1. Omalaleko nuuyamba gaJehova geni taga vulu oku tu kwathela tu kale twa nyanyukwa?

JEHOVA okwa hala tu kale twa nyanyukwa, nohe tu kungulukithile omayambeko ngoka ge na oku tu etela enyanyu. Oshinima shimwe, otu na omwenyo. Onkee ano, otatu vulu okulongitha onkalamwenyo yetu tu tange Kalunga, molwaashoka okwe tu nanena kelongelokalunga lyashili. (Eps. 144:15; Joh. 6:44) Jehova okwe tu shilipaleka ohole ye nohe tu kwathele tu idhidhimike miilonga yetu yoku mu longela. (Jer. 31:3; 2 Kor. 4:16) Ohatu nyanyukilwa oparadisa yopambepo, moka mu na iikulya oyindji yopambepo nosho wo uumwayinathana wopahole. Shoka shi vule mpoka osho shono kutya otu na etegameno li na ondilo lyonakuyiwa.

2. Aapiya yamwe yaKalunga aadhiginini otaya kondjo nashike?

² Kakele kokukala tu na omatompelo ngaka gokukala twa nyanyukwa, aapiya yaKalunga yamwe aadhiginini otaya kondjo nomadhiladhilo omawinayi kombinga yawo yene. Otashi vulika ya kale yu uvite kutya kaye na ongushu yasha kuJehova nosho wo iilonga yawo yoku mu longela. Kwaamboka ye na omadhiladhilo omawinayi taga tsikile, edhiladhilo lyokukala nomwenyo “omimvo odhindji” otali vulu okukala ondjodhi yowala. Esiku kehe kuyo otali vulu okukala owala lya fa esiku lyomilema. — Omuuv. 11:8.

3. Oshike tashi vulu okupendutha omadhiladhilo omawinayi?

³ Omadhiladhilo omawinayi gaamwatate naamwameme mboka otashi  vulika ga penduthwe kokuyematekwa, kuuwehame, nenge komangambeko ngoka hage etwa kuukokele. (Eps. 71:9; Omayel. 13:12; Omuuv. 7:7) Kakele kaashono, Omukriste kehe oku na okutaamba ko uushili mboka kutya omutima ogu na omakoto notagu vulu okukala tagu tu pangula nokuli nuuna tashi vulika Kalunga e tu nyanyukilwa. (Jer. 17:9; 1 Joh. 3:20) Ondiapoli ohayi lundile aapiya yaKalunga. Naamboka omadhiladhilo gawo ga nwethwa mo kuSatana otashi vulika ya kambadhale oku tu nwetha mo netaloko lya fa ndyoka lyaElifas ngoka a li kee na eitaalo, kutya katu na oshilonga kuKalunga. Mbyoka oya li iifundja pethimbo lyaJob ngaashi owala shi li kunena. — Job 4:18, 19.

4. Otatu ka konakona shike moshitopolwa shika?

⁴ Jehova okwe shi yelitha mOmanyolo kutya ota ka kala pamwe naamboka taye ‘ende mesilu lyomilema thokothoko.’ (Eps. 23:4) Omukalo gumwe e li pamwe natse okupitila mOohapu dhe. Ombiimbeli oyi li ‘oshikondjitho sha kola tatu shi pewa kuKalunga, tashi vulu okuhanagula po omapopilongulu omanene,’ mwa kwatelwa euvoko lya puka nosho wo omadhiladhilo omawinayi. (2 Kor. 10:4, 5) Onkee ano, natu ka konakoneni nkene tatu vulu okulongitha Ombiimbeli yi tu kwathele tu kokeke iikala yokukala netaloko ewanawa nosho wo nkene tatu kaleke po etaloko ndyoka. Otashi vulika wu mone uuwanawa ngoye mwene mwaashika, noto ka tseya wo omikalo ndhoka to ka longitha wu ladhipike yalwe.

5. Okatutsu keni taka vulu oku tu kwathela tu kale tu na etaloko ewanawa?

⁵ Omuyapostoli Paulus okwa li a popi iinima yimwe mbyoka tayi vulu oku tu kwathela tu kokeke etaloko ewanawa. Okwa li a ladhipike egongalo lyomuKorinto a ti: “Ikonakoneni, ne mu iyeleke, opo mu tale, ngele omu li tuu meitaalo.” (2 Kor. 13:5) ‘Eitaalo’ olyo ehuku lyomalongo gopaKriste ngoka ge li mOmbiimbeli. Ngele oohapu dhetu niilonga yetu oyi li metsokumwe nomalongo ngoka, otwa pita okatutsu notatu ulike kutya otu li “meitaalo.” Eeno, otu na wo okuyelekanitha onkalamwenyo yetu nomalongo agehe gopaKriste. Itatu vulu okuhogolola mo iitopolwa yimwe mbyoka twa hala okulandula. — Jak. 2:10, 11.

6. Omolwashike tu na okwiikonakona ‘tu tale, ngele otu li tuu meitaalo’? (Tala kethano ndyoka li li petameko.)

⁶ Otashi vulika wu kale to kwatakwata okuninga okatutsu, unene tuu ngele owu uvite kutya oto ke ka ndopa. Ihe, etaloko lyaJehova olya simanenena li vule lyetu, nomadhiladhilo ge hago getu, ano ge li kokule lela nogetu. (Jes. 55:8, 9) Oha konakona aalongeli ye, hanelalakano lyoku ya pangula, ihe okumona uukwatya uuwanawa muyo noku ya kwathela. Uuna ho longitha Oohapu dhaKalunga wu ikonakone ‘wu tale, ngele owu li tuu meitaalo,’ oto ka kala naanaa wi itala ko ngaashi Kalunga e ku tala ko. Shika otashi vulu oku ku kwathela wu kuthe mo momadhiladhilo goye edhiladhilo kehe kutya ku na ongushu yasha koshipala shaKalunga e to tula po eshilipaleko lya kankamena kOmbiimbeli ndika tali ti: Owu na ongushu momeho gaJehova. Oshizemo otashi ka kala wa fa to egulula eholodeyina pekende opo mondunda moka mu na omilema mu ye uuyelele.

7. Ongiini tatu vulu okumona uuwanawa miiholelwa yopaMbiimbeli yuudhiginini?

⁷ Omukalo gwa dhenga mbanda tatu vulu okwiikonakona tse yene omokutedhatedha koshiholelwa shaantu aadhiginini mboka ya popiwa mOmbiimbeli. Yelekanitha oonkalo dhawo nenge omaiyuvo gawo nogoye, ngoye to tala kutya andola owa katuka ngiini ando owa li monkalo yawo. Natu ka konakoneni iiholelwa itatu mbyoka tayi ulike nkene to vulu okulongitha Ombiimbeli wu ikonakonunune wu tale ngele owu li tuu ‘meitaalo,’ ngoye wu kokeke etaloko lyankene wi itala ko.

8, 9. (a) Omuselekadhi ohepele okwa li e li monkalo yini? (b) Omuselekadhi ohepele otashi vulika a li e na omadhiladhilo geni omawinayi?

⁸ Potempeli muJerusalem, Jesus okwa li a mono omuselekadhi ohepele. Oshiholelwa she otashi ke tu kwathela tu kokeke iikala yokukala netaloko ewanawa nonando otu na omangambeko. (Lesha Lukas 21:1-4.) Natu taleni konkalo yomuselekadhi. Okwa li e na okwiidhidhimikila oluhodhi lwokusilwa omusamane gwe, ihe nosho wo  onkalo yomalongelokalunga ndjoka ya li ya kwatelwa komeho kaawiliki mboka “haa li omagumbo gaaselekadhi” pehala lyoku ya kwathela. (Luk. 20:47) Okwa li a hepa noonkondo nokwa li owala ta vulu okugandja kotempeli oshimaliwa shoka hashi vulu okufutwa omuniilonga muule wominute omishona.

⁹ Kala wa fa wu shi nkene omuselekadhi a li u uvite sho ta yi motempeli e na uupeni uyali. Mbela okwa li ta ka kala ti ipula nokashona hono a li ta ka gandja noku ka yelekanitha naashono tashi vulika a li ha vulu okugandja sho omusamane gwe a li e na omwenyo? Mbela okwa li ta ka kala a sa ohoni sho a tala yamwe mboka ye li komeho ge taya tula mo omayambidhidho ogendji, tashi vulika a li ti ipula ngele omayambidhidho ge oge na ngaa oshilonga shili? Nokuli nando otashi vulika a li e na omadhiladhilo ngono, okwa li a ningi ngaashi ta vulu omolwelongelokalunga lyashili.

10. Ongiini Jesus a li u ulike kutya omuselekadhi oku na ongushu momeho gaKalunga?

¹⁰ Jesus okwa li u ulike kutya omuselekadhi naashoka a gandja oshi na ongushu kuJehova. Okwa ti kutya “okwa tula mo oshindji e vule ayehe yalwe [aayamba].” Nonando omayambidhidho ge oga li taga ka tulwa mumwe nogaamboka ya gandja, omuselekadhi ngoka oye owala a li a pandulwa kuJesus. Aadhiginini yiimaliwa mboka ya li ya mono uupeni mboka uyali uushona otashi vulika ya li kaaye wete kutya uumaliwa mboka owu na ongushu yi thike peni kuJehova nosho wo omugandji gwawo. Ihe etaloko lyaKalunga olyo unene lya li lya simana, ihe haashoka aantu ya li taya dhiladhila nenge nkene omuselekadhi a li i itala ko ye mwene. Mbela ito vulu okulongitha ehokololo ndika wu ikonakone ngele owu li tuu meitaalo?

11. Oshike to vulu okwiilonga mehokololo lyomuselekedhi?

¹¹ Oonkalo dhoye otashi vulika dhi gume shu ukilila shoka to vulu okugandja kuJehova. Molwaashoka yamwe aakokele nenge kaaye na uukolele, ethimbo ndyoka haya longitha mokuuvitha onkundana ombwanawa olya ngambekwa noonkondo. Mbela itaye ke ethiwa ya kale kaaye na omaipulo ngele iilonga yawo oya gwana ngaa okunyolwa molopota? Nokuli nando otashi vulika inoo ngambekwa unene, otashi vulika wu kale wu uvite kutya oonkambadhala dhoye ndhoka to ningi ngashingeyi odhi li owala oshitopolwa oshishona shoowili  ndhoka oshigwana shaKalunga hashi longitha omumvo kehe moku mu longela. Ihe, otatu ilongo wo mehokololo ndika lyomuselekadhi ohepele kutya Jehova oha ndhindhilike nokwa lenga oshilonga kehe tashi mu longelwa, unene tuu ngele ngoka e shi longo oku li monkalo ondhigu. Dhiladhila owala kethimbo ndyoka wa li wa longele Jehova momumvo gwa piti. Mbela owili yimwe yomoowili ndhoka wa li we mu longele oya li ye ku pula wu ninge eiyambo li ikalekelwa? Ngele osho, oto vulu okukala nuushili kutya Jehova okwa lenga shoka we mu ningila mowili ndjoka. Ngele oto longo ngaashi to vulu miilonga yaJehova ngaashi omuselekadhi ngwiyaka ohepele, owu na etompelo lya kola lyokwiitaala kutya owu li ‘meitaalo.’

12-14. (a) Omaiyuvo omawinayi oga li ga gumu Elia ngiini? (b) Omolwashike Elia tashi vulika a li e na omadhiladhilo omawinayi?

¹² Omupolofeti Elia okwa li omudhiginini kuJehova nokwa li e na eitaalo lya kola. Ihe pompito yimwe, okwa li a gwililwa po noonkondo nokwa li a pula Jehova e mu dhipage, a ti: “Sha gwana, OMUWA, kutha ndje omwenyo gwandje.” (1 Aak. 19:4) Mboka inaaya pita monkalo ngaashi ndjoka yaElia otashi vulika ya kale ya hala okupa Elia uusama kutya egalikano lye inali “dhiladhilwa nawa.” (Job 6:3) Ihe nonando oongawo, omaiyuvo ge oga li goshili. Ndhindhilika wo kutya pehala Jehova a gande Elia sho a li a hala a se, Jehova okwe mu kwathele.

¹³ Oshike sha li sha ningitha Elia a kale u uvite ngawo? Kuyele manga shoka inaashi ningwa, Elia okwa li a pula Jehova opo u ulukile oshigwana shaIsraeli kutya oye Kalunga kashili naashika osha li she etitha edhipago lyAapolofeti yaBaal 450. (1 Aak. 18:37-40) Elia otashi vulika a li e na einekelo kutya oshigwana shaKalunga osha li tashi ka galukila kelongelokalunga lyashili, ihe shoka inashi ka ningwa we. Omukwaniilwakiintu omwiinayi Isebel okwa li a tumine Elia etumwalaka kutya ota longekidha a ka dhipagwe. Molwaashoka okwa li a tila okusa, Elia okwa li a fadhukile kuumbugantu a taaguluka oshilando shopuushiinda Juda sigo ta yi mombuga, ehala ndyoka lya li kaali na omapya. — 1 Aak. 19:2-4.

¹⁴ Pamadhiladhilo ge mwene, Elia okwa li i ipula niilonga ye yuupolofeti mbyoka a li e wete ya fa kaayi na ongushu yasha. Okwa lombwele Jehova a ti: “Kandi shi omwaanawa ndi vule ootate.” Oshinima shimwe shoka a li u uvite okwa li e wete kee na oshilonga a fa owala ontsi nomasipa goohekulululwa mboka ya sa. Otashi vulika a li i ikonakona pamuthika gwe nokwa li a mono kutya ye ita pondola sha, noke na oshilonga kuJehova nenge kugulwe.

15. Ongiini Kalunga a li a shilipaleke Elia kutya Okwa li e mu lenga natango?

¹⁵ Ihe Omunankondoadhihe okwa li a tala ko Elia momukalo gwi ili. Elia okwa li e na ongushu momeho gaJehova, na Jehova okwa li a katuka oonkatu opo e mu shilipaleke uushili waashoka. Kalunga okwa li a tumu omuyengeli a nkondopaleke Elia. Jehova okwa li wo e mu pe iikulya nomeya mbyoka ya li tayi ka kaleka Elia e na omwenyo pethimbo lyomasiku 40 ngoka a li a kala molweendo u uka kuumbugantu kOndundu Horeb. Kakele kaashono, Kalunga okwa li a pukulula Elia nohenda kutya kapu na Aaisraeli yalwe mboka ya li ya kala aadhiginini kuJehova. Shoka oshindhindhilikwedhi osho kutya, Kalunga okwa li a pe Elia oshinakugwanithwa oshipe, shoka a li a taamba ko. Elia okwa li a mono uuwanawa sho a kwathelwa kuJehova nokwa li a galukile kiilonga ye e li omupolofeti e na oonkondo oompe. — 1 Aak. 19:5-8, 15-19.

16. Omomikalo dhimwe dhini tashi vulika Kalunga e ku kwathela?

¹⁶ Oshimoniwa shaElia otashi vulu oku ku kwathela wu ikonakonunune ngele owu li meitaalo notashi vulu oku ku inyengitha wu kale wu na etaloko li li nawa. Tango, dhiladhila komikalo ndhoka Jehova a longitha opo e ku kwathele wu vule okukala to pula komeho. Mbela otashi vulika gumwe gwomaapiya ye, tashi vulika omukuluntugongalo nenge Omukriste gulwe a pyokoka pambepo, e ku kwathela sho wa li wa pumbwa ekwatho? (Gal. 6:2) Mbela owa li wa talalekwa pambepo kOmbiimbeli, kiileshomwa yetu yopaKriste nosho wo kokugongala kehe kwegongalo? Oshikando tashi landula  to mono uuwanawa muyimwe yomiinima mbika, dhiladhila kOnzo yekwatho lyoye ngoye to galikana kuye wu Mu pandule. — Eps. 121:1, 2.

17. Jehova oha kala a lenga shike maapiya ye?

¹⁷ Oshitiyali, ndhindhilika kutya etaloko ewinayi otali vulu oku ku pukitha. Momukalo ngoka Kalunga e tu tala ko ogwo gu na oshilonga. (Lesha Aaroma 14:4.) Jehova okwa lenga eigandjo lyetu nuudhiginini wetu kuye; ihe tu yeleke naashoka twa longa. Otashi vulu okukala ngeyi, ngaashi owala sha li shoshili shi na ko nasha naElia, owa longela Jehova oshindji shi vulithe nokuli pwaashi to dhiladhila. Otashi vulika megongalo mu na gumwe ngoka we mu nwetha mo nawa, nosho wo mboka ye li moshitopolwa mboka ya mona oshili omolwoonkambadhala dhoye.

18. Oshilonga shoye shoka wa pewa kuJehova oshi li euliko lyashike?

¹⁸ Hugunina, kala wa tala ko oshilonga shoka wa pewa kuJehova shi li euliko kutya oku li pamwe nangoye. (Jer. 20:11) Ngaashi Elia, otashi vulika wu kale wa teka omukumo molwaashoka iilonga yoye otayi monika ya fa kaayi na iizemo yasha nenge molwaashoka omalalakano goye gamwe gopambepo otaga monika ga fa itoo vulu oku ga adha. Ihe nando oongawo, owu na uuthembahenda uunene mboka kehe gumwe gwomutse ta vulu okukala e na ngashingeyi, sha hala okutya mboka wokuuvitha onkundana ombwanawa nokuhumbata edhina lyaKalunga. Kakatela uudhiginini woye. Onkee ano, oohapu ndhoka dhomeyele limwe lyaJesus otadhi vulu okuukithwa kungoye, tadhi ti: “‘Inda menyanyu lyomuwa gwoye!’” — Mat. 25:23.

19. Omunyoli gwEpisalomi 102 okwa li a taalelwa konkalo yini?

¹⁹ Omunyoli gwEpisalomi 102 okwa li u uvite uukweyi. Okwa li u uvite a ‘thiminikwa,’ a monithwa iihuna noonkondo palutu nenge pamaiyuvo, nokwa li wo kee na oonkondo dhokuungaunga nomaupyakadhi ge. (Eps. 102 enyolo lyopombanda, OB-2008.) Moohapu dhe otatu adha mo euliko kutya okwa li muuwehame, u uvite owike, nokwa li e na omaiyuvo ge. (Eps. 102:3, 4, 6, 11) Okwa li i itaala kutya Jehova okwa li a hala oku mu etha. — Eps. 102:10.

20. Ongiini egalikano tali vulu okukwathela omuntu ngoka ta kondjo nomadhiladhilo omawinayi?

²⁰ Ihe omupisalomi okwa li natango ta vulu okulongitha onkalamwenyo ye a tange Jehova. (Lesha Episalomi 102:19-21.) Ngaashi tu shi wete mEpisalomi 102, nokuli naamboka ye li meitaalo otaya vulu okukala yu uvite uuwehame wontumba notaya kondjo ya gandje eitulomo kushilwe. Omupisalomi okwa li u uvite ‘i ikalela a fa okadhila ke li kombanda yondunda,’ a fa owala a li e na uupyakadhi wokukala naantu. (Eps. 102:7) Ngele opu na esiku noka kala wu uvite ngaaka, mbumbulila Jehova omutima gwoye ngaashi omupisalomi. Omagalikano gomuthiminikwa, sha hala okutya goye, otaga vulu oku ku kwathela sho to kondjo nomadhiladhilo omawinayi. Jehova okwa li u uvaneke kutya “ota ka uva omagalikano gomapongo noita ka dhina omaindilo gago.” (Eps. 102:17) Inekela euvaneko ndyoka.

21. Ongiini tashi vulika gumwe ngoka ta kondjo nomaiyuvo omawinayi ta vulu okukala e na etaloko ewanawa?

²¹ Episalomi 102 otali ulike wo nkene to vulu okumona etaloko li li nawa. Omupisalomi okwa li a ningi ngaaka sho u ukitha eitulomo lye kekwatathano lye naJehova. (Eps. 102:12, 27) Okwa li a mono ehekeleko mokutseya kutya Jehova okwa li ta ka kala aluhe ta kwathele oshigwana She shi pite momayeleko. Ngele omadhiladhilo omawinayi ohage ku imbi aluhe okulonga ngaashi to vulu mwaashoka wa hala okulongela Kalunga, galikana kombinga yasho. Pula Kalunga a pulakene kegalikano lyoye hamolwa owala wu mone epepelelo komaupyakadhi goye ihe opo wo ‘yalwe ya hambelele OMUWA.’ — Eps. 102:20, 21.

22. Ongiini kehe gumwe gwomutse ta vulu okunyanyudha Jehova?

²² Eeno, otatu vulu okulongitha Ombiimbeli tu ishilipaleke kutya otu li meitaalo notu na ongushu kuJehova. Natu kale twa shilipalekwa kutya, monkalelo ndjika yiinima, otashi vulika kaatu vule okukutha po omaiyuvo agehe omawinayi nenge etekomukumo. Nonando oongawo, kehe gumwe gwomutse ota vulu okunyanyudha Jehova nokumona ehupitho mokukala ta tsikile neidhidhimiko miilonga ye. — Mat. 24:13.