1. Jehova hnên aṭanga eng malsâwmnate’n nge hlim tûra min ṭanpui thei?

JEHOVA chuan hlim tûrin min duh a, hlimna thlentu malsâwmna tam takin min vûr a ni. Pakhatah chuan, nung damin kan awm a. Biakna dik lama min hîp avângin, kan nun chu Pathian chawimawi nân kan hmang thei a ni. (Sâm 144:15; Joh. 6:44) Jehova chuan a hmangaihna min tiam a, a rawng kan bâwlnaah chhel taka tuar chhuak tûrin min ṭanpui bawk. (Jer. 31:3; 2 Kor. 4:16) Thlarau lam chaw hnianghnâr tak leh inunauna duhawm tak kan hmuh theihna thlarau lam paradise chu kan chên a. Chu bâkah, nakin hun beisei tûr hlu tak kan nei bawk a ni.

2. Pathian chhiahhlawh ṭhenkhat chu engin nge la tibuai reng?

² Hêng hlim chhan tûrte hi an nei chung pawhin, Pathian chhiahhlawh ṭhenkhat chu a thim zâwnga mahni inthlîrna chuan a la tibuai reng a ni. Anmahni leh Jehova rawng an bâwlna chuan hlutna a nei mang meuh lo niin an ngai thei a. A thim zâwnga thil thlîr rengtute tân chuan hlim taka “kum tam tak” hman chu suangtuahna ang mai a ni thei a. Nunna chu thimna nî inzawm zatte ang mai a ni thei a ni.—Thur. 11:8.

3. Engin nge a thim zâwnga thil thlîrna awmtîr thei?

³ Chûng unaute chu lunghnualna te, natna te, a nih loh leh tarnate  chuan a thim zâwngin thil a thlîrtîr mai thei a. (Sâm 71:9; Thuf. 13:12; Thur. 7:7) Chu bâkah, Kristiante chuan thinlung chu bum hmang ber a ni tih leh Pathianin min lâwm thei chung pawhin chu thinlung chuan thiam loh min chantîr thei tih dikzia chu an tawng ṭheuh ngei ang. (Jer. 17:9; 1 Joh. 3:19, 20) Diabola chuan Pathian chhiahhlawhte chu dik lo takin a puh a. Setana ngaihtuahna ang neitute chuan rinna nei lo Elifaza sawi chhuah—Pathian tân kan hlu lo, tih thlîr dân chu min neihtîr an tum mai thei. Chu chu Joba hun lai aṭanga tûn thlenga awm dâwt thu a ni.—Job. 4:18, 19.

4. He thuziakah hian eng nge kan zir ang?

⁴ Jehova chuan ‘thihna hlim kawr ruam zawhtute’ chu a awmpui dâwn tih Bible-ah chiang takin a sawi a. (Sâm 23:4) Keimahni min awmpui dân kawng khat chu a Thu hmangin a ni. Bible chu ngaih dân dik lote leh a thim zâwnga thil thlîr dân pawh tiamin ‘kulhpui nghet takte ṭhiahna tûra Pathian zâra thil ti thei tak a ni.’ (2 Kor. 10:4, 5) A nih chuan, a êng zâwnga thil thlîr dân nei chho tûr leh nei reng tûra Bible kan hman theih dân i lo en ang u. Chuta ṭang chuan a mi mal taka hlâwkna leh mi dangte fuih dân i hre thei a ni.

5. Eng ang infiahnain nge a êng zâwnga thil thlîr tûra min ṭanpui thei ang?

⁵ Tirhkoh Paula chuan a êng zâwnga thil thlîr dân nei chho tûra min ṭanpui thei thil ṭhenkhat a sawi a. Korinth khuaa kohhran chu: “Rinnaah chuan in awm emaw, . . . nangmahni ngei in fiah ṭhîn rawh u,” tiin a fuih a ni. (2 Kor. 13:5) ‘Rinna’ chu Bible-a târ lan Kristian thurin pumhlûm hi a ni a. Kan ṭawngkam leh thiltihin chûng thurinte a mil chuan, fiahna chu kan pal tlangin, “rinnaah” kan awm tih kan lantîr a ni. Kan nun chu Kristian zirtîrna pumhlûm nên kan khaikhin bawk tûr a ni a. Zâwm tûra kan duh lai chauh kan thlang thei lo a ni.—Jak. 2:10, 11.

6. Engtin nge ‘rinnaah kan awm’ leh awm loh kan infiah ang? (A thupui bula milem en rawh.)

⁶ Hlawhchham mai tûr anga i inngaih hunah chutianga mahni infiah chu i hreh zual thei a. Mahse, Jehova min thlîr dân chu mahni kan inthlîr dân aiin a pawimawh zâwk a, a ngaihtuahna pawh kan ngaihtuahna aiin a sâng zâwk bawk a ni. (Is. 55:8, 9) Amah chibaibûktute chu thiam loh chantîr tûr ni lovin, an mize ṭhate hmu tûr leh anmahni ṭanpui tûrin a endik ṭhîn a ni. ‘Rinnaah i awm’ leh awm loh infiah tûra Pathian Thu i hman hunah Pathianin a hmuh ang chein, mahni i inhmu lehzual ang. Chu chuan Pathian tân i hlu lo anga inngaihna engpawh chu Bible ṭanchhan thutiam: Jehova mitah i hlu, tih nêna thlâk thleng tûrin a ṭanpui thei che a. A rah chhuah chu pindan thim taka ni êng luhtîr tûra puanzâr hawn ang a ni thei a ni.

7. Engtin nge rinawmna chungchânga entawn tûr Bible-a târ lante chu kan hlâwkpui theih?

⁷ Mahni inbih chian theih dân kawng ṭha tak pakhat chu Bible-a târ lan mi rinawmte entawn tûr siam ngun taka ngaihtuah a ni a. An dinhmun leh an rilru veizâwngte chu i dinhmun leh rilru veizâwngte nên khaikhin la, an dinhmuna i chhân lêt dân tûr chu enchhin rawh. ‘Rinnaah’ i awm tih nemnghet a, a êng zâwnga mahni inthlîr dân nei chho tûra Bible i hman theih dân târ langtu entîrna pathum i lo en ang u.

8, 9. (a) Hmeithai rethei dinhmun chu eng nge ni? (b) Engtin nge a thim zâwngin thil a thlîr mai theih?

⁸ Jerusalema biak inah Isua chuan hmeithai rethei tak chu a lo thlîr reng a. Chu hmeithai entawn tûr siam chuan theih chin kan nei chung pawha a êng zâwnga thil thlîr reng tûrin min ṭanpui thei a ni. (Luka 21:1-4 chhiar rawh.) Hmeithai dinhmun kha han  ngaihtuah teh. A pasal a sûnna chauh ni lovin, ṭanpui ahnêka ‘hmeithaite sum eitu,’ sakhaw hruaitute lakah pawh hrehawm a tawrh a ngai a ni. (Lk. 20:47) A retheih êm avângin, hnathawktute’n minute rei lotê chhûnga a hlawh theih zât chauh chu biak inah a thawh thei bawk.

⁹ Tangka dere pahnih chauh kenga biak in hungchhûng kawt laia a kal laia chu hmeithai rilru tûr chu han mitthla teh. A pasal dam laia a thawh theih tûr zât nêna khaikhinin a thawh tlêm dân chu a ngaihtuah ang em? A thil thawh tûr chu thawhtlâk a nih tak zet leh zet loh ngaihtuahin, a hmaa mite thawh tamzia a hmuhna chuan a tizak ang em? Chutiang ngaihtuahna chu lo nei ta pawh ni se, biakna dik atâna a tih theih ang chu a ti tho a ni.

10. Hmeithai chu Pathian tân a hlu tih engtin nge Isua’n a târ lan?

¹⁰ Isua chuan hmeithai leh a thawhlâwm thawh chu Jehova tân a hlu tih a târ lang a. Ani chuan “hêng [mi hausa] zawng zawng ai hian he hmeithai rethei tê hian a thlâk tam zâwk,” tiin a sawi a ni. A thawhlâwm thawh chu mi dangte thawh nên a inpawlh vek dâwn a; mahse, Isua’n a fak bîk a ni. Biak ina thawhlâwm chhiartute chuan Jehova tân chûng tangka dere leh a thawhtu hlutzia chu an hre hauh lo vang. Chuti chung chuan, mi dangte ngaih dân emaw, chu hmeithaiin mahni a inthlîr dân emaw ai chuan Jehova thlîr dân chu a pawimawh tak zet zâwk a ni. He chanchin hi rinnaa i awm leh awm loh infiah nân i hmang thei ang em?

11. Hmeithai chanchin aṭangin eng nge i zir theih?

¹¹ I dinhmun chuan Jehova hnêna i pêk theih chu a nghawng mai thei a. Ṭhenkhat chuan tarna emaw, dam lohna emaw avângin chanchin ṭha hrilnaah hun tlêmtê chauh an pe thei a ni. An rawngbâwlna chu report tlâk loh angin an ngaihtuah tûr a ni em? Chutiang harsatnate chu i nei lo a nih pawhin, Pathian mite’n amah biaknaa kum tina dârkâr tam tak an hman zîngah i thawhrimna chu a bei tham hle niin i ngai mai thei a ni. Chuti chung chuan, Jehova chuan atâna thiltih zawng zawng, a  bîk takin dinhmun harsa tak chung pawha thiltih chu a hriain, a hlut hle tih hmeithai rethei chanchin aṭangin kan zir a ni. Ni kum chhûnga Jehova i biakna chu han ngaihtuah lêt teh. A tâna i pêk dârkâr zînga a engemaw berah khân inpêk nasat zual a ngai em? Chutiang a nih chuan, chu dârkâra A tâna i thiltih chu a hlut tih i chiang thei a ni. Chu hmeithai rethei anga Jehova rawngbâwlnaa theih tâwk i chhuah hunah, ‘rinnaah i awm’ tih rin nachhan tûr ṭha tak i nei a ni.

12-14. (a) Engtin nge a thim zâwnga thil thlîrna chuan Elija chu a nghawng? (b) Elija chuan engvângin nge chutiang rilru chu a put mai theih?

¹² Zâwlnei Elija chu Jehova chunga rinawm leh rinna nghet tak nei a ni a. Mahse, ṭum khat chu a lunghnual êm avângin Jehova hnênah a nunna la tûrin a dîl a: “A tâwk ta e, aw LALPA, tûnah hian ka nunna hi la mai teh,” tiin a sawi a ni. (1 Lal. 19:4) Chutiang beidawnna tawng ve lote chuan, Elija ṭawngṭaina chu ‘thu bung’ tak anga ngaiin hnâwl an duh mai thei a. (Job. 6:3) Mahse, chu chu a rilru dik tak a ni. Jehova chuan Elija chu thih a duh avânga hrem lovin, a ṭanpui ta zâwk tih erawh chu chhinchhiah ang che.

¹³ Engtin nge Elija chuan chutiang rilru chu a put? Chu mi hma lâwk chuan Israel ramah Jehova chu Pathian dik a nihzia târ langtu finfiahna chiang tak neihnaah leh chu mi avânga Baala zâwlnei 450 tihhlumnaah chuan kaihruaitu a ni a. (1 Lal. 18:37-40) Elija chuan Pathian mite chu biakna dika an kîr leh tawh a beisei pawh a ni mai thei a; mahse, chutiang chu a thleng lo. Lalnu suaksual Jezebeli chuan Elija hnênah amah that tûrin ruahmanna a siam thu hrilh tûrin mi a tîr a. Elija chuan a nunna chân a hlauh avângin, chhim lama awm ṭhenawm Judai ram thlalêrah a tlânchhe ta a ni.—1 Lal. 19:2-4.

¹⁴ Mahni chauhva a awm laiin, Elija chuan zâwlnei anga a hnathawh chu ṭangkai lo angin a ngaihtuah a ni. Jehova hnênah: “Ka pute aiin ka ṭha chuang bîk si lo,” tiin a hrilh a. Vaivut ang leh thlahtu thi tate ruh ang maia hmantlâk lohvin a inngai tihna a ni. A nihna takah chuan mahniin tehna a insiam a, chu mi hmang chuan infiahin hlawhchham tak, Jehova emaw, mi dangte emaw tâna ṭangkai lo tak angin a inngai tihna ang a ni.

15. Engtin nge Pathian chuan Elija hnênah amah a hlut reng tih a hriat chiantîr?

¹⁵ Mahse, Engkimtitheia chuan Elija chu kawng dangin a hmu a. Ani chu Pathian mithmuhah a hlu reng a, chu chu Elija hriat chiantîr a tum a ni. Pathian chuan Elija tichak tûrin vântirhkoh a tîr a. Elija chu Horeb Tlâng chhim lama ni 40 a zin chhûnga chhawmdâwl nân ei leh in tûr a pe bawk a ni. Chu bâkah, Jehova chunga rinawm Israel mi dangte an awm lo anga Elija ngaih dân dik lo tak chu Pathianin ngilnei takin a siam ṭha bawk a. Chhinchhiah tlâk takin, Pathian chuan Elija chu tih tûr thar a pe a, ani chuan a lo pawm a ni. Jehova ṭanpuina chu a hlâwkpui a, chakna thar nên zâwlnei anga a rawngbâwlnaah a kîr leh ta a ni.—1 Lal. 19:5-8, 15-19.

16. Pathianin kawng ṭhenkhata a chhawmdâwl dân che chu eng nge?

¹⁶ Elija thiltawn chuan rinnaah i awm tih nemnghet tûr leh a êng zâwnga thil thlîr tûrin a ṭanpui thei che a ni. A hmasain, Jehova’n a chhawmdâwl dân che chu ngaihtuah rawh. A chhiahhlawh pakhat, upa emaw, Kristian puitling dang emaw chuan i mamawh lai takin a ṭanpui che em? (Gal. 6:2) Bible te, kan Kristian thu leh hla chhuah te, leh kohhran inkhâwmte hmangin thlarau lama châwm i ni em? Hêng kawng pathum zînga a pakhat ber hi i hlâwkpui leh hunah chuan, ṭanpuina lo Chhuahna dik tak chu ngaihtuahin, A hnênah lâwmthu sawiin ṭawngṭai ang che.—Sâm 121:1, 2.

17. Jehova chuan a chhiahhlawhteah eng nge a hlut?

¹⁷ A pahnihnaah, a thim zâwnga thil thlîrna  chuan mi a bum thei tih hre rawh. Pathianin kan hlutna a chhût dân chu thil pawimawh ber a ni. (Rom 14:4 chhiar rawh.) Jehova chuan kan inpêkna leh a chunga kan rinawmna chu a hlut a, kan thil hlen chhuah hmangin a teh lo. Elija ang khân, kan rin aiin Jehova tân thil kan hlen chhuak nasa hle thei a ni. Kohhrana tuemaw chungah a ṭha zâwngin nghawng i nei thei a, i thu hrilhna bialah i thawhrimna aṭanga thutak hretute pawh an awm mai thei a ni.

18. Jehova hnên aṭanga i chanvo dawn chuan eng nge a târ lan?

¹⁸ A tâwpna atân, Jehova hnên aṭanga i chanvo dawn apiang chu a awmpui che tih târ langtu angin ngai rawh. (Jer. 20:11) I rawngbâwlna chu rah chhuah lo anga a lan emaw, thlarau lam thiltum ṭhenkhat chu tih puitlin theih loh anga a lan emaw avângin Elija angin i lunghnual pawh a ni thei a. Chuti chung chuan kan vaia kan neih mêk, chanvo ropui ber—chanchin ṭha hrilh theihna leh Pathian hming put theihna chu i nei a ni. Rinawm takin awm reng ang che. Tichuan, Isua tehkhin thu sawi zînga pakhat: “I pu lâwmnaah lût rawh,” tih chu i hnêna sawi ang a ni thei ang.—Mt. 25:23.

19. Sâm 102-na ziaktu chuan eng dinhmun nge a tawn?

¹⁹ Sâm 102 ziaktu chu a beidawng hle a. Ani chuan taksa lam emaw, rilru lam emawa harsatna avângin ‘hrehawm a tuar’ a, a buainate hmachhawn tûra chakna a tlacham a ni. (Sâm 102, a chunga thuziak) A thuah chuan a hrehawm tawrhna, a khawharna, leh a mi mal rilru veizâwngte’n a rilru a luah khahzia târ lanna kan hmu a. (Sâm 102:3, 4, 6, 11) Jehova chuan amah paih bo a duh niin a ngai a ni.—Sâm 102:10.

20. A thim zâwnga thil ngaihtuahna dotu tuemaw chu ṭawngṭainain engtin nge a ṭanpui theih?

²⁰ Mahse, fakna hla phuahtu chuan a nun chu Jehova fak nân a la hmang thei tho a ni. (Sâm 102:19-22 chhiar rawh.) Sâm 102-naa kan hmuh angin rinnaa awmte pawhin hrehawm an tuarin, thil dang ngaihsak harsa an ti thei a ni. Fakna hla phuahtu chuan “chawngzawng, in chunga amah chauhva awm,” ang a buainate chauh ṭhiana nei ang maiin a inngai a ni. (Sâm 102:7) Chutianga i inngai ve a nih ngai chuan, fakna hla phuahtu angin Jehova hnênah i thinlung leihbaw rawh. Hrehawm tuarte ṭawngṭaina—i ṭawngṭaina—chuan a thim zâwnga thil ngaihtuahna do tûrin a ṭanpui thei che a. Jehova chuan: “Pachhiate ṭawngṭaina chu a ngaihsak a, an ṭawngṭaina chu a hmusit lo,” tih a tiam a ni. (Sâm 102:17) Chu thutiam chu ring tlat ang che.

21. Engtin nge a thim zâwnga thil thîrna hneh tumtu chuan, a êng zâwnga thil a thlîr lehzual theih?

²¹ Sâm 102-na chuan a êng zâwnga thil i thlîr lehzual theih dân a târ lang bawk a. Fakna hla phuahtu chuan Jehova nêna an inlaichînna lam chu ngaihsak zâwkin chutiang chuan a ti a ni. (Sâm 102:12, 27) Jehova chuan A mite chu fiahna lakah a chhawmdâwl reng dâwn tih hriatna aṭangin thlamuanna a hmu a. A thim zâwnga thil ngaihtuahna chuan engemaw chhûng chu i duh angin Pathian rawng a bâwl tamtîr thei lo che a nih chuan, chu mi chungchângah chuan ṭawngṭai ang che. Pathian hnênah i harsatna chhâwk zangkhai tûr chauh ni lovin, ‘LALPA hming i hrilh theihna’ tûra i ṭawngṭaina ngaithla tûrin i dîl thei a ni.—Sâm 102:20-22.

22. Engtin nge Jehova chu kan tihlâwm ṭheuh theih?

²² Ni e, rinnaah kan awm tih leh Jehova tân kan hlu tih finfiah nân Bible kan hmang thei a. He khawvêlah hian a thim zâwnga thil thlîrna emaw, lunghnualna emaw zawng zawng chu kan nuaibo vek thei lo ngei mai. Chuti chung chuan Jehova kan tilâwm theiin, a rawngbâwlnaa harsatnate rinawm taka tuar chhuakin chhamdam kan ni thei a ni.—Mt. 24:13. (w14-E 03/15)