mojuin tü takuwaʼipakat». Tü jülüjüinjatkat paaʼin shia tü jülüjakat naaʼin Jeʼwaa püchiki (Is. 55:​8, 9). Nünaʼlüin Jeʼwaa tü suluʼukat naaʼin na wayuu aʼyataakana nümüin süpüla nükaaliinjüin naya, nnojotsü süpülajatüin müliain naya nutuma. Wanaaweerü tü jülüjakat paaʼin püchiki piakai sümaa tü jülüjakat naaʼin Maleiwa püchiki müleka pünaʼrüle tü pukuwaʼipakat sükajee tü sümakat tü Wiwüliakat. Paainjüle tia, kojuteechi pia pümüinjiraa otta piyaawateerü aaʼu kojutüin maʼin pia nümüin Jeʼwaa. Piyaawatüle saaʼu tia, nnojoleerü mojuin paaʼin. Müsü aka saaʼin wojutarüle shiwentaanase wanee piichi süpüla shikerotüinjatüin nuwarala chi kaʼikai.

7. ¿Kasa sükaaliinjaka anain waya nakuwaʼipa na wayuu saashajaakana achiki tü Wiwüliakat?

⁷ Süpüla pünaʼlüin müleka pansaale pukuwaʼipa sümaa tü nüchekakat Maleiwa, jülüjüinjatü paaʼin sünain nakuwaʼipa na wayuu saashajaakana achiki tü Wiwüliakat. Jülüja paaʼin jamapuʼuin nakuwaʼipa otta kasapuʼuin alatüin namüin. Otta müinjachi pia: «¿Kasaje taainjaka tayale alatüin amüin tia?». Wekirajaa sünain nakuwaʼipa apünüinshii wayuu süpüla wanaʼlüin müleka pansaale wakuwaʼipa sümaa tü nikirajakalü anain Kürisüto otta süpüla kojutüinjanain waya wamüinjiraa.

8, 9. (1) ¿Jamapuʼusü sukuwaʼipa tü wayuu oukta aʼwayuusetkat? (2) ¿Kasache alataka suluʼupünaa shikii tü wayuu oukta aʼwayuusetkat?

⁸ Chayaa Jerusalén suluʼu tü aʼwaajüleekat Maleiwa, niʼrüin Jesuu wanee wayuu oukta aʼwayuuset. Tü saainjakat tia wayuukot  sükaaliinjüin wanee wayuu süpüla kojutüin nia nümüinjiraa mayaainjeʼe eein tü kasa isakat nüchiki (paashajeʼera Lucas 21:​1-4). Nnojotsü anain maʼin sukuwaʼipa tia wayuukot. Müliasü maʼin saaʼin nüchiirua chi suʼwayuusekai otta müliasü saaʼin sutuma tü naainjakat na shikiishiikana tü anoujaakat; «eʼikeʼetshii [naya] wayuu eekai ouktüin suʼwayuuse» shiiʼiree naʼluwajeein tü kasa eekat sümaʼana. Nnojotsü nakaaliinjayaain joo shiayaa (Luc. 20:47). Maʼletsesat tia wayuukot makalaka shijitüin piamasü nneerü kachueerachen neʼe. Nneetkat tia nnojotsü antapünaain sünain nükanain wanee wayuu eekai niʼyataain motsomüin.

⁹ ¿Kasache paashin alataka suluʼupünaa shikii tia wayuukot wanaa sümaa shijitüin tia nneetkat? Eesüjaʼa süpüla jülüjüin saaʼin palitchoin tü nneerü saapakat jooluʼu suulia tü saapapuʼukat kataiwaʼaya noʼu chi sainmeesekai. Eesüjaʼa süpüla japülin shia süka wainmain tü nneerü nasülajüinjatkat na waneeinnua. Eesüjaʼa süpüla jülüjüin saaʼin nnojoluin kasain anain apüla tü nneerü süsülajakat. Mayaapejeʼe eein süpüla jülüjüin saaʼin tia, süsülajüinya tü nneetchenkat nümüin Jeʼwaa.

10. ¿Jamüsü watüjaaka saaʼu kojutüin nümüin Jeʼwaa tü wayuu oukta aʼwayuusetkat?

¹⁰ Nüküjüin Jesuu kojutüin maʼin nümüin Jeʼwaa tü wayuu oukta aʼwayuusetkat otta kojutüin maʼin nümüin tü nneerü süsülajakat. Naashin Jesuu «alanaʼaleesia maʼi nümüin Maleiwa tü shijitakat [...] suulialeʼeya tü shijitakat tü wayuukolüirua». Mayaainjeʼe süpalirajaain tü sünneetsekat sümaa nanneetse na waneeinnua, nuʼwaajüin shia Jesuu saaʼu tü saainjakat. Neʼrapa na akotchojüliikana nneerü tü shijinalakat, nnojotsü antapünaain suluʼu nekii kojutüin maʼin tia nümüin Jeʼwaa. Shia alanaʼaleeka tü nümakat Jeʼwaa suulialeʼeya tü namakat na wayuukana otta suulia tü alatakat suluʼupünaa shikii tia wayuukot. ¿Eeshiiche süpüla sükaaliinjüin waya tia süpüla watüjaain saaʼu müleka waainjüle tü nüchekakat Kürisüto?

11. ¿Kasa shikirajaka anain waya sukuwaʼipa tü wayuu oukta aʼwayuusetkat?

¹¹ Watüjaa aaʼu eein tü kasa eekai müin saʼalijirakai waya suulia aʼyatawaa nümüin  Jeʼwaa. Eeshii wawalayuu nnojoliikana aküjüin maʼin pütchi süka laülaainnapain naya jee ayuulin naya. Müle pukuwaʼipa, ¿nnojoluinjatche püshajüin tü oora pülatirakat sünain aʼyatawaa nümüin Maleiwa? ¿Jama anale pia jee nnojoire laülaain pia, mojuinjatü paaʼin saaʼujee palitchoin tü oora piʼyataakalü oʼu nümüin Maleiwa? Eesü wanee kasa shikirajaka anain waya tü saainjakat tü wayuu oukta aʼwayuusetkat: kojutüsü maʼin nümüin Jeʼwaa tü waainjakat sünain aʼyatawaa nümüin, yaaʼaleekajaʼa walatirüle müliaa suʼunnaa tia. Jülüja paaʼin tü paainjakat soʼu juyaka tiainka sünain aʼyatawaa nümüin Maleiwa. ¿Aʼyataashiche maʼin pia süchiirua pülatirüin wanee oora sünain aküjaa pütchi? Mülejeʼeya shia, soto paaʼin kojutüin maʼin nümüin Jeʼwaa tia oora paainjakat. Waʼyataale maʼin nümüin Jeʼwaa süka süpüshuaʼa waaʼin maʼaka saainjüin shia tü wayuu oukta aʼwayuusetkat, shiimainjaʼaya waainjüin tü nüchekakat Kürisüto.

12-14. (1) ¿Jamüsü naaʼin Elías soʼu wanee kaʼi? (2) ¿Jamüsü mojuka maʼin naaʼin Elías?

¹² Elías, nia wanee nünüikimaajachi Jeʼwaa oonookai waneepia otta ichesü maʼin nunoula. Shiasaʼa müin soʼu wanee kaʼi, mojusü maʼin naaʼin makalaka nümüin nümüin Jeʼwaa: «¡Puʼuta mata taaʼin Jeʼwaa!» (1 Rey. 19:​4, NM). Nnojolüirüle shapaain maʼin paaʼin maʼaka naaʼin Elías, eeshi pümüle: «Nünüiki neʼe tia sooʼopünaa naaʼin» (Job 6:3). Nnojotpejeʼe nünüikin neʼe tia, mojusia naaʼin. Nnojoishi aashichijaain Jeʼwaa nooʼomüin Elías saaʼujee tü nümakat, nükaaliinjüin neʼe nia.

¹³ ¿Jamüsüche paashin mojuka naaʼin Elías? Süpülapünaa müinjachin nia, naainjüin wanee kasa pülasü eeʼiyataka namüin na wayuukana niain Jeʼwaa chi Maleiwa shiimainshikai. Süchikijee tia, nuʼuta aaʼinchii 450 wayuu nünüikimaajana Baal (1 Rey. 18:37-40). Niainjachiaa Jeʼwaa naʼwaajaka na israeliitakana naaʼinruʼu Elías. Nnojotpejeʼe alatüin tia. Suluwataaka sünüiki Jezabel nümüin sünain suʼutirüinjatüin naaʼin. Ayoʼujaasü naaʼin Elías sutuma, nuʼunaka wattamüin eemüin wanee anoouishii eere jaʼin maʼin kaʼi otta wainmain wüchii jashichi (1 Rey. 19:2-4).

¹⁴ Nümüiwaʼapa Elías chaa anoouishii, antüsü nikiiruʼumüin nnojoluin kasain anain apüla tü niʼyataainkat nümüin Jeʼwaa. Naashin niakai nnojoishi kasain anain apüla nia. Sutuma shiain nikiiruʼuin tia, mojutsai nia nümüin Jeʼwaa otta sümüin wayuu naashin.

15. ¿Kasa naainjaka Jeʼwaa süpüla niiʼiyatüin kojutüin maʼin Elías nümüin?

¹⁵ Naata maʼin tü jülüjakat naaʼin Jeʼwaa nüchiki Elías. Wayuu kojutüshi Elías nümüin Jeʼwaa otta nüchajaain sukuwaʼipa süpüla niiʼiyatüin kojutüin maʼin nia nümüin. Nuluwataain wanee aapiee süpüla nütütüleʼerüin naaʼin Elías. Wanaa sümaa nuʼunüin eemüin tü uuchikat Horeb, naapüinya nümüin niküin otta nüsüin suulia sajaʼttüin naaʼin wopuluʼu. Pienchi shikii kaʼi nia sünain waraittaa süpüla nüntüin chamüin. Wanaa sümaa süntüin nikiiruʼu Elías niain neʼe aʼwaajüin Jeʼwaa nümüiwaʼa, niiʼiyatüin Jeʼwaa nümüin eein waneeinnua israeliita aʼwaajaka nia. Jee müsia aluwataanüshi nia nutuma Jeʼwaa sünain aaʼinraa waneeirua kasa. Anasü maʼin nukuwaʼipa Elías nutuma Jeʼwaa otta nükatsüinrüin nunoula süpüla niʼyataainjachin nüchikuaʼa nümüin (1 Rey. 19:5-8, 15-19).

16. ¿Kasa nüchecheraka aka punoula Jeʼwaa?

¹⁶ Tü nukuwaʼipakat Elías sükaaliinjeechi pia süpüla pütüjaain saaʼu müleka paainjüle tü nüchekakat Kürisüto otta süpüla kojutüin pia pümüinjiraa. Jülüja paaʼin süpüshuaʼa tü kasa naainjakat Jeʼwaa püpüleerua. Wanaa sümaa mojuin paaʼin, eeshi nükaaliinjüichire pia wanee wawala, maʼaka naaʼin wanee laülaashi jee niale wanee wawala ichekai anoula (Gal. 6:2). Eesü süchecheraairüle punoula sutuma paashajeʼerüin tü  Wiwüliakat sümaa tü karaloukta weitajakat jee shiale sutuma puʼunüin sünain tü outkajawaakat. Sülatüle pümüin tia, paapa tü analuʼutkat nümüin Jeʼwaa süka niain kaapajalain shia pümüin (Sal 121:​1, 2).

17. ¿Kasa kojutüka akajee waya nümüin Jeʼwaa?

¹⁷ Nnojotsüle anain mojutüle pia pümüinjiraa. Shia jülüjüinjatka paaʼin tü nümakat Jeʼwaa püchiki (paashajeʼera Roma 14:4). Kojutüshii waya nümüin sükajee wanoujüin nünain otta woonooin nümaa waneepia, nnojotsü shiain sükajee tü kasa wasaʼwatakat sünain aʼyatawaa nümüin. Eesüjaʼa süpüla wainmairüin kasa paainjaka sünain aʼyatawaa nümüin Jeʼwaa maʼaka naainjüin Elías. Eeshii pükaaliinjüinnale kojuyashii wawalayuu suluʼu tü outkajaaleekat. Otta eeshii eekai naapüin süchiki nünüiki Maleiwa sükajee püküjüin pütchi namüin.

18. ¿Kasa niiʼiyataka Jeʼwaa naapüle wanee aʼyatawaa pümüin?

¹⁸ Naapüle pümüin Jeʼwaa wanee aʼyatawaa niiʼiyatüin pümüin eein nia pümaa (Jer. 20:11). Eesü sumojujaale paaʼin saaliijee nnojoluin kasain piʼrüin sünainjee piʼyataain nümüin Maleiwa jee shiale saaliijee iseerüin püchiki püsaʼwatüin wanee aʼyatawaa nümüin. Akatsaʼa sotuinjatüin paaʼin saapünüin pümüin wanee kasa anashaatasü maʼin: püküjüin pütchi otta piʼraajünüin süka nünülia Jeʼwaa. Nnojo puuʼulaain suulia anoujaa. Paainjüle tia, ekeraajeerü pünain tü nümakat Jesuu: «Anakaja müleka talatüle maʼi paaʼin wanaa tamaa» (Mat. 25:23).

19. ¿Jamüsü naaʼin chi ashajakai Salmo 102?

¹⁹ Chi wayuu ashajakai Salmo 102, shapaasü naaʼin otta mojusü maʼin naaʼin. Maʼlainsat naaʼin süpüla eejiraainjachin nia sümaa tü kasa mojusü alatakat nümüin. Shiiʼiyatüin wamüin tü nünüikikat müliain naaʼin otta mojuin maʼin naaʼin (Sal. 102:​3, 4, 6, 11). Naashin niakai, niyüülajüin nia Jeʼwaa (Sal. 102:10).

20. ¿Jamüsü aneetka paaʼin puʼuraajüle?

²⁰ Mayaainjeʼe sülatüin tia nümüin chi ashajakai Salmo 102, nnojoishi ooʼulaain suulia aʼwaajaa Jeʼwaa (paashajeʼera Salmo 102:19-21). Saashin Salmo 102, eesü süpüla shapaain naaʼin na wayuu aainjakana tü nüchekakat Kürisüto. Makalaka isain nachiki jülüjüin naaʼin waneeirua kasa. Naashin chi salmistakai, müshi maʼaka naaʼin wanee wüchii nümüiwaʼakai saaʼu saajuna piichi. Mojusü naaʼin waneepia (Sal. 102:7). Sülatüle pümüin tia, püküja nümüin Jeʼwaa süpüshuaʼa tü kasa mojukalü atuma paaʼin. Puʼuraajüle nümüin Jeʼwaa, aneerü paaʼin. Naashin Jeʼwaa, naapeerü nanüiki na wayuu asütünakana oulia tü kasa namaʼanakat. Nnojoleerü niyouktajüin tü nachuntakat (Sal. 102:17). ¿Punouja anainrü tü nümakat Jeʼwaa?

21. ¿Kasa paaʼinrajatka süpüla kojutüinjachin pia pümüinjiraa?

²¹ Tü nümakat chia ashajakai Salmo 102, sükaaliinjüin wanee wayuu süpüla kojutüinjachin nia nümüinjiraa. Shia jülüjaka naaʼin nukuwaʼipa nümaa Jeʼwaa (Sal. 102:​12, 27). Atütülaasü naaʼin sutuma nütüjaaitpain saaʼu nükaaliinjeerüin Jeʼwaa tü nupueulosekat suʼunnaa müliaa. Nnojoire maʼin piʼyataain nümüin Jeʼwaa sutuma jülüjüin paaʼin mojutüin pia pümüinjiraa, püküja nümüin tü suluʼukat paaʼin. Puchunta nümüin Jeʼwaa süpüla sütütülaainjatüin paaʼin otta süpüla shiʼraajünüinjatüin tü nünüliakat (Sal. 102:​20, 21).

22. ¿Kasa waaʼinrajatka süpüla talatüin naaʼin Jeʼwaa wamaa?

²² Wekirajaaitpa anain sükaaliinjüin waya tü Wiwüliakat süpüla watüjaain saaʼu müleka waainjüle tü nüchekakat Kürisüto otta süpüla kojutüin waya nümüin Jeʼwaa. Watüjaa aaʼu nnojoluin süpüla talatüin waaʼin waneepia. Shiasaʼa müin nnojoliire wooʼulaain suulia anoujaa nünain Jeʼwaa, talateerü naaʼin wamaa otta naapeerü wamüin tü kataakalü oʼuu waneepia (Mat. 24:13).