1. Olketa wanem blessing nao Jehovah givim wea mekem iumi hapi?

JEHOVAH laekem iumi for hapi and hem givim staka samting wea savve mekem iumi hapi. Olsem example, hem givim iumi laef. Iumi savve iusim laef bilong iumi for praisem God, from hem nao leadim iumi kam for worshipim hem. (Ps. 144:15; John 6:44) Jehovah showimaot hem lovem iumi, and hem helpem iumi gohed faithful for worshipim hem. (Jer. 31:3; 2 Cor. 4:16) Iumi hapi for stap long spiritual paradaes wea iumi savve kasem staka spiritual kaikai and iumi garem olketa brata and sista wea lovem iumi. And tu, iumi garem nambawan hope for future.

2. Samfala wea faithful long God feel hao samfala taem?

² Nomata iumi garem staka reason for hapi, samfala wea faithful for worshipim God savve ting daonem olketa seleva samfala taem. Maet olketa feel olsem Jehovah no tinghae long olketa, or long waka wea olketa duim for hem. Olketa wea garem kaen feeling olsem, maet tingse hem hard for olketa hapi for “plande year.” Olketa feel olsem laef bilong olketa hard tumas.—Eccl. 11:8.

3. Wanem nao savve mekem samfala brata and sista for ting daonem olketa seleva?

³ Maet olketa brata and sista hia ting daonem olketa seleva from samfala samting mekem olketa feel nogud, olketa sik, or olketa  olo. (Ps. 71:9; Prov. 13:12; Eccl. 7:7) And tu, iumi mas luksavve heart bilong iumi savve ‘laea long iumi’ and savve mekem iumi feel guilty nomata God hem hapi long iumi. (Jer. 17:9; 1 John 3:20) Satan laea abaotem pipol bilong God. Satan mekem Eliphaz for sei Job no important long God, bat datwan hem no tru. Long taem bilong iumi olketa wea sei iumi no important long God olketa laea tu.—Job 4:18, 19.

4. Wanem nao bae iumi storyim long disfala study?

⁴ Insaed Bible Jehovah talem iumi hem bae helpem and stap witim olketa wea sorre and ting daonem olketa seleva. (Ps. 23:4) Bible hem wanfala samting wea Jehovah givim for helpem iumi. Bible “garem paoa for aotem olketa samting wea strong tumas.” Diswan minim Bible savve helpem iumi for no ting daonem iumiseleva and for garem stretfala tingting abaotem iumiseleva. (2 Cor. 10:4, 5) Distaem bae iumi storyim hao Bible savve helpem iumi for gohed hapi long waka wea iumi duim for Jehovah. Disfala study maet helpem iu, and tu, maet iu savve iusim disfala information for encouragem narawan.

5. Wanem nao iumi savve duim wea savve helpem iumi for hapi long waka wea iumi duim for Jehovah?

⁵ Aposol Paul storyim samfala samting wea savve helpem iumi for hapi long waka wea iumi duim for Jehovah. Hem sei olsem long kongregeson long Corinth: “Gohed for lukluk gud long iufala seleva for savve sapos iufala followim yet olketa tru teaching.” (2 Cor. 13:5) “Olketa tru teaching” hem minim olketa teaching insaed Bible wea olketa Christian bilivim. Sapos iumi “lukluk gud long iumiseleva,” and iumi lukim wanem iumi talem and duim hem followim wanem Bible teachim, datwan showimaot iumi “followim yet olketa tru teaching.” Iumi no chusim nomoa samfala teaching long Bible wea iumi laek followim. Bat iumi mas obeyim evri samting wea Bible talem for olketa Christian.—Jas. 2:10, 11.

6. Why nao iumi shud lukluk gud long iumiseleva for savve sapos iumi “followim yet olketa tru teaching”? (Lukim piksa long start bilong study.)

⁶ Maet from iumi ting daonem iumiseleva datwan mekem iumi hol bak lelebet for lukluk gud long iumiseleva. Bat tingting bilong Jehovah abaotem iumi nao hem important winim hao iumi ting long iumiseleva, bikos savve bilong hem winim savve bilong iumi. (Isa. 55:8, 9) Jehovah lukluk gud long olketa wea worshipim hem, no for lukim nogud samting wea olketa duim, bat hem lukluk long gudfala wei bilong olketa and helpem olketa. Taem iumi iusim Bible for lukluk gud long iumiseleva for savve ‘sapos iumi followim yet olketa tru teaching,’ datwan bae helpem iumi for minim tingting bilong God abaotem iumi. Diswan bae helpem iumi for no ting daonem iumiseleva bat luksavve long disfala tru samting wea Bible talem: Iumi important long God. Taem iumi luksavve long datwan, hem olsem taem iumi openem curtain mekem sun shaen kam insaed long rum wea hem dark.

7. Hao nao example bilong olketa wea faithful wea Bible storyim savve helpem iumi?

⁷ Wei for ting raonem example bilong olketa wea faithful wea Bible storyim savve helpem iumi for lukluk gud long iumiseleva. Ting raonem samting wea kasem olketa and hao olketa feel, and ting raonem sapos sem samting kasem iumi, wanem nao bae iumi duim. Iumi bae storyim thrifala example wea showimaot hao Bible savve helpem iumi for luksavve iumi ‘followim olketa tru teaching.’ Datwan bae helpem iumi tu for hapi long waka wea iumi duim for God.

8, 9. (a) Wanem nao olketa samting wea kasem datfala widow woman? (b) Wanem nao samfala samting wea maet mekem datfala widow woman ting daonem hemseleva?

⁸ Long temple long Jerusalem Jesus lukim  wanfala widow woman wea poor tumas. Example bilong datfala woman savve helpem iumi for hapi long waka bilong God nomata iumi no savve duim evri samting wea iumi laek for duim. (Readim Luke 21:1-4.) Ting raonem olketa samting wea kasem hem. Hasband bilong hem dae. And tu, olketa bigman long religion wea shud helpem olketa widow woman, olketa greedy and savve steal from olketa woman hia. (Luke 20:47) From hem poor tumas, contribution wea hem fit for givim long temple hem semsem olsem pei wea wanfala wakaman savve kasem long waka for 15 minute nomoa.

⁹ Tingim feeling bilong datfala widow woman taem hem kam insaed long temple and holem tufala coin nomoa. Waswe, hem tingse selen wea hem holem hem smol tumas and tingse maet hem savve givim big selen sapos hasband bilong hem laef? Waswe, hem shame taem hem lukim staka selen wea olketa narawan givim, and feel olsem selen hem givim hem smol tumas? Nomata hem feel olsem, hem givim evri samting wea hem garem for sapotim tru worship.

10. Wanem nao Jesus talem wea showimaot Jehovah tinghae long datfala widow woman?

¹⁰ Jesus sei Jehovah tinghae long datfala widow woman and contribution wea hem givim. Hem sei ‘selen wea hem givim hem barava winim nao selen wea olketa wea rich givim.’ Nomata olketa narawan tu putim selen long contribution box, bat Jesus mekhae long samting wea datfala woman givim. Olketa long temple wea kaontem olketa contribution no savve Jehovah barava tinghae long datfala woman and tufala coin wea hem givim. Nomata olsem, tingting bilong Jehovah abaotem datfala woman nao hem important, and no tingting bilong olketa narawan or hao hem ting long hemseleva. Iumi savve iusim disfala story for savve sapos iumi “followim yet olketa tru teaching.”

11. Wanem nao iumi savve lanem from example bilong datfala widow woman?

¹¹ Iumi evriwan no semsem long wanem iumi savve duim for Jehovah. Samfala no savve duim wanem olketa laek for duim long preaching waka bikos olketa olo  or sik. Waswe, hem stret for olketa tingse hem no important for raetem report for preaching waka wea olketa duim? Nomata iumi young or iumi healthy, maet iumi feel olsem waka wea iumi duim long ministry hem smol tumas taem iumi tingim staka hour wea pipol bilong God iusim long preaching waka. Example bilong datfala widow woman helpem iumi for savve Jehovah luksavve and tinghae long evri samting iumi duim for hem, especially taem iumi kasem hard taem. Tingim olketa samting wea iu duim long worship bilong iu for Jehovah long year wea go pas. Waswe, wanfala long olketa hour wea iu iusim long preaching waka iu mas barava waka hard for kasem? Sapos olsem, iu savve sure Jehovah tinghae long wanem iu duim for hem long datfala hour. Taem iumi followim example bilong datfala widow woman and duim best bilong iumi for worshipim Jehovah, datwan showimaot iumi “followim yet olketa tru teaching.”

12-14. (a) From Elijah barava sorre, wanem nao hem talem long Jehovah? (b) Wanem nao happen wea mekem Elijah for feel olsem?

¹² Profet Elijah hem duim wanem Jehovah laekem and hem garem strongfala faith. Nomata olsem, wantaem hem barava sorre tumas and hem laekem for Jehovah killim hem dae nomoa. Hem sei: “Diswan hem tumas nao! Jehovah, letem mi dae nomoa.” (1 Ki. 19:4) Pipol wea no kasem kaen sorre feeling olsem maet sei Elijah “toktok olobaot” long datfala prea. (Job 6:3) Bat hem nao feeling bilong Elijah. Jehovah no kros long Elijah, bat hem helpem hem.

¹³ Wanem nao happen wea mekem Elijah feel olsem? No longtaem bifor Elijah talem datfala prea, hem duim wanfala mirakol wea pruvim Jehovah hem tru God. Bihaen disfala mirakol, Elijah talem olketa Israelite for killim dae 450 profet bilong Baal. (1 Ki. 18:37-40) Elijah tingse pipol bilong God bae kam bak for worshipim tru God, bat datwan no happen. Queen Jezebel talem Elijah bae hem killim hem dae. From Elijah fraet, hem ranawe go long Judah and go stap long wilderness.—1 Ki. 19:2-4.

¹⁴ Taem Elijah stap long wilderness hem start for tingse hem waka hard nating nomoa olsem profet. Hem sei long Jehovah: “Mi semsem nomoa olsem olketa laen dadi bilong mi.” Hem feel olsem hem iusles nomoa, olsem olketa grani bilong hem wea dae longtaem finis. Long tingting bilong Elijah, hem iusles nomoa and no fit for duim eni samting for Jehovah or for eniwan.

15. Wanem nao God duim for showimaot hem tinghae long Elijah?

¹⁵ Bat Jehovah tinghae long Elijah, and helpem hem for luksavve long datwan. God sendem angel for strongim hem. And tu, Jehovah givim kaikai and drink for strongim Elijah long 40 day wea hem wakabaot for go long Mount Horeb. Taem Elijah tingse no eni nara Israelite faithful long Jehovah, God stretem tingting bilong hem. And tu, Jehovah givim samfala nara waka long Elijah, and hem willing for duim olketa waka hia. From Jehovah helpem Elijah, datwan strongim hem for duim moa waka bilong hem olsem profet.—1 Ki. 19:5-8, 15-19.

16. Wanem nao samfala samting wea Jehovah duim for strongim iu?

¹⁶ Wei for ting raonem example bilong Elijah savve helpem iumi for luksavve sapos iumi “followim yet olketa tru teaching,” and for hapi long waka wea iumi duim for God. First samting, tingim olketa samting wea Jehovah duim for strongim iu. Maet wanfala elder or nara mature Christian helpem iu long taem wea iu needim. (Gal. 6:2) Maet samting iu readim long Bible and olketa Christian pablikeson, or samting iu herem long olketa meeting, helpem iu for luksavve Jehovah tingim iu. Hem nao samfala  wei wea Jehovah savve strongim iumi. Next taem Jehovah helpem iu long wei olsem, hem gud for prea and talem thankiu long hem.—Ps. 121:1, 2.

17. Wanem nao Jehovah tinghae long hem?

¹⁷ Mek-tu samting, iumi shud luksavve wei for ting daonem iumiseleva maet mekem iumi for no garem stretfala tingting. Hao God ting long iumi nao hem important. (Readim Rome 14:4.) Jehovah tinghae long wei wea iumi lovem hem and faithful long hem. Hao Jehovah ting long iumi hem no depend long haomas samting iumi duim for hem. Maet iu olsem Elijah wea duim staka samting for Jehovah and no luksavve nomoa. Maet iu no luksavve long wei wea iu helpem samfala long kongregeson. And maet samfala long territory herem gud nius from hard waka bilong iu.

18. Olketa waka wea Jehovah askem iu for duim pruvim wanem?

¹⁸ Last samting, ting long evri waka wea Jehovah askem iu for duim hem samting wea pruvim God hapi long iu. (Jer. 20:11) Olsem Elijah, maet iu wikdaon from iu tingse no eni gud samting kamaot from waka wea iu duim for Jehovah or iu hard for kasem samfala goal wea iu markem. Nomata olsem, iu garem nambawan privilege for talemaot gud nius and for kamap wanfala Jehovah’s Witness. So gohed faithful long Jehovah. Sapos iu duim olsem, iu bae hapi olsem Jesus talem.—Matt. 25:23.

19. Hao nao feeling bilong man wea raetem Psalm 102?

¹⁹ Man wea raetem Psalm 102 hem barava needim help. Hem “safa tumas” from body hem pain or hem feel sorre tumas, and hem no garem strong for deal witim olketa problem bilong hem. (Ps. 102, smol toktok antap disfala chapter) Hem tingim nomoa pain wea kasem hem, feeling bilong hem, and hem lonely. (Ps. 102:3, 4, 6, 11) Hem tingse Jehovah no tingim hem nao.—Ps. 102:10.

20. Hao nao prea savve helpem samwan wea sorre or ting daonem hemseleva?

²⁰ Bat man wea raetem psalm savve iusim laef bilong hem yet for praisem Jehovah. (Readim Psalm 102:19-21.) Psalm 102 showimaot samfala wea “followim yet olketa tru teaching” savve safa tumas and gogo maet olketa no savve tingim eni nara samting nao. Man wea raetem psalm sei hem feel “olsem wanfala bird wea stap seleva long ruf.” Datwan minim hem feel olsem no eniwan stap for helpem hem, bat olketa problem nomoa stap. (Ps. 102:7) Sapos iu feel olsem enitaem, talemaot evri feeling bilong iu long Jehovah olsem datfala man wea raetem psalm duim. Olketa prea bilong iu bae helpem iu for no sorre or ting daonem iuseleva. Jehovah promis for “herem prea bilong olketa wea lusim evri samting, and hem no ting daonem prea bilong olketa.” (Ps. 102:17) Trustim datfala promis bilong God.

21. Wanem nao savve helpem iumi for hapi sapos iumi wikdaon?

²¹ Psalm 102 savve helpem iumi tu for hapi long waka wea iumi duim for God. Man wea raetem psalm hem ting raonem wei wea hem fren witim Jehovah. (Ps. 102:12, 27) From hem savve Jehovah evritaem helpem pipol bilong hem wea kasem hard taem, datwan comfortim hem. Sapos iu wikdaon and datwan mekem iu no duim wanem iu laek for duim long waka bilong God, prea abaotem datwan. Askem God for helpem iu deal witim problem bilong iu, and for pipol savve long nem bilong Jehovah.—Ps. 102:20, 21.

22.  Wanem nao iumi evriwan savve duim for mekem Jehovah hapi?

²² Tru tumas, Bible savve helpem iumi for luksavve iumi ‘followim olketa tru teaching’ and for savve Jehovah tinghae long iumi. Hem tru, long disfala world bilong Satan, samfala taem maet iumi ting daonem iumiseleva or iumi feel wikdaon. Nomata olsem, iumi evriwan savve mekem Jehovah hapi and kasem laef olowe sapos iumi gohed faithful long waka bilong hem.—Matt. 24:13.