1. ¿Ima bendicionestataj Jehová qowanchej kusisqa kanapaj?

JEHOVAQA kusisqa kananchejta munan, chaypajtaj may chhika bendicionesta qowanchej. Chaykunamanta ujnenqa kausayta qowasqanchej. Kausayninchejpitaj Payta yupaychayta atinchej, imajtinchus cheqa religionman pusamuwarqanchej (Sal. 144:15; Juan 6:44). Chantapis Jehovaqa munakuwanchej, mana llauchʼiyaspa payta yupaychanapajtaj yanapawanchej (Jer. 31:3; 2 Cor. 4:16). Mana chayllachu, llajtanpi kasqanchejrayku ashkha yachachiykunata japʼinchej, hermanoswanpis kʼachata kausakunchej. Astawanpis, sumaj suyakuyniyoj kanchej.

2. ¿Imastataj wakin cristianos yuyanku?

² Chay imasrayku kusisqa kausakuna kajtinpis, wakin cheqa sonqo cristianosqa pisipaj qhawakunku. Paykuna yuyanku Jehovaqa paykunata, paypaj llankʼasqankutapis pisipaj qhawasqanta. Chay jawataj, “unay watastapis” kusisqa kausakoyqa llulla cuento jinallata kasqanta yuyanku. Paykunapajqa kausayninku sapa pʼunchay llakiylla (Ecl. 11:8).

3. ¿Imaraykutaj pisipaj qhawakusunman?

³ ¿Imaraykutaj paykuna pisipaj qhawakunku? Ichapis ima kajtin llakisqa kasqankurayku, uj onqoyrayku chayri machituña  kasqankurayku (Sal. 71:9; Pro. 13:12; Ecl. 7:7). Chantapis sonqonchej aswan chʼauka kasqanrayku, Dios allinpaj qhawawajtinchejpis sonqonchejqa juchachawasunman (Jer. 17:9; 1 Juan 3:20). Satanaspis Diospa kamachisninta qhasimanta juchachan. Wakin runastaj Kuraj Supay jina yuyaspa, creechiyta munawanchej imatachus Elifaz Jobman nisqanta: Diospajqa mana valesqanchejta. Chaytaj, kunankamapis llullallapuni (Job 4:18, 19).

4. ¿Imatataj kay yachaqanapi ukhuncharisun?

⁴ Bibliaqa niwanchej Jehová “chʼin laqha wayqʼosta” purejkunata, nisunman pisipaj qhawakojkunata mana saqerparinanta (Sal. 23:4). Chayrayku Palabrannejta yanapawanchej. Arí, Bibliaj nisqasnenqa “Diospa atiyninwan sinchʼi kanku, jarkʼachasqa wasista” thuñinapaj jina, nisunman yanapawanchej mana pisipaj qhawakunapaj (2 Cor. 10:4, 5). Kunanqa kusisqallapuni kanapaj, imaynatachus Biblia yanapanawanchejta ukhuncharina. Chaytaj mayta yanapawasun, wajkunata yanapanapajpis wakichiwasun.

5. ¿Imatataj qhawarikunanchej tiyan kusisqallapuni kanapaj?

⁵ Apóstol Pabloqa kusisqallapuni kanapaj imatachus ruwanata yuyaycharqa. Corintopi cristianosman kayta nerqa: “Qankuna kikiykichej qhawarikuychej, yachanaykichejpaj creeypi sinchʼitachus sayashankichej, chayri manachus, chayta”, nispa (2 Cor. 13:5). “Creeypi” nispaqa Bibliaj yachachiykunasninpi creesqanchejmanta parlasharqa. ¿Imaynatá yachasunman “creeypi” sinchʼitachus sayashanchej manachus chayta? Chaypajqa parlasqanchej, kausayninchejpis chay creesqanchejman jinachus manachus kasqanta qhawarikuna. Manataj imachus allin rijchʼawasqallanchejchu juntʼana, manaqa Bibliaj tukuy yachachiykunasninta (Sant. 2:10, 11).

6. ¿Imaraykutaj qhawarikunanchej tiyan creeypi sinchʼitachus sayashanchej manachus, chayta? (12 paginapi dibujota qhawariy.)

⁶ Ichapis imaynatachus kausashasqanchejta qhawarikuyta manchachikusunman, imapipis pantashasqanchejta mana reparakuyta munaspa. Chaywanpis Jehová imatachus noqanchejmanta yuyasqanqa “aswan patapi” kashan, yuyasqanchejmanta nisqaqa (Isa. 55:8, 9). Payqa kamachisninta mana juchachanchu, manaqa allin imasta ruwasqankuta sumajpaj qhawan, yanapaytataj munan. Noqanchejpis, Bibliaj nisqanman jina creeypi sinchʼitachus sayashanchej manachus, chayta qhawarikusun chayqa, Dios yuyasqanman jinallataj qhawakusun. Chaytaj mana pisipaj qhawakunapaj yanapawasun, reparachiwasuntaj Jehovapaj may valorniyoj kasqanchejta. Chaytaj kanman inti kʼanchaykamunanpaj uj laqha cuartoj ventanantapis kicharisunman jina.

7. ¿Imaynatataj ñaupa tiempomanta Diospa cheqa sonqo kamachisninpi tʼukuriy yanapawasunman?

⁷ Chayta ruwanapajqa, ñaupa tiempomanta Diospa cheqa sonqo kamachisninpi tʼukurina. Paykuna ima llakiypichus rikukusqankuta, kausayninkutapis kausayninchejwan kikincharina. Paykuna jina rikukuspa, ¿imatataj ruwasunman karqa? Kunanqa Diospa ñaupa kinsa kamachisninmanta parlarina. Chaytaj reparachiwasun imaynatachus Bibliaj yanapayninwan creeypi sinchʼitachus sayashanchej manachus chayta qhawarikunapaj. Ajinamanta kusisqallapuni kasunchej.

8, 9. 1) ¿Imapitaj uj wajcha viuda rikukorqa? 2) ¿Imastataj yuyanman karqa?

⁸ Jesusqa Jerusalén templopi uj wajcha viudaj ruwasqanta qhawarqa. Chay  ruwasqantaj yanapawasunman wakin imasta mana ruwayta atejtinchejpis, kusisqallapuni kanapaj (Lucas 21:1-4 leey). ¿Imapitaj chay viuda rikukusharqa? Qosan wañupusqanmanta may llakisqa kasharqa, chantapis chay tiempomanta religionta kamachejkunarayku ñakʼarisharqa. Imaraykuchus yanapanankumantaqa “viudaspa kapuyninkuta” oqokapoj kanku (Luc. 20:47). Chay viudaqa may wajchapuni kasqanrayku pisi qolqellata templopi churarqa, ichapis karqa uj runa uj mashkha minutosllapi ganakusqan jina.

⁹ Chay viuda temploman iskay phisitusllawan yaykusqanpi tʼukurina. Qosan kausashajtenqa ichapis aswan ashkhata churaj, chayrayku ichá yuyarqa churasqan ancha pisi kasqanta. ¿Pʼenqakunmanchu karqa wajkuna ashkha qolqeta churasqankuta rikuspa? ¿Yuyanmanchu karqa iskay phisitusta churasqan ni imapaj kasqanta? Ichapis chaykunata yuyarqa, jinapis Diosta yupaychay ñauparinanpaj chay iskay phisitusninwan yanapakorqa.

10. ¿Imaraykutaj nisunman chay viuda Jehovapaj may valorniyoj kasqanta?

¹⁰ Jesusqa sutʼincharqa chay viuda, qolqesituta churasqanpis Jehovapaj may valorniyoj kasqanta. Pay nerqa: “Kay wajcha viudaqa aswan ashkhata churan, tukuy [qhapaj] runasmanta nisqaqa”, nispa. Churasqan phisitus wajkunaj churasqankuwan chajrukojtinpis, Jesusqa chay viuda Jehovata tukuy sonqo yupaychasqan aswan sumaj kasqanta nerqa. Qolqe waqaychajkunataj, chay phisitusta rikuspa nichá yuyallarqankupischu Jehovapajqa may valorniyoj kasqanta. Jinapis Jehovapajqa may valorniyoj karqa, runas yuyasqankumanta chayri chay viudaj yuyasqanmanta nisqaqa. Chay viudaj ruwasqanqa creeypi sinchʼitachus sayashanchej manachus chayta qhawarikunapaj yanapawasunman.

11. ¿Imatá viudaj kausayninmanta yachakunchej?

¹¹ Kausayninchej mana kikinchu kasqanrayku, mana munasqanchejman jinapunichu Jehovapaj llankʼayta atisunman. Wakin hermanosqa pisillata runasman willanku,  machitusña chayri onqosqa kasqankurayku. ¿Chayraykuchu willasqankumanta informeta mana jaywananku kanman? Ichá mana tukuychu jinapi rikukunchej, jinapis sapa wata Jehovaj llajtan ashkha horasta willasqanwan willasqanchejtawan kikinchaspa, may pisilla kasqanta yuyasunman. Jinapis chay wajcha viudaj kausaynenqa rikuchiwanchej Jehovaqa kallpachakusqanchejta may sumajpaj qhawasqanta, astawanraj ima llakiypi rikukojtinchejqa. Qayna wata Jehovapaj llankʼasqaykipi tʼukuriy. Ichapis uj mashkha horatawan willanaykipaj mayta kallpachakorqanki. Ama qonqaychu chay ruwasqaykita Jehová may sumajpaj qhawasqanta. Chay viuda jina Jehovapaj tukuy atisqanchejta ruwaspaqa, “creeypi” sinchʼita sayashasqanchejta nisunman.

12-14. 1) ¿Imapitaj Elías rikukorqa? 2) ¿Imaraykutaj Elías sinchʼi llakisqa kasharqa?

¹² Profeta Eliasqa cheqa sonqo, sinchʼi creeyniyojtaj karqa. Jinapis uj kuteqa sinchʼi llakisqa kaspa kayta Diosmanta mañakorqa: “¡Señor Diosníy, kaykamallaña! Kawsayniyta qechupuway”, nispa (1 Rey. 19:4, Diospa Simin Qelqa). Mana chay jina llakiypi rikukojkunaqa ichapis ninkuman Elías “imatapis usqhayllata” mana yuyaychakuspa parlarparisqanta (Job 6:3). Jinapis may llakisqa kaspa chaytaqa nerqa. Jehovataj mana chaymanta phiñakorqachu, astawanqa Eliasta yanaparqa.

¹³ ¿Imaraykutaj Elías chay jinata llakikorqa? Payqa uj milagrota ruwaspa Jehová cheqa Diospuni kasqanta rikucherqa. Chay milagrota ruwasqantawantaj, Baalpa 450 profetasnin wañuchisqa karqanku (1 Rey. 18:37-40). Eliasqa ichapis yuyarqa Diospa llajtan chayta rikuspa, cheqa yupaychayman kutirikunanta, chaywanpis mana jinachu karqa. Sajra reina Jezabeltaj, wañuchiyta munasqanta willacherqa. Eliastaj wañuchinankuta manchachikuspa Israel jallpʼaj uranejninman ayqekorqa, Judá jallpʼanejta pasaspataj chʼin pampaman chayarqa (1 Rey. 19:2-4).

¹⁴ Eliasqa sapallan tarikuspa, qhasi manakajpaj imatapis ruwasqanta yuyarqa. Jehovamantaj nerqa: “Noqaqa mana aswan sumajchu kani tatasniymanta nisqaqa”, nispa. Payqa wañupoj ñaupa tatasninpa ismupoj tullusnin jina mana imapaj kasqanta yuyarqa. Chaytaj karqa yuyasqanman jinalla, chayrayku payqa ni imapaj valesqanta yuyarqa, ni Jehovapaj, nitaj waj runaspajpis.

15. ¿Imatá Jehová ruwarqa Eliasta valorniyojpaj qhawasqanta rikuchinanpaj?

¹⁵ Tukuy Atiyniyoj Diostajrí mana Elías jinachu yuyarqa, astawanqa may valorniyojpaj payta qhawarqa. ¿Imatá Dios ruwarqa ajinapuni kasqanta rikuchinanpaj? Uj angelta kallpachananpaj kacharqa. Chantapis Horeb orqoman 40 pʼunchay puriyta rishajtin yakutawan, mikhunatawan mana pisicherqachu. Eliasqa yuyarqa israelitasmanta sapallanña Jehovata yupaychashasqanta, Jehovataj mana jinachu kasqanta reparacherqa. Astawanpis waj ruwaykunatawan payman qorqa, chaytataj Eliasqa tukuy sonqo japʼikorqa. Jehová yanapasqanraykutaj, kallpachakuspa profeta jina llankʼallarqapuni (1 Rey. 19:5-8, 15-19).

16. ¿Imaynasmantataj Jehová kallpachasorqa?

¹⁶ Eliaspa kausaynenqa yanapallawasunmantaj creeypi sinchʼitachus sayashanchej manachus chayta qhawarikunapaj, kusisqallapunitaj kanapaj. ¿Imaynamantá chayta ruwasunman? Ñaupajtaqa tʼukurina tukuy imaymanamanta Jehová yanapawasqanchejpi. Ichapis ima llakiypi kashajtinchej, uj anciano chayri creeypi sinchʼi sayasqa hermano yanapawarqanchej (Gál. 6:2). Chayri ichapis creeyninchej sinchʼiyarqa Bibliata chayri publicacionesta leerisqanchejrayku, manaqa tantakuykunaman risqanchejrayku. Ama qonqanachu  chay yanapasqa Jehovamanta jamusqanta, paymantaj agradecekuna (Sal. 121:1, 2).

17. ¿Imaraykutaj Jehová munakuwanchej?

¹⁷ Iskay kaj, ichá noqallanchej pisipaj qhawakushanchej. Chaywanpis, yuyasqanchejmanta nisqaqa Jehová imatachus noqanchejmanta yuyasqan aswan patapi kashan (Romanos 14:4 leey). Jehovaqa, payta tukuy sonqo yupaychasqanchejrayku, paymantaj cheqa sonqo kasqanchejrayku ima mayta munakuwanchej, manataj mashkhatachus Paypaj ruwasqanchejraykuchu. Chantapis, ichá Elías jinallataj yuyasqanchejmantapis aswan ashkhataña ruwanchej. Ichá mana reparakuspalla ashkha hermanostaña yanapanchej. Chayri ichapis willanapaj kallpachakusqanchejrayku wakin runas Bibliamanta yachakunku.

18. ¿Imatataj rikuchin Jehová ruwaykunata qowasqanchej?

¹⁸ Kinsa kaj, Jehová ima ruwaytapis qowasqanchejqa allinpaj qhawawasqanchejta rikuchin (Jer. 20:11). Ichapis yuyanchej willayninchej mana runata yanapasqanta chayri qotuchakuypi ima ruwaytapis mana japʼinapaj jinachu kasqanchejta. Chayta yuyajtinchej chayri manapis, sumaj willaykunata willayta atisqanchejqa imamantapis aswan sumaj, jinallataj Jehovaj testigosnin kasqanchejpis. Chayrayku Jehovata mana wasanchanachu. Ajinamanta Jesús niwasun: “Patronniykej kusikuyninman yaykuy”, nispa (Mat. 25:23).

19. ¿Imaynataj kasharqa 102 Salmota qhelqaj?

¹⁹ Kay 102 Salmota qhelqajqa may “llakisqa” kasharqa, tʼunasqa jina chayri sonqo nanasqa jina. Chʼampayninta atipananpaj mana kallpayoj kasharqa (Sal. 102, qallariyninpi qhelqasqa). Chay Salmopi nin jina, payqa may llakisqa, sapallantaj kasharqa (Sal. 102:3, 4, 6, 11). Yuyarqataj Jehová wijchʼurparinanta (Sal. 102:10).

20. ¿Imaynatataj Diosmanta mañakuy mana pisipaj qhawakunaykipaj yanapasunkiman?

²⁰ Jina llakisqa kashaspapis, chay salmistaqa Jehovata yupaychallarqapuni (Salmo 102:19-21 leey). Kay 102 Salmo rikuchin jina, creeypi kajkunaqa may llakisqa tarikunkuman, ñakʼarishankumantaj. Chay salmistaqa “sapan purikoj wasi patapi pʼisqo jina” kasqanta yuyakorqa, llakiykunallapis qhatirishanman jina (Sal. 102:7). Qanpis, ajinapi rikukuspaqa salmista jina, Jehovaman llakiykunasniykita willakuy. May llakisqa kashaspa Diosmanta mañakoyqa mana pisipaj qhawakunaykipaj yanapasonqa. Imajtinchus Jehovaqa “mana piniyojpa mañakusqanta uyarin; chay mañakusqantapis mana qhesachanchu” (Sal. 102:17). Chaymantaqa ama iskayrayaychu.

21. ¿Imataj kusisqallapuni kanapaj yanapawanchej?

²¹ Chantapis, 102 Salmoqa kusisqallapuni kanapaj yanapawanchej. Chay salmistaqa Jehovaj kausaqen kayta sumajpaj qhawasqanrayku kusisqallapuni karqa (Sal. 102:12, 27). Payqa mayta sonqochakorqa Jehová llajtanta llakiykunapi kashajtin yanapanantapuni yachaspa. Qanpis llakiykunarayku manaña Jehovapaj anchata ruwayta atinkichu chayqa imachus sonqoykipi kasqanta Jehovaman willay. Paymantataj mañakuy mana sonqochasqa kanallaykipajchu, manaqa “Diospa sutin rejsichisqa” kananpajpis (Sal. 102:20, 21).

22.  ¿Imaynatataj Jehovata kusichisunman?

²² Rikunchej jina, Bibliaqa mayta yanapawasunman creeypi sinchʼitachus sayashanchej manachus chayta yachanapaj, Jehová allinpaj qhawawasqanchejta yachanapajpis. Kay sajra pachapi kausakusqanchejrayku, ichapis pisipaj qhawakullasunpuni, llakiykunapis kanqapuni. Chaywanpis Jehovata mana wasanchasunchu chayqa payta kusichisun, wiñay kausaytataj qowasun (Mat. 24:13).