1. Kico Jehova ta duna nos pa nos por ta feliz?

JEHOVA kier pa nos ta feliz, pesey e ta duna nos tur loke nos tin mester pa nos por ta feliz. Pa cuminsa, el a duna nos bida. Y nos por uza nos bida pa alab’e, pasobra ta e a hala nos na e religion berdadero. (Sal. 144:15; Juan 6:44) Ademas, Jehova ta sigura nos di su amor y ta yuda nos sigui sirbie fielmente. (Jer. 31:3; 2 Cor. 4:16) Nos ta gosa tambe di un paradijs spiritual, caminda nos ta haya un abundancia di cuminda spiritual y por disfruta di un hermandad amoroso. Es mas, nos tin un maraviyoso speransa pa futuro.

2. Kico algun fiel sirbidor di Dios ta lucha cu ne?

² A pesar cu nos tin tur e motibonan aki pa ta feliz, tin algun fiel sirbidor di Jehova cu tin pensamentonan negativo di nan mes. Kisas nan ta sinti cu nan ni nan sirbishi no ta bal nada den bista di Jehova. Pa personanan cu constantemente ta lucha cu pensamentonan negativo, e idea di ta feliz pa “hopi aña” ta simplemente un soño. Pa nan, tur dia cos ta malo.—Ecl. 11:8.

3. Kico por lanta sintimentonan negativo?

³ Awor, kico ta algun di e cosnan cu por lanta sintimentonan negativo? Decepcion, maleza of problemanan cu edad avansa  ta trece cu ne. (Sal. 71:9; Prov. 13:12; Ecl. 7:7) Anto nos no mester lubida cu nos curason ta engañoso y por condena nos maske Dios ta contento cu nos. (Jer. 17:9; 1 Juan 3:20) Diabel tambe ta lanta acusacionnan falso contra sirbidornan di Dios. Y hende cu ta bay tras di e ideanan di Satanas ta purba di pone nos kere loke e homber infiel, Elifaz, a bisa Job, esta, cu nos no ta bal nada den bista di Dios. Esey sigur tabata un mentira, y te awe e ta asina.—Job 4:18, 19.

4. Kico nos lo trata den e articulo aki?

⁴ Jehova a mustra bon cla den su Palabra cu lo e ta cu esnan cu ta “cana den e vaye di sombra.” (Sal. 23:4) Un manera cu Jehova ta cu nos ta mediante su Palabra. Bijbel ta un “arma poderoso cu Dios a duna nos pa tumba loke ta fuertemente hancra”, incluso pensamentonan negativo cu nos por tin di nos mes. (2 Cor. 10:4, 5) Pesey, laga nos wak con nos por uza Bijbel pa yuda nos cultiva y keda cu un punto di bista positivo di nos mes. E analisis aki lo beneficia nos personalmente y yuda nos mira con nos por anima otro hende.

5. Ki saminacion por yuda nos cultiva un punto di bista positivo?

⁵ Apostel Pablo a menciona algun cos cu por yuda nos cultiva un punto di bista positivo. El a urgi e cristiannan di Corinto: “Sigui samina boso mes pa sa si boso ta den e fe.” (2 Cor. 13:5) Cu e palabra “fe” Pablo tabata referi na e totalidad di creencia cristian cu tin den Bijbel. Si nos palabra- y echonan ta na harmonia cu e creencianan ey, nos por bisa cu nos ta “den e fe.” Ta claro cu nos no por cumpli cu solamente e creencianan cu ta cumbini nos. Nos mester obedece tur e siñansanan cu tin den Bijbel.—Sant. 2:10, 11.

6. Dicon nos mester samina nos mes pa wak ‘si nos ta den e fe’? (Wak e prome plachi.)

⁶ Kisas bo ta duda pa haci e saminacion ey, specialmente si bo ta sinti cu lo bo no keda satisfecho cu e resultado. Pero, loke Jehova ta pensa di nos ta mas importante cu loke nos ta pensa di nos mes; su pensamentonan ta “mas halto” cu esnan di nos. (Isa. 55:8, 9) Jehova ta samina su sirbidornan, no pa condena nan, sino pa enfoca riba nan bon cualidadnan y pa yuda nan. Ora bo ta uza Bijbel pa wak ‘si bo ta den e fe’, lo bo cuminsa mira bo mes manera Dios ta mira bo. Esaki lo yuda bo vence cualkier pensamento negativo y yuda bo corda loke Jehova ta pensa di bo, esta, cu bo ta valioso den su bista. Esey lo ta comosifuera bo ta habri cortina di un camber scur pa laga rayo di solo drenta.

7. Con ehempel di sirbidornan fiel di pasado por yuda nos?

⁷ Un manera eficaz pa samina nos mes ta di medita riba ehempel di personanan fiel den Bijbel. Nos tin cu compara nan situacion y nan sintimentonan cu esnan di nos y pensa kico nos lo a haci si nos tabata den nan situacion. Awor, laga nos analisa tres ehempel y wak con nos por uza Bijbel pa haci sigur cu nos ta “den e fe” y asina cuminsa pensa mas positivo di nos mes.

8, 9. (a) Den ki situacion e viuda pober tabata? (b) Ki pensamentonan negativo e viuda lo por tabatin?

⁸ Na e tempel di Jerusalem, Hesus a observa un viuda pober. E ehempel di e viuda aki por yuda nos keda cu un punto di bista positivo di nos mes a pesar di nos limitacionnan. (Lesa Lucas 21:1-4.) Den ki situacion e viuda tabata? Pa di prome, e tabatin hopi dolor debi na morto di su esposo. Fuera di esey, e lidernan religioso golos tabata ‘probecha di e viudanan’ y horta nan en bes di yuda nan. (Luc. 20:47) E tabata asina  pober cu e por a contribui cu solamente loke un trahador lo a gana den apenas 15 minuut.

⁹ Purba di imagina bo con e viuda lo a sintie segun cu e tabata drenta e patio di e tempel cu su dos monedanan. Kisas e tabata pensa cu loke e tabata bay duna no tabata nada na comparacion cu loke lo e por a contribui cu ne si su casa tabata na bida. Acaso el a sinti berguensa ora el a mira e donacionnan grandi cu e hendenan su dilanti a haci, kisas pensando cu su donacion no tabatin balor? Aunke e por tabatin e pensamentonan ey, toch el a haci loke e tabata por pa apoya adoracion berdadero.

10. Con Hesus a mustra cu e viuda tabata valioso den bista di Dios?

¹⁰ Hesus a indica cu tanto e viuda como su donacion tabata valioso den bista di Jehova. El a bisa cu e viuda ‘a tira mas cu tur e riconan.’ Aunke e viuda su monedanan a bay hunto cu tur e otro donacionnan, Hesus a elogia e. Ora e tesoreronan a haya e dos monedanan, nan lo no por a imagina nan mes cuanto balor esakinan tabatin pa Jehova y con precioso e viuda tabata den su bista. Pero loke realmente tabata importante tabata Jehova su punto di bista y no loke hende tabata pensa ni loke e viuda tabata pensa di su mes. Abo por uza e relato aki pa samina bo mes pa wak si bo ta “den e fe”?

11. Kico nos por siña for di e relato di e viuda pober?

¹¹ Ta berdad cu nos circunstancianan por stroba nos di duna Jehova loke nos ta desea. Por ehempel, debi na edad avansa of maleza, algun ruman no por dedica hopi tempo na predicacion di e bon noticia. Acaso e rumannan aki mester sinti cu no ta bale la pena raporta nan oranan di sirbishi? Hasta ora no tin nada ta stroba un ruman, e por sinti cu su oranan ta poco compara cu e cantidad di ora cu e pueblo di Jehova ta dedica tur aña na adoracion na Jehova. Pero, manera nos a siña for di e  relato di e viuda pober, Jehova ta mira y ta balora tur loke nos ta haci p’e, specialmente e esfuersonan cu nos ta haci a pesar di situacion dificil. Pensa un rato riba e adoracion cu bo a rindi aña pasa na Jehova. Bo mester a haci hopi esfuerso pa dedica algun di e oranan ey na Jehova? Si ta asina, bo por ta sigur cu Jehova ta balora loke bo a haci p’e durante e oranan ey. Pues, mescos cu tabata e caso cu e viuda pober, ora nos ta haci tur loke nos por den Jehova su sirbishi, nos tin motibo solido pa kere cu nos ta “den e fe.”

12-14. (a) Ki sintimentonan negativo a tormenta Elias? (b) Con bin e tabata sintie asina?

¹² Profeta Elias tabata un homber leal na Jehova y tabatin un fe fuerte. Toch, na un dado momento el a sintie asina desanima cu el a pidi Jehova pa kita su bida. El a bisa Jehova: “Ta basta; awor, o SEÑOR, tuma mi bida.” (1 Rey. 19:4) Un hende cu nunca a sintie asina desespera kisas lo por pensa cu Elias a papia sin ‘controla su palabranan’ ora el a haci oracion na Jehova. (Job 6:3) Sinembargo, su sintimentonan tabata real. Y Jehova no a rabia cu ne; al contrario, Jehova a yud’e.

¹³ Pero con bin Elias tabata asina desespera? Wel, poco prome cu el a pidi Jehova pa e muri, el a hunga un papel importante den un milager cu a proba cu ta Jehova ta e Dios berdadero. Despues di e milager ey, 450 profeta di Baal a ser ehecuta. (1 Rey. 18:37-40) Probablemente Elias a spera cu despues di e milager ey Jehova su pueblo lo a bolbe na e adoracion berdadero, pero esey no a sosode. Reina Jezabel, kende tabata masha malbado, a manda bisa Elias cu lo e laga mat’e. Pa scapa su bida, Elias a huy bay zuid, crusa e tera di Juda y bay den desierto, un luga infertil y peligroso.—1 Rey. 19:2-4.

¹⁴ Ora Elias tabata su so, el a cuminsa reflexiona riba su trabou como profeta y a sinti cu su trabou tabata pornada. El a bisa Jehova: “Mi no ta mihor cu mi tatanan.” Elias a sintie inutil, mescos cu e restonan mortal di su antepasadonan. El a husga su mes a base di su propio normanan y a yega na e conclusion cu e ta un fracaso total y cu e no ta bal nada den bista di Jehova ni den bista di hende.

15. Con Jehova a sigura Elias cu e ta un persona masha valioso p’e?

¹⁵ Pero e Todopoderoso tabatin un otro punto di bista di Elias. Den su bista, Elias tabata un persona masha valioso, y Jehova a tuma accion pa proba Elias esey. Jehova a manda un angel pa fortalece Elias. Ademas, Jehova a percura awa y cuminda pa sosten’e durante su biahe di 40 dia pa Sero Horeb. Y na un manera bondadoso Jehova a corigi e punto di bista robes cu Elias tabatin, esta, cu e tabata e unico Israelita cu a keda fiel. Tuma nota cu Jehova a duna Elias mas asignacion, loke el a acepta tambe. Elias a beneficia masha hopi di Jehova su yudansa y a haya energia atrobe pa sigui cu su trabou como profeta.—1 Rey. 19:5-8, 15-19.

16. Menciona algun manera cu Jehova a sostene bo.

¹⁶ E experencia di Elias por yuda bo samina bo mes pa wak si bo ta den e fe y alabes yuda bo haya un punto di bista positivo di bo mes. Con asina? Di prome, pensa riba e maneranan cu Jehova a sostene bo. Podise un di su sirbidornan, kisas un anciano of un otro cristian maduro, a yega di yuda bo ora bo tabatin un of otro problema. (Gal. 6:2) Ademas, bo no ta sinti cu bo ta ser fortalece spiritualmente pa medio di Bijbel, nos publicacionnan y e reunionnan di congregacion? E siguiente biaha cu bo haya yudansa den un di e maneranan  aki, pensa riba Jehova, e berdadero fuente di bo yudansa, y haci oracion pa gradicie.—Sal. 121:1, 2.

17. Ki Jehova ta balora di su sirbidornan?

¹⁷ Di dos, corda cu un punto di bista negativo por ta engañoso. Loke ta importante ta e manera cu Jehova ta mira nos. (Lesa Romanonan 14:4.) Jehova ta balora nos pa nos devocion y fieldad na dje y no pa nos logronan. Y por ta masha bon cu, mescos cu tabata e caso cu Elias, bo a haci mas pa Jehova cu loke bo ta pensa. Probablemente tin personanan den congregacion cu bo tabatin bon influencia riba nan. Y kisas tin personanan den teritorio cu a tende e berdad debi na bo esfuersonan.

18. E asignacionnan cu bo ta haya di Jehova ta duna prueba di kico?

¹⁸ Finalmente, mira cada asignacion cu bo haya for di Jehova como un prueba cu e ta cu bo. (Jer. 20:11) Kisas bo ta sinti bo desanima mescos cu Elias pasobra ta parce cu bo sirbishi no ta duna fruta of cu bo no por logra bo metanan spiritual. No obstante, ainda bo tin e privilegio di mas grandi cu hende por tin: e privilegio di predica e bon noticia y di por carga e nomber di Dios. Keda fiel! E ora ey, manera Hesus a bisa, abo tambe lo por “drenta y comparti e alegria di bo doño.”—Mat. 25:23.

19. Ki situacion e escritor di Salmo 102 tabata confronta?

¹⁹ E escritor di Salmo 102 tambe tabata desespera. E tabata “afligi” debi na un inmenso dolor, sea fisico of emocional. Y e no tabatin forsa pa trata cu su problemanan. (Sal. 102, introduccion) Su palabranan ta indica cu e tabata sintie su so y cu e tabata pensa solamente riba su dolor y su sintimentonan. (Sal. 102:3, 4, 6, 11) El a pensa cu Jehova kier a bent’e afo.—Sal. 102:10.

20. Con oracion por yuda hende cu ta lucha cu sintimento- of pensamentonan negativo?

²⁰ Asina mes, e salmista por a uza su bida pa alaba Jehova. (Lesa Salmo 102:19-21.) Pues, manera Salmo 102 ta mustra, hasta hende cu ta “den e fe” por tin asina tanto dolor cu ta dificil pa nan concentra riba algo otro. E salmista tabata sintie “manera parha solitario riba dak di cas”, comosifuera ta problema so tabata rondon’e. (Sal. 102:7) Si un dia bo sinti bo asina, desahoga bo curason cerca Jehova, mescos cu e salmista a haci. Bo oracionnan por yuda bo lucha cu sintimento- of pensamentonan negativo. Jehova a priminti cu e ta scucha ‘oracion di esnan desampara y no ta desprecia nan oracion.’ (Sal. 102:17) Confia den e promesa ey!

21. Con esnan cu ta lucha cu sintimentonan negativo por haya un punto di bista positivo di nan mes?

²¹ Salmo 102 ta yuda nos mira tambe con nos por haya un punto di bista positivo di nos mes. E salmista a logra esey ya cu el a scoge pa enfoca su pensamentonan riba su amistad cu Jehova. (Sal. 102:12, 27) E echo cu el a corda cu Jehova semper t’ey pa sostene Su pueblo y pa yuda su sirbidornan persevera den situacion dificil a consol’e. Pues, si bo ta desanima y e sintimento negativo aki ta stroba bo di haci loke bo ta desea den Dios su sirbishi, haci oracion tocante e asunto. Pidi Jehova pa scucha bo oracion, no solamente pa bo haya alivio pero pa bo por sigui ‘declara su nomber.’—Sal. 102:20, 21.

22.  Con cada un di nos por agrada Jehova?

²² Manera nos a mira, nos por uza Bijbel pa proba nos mes cu nos ta “den e fe” y cu nos tin balor den bista di Jehova. Ta berdad cu den e mundo malbado aki nos no por kita tur sintimento negativo ni evita di sinti nos desanima. Pero asina mes, cada un di nos por agrada Jehova y ser salba si nos sigui sirbie fielmente.—Mat. 24:13.