1. Kiko Yehova ta duna nos pa nos por ta felis?

YEHOVA ke pa nos ta felis, p’esei e ta duna nos tur loke nos tin mester pa nos por ta felis. Pa kuminsá, el a duna nos bida. I nos por usa nos bida pa alab’é, pasobra ta é a hala nos na e religion berdadero. (Sal. 144:15; Huan 6:44) Ademas, Yehova ta sigurá nos di su amor i ta yuda nos sigui sirbié fielmente. (Yer. 31:3; 2 Kor. 4:16) Nos ta gosa tambe di un paradeis spiritual, kaminda nos ta haña un abundansia di kuminda spiritual i por disfrutá di un hermandat amoroso. Es mas, nos tin un maravioso speransa pa futuro.

2. Kiko algun fiel sirbidó di Dios ta lucha kuné?

² Apesar ku nos tin tur e motibunan akí pa ta felis, tin algun fiel sirbidó di Yehova ku tin pensamentunan negativo di nan mes. Kisas nan ta sinti ku nan ni nan sirbishi no ta bal nada den bista di Yehova. Pa personanan ku konstantemente ta lucha ku pensamentunan negativo, e idea di ta felis pa “hopi aña” ta simplemente un soño. Pa nan, tur dia kos ta pinta skur.—Ekl. 11:8.

3. Kiko por lanta sintimentunan negativo?

³ Awor, kiko ta algun di e kosnan ku por lanta sintimentunan negativo? Desepshon, malesa òf problemanan ku edat avansá ta trese kuné. (Sal. 71:9; Pro. 13:12; Ekl. 7:7) Anto nos  no mester lubidá ku nos kurason ta engañoso i por kondená nos maske Dios ta kontentu ku nos. (Yer. 17:9; 1 Huan 3:20) Diabel tambe ta lanta akusashonnan falsu kontra sirbidónan di Dios. I hende ku ta bai tras di e ideanan di Satanas ta purba di pone nos kere loke e hòmber infiel, Elifaz, a bisa Yòb, esta, ku nos no ta bal nada den bista di Dios. Esei sigur tabata un mentira, i te awe e ta asina.—Yòb 4:18, 19.

4. Kiko nos lo trata den e artíkulo akí?

⁴ Yehova a mustra bon kla den su Palabra ku lo e ta ku esnan ku ta “kana den e vaye di sombra.” (Sal. 23:4) Un manera ku Yehova ta ku nos ta mediante su Palabra. Beibel ta un “arma poderoso ku Dios a duna nos pa tumba loke ta fuertemente ankrá,” inkluso pensamentunan negativo ku nos por tin di nos mes. (2 Kor. 10:4, 5) P’esei, laga nos wak kon nos por usa Beibel pa yuda nos kultivá i keda ku un punto di bista positivo di nos mes. E análisis akí lo benefisiá nos personalmente i yuda nos mira kon nos por animá otro hende.

5. Ki saminashon por yuda nos tin un punto di bista positivo di nos mes?

⁵ Apòstel Pablo a menshoná algun kos ku por yuda nos kultivá un aktitut positivo. El a urgi e kristiannan di Korinto: “Sigui saminá boso mes pa sa si boso ta den e fe.” (2 Kor. 13:5) Ku e palabra “fe” Pablo tabata referí na e totalidat di kreensia kristian ku tin den Beibel. Si nos palabra- i echonan ta na armonia ku e kreensianan ei, nos por bisa ku nos ta “den e fe.” Ta klaru ku nos no por kumpli ku solamente e kreensianan ku ta kumbiní nos. Nos mester obedesé tur e siñansanan ku tin den Beibel.—Sant. 2:10, 11.

6. Dikon nos mester saminá nos mes pa wak ‘si nos ta den e fe’? (Wak e promé plachi.)

⁶ Kisas bo ta duda pa hasi e saminashon ei, spesialmente si bo ta sinti ku lo bo no keda satisfecho ku e resultado. Pero, loke Yehova ta pensa di nos ta mas importante ku loke nos ta pensa di nos mes; su pensamentunan ta “mas haltu” ku esnan di nos. (Isa. 55:8, 9) Yehova ta saminá su sirbidónan, no pa kondená nan, sino pa enfoká riba nan bon kualidatnan i pa yuda nan. Ora bo ta usa Beibel pa wak ‘si bo ta den e fe,’ lo bo kuminsá mira bo mes manera Dios ta mira bo. Esaki lo yuda bo vense kualke pensamentu negativo i yuda bo kòrda loke Yehova ta pensa di bo, esta, ku bo ta balioso den su bista. Esei lo ta komo si fuera bo ta habri kortina di un kamber skur pa laga rayo di solo drenta.

7. Kon ehèmpel di sirbidónan fiel di pasado por yuda nos?

⁷ Un manera efikas pa saminá nos mes ta di meditá riba ehèmpel di personanan fiel den Beibel. Nos tin ku kompará nan situashon i nan sintimentunan ku esnan di nos i pensa kiko nos lo a hasi si nos tabata den nan situashon. Awor, laga nos analisá tres ehèmpel i wak kon nos por usa Beibel pa hasi sigur ku nos ta “den e fe” i asina kuminsá pensa mas positivo di nos mes.

8, 9. (a) Den ki situashon e biuda pober tabata? (b) Ki pensamentunan negativo e biuda lo por tabatin?

⁸ Na e tèmpel di Herúsalèm, Hesus a opservá un biuda pober. E ehèmpel di e biuda akí por yuda nos keda ku un punto di bista positivo di nos mes apesar di nos limitashonnan. (Lesa Lukas 21:1-4.) Den ki situashon e biuda tabata? Pa di promé, e tabatin hopi doló debí na morto di su esposo. Fuera di esei, e lidernan religioso golos tabata ‘probechá di e biudanan’ i hòrta nan en bes di yuda nan. (Luk. 20:47) E tabata asina pober ku e por  a kontribuí ku solamente loke un trahadó lo a gana den apénas 15 minüt.

⁹ Purba di imaginá bo kon e biuda lo a sintié segun ku e tabata drenta e patio di e tèmpel ku su dos monedanan. Kisas e tabata pensa ku loke e tabata bai duna no tabata nada na komparashon ku loke lo e por a kontribuí kuné si su kasá tabata na bida. Akaso el a sinti bèrgwensa ora el a mira e donashonnan grandi ku e hendenan su dilanti a hasi, kisas pensando ku su donashon no tabatin balor? Aunke e por tabatin e pensamentunan ei, tòg el a hasi loke e tabata por pa apoyá adorashon berdadero.

10. Kon Hesus a mustra ku e biuda tabata balioso den bista di Dios?

¹⁰ Hesus a indiká ku tantu e biuda komo su donashon tabata balioso den bista di Yehova. El a bisa ku e biuda ‘a tira mas ku tur e rikunan.’ Aunke e biuda su monedanan a bai huntu ku tur e otro donashonnan, Hesus a elogiá é. Ora e tesoreronan a haña e dos monedanan, nan lo no por a imaginá nan mes kuantu balor esakinan tabatin pa Yehova i kon presioso e biuda tabata den su bista. Pero loke realmente tabata importante tabata Yehova su punto di bista i no loke hende tabata pensa ni loke e biuda tabata pensa di su mes. Abo por usa e relato akí pa saminá bo mes pa wak si bo ta “den e fe”?

11. Kiko nos por siña for di e relato di e biuda pober?

¹¹ Ta bèrdat ku nos sirkunstansianan por stroba nos di duna Yehova loke nos ta deseá. Por ehèmpel, debí na edat avansá òf malesa, algun ruman no por dediká masha tempu na predikashon di e bon notisia. Akaso e rumannan akí mester sinti ku no ta bale la pena raportá nan oranan di sirbishi? Asta ora no tin nada ta stroba un ruman, e por sinti ku su oranan ta solamente un granito kompará ku e kantidat di ora ku e pueblo di Yehova ta dediká tur aña na adorashon na Yehova. Pero, manera nos a siña for di e relato di e biuda pober, Yehova ta mira i ta balorá  tur loke nos ta hasi p’e, spesialmente e esfuersonan ku nos ta hasi apesar di situashon difísil. Pensa un ratu riba e adorashon ku bo a rindi aña pasá na Yehova. Bo mester a hasi un gran esfuerso pa dediká algun di e oranan ei na Yehova? Si ta asina, bo por ta sigur ku Yehova ta balorá loke bo a hasi p’e durante e oranan ei. Pues, meskos ku tabata e kaso ku e biuda pober, ora nos ta hasi tur loke nos por den Yehova su sirbishi, nos tin motibu sólido pa kere ku nos ta “den e fe.”

12-14. (a) Ki sintimentunan negativo a tormentá Elías? (b) Kon bini e tabata sintié asina?

¹² Profeta Elías tabata un hòmber leal na Yehova i tabatin un fe fuerte. Tòg, na un dado momento el a sintié asina desanimá ku el a pidi Yehova pa kita su bida. El a bisa Yehova: “Ta basta; awor, o SEÑOR, tuma mi bida.” (1 Rei. 19:4) Un hende ku nunka a sintié asina desesperá kisas lo por pensa ku Elías a papia sin ‘kontrolá su palabranan’ ora el a hasi orashon na Yehova. (Yòb 6:3) Sinembargo, su sintimentunan tabata real. I Yehova no a rabia kuné; al kontrario, Yehova a yud’é.

¹³ Pero kon bini Elías tabata asina desesperá? Wèl, poko promé ku el a pidi Yehova pa e muri, el a hunga un papel importante den un milager ku a proba ku ta Yehova ta e Dios berdadero. Despues di e milager ei, 450 profeta di Baal a ser ehekutá. (1 Rei. 18:37-40) Probablemente Elías a spera ku despues di e milager ei Yehova su pueblo lo a bolbe na e adorashon berdadero, pero esei no a sosodé. Reina Yézabèl, kende tabata masha malbado, a manda bisa Elías ku lo e laga mat’é. Pa skapa su bida, Elías a hui bai zùit, krusa e tera di Huda i bai den desierto, un lugá infértil i peligroso.—1 Rei. 19:2-4.

¹⁴ Ora Elías tabata su so, el a kuminsá reflekshoná riba su trabou komo profeta i a sinti ku su trabou tabata pòrnada. El a bisa Yehova: “Mi no ta mihó ku mi tatanan.” Elías a sintié inútil, meskos ku e restunan mortal di su antepasadonan. El a husga su mes a base di su propio normanan i a yega na e konklushon ku e ta un frakaso total i ku e no ta bal nada den bista di Yehova ni den bista di hende.

15. Kon Yehova a sigurá Elías ku e ta un persona masha balioso p’e?

¹⁵ Pero e Todopoderoso tabatin un otro punto di bista di Elías. Den su bista, Elías tabata un persona masha balioso, i Yehova a tuma akshon pa proba Elías esei. Yehova a manda un angel pa fortalesé Elías. Ademas, Yehova a perkurá awa i kuminda pa sosten’é durante su biahe di 40 dia pa Seru Horèb. I na un manera bondadoso Yehova a korigí e punto di bista robes ku Elías tabatin, esta, ku e tabata e úniko israelita ku a keda fiel. Tuma nota ku Yehova a duna Elías mas asignashon, loke el a aseptá tambe. Elías a benefisiá mashá di Yehova su yudansa i a haña energia atrobe pa sigui ku su trabou komo profeta.—1 Rei. 19:5-8, 15-19.

16. Menshoná algun manera ku Yehova a sostené bo.

¹⁶ E eksperensia di Elías por yuda bo saminá bo mes pa wak si bo ta den e fe i a la bes yuda bo haña un punto di bista positivo di bo mes. Kon asina? Di promé, pensa riba e maneranan ku Yehova a sostené bo. Podisé un di su sirbidónan, kisas un ansiano òf un otro kristian maduro, a yega di yuda bo ora bo tabatin un òf otro problema. (Gal. 6:2) Ademas, bo no ta sinti ku bo ta ser fortalesé spiritualmente pa medio di Beibel, nos publikashonnan i e reunionnan di kongregashon? E siguiente biaha ku bo haña yudansa den un di e maneranan akí, pensa riba Yehova, e berdadero  fuente di bo yudansa, i hasi orashon pa gradisié.—Sal. 121:1, 2.

17. Ki Yehova ta balorá di su sirbidónan?

¹⁷ Di dos, kòrda ku un punto di bista negativo por ta engañoso. Loke ta importante ta e manera ku Yehova ta mira nos. (Lesa Romanonan 14:4.) Yehova ta balorá nos pa nos deboshon i fieldat na dje i no pa nos logronan. I por ta masha bon ku, meskos ku tabata e kaso ku Elías, bo a hasi mas pa Yehova ku loke bo ta pensa. Probablemente tin personanan den kongregashon ku bo tabatin bon influensia riba nan. I kisas tin personanan den teritorio ku a tende e bèrdat debí na bo esfuersonan.

18. E asignashonnan ku bo ta haña di Yehova ta duna prueba di kiko?

¹⁸ Finalmente, mira kada asignashon ku bo haña for di Yehova komo un prueba ku e ta ku bo. (Yer. 20:11) Kisas bo ta sinti bo desanimá meskos ku Elías pasobra ta parse ku bo sirbishi no ta duna fruta òf ku bo no por logra bo metanan spiritual. No opstante, ainda bo tin e privilegio di mas grandi ku hende por tin: e privilegio di prediká e bon notisia i di por karga e nòmber di Dios. Keda fiel! E ora ei, manera Hesus a bisa, abo tambe lo por “drenta i kompartí e alegria di bo doño.”—Mat. 25:23.

19. Ki situashon e eskritor di Salmo 102 tabata konfrontá?

¹⁹ E eskritor di Salmo 102 tambe tabata desesperá. E tabata “afligí” debí na un inmenso doló, sea físiko òf emoshonal. I e no tabatin forsa pa trata ku su problemanan. (Sal. 102, introdukshon) Su palabranan ta indiká ku e tabata sintié su so i ku e tabata pensa solamente riba su doló i su sintimentunan. (Sal. 102:3, 4, 6, 11) El a pensa ku Yehova kier a bent’é afó.—Sal. 102:10.

20. Kon orashon por yuda hende ku ta lucha ku sintimentu- òf pensamentunan negativo?

²⁰ Asina mes, e salmista por a usa su bida pa alabá Yehova. (Lesa Salmo 102:19-21.) Pues, manera Salmo 102 ta mustra, asta hende ku ta “den e fe” por tin asina tantu doló ku ta difísil pa nan konsentrá riba algu otro. E salmista tabata sintié “manera para solitario riba dak di kas,” komo si fuera ta problema so tabata rondon’é. (Sal. 102:7) Si un dia bo sinti bo asina, deshogá bo kurason serka Yehova, meskos ku e salmista a hasi. Bo orashonnan por yuda bo lucha ku sintimentu- òf pensamentunan negativo. Yehova a primintí ku e ta skucha ‘orashon di esnan desampará i no ta despresiá nan orashon.’ (Sal. 102:17) Konfia den e promesa ei!

21. Kon esnan ku ta lucha ku sintimentunan negativo por haña un punto di bista positivo di nan mes?

²¹ Salmo 102 ta yuda nos mira tambe kon nos por haña un punto di bista positivo di nos mes. E salmista a logra esei ya ku el a skohe pa enfoká su pensamentunan riba su amistat ku Yehova. (Sal. 102:12, 27) E echo ku el a kòrda ku Yehova semper t’ei pa sostené Su pueblo i pa yuda su sirbidónan perseverá den situashon difísil a konsol’é. Pues, si bo ta desanimá i e sintimentu negativo akí ta stroba bo di hasi loke bo ta deseá den Dios su sirbishi, hasi orashon tokante e asuntu. Pidi Yehova pa skucha bo orashon, no solamente pa bo haña alivio pero pa bo por sigui ‘deklará su nòmber.’—Sal. 102:20, 21.

22.  Kon kada un di nos por agradá Yehova?

²² Manera nos a mira, nos por usa Beibel pa proba nos mes ku nos ta “den e fe” i ku nos tin balor den bista di Yehova. Ta bèrdat ku den e mundu malbado akí nos no por kita tur sintimentu negativo ni evitá di sinti nos desanimá. Pero asina mes, kada un di nos por agradá Yehova i ser salbá si nos sigui sirbié fielmente.—Mat. 24:13.