1. Ko e heigoa e tau monuina mai ia Iehova ka lagomatai a tautolu ke fiafia?

 KUA manako a Iehova ke fiafia a tautolu, ti foaki e ia loga e monuina ne lata ke tamai ki a tautolu e fiafia. Taha e mena, ne foaki e ia e moui ki a tautolu. Maeke ia tautolu ke fakaaoga e tau momoui ha tautolu ke fakaheke a ia, ha kua futiaki he Atua a tautolu ke he tapuakiaga mooli. (Sala. 144:15; Ioane 6:44) Kua fakailoa mai e Iehova ki a tautolu e fakaalofa haana, ti lagomatai e ia a tautolu ke nakai fakalolelole ke he fekafekauaga haana. (Iere. 31:3; 2 Kori. 4:16) Olioli e tautolu e parataiso fakaagaaga, putoia ai e mafola mooli mo e kaufakalataha, tau matakainaga ofania, mo e tau fakamanatuaga tumau he fakaalofa ha Iehova ma tautolu. Lafi ki ai, ha ha ia tautolu e amaamanakiaga uho ma e anoiha.

2. Ko e heigoa ne taufetului ki ai e falu fekafekau he Atua?

² Pete kua ha ha ia tautolu e tau kakano nei ke fiafia, ne taufetului e falu fekafekau fakamooli he Atua ha ko e tau manatu kelea hagaao ki a lautolu ni. Liga logona hifo e lautolu kua nakai uho a lautolu po ke ha lautolu a fekafekauaga ki a Iehova. Ko lautolu ne manamanatu kelea tumau ne liga logona hifo ko e miti noa ni e olioli he “tau tau loga.” Ko e moui kua tuga e tau aho pouli.​​—Fakama. 11:8.

3. Ko e heigoa ne liga fakatupu e tau logonaaga kelea?

 ³ Ko e tau logonaaga kelea pihia ne liga tupu ha ko e tau fakaita, gagao, po ke fuakau. (Sala. 71:9; Fakatai 13:12; Fakama. 7:7) Kua lata foki a tautolu ke mailoga na “fakavai” e tau loto ha tautolu ti maeke he mena ia ke taute a tautolu ke agahala e logonaaga pete foki ka fiafia e Atua ki a tautolu. (Iere. 17:9; 1 Ioa. 3:20) Kua fakaholofa he Tiapolo e tau pikopiko hagaao ke he tau fekafekau he Atua. Ne fakalagalaga e Satani a Elifasa ke talahau kua nakai aoga a tautolu ke he Atua. Ko e pikopiko a ia he vahā ha Iopu, ti pihia agaia he vahā nei.​​—Iopu 4:18, 19.

4. Ko e heigoa ka fakatutala a tautolu he vala tala nei?

⁴ He tau Tohiaga Tapu, ne talahau e Iehova to fakalataha a ia mo lautolu kua taufetului mo e tau manatu kelea. (Sala. 23:4) Taha puhala kua fakalataha a ia mo tautolu ko e haana Kupu. Ko e Tohi Tapu kua “malolo ki mua he Atua ke ulu ai e tau kolo.” Kakano e mena nei kua maeke ai ke hiki e tau manatu hepe po ke kelea hagaao ki a tautolu ni. (2 Kori. 10:4, 5) Kia fakatutala la tautolu ke he puhala ka fakaaoga e tautolu e Tohi Tapu ke lagomatai a tautolu ke feaki mo e fakatumau e onoonoaga mitaki. Liga aoga fakatagata a koe mai he mena nei ti moua foki e koe e tau puhala ke fakamalolō e falu.

5. Ko e heigoa e kamatamata ka lagomatai a tautolu ke moua e onoonoaga mitaki?

⁵ Ne fakamaama he aposetolo e falu mena ka lagomatai a tautolu ke feaki e onoonoaga mitaki. Ne fakatonu e ia e fakapotopotoaga i Korinito: “Kia kamatamata e mutolu a mutolu, po kua ha ha i ai a mutolu ke he tua.” (2 Kori. 13:5) Ko e “tua” ko e katoatoaaga he tau taofiaga Kerisiano ne fakakite he Tohi Tapu. Ka talahau mo e taute e tautolu e tau mena ne fakaako he Tohi Tapu, ti kautū mogoia a tautolu ke he kamatamata nei mo e fakakite ko tautolu he “tua.” Mooli, nakai maeke a tautolu ke fifili e tau taofiaga ha tautolu ke mumui ki ai. Kua lata ia tautolu ke omaoma ke he tau fakaakoaga Kerisiano oti he Tohi Tapu.​​—Iako. 2:10, 11.

6. Ko e ha kua lata ia tautolu ke kamatamata ko tautolu mooli he “tua”? (Kikite fakatino he kamataaga.)

⁶ Liga nakai manako a koe ke taute e kamatamata ia, mua atu ka manatu a koe to liga kaumahala a koe. Ka e mua atu e aoga he manatu ha Iehova hagaao ki a tautolu, ha kua lahi atu e mena haana ne iloa ke he ha tautolu. (Isaia 55:8, 9) Ne kumikumi e ia e tau tagata tapuaki haana, nakai ke fakahala a lautolu, ka e kumi e tau mahani mitaki ha lautolu mo e ke lagomatai a lautolu. Ka fakaaoga e koe e Kupu he Atua ke kamatamata a koe ke kitia “po kua ha ha i ai a [koe] ke he tua,” to kamata a koe ke maama e puhala kua logona hifo e Atua hagaao ki a koe. To lagomatai he mena nei a koe ke kalo kehe mai he manamanatu kua nakai aoga a koe ti lagomatai a koe ke manatu e onoonoaga he Atua: Kua uho a koe ke he fofoga haana. He manatu e mena nei kua tuga e hafagi he pā fakamaama ke maama mai e laā ke he poko pouli.

7. Maeke fēfē e fakafifitakiaga he tau tagata fakamooli ne totoku he Tohi Tapu ke lagomatai a tautolu?

⁷ Ko e puhala mitaki ke kamatamata e tautolu a tautolu ko e manamanatu fakahokulo ke he fakafifitakiaga he tau tagata fakamooli ne totoku he Tohi Tapu. Fakatatai e tau tuaga po ke tau logonaaga ha lautolu mo e haau, ti kitia e mena ka taute e koe he tuaga ha lautolu. Kia kitekite la tautolu ke he tolu e fakafifitakiaga kua fakamaama e puhala ka fakaaoga e koe e Tohi Tapu ke fakakite ko koe he “tua.” To lagomatai foki he mena nei a koe ke feaki e onoonoaga mitaki hagaao ki a koe ni.

8, 9. (a) Ko e heigoa e tau tuaga he fifine takape nofogati? (e) Ko e heigoa e tau logonaaga kelea ne liga lauia e takape?

⁸ He faituga i Ierusalema, ne kitekite a  Iesu ke he fifine takape nofogati. Lagomatai he fakafifitakiaga he takape a tautolu ke fakatumau e onoonoaga mitaki pete ka nakai maeke ia tautolu ke taute e tau mena oti kua manako a tautolu. (Totou Luka 21:1-4.) Manamanatu ke he tuaga haana. Fakamua, ne fakauka a ia ke he mamahi he mate e taane haana. Magaaho ia foki, ne lotokai e tau takitaki lotu ti fofō mena mai he tau takape tuga a ia nei, ka e nakai lagomatai a lautolu. (Luka 20:47) Ne nofogati lahi a ia ti ko e tupe ne maeke a ia ke tuku ke he faituga kua tatai mo e totogi ka moua he tagata gahua he tau minuti gahoa.

⁹ Lali ke manamanatu e puhala ne liga logona hifo he takape he hū atu a ia ke he lotopā he faituga mo e totō ua ni e tupe tote. To manamanatu kia a ia ke he tote he tupe haana he fakatatai mo e tupe ka foaki e ia ane mai moui agaia e taane haana? He kitia e ia e tau mena lalahi ne foaki he falu, to fuafua kelea kia a ia ti logona hifo e nakai aoga he mena fakaalofa haana? Pete ka pihia e tau logonaaga haana, ne foaki agaia e ia e mena ne maeke ke lalago aki e tapuakiaga mooli.

10. Fakakite fēfē e Iesu kua uho e takape ke he Atua?

¹⁰ Pehē a Iesu ko e takape mo e mena fakaalofa haana ne uho lahi ki a Iehova. Pehē a ia kua lahi atu e mena ne tuku he takape ke he tau tagata maukoloa oti. To tuku fakalataha e mena fakaalofa he takape mo e falu, ka e mua atu e loto fakaaue ha Iesu ke he mena fakaalofa he takape ki a Iehova. Ko lautolu ne totou e tau mena fakaalofa he faituga to nakai iloa e aoga he ua e tupe ikiiki ia ki a Iehova po ke kakano ne uho e takape ia ki a Iehova. Ka ko e manatu he Atua kua mua atu agaia e aoga mooli, nakai ko e manatu he falu po ke puhala ne logona hifo e takape ki a ia. Maeke nakai a koe ke fakaaoga e tala nei ke kamatamata ‘kua ha ha i ai a koe ke he tua’?

11. Ko e heigoa haau ka fakaako mai he tala ke he takape?

¹¹ Ko e tau tuaga haau ne liga lauia e mena ka foaki e koe ki a Iehova. Ha ko e motua po ke tau lekua malolō tino, nakai maeke e falu ke foaki e magaaho lahi ke fakamatala tuga ne manako a lautolu. Lata kia ia lautolu  ke logona hifo ko e magaaho ha lautolu he gahua ke he fonua kua fakateaga ke hokotaki? Pete foki he tote po ke malolō e tino haau, liga manatu a koe ko e gahua haau ko e vala tote he tau tulā loga ne fakaaoga he tau tagata he Atua ke tapuaki a ia. Fakaako he tala ke he takape nofogati a tautolu kua mailoga mo e uho ki a Iehova e tau mena ikiiki oti ne taute e tautolu ma haana, mua atu ka uka e tau tuaga ha tautolu. Manamanatu ke he tapuakiaga haau ki a Iehova he tau kua mole. Taha kia he tau tulā ne fakaaoga e koe he fekafekau ki a Iehova ne lata ia koe ke foaki fakalahi? Ka pihia, maeke a koe ke iloa tonuhia kua uho ki a ia e mena ne taute e koe ma haana he tulā ia. Fakakite e koe ko koe ke he “tua” ka fifitaki e koe e takape nofogati mo e taute e tau mena oti kua maeke ia koe ke lata mo Iehova.

12-14. (a) Ko e heigoa e tau logonaaga kelea ne moua e Elia? (e) Ko e ha ne liga pihia e logonaaga ha Elia?

¹² Ne fakamooli e perofeta ko Elia ki a Iehova ti malolō foki e tua. Ka e taha magaaho, ne logona e ia e hogohogo manava lahi ti ole a ia ki a Iehova ke uta kehe haana a moui ke he mate, he pehē: “Iehova na e, tokai; kia uta kehe e koe haku a moui.” (1 Patu. 19:4) Ko lautolu ne nakaila logona e fakaagitau lahi ne liga manamanatu ko e ‘tau kupu fakahanoa’ e liogi ha Elia. (Iopu 6:3) Ka e mooli e tau logonaaga haana. Mailoga kua nakai ita a Iehova ki a Elia ka e lagomatai ai e ia.

¹³ Ko e ha ne pihia e tau logonaaga ha Elia? Nakai leva to hoko e mena nei, ne taute e Elia e mana ne fakakite ko Iehova e Atua mooli. Mole e mana nei, ne 450 e perofeta ha Paala ne tamate. (1 Patu. 18:37-40) Liga amanaki a Elia ko e tau tagata he Atua to liliu mogonei ke he tapuakiaga meā, ka e nakai pihia e mena ne tupu. Ne fakafano atu he patuiki fifine kelea ko Iesepela e fekau ki a Elia ko e kelipopo fai e ia a Elia. He matakutaku a Elia ma e moui haana, ne hola a ia ke he faahi toga mai Isaraela ke he taha faahi he motu ha Iuta ke he tutakale.​​—1 Patu. 19:2-4.

¹⁴ He nofo tokotaha a Elia he tutakale, ne kamata a ia ke manamanatu ko e gahua haana ko e perofeta kua nakai aoga. Ne pehē a ia ki a Iehova: “Kua nakai mua haku a mahani mitaki ke he haku a tau matua.” Ne logona hifo e ia e fakateaga tuga e efuefu mo e tau huimotua he tau tupuna mamate haana. He manatu haana, kua kaumahala a ia ti nakai aoga ki a Iehova po ke ha tagata.

15. Fakakite fēfē he Atua ki a Elia kua uho agaia a ia ki a Iehova?

¹⁵ Ka e kehe e manatu he Mua Ue Atu ki a Elia. Ne fakatumau a Elia ke uho ki a Iehova, ti eketaha a ia kua iloa e Elia e mena ia. Ne fakafano he Atua e agelu ke fakamalolō a Elia. Ne foaki foki e Iehova ki a Elia e tau mena kai mo e tau mena inu ke lagomatai a ia ke fakauka ke he fenoga haana ne 40 e aho ke he faahi toga ke he Mouga ko Horepa. He logona hifo e Elia kua nakai fai Isaraela foki ne mahani fakamooli ki a Iehova, ne fakahako fakamitaki he Atua e manatu hepe haana. Mailoga foki, na tuku age e Iehova e tau kotofaaga foou ki a Elia ti talia ai e ia. Ne lagomatai e Iehova a Elia ti ko e fua, ne moua e ia e malolō foou ti liu a ia ke he gahua haana ko e perofeta.​​—1 Patu. 19:5-8, 15-19.

16. Fakamalolō fēfē e Iehova a koe?

¹⁶ Maeke a koe ke fakaaoga e mena ne tupu ki a Elia ke fakamooli ko koe ke he “tua” mo e feaki e aga mitaki. Fakamua, manamanatu ke he tau puhala ne lalago e Iehova a koe. Foaki kia he motua po ke taha Kerisiano motua e lagomatai ki a koe he magaaho tonu? (Kala. 6:2) Lagomatai kia he Tohi Tapu, ha tautolu a tau tohi Kerisiano, mo e tau feleveiaaga a koe ke logona kua leveki e Iehova a koe? He taha magaaho foki ka lagomatai ki a koe he taha he tau puhala nei, manamanatu ke he hauaga he lagomatai  nei ti manatu ke fakaaue ki a Iehova he liogi.​​—Sala. 121:1, 2.

17. Ko e heigoa ne uho ki a Iehova he tau fekafekau haana?

¹⁷ Uaaki, manatu ko e onoonoaga kelea ka fakahehē a tautolu. Ko e manatu he Atua hagaao ki a tautolu kua mua atu e aoga. (Totou Roma 14:4.) Kua uho ki a Iehova e mahani fakamooli ha tautolu mo e tua fakamooli ha tautolu ki a ia. Ko e uho ha tautolu ki a Iehova kua nakai fakavē ke he lahi he mena ne taute e tautolu ma haana. Liga tuga a Elia, kua lahi atu e mena ne taute e koe ki a Iehova ka e nakai mailoga e koe. Liga lagomatai e koe falu he fakapotopotoaga ka e nakai mailoga ai. Ti liga logona he tau tagata he fonua e kupu mooli ha ko e gahua lahi haau.

18. Ko e heigoa ne fakakite he kotofaaga haau mai ia Iehova?

¹⁸ Fakahiku ai, manamanatu ke he tau kotofaaga takitaha mai ia Iehova ko e fakamooliaga kua fiafia a ia ki a koe. (Iere. 20:11) Tuga a Elia, liga loto lolelole a koe ka tuga kua nakai kautū e fekafekauaga haau po ke ka tuga kua nakai hokotia e tau foliaga he fekafekauaga haau ki a Iehova. Ka e moua agaia e koe e lilifu lahi mahaki. Ko e lilifu anei ke fakamatala e tala mitaki mo e fakahigoa ko e taha he Tau Fakamoli a Iehova. Kia tumau e mahani fakamooli ki a Iehova. Ti, tuga ni he talahau e Iesu to maeke ia koe ke ‘hu mai ke he fiafia he hau a iki.’​​—Mata. 25:23.

19. Fēfē e logonaaga haana ne tohi e Salamo 102?

¹⁹ Ne fakaagitau a ia ne tohi e Salamo 102. Ne “matematekelea” a ia, kua mamahi lahi e tino po ke logonaaga haana. Ne “nakai fahia” foki a ia, kakano kua nakai fai malolō a ia ke fakauka ke he tau lekua haana. (Sala. 102, mataulu) Ko e mena ni ne manamanatu a ia ki ai ko e haana mamahi, haana matimati, mo e haana tau logonaaga. (Sala. 102:3, 4, 6, 11) Ne talitonu a ia kua manako a Iehova ke liti hifo a ia ki lalo.​​—Sala. 102:10.

20. Lagomatai fēfē he liogi e tagata hane totoko e tau manatu kelea?

²⁰ Ka kua maeke agaia e salamo ke fakaaoga e moui haana ke fakaheke a Iehova. (Totou Salamo 102:19-21.) Fakakite he Salamo 102 ki a tautolu kua maeke foki a lautolu he “tua” ke mamahi ti liga nakai maeke ke manamanatu ke he ha mena foki. “Tuga ne manu lele tote kua nofo tokotaha ke he tua fale,” ne logona he salamo e matimati, ke tuga kua agaagai ni a ia he tau lekua. (Sala. 102:7) Ka logona hifo pihia a koe, liligi e loto haau ki a Iehova, tuga ne taute he salamo. Maeke he tau liogi haau ke lagomatai a koe ke totoko e tau manatu kelea. Mavehe e Iehova to “hagao mai a ia ke he liogi he tagata nofogati, kua nakai vihiatia foki e ia ha lautolu a liogi.” (Sala. 102:17) Falanaki ke he maveheaga haana.

21. Ka loto lolelole a tautolu, maeke fēfē a tautolu ke lahi e onoonoaga mitaki?

²¹ Fakakite foki he Salamo 102 e puhala ka moua e koe lahi e onoonoaga mitaki. Ne fifili he salamo ke manamanatu ke he tuaga kapitiga haana mo Iehova. (Sala. 102:12, 27) Ne mafanatia a ia ke iloa to ha ha i ai tumau a Iehova ke lagomatai e tau tagata Haana ke fakauka ke he tau kamatamata. Ti ka loto lolelole a koe ti taofi he mena nei a koe mai he lahi e mena ke taute he fekafekauaga he Atua, liogi hagaao ki ai. Ole ke he Atua ke logona e liogi haau ke fakatotoka mai he lekua haau ti pihia foki ke “tokutoku atu ai e higoa a Iehova.”​​—Sala. 102:20, 21.

22. Maeke fēfē a tautolu takitokotaha ke fakafiafia a Iehova?

²² Ē, maeke ia tautolu ke fakaaoga e Tohi Tapu ke fakakite ko tautolu he “tua” ti uho ki a Iehova. Mooli, he lalolagi ha Satani kua liga nakai maeke a tautolu ke tiaki oti e tau logonaaga kelea po ke loto lolelole. Pete ia, igatia a tautolu mo e maeke ke fakafiafia a Iehova mo e moua e moui tukulagi kaeke ke fakauka fakamooli a tautolu ke he fekafekauaga haana.​​—Mata. 24:13.