1. Matungiko musinke gokutunda kwaJehova aga naga tu hafesa?

JEHOVA kuna tu harere tu hafe, ntani age kutupowomwena matungiko aga aga tu hafesa. Yeeyi ose vanamwenyo. Ano ose kuvhura kuruganesa eparu lyetu mokuhamberera Karunga, morwa age kwa tu kokera koukareli wousili. (Epis. 144:15; Joh. 6:44) Jehova kutulikida eharo lyendi ntani nokutuvatera tu lididimikire mokumukarera. (Jer. 31:3; 2 Kol. 4:16) Ose kuhafera paradisa zopampepo, omu atu gwana nondya dononzi dopampepo ntani eharo lyosiumbya movanavazinyetu. Kugusa oyo, ose twa kara nehuguvaro lyewa lyokomeho.

2. Yisinke ava kondjo nayo vakareli vamwe vaKarunga wovalimburukwi?

² Nampili ngomu twa kara nonokonda edi doruhafo, vakareli vamwe vaKarunga wovalimburukwi kukondja nomalizuvho gomadona kuhamena nyamwawo. Awo kulizuvha asi awo kwato mulyo kwaJehova. Ava ava twikire kukara nomalizuvho gangesi, kwawo kuhafa ‘nomvhura dononzi’ ngwendi nzodi tupu. Kwawo eparu kumoneka ngwendi kuna kara momundema gomunene.—Muud. 11:8.

3. Yisinke ayi retesa po malizuvho gomadona?

³ Kovanavazinyetu vangoso, malizuvho gomadona kugaretera edompeso nouvera ndi ukurupe. (Epis. 71:9; Yis. 13:12; Muud.  7:7) Mokugwederera ko, nkenye Mukriste ga hepa kunongonona asi mutjima gwa vera ntani ago kuvhura kutudompesa nampili ngomu Karunga na hafera yirugana yetu. (Jer. 17:9; 1 Joh. 3:20) Muzonaguli kurundira vakareli vaKarunga. Ntani ava va kara nomagano gaSatana kuvhura va tu nyateke nomutaro gwaElifasa ogu ga uyungire asi ose kwato mulyo kwaKarunga. Oyo kwa kere yimpempa mosiruwo saJoba ano yina lifana nanaina.—Joba 4:18, 19.

4. Yisinke natu ka konakona mosirongwa esi?

⁴ Jehova kwa yi zeresa momatjangwa asi age nga kara nava vana ‘kugenda medamenena lyomundwire gonomfa.’ (Epis. 23:4) Nkedi zimwe a kara nose, kupitira moNonkango dendi. Bibeli kwa kara ‘nononkondo daKarunga, edi adi hanagura po nohotepopero dovantu,’ kukwatera mo magano gepuko nomalizuvho gomadona. (2 Kol. 10:4, 5) Ngesi tatu ka konakona omu natu ruganesa Bibeli zi tu vatere mokutunga mutaro gouhunga nokukwaterera komutaro ogo. Ove kuvhura o gwanene mo uwa, ntani o gwane nkedi omu no korangeda wopeke.

5. Yisinke nayi tu vatera tu kare nomutaro gouhunga?

⁵ Mupositoli Paurusa kwa faturura yininke yimwe eyi nayi tu vatera tu tunge po mutaro gouhunga. Age kwa korangedere mbungakriste zomoKolinte asi: “Likonakoneni nsene asi mepuro muna kara.” (2 Kol. 13:5) ‘Epuro’ kuna kara marongo goSikriste aga twa pura ga kara moBibeli. Nsene asi nonkango noyirugana yetu kuhorora eyi twa pura, ngoso kulikida asi “mepuro” tuna kara. Yimo, twa hepa hena kuhetakanesa mparukiso zetu nomarongo nagenye goSikriste. Kapi tatu vhuru kulimburukwa po tupu gamwe.—Jak. 2:10, 11.

6. Morwasinke natu likonakonena ‘nsene mepuro tuna kara’? (Tara efano pepenuno 12.)

⁶ Ove kuvhura o kare nowoma wokulikonakona, unene po nsene ono diva asi koyili yimwe o dili kusikisa mo. Nye mutaro gwaJehova mulyo unene kupitakana gwetu, ntani magazaro gendi kwa likara ure naga getu. (Jes. 55:8, 9) Age kukonakona vakareli vendi, kapisi mokuvapangura nye mokupapara mwetu yikara yoyiwa yipo a tu vatere. Nsene to ruganesa Nonkango daKarunga mokulikonakona ‘nsene asi mepuro ono kara,’ ove ngo limona nyamoge ngamoomu a ku mono Karunga. Nevatero lyoBibeli, eyi kuvhura yi ku vatere o guse po malizuvho gomadona gokuligazara asi ove kwato mulyo kwaKarunga: Ove mulyo kosipara saJehova. Yitundwamo kuvhura kukara ngwendi kuna zegurura ekehe yipo site si hwilire monzugo zomundema.

7. Ngapi natu gwanena mo uwa moyihonena yovantu wovalimburukwi va tumbura moBibeli?

⁷ Nkedi zongwa zokulikonakona nyamwetu kuna kara mokuteda ko koyihonena yovantu wovalimburukwi ava va tumbura moBibeli. Hetakanesa maudigu ndi malizuvho gawo kumwe naga goge, ntani neyi ngano wa rugene nsene asi nyove ya horokerere. Tu konakoneni yihonena yitatu eyi ya faturura omu no ruganesa Bibeli o dimburura asi ono kara “mepuro” nokutunga po mutaro gouhunga kwanyamoge.

8, 9. (a) Moukaro musinke ga kere mufisayendi gomuhepwe? (b) Malizuvho musinke gomadona nampo ga kere nago?

⁸ Pontembeli moJerusarema, Jesus kwa nomenene mufisayendi gomuhepwe. Sihonena sendi kuvhura kutuvatera tu kwaterere komutaro gouhunga nampili ngomu twa dira kuweka yoyinzi. (Resa Rukasa 21:1-4.) Tarurura ukaro womufisayendi: Age kapi ga lididimikilire tupu ruguwo rokuzumbanesa mugara ngwendi nye hena vapitisili  ava ngava pitisire momaukarelikarunga ngava ‘manene vafisavayawo emona lyawo’ mevango lyokuvavatera. (Ruk. 20:47) Age kwa kere noruhepo sili oru rwa mu ninkisire a gave tupu tumalivagona tuvali kontembeli, mfuto ezi ngava gwana monominute dongandi tupu.

⁹ Gazara tupu omu ga lizuvhire mufisayendi gwina gomuhepwe ngomu ga hwililire montembeli age ana simbi tumalivagona tuvali. Ga gazarere asi eyi na ka gava yinunu kupitakana eyi nga gava apa ga kere mugara gwendi age muzuni ndi? Ga lizuvhire nomuga mokumona yigava yoyinzi eyi va geve owo va kere komeho zendi nampo nokulipura asi yendi kapi ya kere mulyo ndi? Nampili nsene asi ga kere nomalizuvho gangoso, nye simpe ga geve eyi ga kere nayo mokukwatesa ko ukareli wousili.

10. Ngapi Jesus ga yi likidire asi mufisayendi ga kere nomulyo kosipara saKarunga?

¹⁰ Jesus kwa likidire asi mufisayendi noyigava yendi kwa kere nomulyo kwaJehova. Age kwa tente asi age ‘kwa tulire mo yoyinzi, a pitakane navenye.’ Yigava yendi kwa livhongere neyi va geve wopeke nye Jesus kwa pandadekere po yigava yomufisayendi. Wokuvarura yimaliwa apa va tu mwene tumaliwagona tuvali kapi va yi dimbwilire asi ato mulyo kwaJehova. Nye mutaro gwaKarunga yigo gwa kere gomulyo po kapisi govantu ndi omu ga litere mwene mufisayendi. Kuvhura o ruganese sihorokwa esi mokuheteka nsene mepuro ono kara ndi?

11. Yisinke no lirongera ko kosihorokwa somufisayendi?

¹¹ Ukaro woge kuvhura u kundame eyi no vhura kugava kwaJehova. Morwa ukurupe ndi uvera, vamwe kapi ava vhuru kuzuvhisa siruwo sosire. Kuvhura yi hungame kwawo mokudira kurapota novili dawo ndi? Nsene asi ove kwato eyi ayi ku limbike, kuvhura o lizuvhe asi novili edi o rapota nonsesu kupitakana edi vakareli vakweni ava rapota nkenye mvhura. Nye simpe tatu lirongere ko kosihorokwa somufisayendi gomuhepwe asi Jehova kutara eyi atu  mu ruganene asi mulyo, unene po nsene kuna kuyirugana momaukaro goudigu. Gazadara ko kuhamena ukareli woge kwaJehova nomvhura dina ka pita. Novili dimwe edi wa rugene kwa hepere elizambero ndi? Nsene yimo, kara nehuguvaro asi monovili odo wa mu ruganena ga di mwene asi mulyo. Ngwendi mufisayendi gomuhepwe, apa o rugana unene mosirugana saJehova, ngo kara nehuguvaro lyokupama asi ove “mepuro” ono kara.

12-14. (a) Ngapi malizuvho gomadona ga kundamene Eliya? (b) Morwasinke Eliya ga lizuvhilire ngoso?

¹² Muporofete Eliya kwa kere mulimburukwi kwaJehova nepuro lyokupama. Nye posiruwo simwe ga dompere unene mutjima nokupura Jehova a mu dipage pokutanta asi: “HOMPA, yina pitakanene nye. Gusa nge mwenyo gwange.” (1 Vah. 19:4) Ava va dira kuligwanekera noukaro wangoso, kuvhura va tare ekanderero lyaEliya ‘ngononkango dononkukutu.’ (Joba 6:3) Nye malizuvho gendi kwa kere gokukora. Koneka hena asi mevango lyokuhandukira Eliya, Jehova kwa mu vaterere.

¹³ Yisinke ya mu ninkisire Eliya a ya kare nomalizuvho gangoso? Komeho zoyo, age kwa tulisire po etokoro lyokulikida asi Jehova yige Karunga gosili, eyi ya twaredesere kedipago lyovaporofete vaBara 450. (1 Vah. 18:37-40) Eliya nampo kwa kere nehuguvaro asi vantu vaKarunga ngava tengwira koukareli wousili, nye eyi kapi ya horokere. Hompa gomukadi Jesebeli kwa tumine mbudi kwaEliya asi age kwa tulire po mawapaiko gokumudipaga. Mokuparura mwenyo gwendi, Eliya kwa dukilire koJuda momburundu.—1 Vah. 19:2-4.

¹⁴ Ano apa ga ka kere gelike, makura ta gazadara kuhamena sirugana sendi souporofete ngwendi asi kwato mulyo. Yipo ga tanterere Jehova asi: “Name kufa tupu nye.” Age kwa lizuvhire asi age kwato mulyo ngwendi mbundu noyisupa yozinyakurwendi ava va fa nare. Age kwa lihetekere mwene kuliza nomutaro gwendi nokugazara asi age kwato mulyo kwaJehova ndi kovantu.

15. Ngapi Karunga ga huguvaresere Eliya asi age mulyo kwendi?

¹⁵ Nye Jehova kwa mu tere monkedi zapeke. Age kwa mu tere asi mulyo kosipara sendi, ntani ga mu hengagwidire. Karunga kwa tumine muengeli a ya nkondopeke Eliya. Jehova kwa pere Eliya nondya nomema eyi ya mu pere nonkondo dokugenda mazuva 40 a ze kondundu zaSinayi. Ntani hena, Jehova Karunga kwa vyukisire Eliya kegano lyendi lyepuko eli asi mwato gumwe moVaisraeli ogu ga kere mulimburukwi posiruwo sina. Konyima zoyo, makura Karunga ta pe Eliya sirugana sosipe esi ga tambwire. Eliya kwa gwanenene mo uwa mevatero lyaJehova ntani nokutengura kosirugana sendi ngomuporofete nouradi.—1 Vah. 19:5-8, 15-19.

16. Mononkedi musinke dimwe Karunga ga ku pa evatero?

¹⁶ Sihorokwa saEliya kuvhura si ku vatere o dimburure nsene mepuro ono kara ntani si ku tumangede o kare nomutaro gouhunga. Pomuhowo, gazadara ko kononkedi omu Jehova ga ku vatera. Nampo ga ku vatera kupitira mwagumwe govakareli vendi ava va kura pampepo apa wa hepere yuma. (Gar. 6:2) Ove wa gwana rumwe evatero lyokutunda moBibeli ndi moyimbapiratjangwa yetu ntani mombungakriste ndi? Apa ngo gwanena mo uwa mononkedi dangesi, diworoka Ntudiliro zevatero eli ntani mu pandura kupitira mekanderero.—Epis. 121:1, 2.

17. Yisinke a tara Jehova asi mulyo movakareli vendi?

¹⁷ Ntani, dimburura asi kukara nomutaro  gomudona kuhamena nyamoge kuvhura kukupukisa. Omu a tu tara Karunga yiso somulyo po. (Resa Varoma 14:4.) Jehova kutara ukareli noulimburukwi wetu kwendi asi mulyo, kapi a tu konakona kuliza neyi atu sikisa mo. Ano ngamoomu ya horokerere Eliya, nove kuvhura yi kare asi wa sikisa mo yoyinzi mokukarera Jehova kupitakana omu o yi gazara. Nampo moveli vamwe mombungakriste wa gwanena mo uwa moukareli woge, ntani hena vamwe momukunda va gwana mpito zokudiva usili morwa ezuvhiso lyoge.

18. Yisinke asi likida situmbukira soge sokutunda kwaJehova?

¹⁸ Ntani hena, tara nkenye situmbukira sokutunda kwaJehova ngosidiviso koge asi nove ga kara. (Jer. 20:11) Ngwendi Eliya, kuvhura yi ku dompese morwa ukareli woge kumoneka ngwendi asi kwato mulyo ndi morwa udigu kusika koyitambo yimwe yopampepo. Nye simpe ove kuna kulihameka mo mositumbukira sosinene esi twa kara naso natuvenye, sokuzuvhisa mbudi zongwa nokudivisa edina lyaKarunga. Kara ngorooro mulimburukwi. Makura nonkango domosifanekeso simwe saJesus ngadi sikilira mo moge: “Wiza o ya yigare kumwe name.”—Mat. 25:23.

19. Ukaro musinke ga ligwanekerere nawo mutjangi gEpisarome 102?

¹⁹ Mutjangi gEpisarome 102 kwa kere moudigu. Age kwa hepere parutu ndi pamalizuvho, ntani kapi ga kere nononkodo dokukohonona po maudigu gendi. (Epis. 102) Mononkango dendi ose kugwana mo asi age kwa zuvhire unene kukora, mukuma ntani kwa kere nomalizuvho gomadona. (Epis. 102:3, 4, 6, 11) Age kwa gazarere asi Jehova kuna hara kumuzumba.—Epis. 102:10.

20. Ngapi ekanderero nali vatera muntu ogu ana kara nomagazaro gomadona?

²⁰ Nye muepisarome simpe ga ruganesere eparu lyendi mokuhamberera Jehova. (Resa Episarome 102:19-21.) Ngomu tuna yi mono mEpisarome 102, nampili ava va kara nepuro kuvhura kuzuvha kukora nokudira kuvhura kugazara nayopeke. Muepisarome kwa lizuvhire ngwendi “sidira soulike komutwe gonzugo.” (Epis. 102:7) Nsene o lizuvha ngoso, kanderera kwaJehova ngomu ga yi rugene muepisarome. Makanderero kuvhura ga ku vatere o funde po magazaro gomadona. Jehova ga tumbwidira asi “nga zuvha vantu vendi ava ga zumba, ta purakene makanderero gawo.” (Epis. 102:17) Huguvara etumbwidiro olyo.

21. Ngapi ogu ana kukondja nomalizuvho gomadona na kara nomutaro gouhunga?

²¹ Episarome 102 kulikida hena omu no kara ngorooro nomutaro gouhunga. Muepisarome kwa yi rugene oyo pokudemenena kelikwatakano lyendi naJehova. (Epis. 102:12, 27) Age kwa gwene ehengagwido pokudiva asi Jehova nkenye apa kupakera mbili vantu vendi momaudigu. Nsene asi malizuvho gomadona kuna kukuninkisa o dire kurugana unene mosirugana saKarunga, ga tumbura mekanderero lyoge. Pura Karunga a zuvhe ekanderero lyoge kapisi mokugwana tupu ehengagwido komaudigu goge nye hena yipo ‘edina lyaHOMPA va li udise.’—Epis. 102:20, 21.

22. Ngapi omu nkenye gumwe gwetu na hafesa Jehova?

²² Yimo, kuvhura tu ruganese Bibeli mokulikonakona nsene mepuro tuna kara ntani nsene Jehova kututara asi mulyo. Yosili, mouzuni ou kuvhura tu dire kufundilira po malizuvho gomadona ndi edompo mutjima. Nye nkenye gumwe gwetu kuvhura kuhafesa Jehova nokugwana evatero pokulididimikira noulimburukwi mosirugana sendi.—Mat. 24:13.