1. Vyuma muka atuhana Yehova vize navitukafwa tupwenga vakuwahilila?

YEHOVA asaka tupwenga vakuwahilila kaha eji kutuhananga vyuma vyavivulu vize vyeji kutulingisanga tupwenga vakuwahilila. Chuma chimwe atuhana shina kuyoya. Ngocho tunahase kuzachisa kuyoya chetu mangana twalise Kalunga mwomwo atuneha mukulemesa chamuchano. (Samu 144:15; Yowa. 6:44) Yehova atufwelelesa ngwenyi mwatuzanganga nakutukafwa tumike muukalu omu tuli nakumuzachila. (Yele. 31:3; Koli. 2, 4:16) Tweji kulivwisanga kuwaha palachise yakushipilitu muze mwatwama kulya chachivulu chakushipilitu navandumbwetu vaze vatuzanga. Kaha nawa tuli nakutalilila vyuma vyamwaza kulutwe.

2. Vangamba jaKalunga vamwe veji kulipikanga naukalu muka?

² Numba tuhu tuli navyuma kanevi vyatela kutulingisa tupwenga vakuwahilila, oloze vangamba jaKalunga vamwe vakushishika vapwa vakuhomba mwomwo yakulivwa nge vamokomoko. Veji kushinganyekanga ngwavo vapwa vamokomoko kuli Yehova kaha namilimo veji kumuzachilanga kayapwa yayilemu kuli ikiyeko. Vaze vakwechi vishinganyeka kanevi vyavipi kavashinganyeka ngwavo vanahase kukalivwisa kuwaha ‘myaka yayivuluko.’ Kuyoya chavo chinahase kupwa nge makumbi amilima.—Kwambu. 11:8.

3. Vyuma muka vinahase kutulingisa tupwenga navishinganyeka vyakuhenga?

 ³ Vandumbwetu kana ava vanahase kupwa navishinganyeka vyavipi nge vanavevwisa kupihya, vanaviji, chipwe vanashinakaja. (Samu 71:9; Vishi. 13:12; Kwambu. 7:7) Kaha nawa vaka-Kulishitu vosena vatwama namuchima uze uka-kutangisa, kaha unahase kuvahana milonga numba tuhu Yehova ali nakuvevwila kuwaha. (Yele. 17:9; Yowa. 1, 3:20) Kaha nawa Liyavolo eji kuvangijikilanga vatu jaKalunga. Kaha vaze veji kupwanga navishinganyeka vyaSatana vanahase kutulingisa tupwenga navishinganyeka vyakulimona kupwa vamokomoko kuli Kalunga ngana muze ahanjikile Elifwaze wakuhona kushishika. Vishinganyeka kana vyapwa vyamakuli.—Yopa 4:18, 19.

4. Vyuma muka natushimutwila muchihande chino?

⁴ Yehova atulweza muVisoneka ngwenyi mwapwanga navosena vaze vali nakutambuka “muchinema chamuvwimbimbi wakufwa.” (Samu 23:4) Jila yimwe yize eji kupwilangamo nayetu shina kuhichila muMazu enyi. Mbimbiliya yikwechi ‘ngolo jakuli Kalunga jakukatumwisa vyuma vize vyazama chikuma,’ kuhakilako navishinganyeka vyakuhenga. (Koli. 2, 10:4, 5) Tushimutwilenu jino omu tunahase kuzachisa Mbimbiliya mangana yitukafwe tupwenga vakuwahilila hakuzachila Yehova. Munahase kunganyala kuvyuma natulinangula nakuwana jijila jize munahase kukolezezelamo vakwenu.

5. Chuma muka nachitukafwa mangana tupwenga vakuwahilila?

⁵ Kaposetolo Paulu alumbunwine vyuma vimwe vize navitukafwa tupwenga vakuwahilila. Akolezezele chikungulwilo chamuKolinde ngwenyi: “Lyesekenunga enu vavene mumone numba nge muli mulufwelelo.” (Koli. 2, 13:5) “Lufwelelo” lwapwa kunangula chavaka-Kulishitu chize chatwama muMbimbiliya. Nge mazu navilinga vyetu navilitombola navyuma vize vanangula muMbimbiliya, kaha tunapu vakutamo kaha natusolola nge tuli “mulufwelelo.” Kaha nawa twatela kupezalisa twamiso yetu nakunangula chavaka-Kulishitu chize chatwama muMbimbiliya. Katwatela kukavangizanga jishimbi jimwe nakukana jishimbi jikwavoko.—Yako. 2:10, 11.

6. Mwomwo ika twatela kulyeseka etu vavene ‘tumone nge tuli mulufwelelo’? (Talenu muvwimbimbi wakulivanga.)

⁶ Munahase kukana kulyeseka enu vavene chikumanyi nge munamono ngwenu kamweshi kutesamoko. Oloze jila atumwenamo Yehova yalihandununa omu tweji kulimwenangamo etu vavene, kaha nawa vishinganyeka vyenyi vyahambakana vishinganyeka vyetu. (Isa. 55:8, 9) Yehova eji kukekesanga vaka-kumulemesa mangana awane vilinga vyavo vyamwaza nakuvakafwa, keshi kuvakekesa mangana avawanyine milongako. Omu namuzachisa Mazu aKalunga mulyeseke enu vavene “mumone numba nge muli mulufwelelo,” kaha namulimona ngana muze Kalunga amimona. Echi nachimikafwa mupwenga navishinganyeka vyamwaza vyakulimona kupwa muvavalemu kuli Kalunga ngana muze yamifwelelesa Mbimbiliya ngwayo: Muvavalemu kumeso aYehova. Vyuma vinahase kufumaho tunahase kuvyesekesa kukusokolola jinjanena mangana kumunyika chamusana chingile muzuvo muze muli milima.

7. Tunahase kunganyala ngachilihi kuvyakutalilaho vyamuMbimbiliya vyavatu vaze vapwile nalufwelelo?

⁷ Jila yamwaza yakulyesekelamo etu vavene shina kushinganyeka hachakutalilaho chavatu valufwelelo vaze vavuluka muMbimbiliya. Esekesenu ukalu chipwe vishinganyeka vyavo nevi vyenu nakumona omu munahase kulinga ngana muze valingile vakivo. Tutalenu jino havyakutalilaho vitatu vize vyasolola omu munahase kuzachisa Mbimbiliya mumone nge “muli mulufwelelo” nakumikafwa mupwenga vakuwahilila.

8, 9. (a) Ukalu muka amwene uze tuliwe muka-kukalikiza? (b) Vishinganyeka muka vyakuhenga vize pamo apwile navyo?

⁸ Omu Yesu apwile mutembele muYelusalema,  amwene tuliwe muka-kukalikiza. Chakutalilaho chenyi nachitukafwa tupwenga vakuwahilila chamokomoko naukalu wetu. (Tangenu Luka 21:1-4.) Achitalenu haukalu apwile nawo. Ou tuliwe alipikile naukalu wakufwisa lunga lyenyi kaha nawa vatwamina vamukwitava ‘valilenga vikumba vyavatuliwe vamapwevo’ muchishishisa chakuvakafwa. (Luka 20:47) Ou tuliwe apwile wakuhutwa chikuma, kahechi chamulingishile ahane jimbongo jajindende chikuma mutembele. Jimbongo kana jikiko vawanyinenga vaka-kuzata muminyutu yayindende kaha.

⁹ Achishinganyekenu omu evwilenga uze tuliwe hakwingila mutembele natujimbongo twajichele tuvali. Uno ashinganyekele hakukeha chajimbongo ahanyinenga nakujesekesa kujize ahanyinenga shimbu apwile lunga lyenyi wamutonyi tahi? Kutala evwilenga sonyi hakumona vatu vapwile kulutwe lwenyi navahana jimbongo jajivulu kuhambakana ikiye nakushinganyeka nge wana wenyi wapwile wamokomoko tahi? Numba tuhu apwile navishinganyeka kana, oloze atwalilileho lika kulinga kweseka noho hakumina ngolo jenyi mangana akundwize kulemesa chamuchano.

10. Mujila muka Yesu asolwele nge uze tuliwe apwile wamulemu kuli Kalunga?

¹⁰ Yesu asolwele ngwenyi Yehova amwene uze tuliwe kupwa wamulemu hohamwe najimbongo jize ahanyine. Ambile ngwenyi uze tuliwe ahanyine jimbongo ‘jajivulu kuhambakana vaka-luheto vosena.’ Wana wenyi vaufutwile nawana vahanyine vakwavo, oloze Yesu alishile kaha ikiye hakulisuula chenyi. Vaka-kulama jimbongo omu vamwene jize jimbongo jachichele jivali kavatachikijile ngwavo jize jimbongo jajilemu kuli Yehova hohamwe nauze ajihanyineko. Chipwe ngocho, jila yize Kalunga amwenenenemo uze wana yikiko yapwile yayilemu, keshi nge muze vaumwene vatu veka chipwe muze apwile nakushinganyeka yiveneko. Kutala munahase kuzachisa mujimbu kanou nakulyeseka mumone numba nge muli mulufwelelo tahi?

11. Vyuma muka natulinangula kumujimbu watuliwe?

¹¹ Ukalu muli nawo pamo unahase kumilingisa muhone kuzachila kanawa Yehova. Ushinakaji,  kuviza chipwe utonji vinahase kulingisa vamwe vazate lwola lwalundende mumulimo wakwambulula mujimbu wamwaza. Kutala vatela kushinganyeka ngwavo lwola vanazate lwalundende kaha kavatela kutuma lipoti lyavo lyamuwandeko tahi? Navatu vamwe vaze kaveshi naukalu kanako vanahase kushinganyeka ngwavo jola javo jajindende chikuma hakujesekesa kujize vali nakuzatanga vangamba jaKalunga mwaka himwaka. Chipwe ngocho, mujimbu watuliwe muka-kukalikiza watunangula nge Yehova eji kumonanga milimo tweji kumuzachilanga mutu himutu chikumanyi nge tuli nakumona ukalu. Achishinganyekenu hamilimo mwazachilanga Yehova mwakawali. Kutala jola jize mwahananga kuli Yehova mwajizachile halwola mwapwile muukalu umwe tahi? Nge muli nakuzachila Yehova nangolo jenu josena ngana muze alingile tuliwe muka-kukalikiza, kaha fwelelenu ngwenu “muli mulufwelelo.”

12-14. (a) Vishinganyeka vyakuhenga muka apwile navyo Elija? (b) Vyuma muka vyalingishile Elija ashinganyeke mujila yakuhenga?

¹² Kapolofweto Elija apwile wakulyononona kuli Yehova kaha nawa apwile nalufwelelo lwakukola. Oloze lwola lumwe evwile nge apwile wamokomoko nakushinganyeka ngwenyi Yehova amujihe hakwamba ngwenyi: “Ove Yehova, kunahu jino, tambula mwono wami.” (Vamya. 1, 19:4) Vatu vaze kanda vamone ukalu kanou vanahase kwamba ngwavo kulomba chaElija chapwile kaha ‘chakulusuka.’ (Yopa 6:3) Oloze chikupu vene apwile muukalu. Nyingililenu ngwenu Yehova amukafwile muchishishisa chakumutenukila mwomwo yakusaka kufwa.

¹³ Uno vyuma muka vyalingishile Elija ahanjike mazu kana? Shimbu kanda ahanjike mazu kana, Elija atetekelele mulimo umwe muIsalele uze wasolwele nge Yehova apwile Kalunga wamuchano, kahechi chalingishile vanongese tupolofweto vaMbale vakuheta ku 450. (Vamya. 1, 18:37-40) Elija afwelelele ngwenyi vatu jaKalunga navakinduluka kukulemesa chamuchano, oloze kachalingiwileko. Lisano Yezevele atumine mujimbu kuli Elija ngwenyi ali nakusaka kumujiha. Elija evwile woma, ngocho achinyinyine mupambo kuYuta.—Vamya. 1, 19:2-4.

¹⁴ Omu apwile ukawenyi mupambo, Elija ashinganyekele hamulimo wenyi waupolofweto nakuumona kupwa wamokomoko. Ngocho alwezele Yehova ngwenyi: “Kangwawaha kuhambakana vakakuluka jamiko.” Elija apwile nakulumbununa nge apwile wamokomoko kwijiva nge lukungu navifuwa vyavaka-kuluka jenyi vaze vafwa. Alyesekele ivene nakumona nge apwile wakukuminamo kaha nawa kapwile wamulemu kuli Yehova chipwe kuli vatuko.

15. Kalunga afwelelesele ngachilihi Elija ngwenyi amumwene kupwa wamulemu?

¹⁵ Oloze Kalunga amwene Elija mujila yeka. Yehova amwenenga Elija kupwa wamulemu, kaha alingile vyuma vize vyasolwele nge amumwene kupwa wamulemu. Kalunga atumine kangelo mangana akolezeze Elija. Yehova amuhanyine nawa kulya nameya vize vyamuhanyine ngolo haungeji wenyi uze wambachile makumbi 40 hakuya kusulo yaPili Holeve. Kaha nawa Kalunga olwele vishinganyeka vyaElija vyakuhenga vyakwamba ngwenyi, kakwapwile kaIsalele uze apwile wakushishika kuli Yehovako. Kalunga ahanyine Elija milimo yeka, kaha etavilile. Elija anganyalile omu vamukafwile kuli Yehova, kaha aputukile cheka kuzata natwima mulimo wenyi waupolofweto.—Vamya. 1, 19:5-8, 15-19.

16. Jijila muka jize Kalunga namikafwilamo?

¹⁶ Mujimbu waElija unahase kumikafwa mumone nge muli mulufwelelo nakumilingisa mupwenga lika vakuwahilila. Chatete, shinganyekenu jila yize Yehova namikafwilamo. Kutala lwola lumwe ngamba yaYehova wakufwana nge mukulwane muchikungulwilo chipwe ndumbwetu wakuhya kushipilitu amikafwile halwola mwapwile muukalu tahi? (Ngale. 6:2) Kutala vamijikijisaho lyehi kushipilitu hakutanga Mbimbiliya, namikanda yetu, nakukukunguluka tahi? Halwola lukwavo namukanganyala mujijila kaneji, kaha mwatela kukanuka Kalunga uze namikafwe  mujila kana nakumusakwilila kuhichila mukulomba.—Samu 121:1, 2.

17. Vyuma muka amona Yehova muli vangamba jenyi kupwa vyavilemu?

¹⁷ Chamuchivali mwatela kutachikiza ngwenu vishinganyeka vyavipi vinahase kumihungumwisa. Jila eji kutumwenangamo Kalunga yikiko yayilemu. (Tangenu Wavaka-Loma 14:4.) Yehova amona kulisuula chetu nakushishika kuli ikiye kupwa chachilemu. Keshi kututalila kumilimo tweji kuzatangako. Ngana muze chapwile kuli Elija pamo munazachila Yehova milimo yayivulu chakuzeneka enu kuchitachikiza. Kuli vamwe muchikungulwilo vaze pamo munakafwe chakuzeneka enu kuchitachikiza. Kaha nawa vatu vamungalila yenu pamo vanalinangula muchano mwomwo yakwambulula chenu natwima.

18. Uno milimo amihana Yehova yasolola ika?

¹⁸ Chamakumishilo, monenu kala milimo mwamihana Yehova kupwa hichinjikizo chakusolola nge ali hamwe nayenu. (Yele. 20:11) Ngana mwaElija, nayenu pamo munahase kuhomba nge milimo muli nakuzachila Yehova kayeshi nakuneha mihakoko chipwe kamwateselemo vyuma vyakushipilitu mwalitomena kulingako. Oloze munahase kwazana mukuzata mulimo waunene wakwambulula mujimbu wamwaza nakuvilika lijina lyaKalunga. Twalenuho lika kupwa vakushishika. Nge namulinga ngocho, kaha mazu aze ahanjikile Yesu muchishimo chenyi nawatalisa kuli enu akwamba ngwavo: “Ingila jino mukuwahilila chakaka yove.”—Mateu 25:23.

19. Ukalu muka amwene muka-kusoneka Samu 102?

¹⁹ Muka-kusoneka Samu 102 apwile muukalu. Amwene “malwa,” hakuyanda kumujimba namuvishinganyeka. Kaha nawa ‘azeyele,’ nakuhona ngolo jakuhonesa ukalu wenyi. (Samu 102, Mazu akujimbula vanasoneka muvipango ahelu) Mazu enyi asolola nge apwile nakushinganyeka kaha haukalu wenyi, nauli apwile nakwivwa naukalu weka. (Samu 102:3, 4, 6, 11) Ashinganyekele ngwenyi Yehova asakile kumumbila.—Samu 102:10.

20. Kulomba chinahase kukafwa ngachilihi mutu uze ali nakulipika navishinganyeka vyavipi?

²⁰ Chipwe ngocho, muka-kwimba jisamu atwalileho lika kwalisa Yehova mukuyoya chenyi. (Tangenu Samu 102:19-21.) Nganomu tunamono hamukanda waSamu 102, navaze vali mulufwelelo veji kupwanga muukalu kaha veji kuzatanga nangolo numba vahone kushinganyeka vyuma vyeka. Muka-kwimba jisamu evwile nge “kajila ou ali uka wenyi hamulungu wazuvo,” kwijiva nge vamujingilikile kuukalu. (Samu 102:7) Nge omu mukiko mweji kwivwanga nayenu, kaha lombenu kuli Yehova amikafwe ngana muze alingile muka-kwimba jisamu. Kulomba chayou ali nakumona malwa, chipwe ngwetu kulomba chenu chinahase kumikafwa muhonese vishinganyeka vyavipi. Yehova afwelelesa ngwenyi, “natale lyehi meso enyi kukulomba chavaka-kusuvala, kalumbilishile kulomba chavoko.” (Samu 102:17) Ngachize, fwelelenu mazu kana awa atushika.

21. Uno mutu uze ali nakulipika navishinganyeka vyakuhenga nahase kupwa ngachilihi wakuwahilila?

²¹ Samu 102 yasolola nawa omu tunahase kupwa vakuwahilila. Muka-kwimba jisamu apwile cheka wakuwahilila hakushinganyeka hausepa wenyi naYehova. (Samu 102:12, 27) Vamuvendejekele hakutachikiza ngwenyi Yehova mwakafwanga lika vatu jenyi nge vali muukalu. Ngachize, nge ukalu naumihonesa kuzachila Kalunga kweseka nomu muli nakusaka, kaha lombenu kuli ikiye haukalu kana. Lombenu kuli Kalunga evwilile kukulomba chenu mangana mwivwenga hwo kumuchima nakuvilika ‘lijina lyaYehova.’—Samu 102:20, 21.

22. Tuvosena tunahase kwivwisa ngachilihi Yehova kuwaha?

²² Chikupu vene tunahase kuzashisa Mbimbiliya mangana tumone nge tuli mulufwelelo kaha nawa twapwa vavalemu kuli Yehova. Mukaye kano kakapi katweshi kuhasa kuhonesa vishinganyeka vyosena vyavipi chipwe kuhombako. Chipwe ngocho, tuvosena tunahase kwivwisa Yehova kuwaha nakuyovoka nge natutwalaho lika kumika nakumuzachila.—Mateu 24:13.