1. Anto ran bendisyon nen Jehova so mangiiter na liket ed sikatayo?

LABAY nen Jehova ya maliket itayo, tan dakel so iiter ton bendisyon pian nalikna tayoy liket. Unona, mabilay itayo. Nausar tayoy bilay tayo pian idayew so Dios lapud inyasingger to itayod dugan panagdayew. (Sal. 144:15; Juan 6:44) Ipapaseguro nen Jehova ya inaro to itayo tan tulongan to tayon mantultuloy ed panaglingkor. (Jer. 31:3; 2 Cor. 4:16) Panliliketan tayoy espiritual ya paraiso, ya ditan et dakdakel so espiritual a naakan tan nalilikna tayoy aroan na sanaagi. Likud nid satan, walay mabmablin ilalo tayod arapen.

2. Anton liknaan so lalabanan na arum ya matoor a lingkor na Dios?

² Anggano wala iratan ya rason pian manliket itayo, say arum ya lingkor na Dios et negatiboy panmoria dad sarili da. Liknaen dan ag-ira importantid si Jehova pati say panlilingkor da. Isipen dan singa imposiblin panliketan day ‘dakdakel a taon.’ Singa ira manbibilay ed kabilungetan.—Ecl. 11:8.

3. Anto ray nayarin rason na negatibon liknaan?

³ Nayarin say rason no akin ya negatiboy liknaan na arum et lapud nadidismaya ira, walay sakit da, o maedad la ra. (Sal. 71:9; Uli. 13:12; Ecl. 7:7) Sakey ni, amta tayon say puso et manamalingo tan ukomen itayo na satan anggano diad tua et naliliketan  so Dios ed sikatayo. (Jer. 17:9; 1 Juan 3:20) Aakusaan na Diablo iray lingkor na Dios. Tan saramay miparay kanonotan dad si Satanas et nayarin mangimpluensyad sikatayo pian isipen tayon anggapoy kana tayod Dios, singa ed samay imbaga na andiay pananisian si Elifaz ed si Job. Aliwan tua itan nensaman, ya anggad natan.—Job 4:18, 19.

4. Antoy aralen tayod sayan artikulo?

⁴ Diad Kasulatan, malinew ya impaseguro nen Jehova ya sikatoy walad abay na saramay ‘manaakar ed ambilbilunget a dalan.’ (Sal. 23:4, NW) Say sakey ya paraan a sikatoy walad abay tayo et diad panamegley na Salita to. Say Biblia et ‘pakayarin manlalapud Dios ya sarag ton igeba iramay malmalet ya akaletneg,’ anggan saray aliwan panmoria tan negatibon kanonotan. (2 Cor. 10:4, 5) Aralen tayo sirin no panon tayon nausar so Biblia pian magmaliw tan mansiansia itayon positibo. Nagunggonaan kad saya, tan nawalaan kay ideya no panon mo met ya napaseseg so arum.

5. Anton subok so gawaen tayo pian magmaliw itayon positibo?

⁵ Wala ray imbaga nen apostol Pablo ya makatulong pian magmaliw itayon positibo. Pinaseseg toy kongregasyon ed Corinto: “Itultuloy yon suboken so inkasikayo no kasin wala kayo ed pananisia.” (2 Cor. 13:5) Say “pananisia” et say amin ya Kristianon bangat ya walad Biblia. No nanengneng ed saray salita tan gawa tayo ya tutumboken tayo iratan ya bangat, akapasa tayod subok tan ‘wala itayod pananisia.’ Siempre, nepeg tayon usisaen so bilay tayo base ed amin ya Kristianon bangat. Agtayo manpipili na labay tayo labat a tumboken.—Sant. 2:10, 11.

6. Akin et nepeg tayon subokey sarili tayo ‘no kasin wala tayod pananisia’? (Nengnengen so litratod gapo na sayan artikulo.)

⁶ Anganko et agmo labay ya subokey sarilim, lalo la no isipen mon ompan agka met lanlamang makapasa. Balet, tandaan ya mas importante so panmoria nen Jehova nen say panmoria tayo, tan mas atagey so kanonotan to nen say kanonotan tayo. (Isa. 55:8, 9) Uusisaen to ray mandadayew ed sikato aliwan pian ukomen ira, noagta pian anapen iray maong ya kualidad da tan pian tulongan to ra. No usaren moy Salita na Dios pian subokey sarilim ‘no kasin wala kad pananisia,’ say pakanengneng mod sarilim et mas miparad pakanengneng na Dios ed sika. Ontulong itan pian naekal ed kanonotan mo ya anggapoy kanam ed Dios lapud ipapaseguro na Biblia: Pinabpabli ka nen Jehova. No tandaan mo itan, singam lulukasan so kurtina pian onloob so agew ed ambilunget a kuarto.

7. Panon itayon nagunggonaan ed saray matoor ya alimbawa diad Biblia?

⁷ Say epektibon paraan pian nasubok moy sarilim et say pandalepdep ed alimbawa na saray matoor ya totoo diad Biblia. Ikomparam so sarilim ed situasyon o liknaan da, tan isip mo no antoy gawaen mo no sikay walad kipapasen da. Nengnengen tayoy taloran alimbawa ya mangipanengneng no panon mon nausar so Biblia pian nasubok no kasin ‘wala kad pananisia,’ diad ontan et magmaliw kan positibo ed sarilim.

8, 9. (a) Antoy kipapasen na samay pobrin balo? (b) Anto ray posiblin negatibon alikna na samay balo?

⁸ Diad templo ed Jerusalem, naimano nen Jesus so sakey a pobrin balo. Ontulong so alimbawa to pian mansiansia itayon positibo anggano wala ray limitasyon  tayo. (Basaen so Lucas 21:1-4.) Isipen pa so kipapasen na samay balo. Aliwa labat ya say impatey na asawa to so paneermenan to noagta pati say makapuy ya kagagawa na saray lider na relihyon ya “aakmonen da iray kaabungan na saray balon bibii” imbes ya tulongan da ra. (Luc. 20:47) Agaylay irap na bilay to kanian say nidonasyon tod templo et singa labat pigaran minuto ya sueldo na trabahador.

⁹ Imadyin yo pa no anto ray posiblin alikna na samay balo legan ton onloloob ed sular na templo ya sankabembenan toy duaran sinsilyo to. Kasin sankanonot to ya melmelag a maong so ipelag to no ikomparad sarag ton iter nensaman nen mabilay ni asawa to? Kasin nababaingan legan ton sankanengneng iramay walad unaan to ya angkakabaleg so donasyon da, ya ompan iisipen to ni ingen no kasin walay kana na donasyon to? Anggano ontan bilang so alikna to, siansia nin inter toy anggaay nayarian to pian nasuportaay dugan panagdayew.

10. Panon ya impanengneng nen Jesus ya pinabpabli na Dios imay balo?

¹⁰ Impanengneng nen Jesus ya samay balo tan say donasyon to et papablien nen Jehova. Imbaga ton sikatoy “angipelag na mas dakel ni nen say impelag [na amin ya mayayaman].” Anggano nilaok imay impelag na balo ed donasyon ya inter na arum, sikato labat so inrayew nen Jesus. Nayarin ag-amta na saramay mangaasikasod donasyon ed templo ya papablien a maong nen Jehova imay duaran angkelag a sinsilyo tan samay angipelag ed satan. Balet say importante et say panmoria na Dios, aliwan say isipen na arum odino anggan say isipen na samay mismon balo. Sarag mo kasin usaren iyan salaysay pian suboken no kasin wala kad pananisia?

11. Antoy naaralan mod salaysay nipaakar ed pobrin balo?

¹¹ Nayarin naapektoan so panaglingkor mod si Jehova lapud kipapasen mo. Say arum et maedad la odino mansasakit kanian limitadon maong so panaon ya nauusar  da ed panagpulong. Kasin duga ya isipen dan anggapo lay kana na pangi-report dad satan? Anggano aliwa met ya dagdaiset so nagagawaan mo, ompan isipen mo ya melmelag labat itan a kabiangan na amin ya oras ya uusaren na saray lingkor na Dios kada taon. Balet naaralan tayod samay salaysay nipaakar ed pobrin balo ya naiimano tan papablien nen Jehova so kada sagpot tayo, lalo la no mairap so kipapasen tayo. Nonot mo pay impanlingkor mod si Jehova nen imbeneg ya taon. Diad saramay oras ya inusar mo parad sikato, wala kasi nanonotan mon sakey ya oras ya talagan nansakripisyo ka? No ontan, makaseguro kan papablien toy ginawam parad sikato ed saman ya oras. Papaneknekan mon ‘wala kad pananisia’ no aligen mo imay pobrin balo tan gagawaen moy anggaay nayarian mo parad si Jehova.

12-14. (a) Antoy epekto na negatibon liknaan ed si Elias? (b) Akin et onman so alikna nen Elias?

¹² Si propetan Elias et matoor ed si Jehova tan mabiskeg so pananisia to. Balet aminsan et kinmakkapuy so liknaan to kanian impikasi tod si Jehova ya ompatey la komon. Imbaga ton: ‘Ekal mo lay bilay ko natan’! (1 Ara. 19:4) Ompan isipen na saramay agni akaeksperiensya na ontan ya say pikakasi nen Elias et “marlas” o agla ninonot ya panagsalita. (Job 6:3) Balet ontan so tuan nalilikna to. Imbes ya sikatoy pampasnokan nen Aman Jehova, tinulongan to.

¹³ Akin et onman so alikna nen Elias? Antis na satan, indaulo toy agnalinglingwanan ya subok ed Israel ya amaneknek a si Jehova so tuan Dios, tan pinatey so 450 a propeta nen Baal. (1 Ara. 18:37-40) Anganko et ilaloan nen Elias ya ompawil lad dugan panagdayew iray Israelita, balet ta andi. Naamtaan to ni ingen ya sikatoy labay ya ipapatey na mauges ya reynan si Jezebel. Tinmakot si Elias kanian batik ed kalawakan.—1 Ara. 19:2-4.

¹⁴ Inisip nen Elias ya anggapoy gunggona na kimey to bilang propeta. Imbaga tod si Jehova: “Agak magmaong nen saray ateng ko.” Labay ton ibaga et anggapoy kakanaan to ya singa saray pukel na inaatey lan inmuunan atateng to. Singa to sinubok so sarili to base ed mismon estandarte to tan inisip ton anggapoy kana to ed si Jehova odino ed anggan siopa.

15. Panon ya impaseguro na Dios a siansia nin papablien toy Elias?

¹⁵ Balet duma so pakanengneng na Makapanyarin-amin ed si Elias. Ag-anguman so panamabli nen Jehova ed sikato, tan nanggaway paraan so Dios pian ipaseguro itan ed sikato. Angibaki so Dios na anghel ya mamabiskeg ed si Elias. Angitarya met si Jehova na naakan tan danum ya manustunid si Elias diad 40 agew ya pambiahe to paonlad Palandey Horeb. Tan maaron impaamta nen Jehova ed sikato ya wala ni ray arum ya Israelita ya nansiansian matoor. Inikdan met na Dios si Elias na balon kimey, tan inawat to itan. Apaseseg si Elias ed tulong nen Jehova, tan linmigsa lamet ed kimey to bilang propeta.—1 Ara. 19:5-8, 15-19.

16. Anto ray pigaran paraan ya tinulongan ka na Dios?

¹⁶ Natulongan ka na eksperiensya nen Elias pian nasubok mo no kasin walad kad pananisia tan pian magmaliw kan positibo. Unona, isipen pa iray paraan ya tinulongan ka nen Jehova. Kasin walay sakey a lingkor to, nayarin elder o agin maespiritual, ya angiter ed sika na tulong nen kakkaukolan mo itan? (Gal. 6:2) Kasin binmiskeg kad espiritual panamegley na Biblia, saray publikasyon tayo, tan saray aral? Diad onsublay ya naeksperiensyam iratan, nonot mo so  tuan Lapuan na tulong tan misalamat kad Sikato.—Sal. 121:1, 2.

17. Antoy papablien nen Jehova ed saray lingkor to?

¹⁷ Komadua, tandaan mon say negatibon kanonotan et manamalingo. Say importante et say panmoria na Dios ed sikatayo. (Basaen so Roma 14:4.) Papablien nen Jehova so debosyon tan katooran tayod sikato; agto ibabase so kana tayo ed saray nagagawaan tayo. Tan singa si Elias, ompan agmo amta ya dakel la manayay agawaan mo parad si Jehova. Nayarin wala ray apaseseg mod kongregasyon, tan wala ray akaamtad katuaan diad teritorya yo lapud pansasagpot mo.

18. Antoy prupruebaan na asainmin ya inter nen Jehova ed sika?

¹⁸ Komatlo, isip mon kada asainmin ya inter nen Jehova ed sika et prueba ya sikatoy kaibam. (Jer. 20:11) Singa si Elias, ompan onkakapuy so liknaan mo lapud singa anggapoy bunga na serbisyom odino agmo nanaabet iray espiritual a kalat mo. Balet diad tua et walad sika so sankabalgan ya pribilehyo—say pangipulong ed maong a balita tan natawag ed ngaran na Dios. Kanian mansiansia ka labat a matoor. No ontan, singa imbaga nen Jesus, sakey ka ed saramay ‘miliket ed katawan mo.’—Mat. 25:23.

19. Antoy kipapasen na samay angisulat ed Salmo 102?

¹⁹ Nagogonigon imay angisulat ed Salmo 102. Sikatoy ‘maermen’ kanian apektadon maong so laman tan emosyon to. Anggapo lay biskeg ton arapen iray problema. (Sal. 102, superskripsyon) Nanengneng tayod saray salita to ya sikatoy kinmakkapuy lapud sakit na liknaan, ermen, tan kaskasian toy sarili to. (Sal. 102:3, 4, 6, 11) Inisip ton sikatoy pinaulyanan la nen Jehova.—Sal. 102:10.

20. Panon ya ontulong so pikakasi pian nalabanan tayoy negatibon liknaan?

²⁰ Balet anggano ontay nalilikna na salmista, nausar to nin siansiay bilay ton mangidayew ed si Jehova. (Basaen so Salmo 102:19-21.) Nanengneng tayod Salmo 102 ya anggan saramay walad pananisia et manproblema met tan ompan atan lay sankanonot da. Alikna na salmista ya sikatoy singa “anuyaw a manbukbukor ed toktok na abung,” ya puro problema labat so kaiba to. (Sal. 102:7) No ontan so naliliknam, ibesngaw mod si Jehova, ya singa ginawa na salmista. Say pikakasi na maermen—say pikakasim—et ontulong ed sikan nalabanan iray negatibon kanonotan. Insipan nen Jehova ya ‘pablien to so pikakasi na naukolan, tan agto balawen so pikakasi ra.’ (Sal. 102:17) Panmatalkan mo itan a sipan.

21. Panon ya magmaliw a mas positibo so sakey ya lalabanan toy negatibon liknaan?

²¹ Nanengneng met ed Salmo 102 no panon kan magmaliw ya mas positibo. Impokus la na salmista so imano to diad relasyon tod si Jehova. (Sal. 102:12, 27) Aligliwa ta amta ton wadtan ya lanang si Jehova ya ontulong ed saray lingkor to. Kanian no lapud negatibo iran liknaan et agmo nagawaan so amin a labay mon gawaen ed panaglingkor, ipikasim itan ed si Jehova. Kerew mod Dios ya dengelen toy pikakasim, aliwa labat a pian nainawaan ka, noagta pian ‘nipaamta so ngaran nen Jehova.’—Sal. 102:20, 21.

22. Panon ya napaliket na balang sakey ed sikatayo si Jehova?

²² On, usaren tayo so Biblia pian paneknekan ya wala tayod pananisia tan mabmabli itayod si Jehova. Tua, agtayo sarag ya ekalen so amin ya negatibon liknaan o pakadismaya diad sayan sistema na mundo. Balet, napaliket na balang sakey ed sikatayo si Jehova tan nilaban itayo no mantultuloy itayon manlingkor ed sikato.—Mat. 24:13.