Wãn to la d tõe n kell n tũ a Zeova ne sũ-noogo?
“Ned sã n vɩ n kaoos yʋʋm wʋsgo, bɩ a maan sũ-noog yʋʋm kãens fãa pʋgẽ.”—KOƐ. 11:8.
1. Bõe la a Zeova kõt tõnd sẽn na yɩl tɩ d paam sũ-noogo?
A ZEOVA ratame tɩ d paam sũ-noogo. Rẽ n so t’a kõt-d bũmb wʋsg sẽn na yɩl tɩ d sũy yɩ noogo. Pipi bũmb a sẽn kõ tõnd yaa vɩɩmã. D tõe n kɩtame tɩ d sẽn vɩ to-to wã waoog Wẽnnaam, bala, a sõng-d lame tɩ d wa tũudum hakɩkã pʋgẽ. (Yɩɩl 144:15; Zã 6:44) A Zeova wilgdame t’a nonga tõndo, la a sõngd-d tɩ d ket n maand a raabã. (Zer. 31:3; 2 Kor. 4:16) D be a Zeova siglgã pʋgẽ, tɩ tõnd ne d saam-biisã nong taaba, n zemsd taab tɩ laafɩ be d sʋka, la d paamd a Zeova sor-wilgr wakat fãa. Sẽn paase, d saagdame tɩ beoog na n yɩɩ neere.
2. Tags-bʋg la kiris-neb kẽer tar tɩ namsd-ba?
2 Baa d sẽn tar bʋʋm wʋsg woto n na n maan sũ-noogã, tõnd sʋka neb kẽer mi n tagsdame tɩ b pa tar yõod ye. B tõe n tagsdame t’a Zeova pa nand bãmba, wall bũmb nins b sẽn maand a tʋʋmdã pʋgẽ wã ye. Nin-kãens tõe n tagsdame tɩ maan sũ-noog yʋʋm wʋsg pʋgẽ yaa bũmb sẽn pa tõe. Ne bãmba, beoog sẽn vẽeg fãa yaa toogo.—Koɛ. 11:8.
3. Bõe n tõe n wa kɩt tɩ ned tagsdẽ t’a pa tar yõodo?
3 Tõe tɩ yaa ninã sẽn bao bũmb n pa paame, wall bãag bɩ kʋʋlem n kɩt t’a tagsdẽ t’a pa tar yõodo. (Yɩɩl 71:9; Yel. 13:12; Koɛ. 7:7) Sẽn paase, d fãa segd n tẽegame tɩ d sũurã “tara ziri,” la t’a tõe n ningd-d-la taale, tɩ Wẽnnaam pa ningd-d taal ye. (Zer. 17:9; 1 Zã 3:20) A Sʋɩtãan rõta neb nins sẽn tũud Wẽnnaamã. Neb nins sẽn tagsd wa a Sʋɩtãanã me tõe n modgdame sẽn na yɩl tɩ d tẽ bũmb ning a Elifaaz sẽn yeel a Zoob wakatẽ wã. A wilgame tɩ tõnd pa tar yõod Wẽnnaam nifẽ ye. Gom-kãngã yaa ziri.—Zoob 4:18, 19.
4. Bõe yell la d na n gom sõs-kãngã pʋgẽ?
4 A Zeova wilga a Gomdã pʋgẽ t’a bee ne neb nins sũy sẽn sãamã. (Yɩɩl 23:4) Bũmb a ye a sẽn kõ tõnd tɩ wilgdẽ t’a bee ne tõnd yaa a Gomdã. Biiblã tara pãnga, n tõe n toeem ned tagsgo. (2 Kor. 10:4, 5) Sõs-kãngã pʋgẽ, d na n goma Biiblã sẽn tõe n sõng tõnd to-to tɩ d paam sũ-noog la d kell n tall-a. Rẽ tõe n nafa yãmba, la sõng-y tɩ y bãng y sẽn tõe n maan to-to n keng y taabã raoodo.
BIIBLÃ SẼN TÕE N SÕNG TÕND TO-TO TƖ D TALL SŨ-NOOGO
5. Bõe n tõe n sõng tõnd tɩ d tall sũ-noogo?
5 Tʋmd-tʋmd a Poll wilga bũmb kẽer sẽn tõe n sõng tõnd tɩ d tall sũ-noogo. Wala makre, a yeela Korẽnt tigingã neb woto: “Bɩ y fees yãmb mens n ges yãmb sã n bee tẽeb pʋgẽ.” (2 Kor. 13:5) Ka wã, ‘tẽebã’ yaa bũmb nins fãa kiris-nebã sẽn tẽedã. Bõn-kãens bee Biiblã pʋgẽ. Tõnd no-goamã la d manesmã sã n zems ne Biiblã sẽn yetã, d wilgdame tɩ d “bee tẽeb pʋgẽ.” D pa tõe n yãk zãmsg kẽer d sẽn dat bal n tũ ye. D segd n saka bũmb nins fãa Biiblã sẽn yetã.—Zak 2:10, 11.
6. Bõe yĩng tɩ d segd n fees d meng n bãng d “sã n bee tẽeb pʋgẽ”? (Ges-y sõsgã sɩngrẽ fotã.)
6 Yãmb sã n tagsdẽ tɩ y sã n fees y menga y na n mikame tɩ y ka be tẽeb pʋgẽ, tõe tɩ y pa rat n fees y meng ye. La a Zeova sẽn get tõnd to-to wã n tar yõod n yɩɩda, bala, a tagsgã yɩɩda tõnd tagsgã. (Ezai 55:8, 9) A feesda neb nins sẽn tũud-a wã, pa sẽn na yɩl n ning-b taal ye. Yaa sẽn na yɩl n yã b zʋg-sõma wã, la a sõng-ba. Y sã n karemd Biiblã sẽn na yɩl n bãng y “sã n bee tẽeb pʋgẽ,” y na n bãnga Wẽnnaam sẽn get-y to-to wã. Rẽ tõe n sõng-y lame tɩ y ra le tags tɩ y pa tar yõod Wẽnnaam nifẽ, la tẽeg-y t’a nand-y lame. Dẽ na n yɩɩ wa y sẽn pak fenetr sẽn na yɩl tɩ vẽenem kẽ roog pʋgẽ.
7. Wãn to la Biiblã kibay nins sẽn gomd wẽn-sakdb yellã tõe n naf tõndo?
7 Bũmb y sẽn tõe n maan n fees y meng sõma yaa y sẽn na n karem Biiblã kibay nins sẽn gomd wẽn-sakdb yellã. Y sã n wa karemdẽ bɩ y mak nin-kãens yɛlã sẽn da yaa to-to wã ne yãmb yɛlã, la y ges yãmb manesem sẽn da na n yɩ to-to y sã n da be b zĩigẽ. Bɩ d gom neb a tãab yelle. Rẽ na n sõng-d lame tɩ d bãng d sẽn tõe n karem Biiblã to-to n fees d meng n ges d “sã n bee tẽeb pʋgẽ.” Na n sõng-d lame me tɩ d paam sũ-noogo.
PƲG-KÕOR SẼN YAA NAONG SOABA
8, 9. a) Pʋg-kõorã yɛl da yaa wãn to? b) Pʋg-kõorã ra tõe n tagsa bõe yell tɩ koms a raoodo?
8 Zerizalɛm wẽnd-doogẽ wã, a Zezi yãa pʋg-kõor sẽn yaa naong soaba. Pʋg-kõorã kibar sõngda tõnd tɩ d bãng tɩ baa d sã n pa tõe n maan bũmb kẽer d sẽn date, d tõe n kell n talla sũ-noogo. (Karm-y Luk 21:1-4.) Mams-y pʋg-kõorã yɛl sẽn da yaa to-to wã. A sɩdã maana kaalem tɩ namsd-a wʋsgo. La wakat kãng tɩ tũudmã taoor-dãmb ra yaa yão-be-rãmba. B ra “rɩta pʋg-kõap paoongo,” n pa sõngd-b ye. (Luk 20:47, Sebr Sõngo) Pʋg-kõorã ra yaa naong soab hal tɩ ligd ning a sẽn tõe n kõ wẽnd-doogẽ wã zemsa tʋm-tʋmd sẽn na n tʋm minit a wãn bal yaoodo.
9 Pʋg-kõorã sẽn wa n kẽ wẽnd-doogã zak pʋgẽ ne a ligd-bõoneg a yiibã, tõe t’a tagsa bõe yelle? A tagsame tɩ yẽ sẽn tar n na n kõ wã yaa bilf wʋsgo, n yɩɩd a sẽn da tõe n kõ wakat ning a sɩdã sẽn da ket n vɩ wã bɩ? A sẽn wa n yã neb a taab sẽn kõt ligd wʋsgã, a zoee yãnde, wall a tags t’a kũunã pa zem baa fʋɩ bɩ? Baa a sã n tagsa woto, a kell n kõo bũmb ning a sẽn tar n na n teel tũudum hakɩkã.
10. Wãn to la a Zezi wilg tɩ Wẽnnaam nanda pʋg-kõorã wʋsgo?
10 A Zezi wilgame t’a Zeova nanda pʋg-kõorã ne a kũunã. A yeelame tɩ pʋg-kõorã “ningame n yɩɩd [arzɛgs rãmbã] fãa.” A ligdã naaga neb a taabã rẽndã, la a Zezi pẽg-a lame. Sẽn sõt-b wẽnd-doogã ligdã sã n wa yã ligd-bõoneg a yiibã, b pa tõe n bãng t’a Zeova nifẽ, ligd kãens tara yõodo, la t’a nanda ned ning sẽn kõ wã wʋsg ye. La sẽn tar yõod n yɩɩdã pa neb a taabã tagsgo, wall pʋg-kõorã sẽn tagsd bũmb ningã ye. Yaa a Zeova sẽn get pʋg-kõorã to-to wã. Wãn to la kiba-kãngã tõe n sõng-y tɩ y fees y meng n ges y sã n bee tẽeb pʋgẽ?
11. Yam bʋg la d tõe n dɩk pʋg-kõorã kibarã pʋgẽ?
11 Yãmb sẽn tõe n maan bũmb ning n kõ a Zeova wã bee ne y yɛlã sẽn yaa to-to wã. Kʋʋlem wall bãag kɩtame tɩ kẽer pa tõe n moon koɛɛgã wa b sẽn datã ye. Rẽ yĩnga nin-kãens segd n tagsame tɩ b sẽn moond lɛɛr ninsã sõor yaa bilfu, tɩ pa sek b na n kõ rapoor bɩ? Baa y yaa bi-bɩɩg n tar keelem, y sã n mak y sẽn maand bũmb ningã ne a Zeova Kaset rãmbã fãa sẽn maandã, y tõe n wa tagsdame tɩ yaa bilf wʋsgo. La pʋg-kõorã kibarã wilgdame tɩ d sã n maan bũmb a Zeova yĩnga, baa yaa bilfu, a neeme, t’a sũur noome, sẽn yɩɩd fãa, yɛlã sã n pa nana ne-do. Tẽeg-y bũmb nins y sẽn maan a Zeova tũudmã pʋgẽ rɩẽ yʋʋmdã. Rẽ yĩnga, yɩɩ tɩlae tɩ y mong y meng bũmb wʋsg n tõog n maan bõn-kãens sʋkã bũmb a ye bɩ? Sã n yaa woto, bãng-y t’a Zeova nanda bõn-kãngã. Yãmb sã n dɩka pʋg-kõorã togs-n-taare, n maand y sẽn tõe tɛk a Zeova tʋʋmdã pʋgẽ, y “bee tẽeb pʋgẽ.”
“BƖ Y REEG M VƖƖMÔ
12-14. a) Bõe n wilgd t’a Eli sũurã sãama wʋsgo? b) Bõe yĩng t’a Eli sũurã sãame?
12 No-rɛɛs a Eli ra sakda a Zeova ne a sũur fãa, t’a tẽebã ra tar pãng me. Baa ne rẽ, wakat n zĩnd t’a sũurã sãam wʋsgo, hal t’a kos a Zeova kũum. A yeelame: “Zu-soaba, masã, a sekame, bɩ y reeg m vɩɩmã.” (1 Rĩm 19:4) Neb nins sũy sẽn zɩ n sãam wa a Eli wã tõe n tagsame t’a goamã pa zems ye. (Zoob 6:3) La a sũurã sɩd ra sãamame. Baasgo, a Zeova pa zab-a ye. A sõng-a lame.
13 Bõe yĩng t’a Eli sũurã ra sãam woto? Bilf sẽn deng rẽ, a maana yel-solemd sẽn wilg t’a Zeova n sɩd yaa Wẽnnaam. Rẽ poore, b kʋʋ Baal no-rɛɛsdb 450. (1 Rĩm 18:37-40) Tõe t’a Eli ra tẽedame tɩ Israyɛll nebã sẽn yã rẽ wã, b na n lebs n sɩnga a Zeova tũubu. La pa yɩ woto ye. Rĩm-poak a Zezabɛll sẽn yaa nin-wẽngã tʋma ned t’a yeel a Eli t’a na n kʋ-a lame. Rabeem yõka a Eli, t’a zoe n pasg Israyɛll ne Zida soolmã, n kẽng weoogẽ wã.—1 Rĩm 19:2-4.
14 No-rɛɛs a Eli sẽn wa n be weoogẽ wã, a tagsame tɩ bũmb nins a sẽn maanã fãa yaa zaalem. A yeela a Zeova yaa: “Mam me ka yɩɩd m yaab-rãmbã ye.” A tagsame tɩ yẽ yõod pa yɩɩd a yaab-rãmbã sẽn ki n lebg tẽng tom la kõbã ye. A ra getame t’a vɩɩmã ka barka, la t’a pa tar yõod a Zeova wall ned a to nifẽ ye.
15. Wãn to la Wẽnnaam wilg a Eli t’a ket n tara yõodo?
15 La Sẽn-tõe-a-fãa wã ra pa tagsd woto a Eli zug ye. A Eli ra ket n tara yõod wʋsg a Zeova nifẽ. Rẽ n so t’a maan bũmb toor-toor sẽn na yɩl n sõng-a t’a kɩs sɩd ne rẽ. A tʋma malɛk t’a keng a raoodo. A kõ-a-la rɩɩb t’a rɩ, la koom t’a yũ, n paam keelem n kẽn rasem 40 n kẽng Horɛb tãngẽ wã. A Eli sẽn yeel tɩ yaa yẽ a ye bal n sakd a Zeova wã, a Zeova maaga a yĩng n wilg-a tɩ Israyɛll neb a taab me n sakd yẽ. Sẽn paase, a kõ a Eli tʋʋm a taaba. Ne a Zeova sõngre, no-rɛɛs a Eli le paama raoodo, n lebs n sɩng a tʋʋmdã.—1 Rĩm 19:5-8, 15-19.
16. Wilg-y bũmb kẽer a Zeova sẽn maan n sõng yãmba.
16 A Eli kibarã tõe n sõng-y lame tɩ y bãng y sã n bee tẽeb pʋgẽ, la sõng-y tɩ y paam sũ-noogo. Pipi, tags-y-yã a Zeova sẽn zoe n teel-y to-to wã yelle. Kãsem-soab wall kiris-ned a to sẽn tar minim zoe n kõo yãmb saglga, tɩ kell n zems a wakat bɩ? (Gal. 6:2) Y zoe n karma bũmb Biiblã pʋgẽ wall tõnd sɛbã pʋsẽ, pa rẽ bɩ y kelg sõsg tigsg sasa, tɩ kɩt tɩ y kɩs sɩd t’a Zeova geta y yell bɩ? A buud sã n paam-y nindaar bɩ y tẽeg tɩ yaa a Zeova n sõng-y-yã, n pʋʋs-a barka.—Yɩɩl 121:1, 2.
17. Bõe yĩng t’a Zeova nand neb nins sẽn maand a raabã?
17 Yiib-n-soaba, tẽeg-y tɩ ned sã n tagsdẽ t’a pa tar yõodo, tõe n kẽes-a-la weoogo. Wẽnnaam sẽn get tõnd to-to wã n tar yõod n yɩɩda. (Karm-y Rom dãmb 14:4.) A Zeova nanda tõnd d sẽn nong-a la d sakd-a wã yĩnga. Tõnd sẽn tar yõod a Zeova nifẽ wã pa be ne bũmb nins d sẽn tõog n maanã ye. Tẽeg-y t’a Eli maana bũmb wʋsg a Zeova tʋʋmdã pʋgẽ, n yaool n da tagsdẽ tɩ pa tar yõod ye. A buud tõe n paama tõnd me. Tõe tɩ y maana bũmb tigingã pʋgẽ, tɩ naf neb a taabã tɩ y pa bãng ye. Sẽn paase, y moonegã zĩigẽ, neb n wʋm sɩdã yãmb modgrã maasem yĩnga.
18. A Zeova sã n kõ-y tʋʋmde, wilgda bõe?
18 Sẽn na n baase, ges-y tʋʋmd ning fãa a Zeova sẽn kõ-y wa kaset sẽn wilgd t’a bee ne-yã. (Zer. 20:11) Wa a Eli, yãmb me tõe n wa tagsdame tɩ bũmb nins y sẽn maand a Zeova tʋʋmdã pʋgẽ wã pa womd biisi, pa rẽ bɩ yaa bũmb la y rat n maan a Zeova tʋʋmdã pʋgẽ, n yaool n getẽ tɩ y pa na n tõog ye. Baasgo, y paam n tʋmda tʋʋmd ning a Zeova sẽn kõ d fãa tɩ yaa zu-zẽkr bũmbã. Tʋʋm-kãng yaa a sẽn kɩt tɩ d moond koe-noogã la d yaa a Kaset rãmbã. Woto wã, bɩ y kell n sak a Zeova. Rẽ, wa a Zezi sẽn yeelã, y na n ‘paama pʋɩɩr ne y zu-soabã sũ-noogo.’—Mat. 25:23.
“NIMBÃAN NED PƲƲSGO”
19. Bõe yell la Yɩɩl Sõamyã 102 soabã gʋlsd ra tagsda?
19 Yɩɩl Sõamyã 102 soabã gʋlsd sũur da sãama wʋsgo. A ra namsda wʋsgo, hal t’a ‘pãngã sɛ,’ t’a pa le tõe n mao ne a zu-loeesã ye. (Yɩɩl 102:1) A sẽn yeel bũmb ningã wilgdame tɩ yaa a toogã, a sẽn da yaa a ye wã, n paas a sũ-sãamsã yell bal la a ra tagsda. (Yɩɩl 102:4, 5, 7, 12) A tagsame t’a Zeova rat n dɩk-a lame n lobe.—Yɩɩl 102:11.
20. Bõe yĩng tɩ ned sũur sẽn sãam wʋsg segd n pʋʋs a Zeova?
20 La yɩɩl-gʋlsdã ra ket n tõe n pẽga a Zeova. (Karm-y Yɩɩl Sõamyã 102:20-22.) Wa Yɩɩl Sõamyã 102 soabã sẽn wilgdã, baa neb nins sẽn be tẽeb pʋgẽ wã tõe n paama toogo, tɩ wʋm-b hal tɩ b pa le tõe n tags bũmb a to yell ye. Yɩɩl-gʋlsdã ra tagsdame tɩ yẽ “yaa wa liuul sẽn zao roog zug a ye bala,” rat n yeel t’a ra tagsdame t’a yaa a ye ne a zu-loeesã. (Yɩɩl 102:8) Y sã n wa tagsd woto bɩ y pelg y pʋg n pʋʋs a Zeova wa yɩɩl-gʋlsdã sẽn maanã. Y pʋʋsgã tõe n sõng-y lame tɩ y ra le tags tɩ y pa tar yõod ye. A Zeova yeelame t’a kelgda “namsdbã kosgo,” n pa paoogd-b ye. (Yɩɩl 102:18) Kɩs-y sɩd ne rẽ.
21. Bõe la ned sẽn tar tags-kɛg tõe n maan n paam sũ-noogo?
21 Yɩɩl Sõamyã 102 soabã wilgda d sẽn tõe n paam sũ-noog to-to me. Yɩɩl-gʋlsdã yãka yam n na n tags yẽ ne a Zeova zoodã yelle. (Yɩɩl 102:13, 28) A sẽn tẽeg t’a Zeova na n kell n sõnga a nin-buiidã toog wakatã, kenga a raoodo. Woto wã, y sã n wa tar tags-kɛg tɩ kɩt tɩ y pa le tõe n tʋm Wẽnnaam tʋʋmdã wa y sẽn datã, bɩ y pʋʋs rẽ yĩnga. Ra kos-y-yã a Zeova t’a yols-y bal ye. Kos-y-yã-a t’a kɩt tɩ b moon a yʋʋrã tɩ saag zĩig fãa.—Yɩɩl 102:21, 22.
22. Wãn to la tõnd ned kam fãa tõe n ta a Zeova yam?
22 Vẽenega, Biiblã tõe n sõng-d lame tɩ d fees d mens n ges d sã n bee tẽeb pʋgẽ, la d kɩs sɩd t’a Zeova nand-d lame. Yaa sɩd tɩ d tõe n mi n wa tagsame tɩ d pa tar yõodo, pa rẽ bɩ d mi n komsa raoodo. Baa d sẽn pa tõe tɩ rẽ sa dũni-kãngã pʋgẽ wã, d ned kam fãa sã n kell n tʋm a Zeova tʋʋmdã, d na n ta a yam, n wa paam vɩɩm sẽn kõn sa wã.—Mat. 24:13.
