1. Ñucanchicuna cushilla causachunga ¿imacunatallata Jehová Diosca carashca?

JEHOVÁ DIOSCA ñucanchicuna cushijushpa causachunmi ashtaca bendiciongunata cushca. Huaquin ejemplocunata ricupashun. Taita Dios causaita carajpimi ali religionda tarishpa paita aliguta adorai ushanchi (Sal. 144:15; Juan 6:44). Shinallata Jehová Diosca cangunata juyanimi nishpami, llaquicunatapash aguantashpa paita sirvichun ayudashca (Jer. 31:3; 2 Cor. 4:16). Ashtahuangarin, ñucanchita ricuriashpa cuidangapaj munashpami ashtaca publicaciongunata cushca. Mundo enteropi huauquipanicunatapashmi cushca. Chai tucuita carashca jahuapash shamuj punllacunapi ali causana esperanzatami cun.

2. Jehová Diosta sirvinajushpapash ¿ima pensamientocunatata huaquingunaca charin?

² Jehová Dios tucuita cujpi cushilla causana cashpapash, huaquingunaca llaqui pensamientocunata charishpami llaquilla sintirin. Paicunaca yanmi, ñucaca na imatapash ali rurai ushanichu o ñuca rurashcacunaca na imapapash sirvinllu nishpa. Chashna llaqui pensamientocunahuan na ushashpami huaquingunaca shamuj punllacunapi cushilla causai tianataca na crin, cunanbishnallata llaquillami causasha yanmi (Ecl. 11:8).

3. Huaquingunaca ¿imamandata llaqui pensamientocunata charin?

 ³ Huaquingunaca ¿imamandata llaqui pensamientocunata charin? Huaquingunaca imapash llaquicuna japijpi, ungüimanda o ña mayorlla caimandami llaqui pensamientocunata charin (Sal. 71:9; Prov. 13:12; Ecl. 7:7). Ñucanchi shungupash pandachinllami. Chaimandami Jehová Dios ñucanchita alicachijpipash nalita rurajunshna sintirinchi (Jer. 17:9; 1 Juan 3:20). Diablopash Diosta sirvijcunataca yangatami juchachin. Huaquin gentecunapash Diablopa chaquita catishpami ñucanchicunataca nali runa Elifazpa shimicunata crishpa llaquilla cachun munan (Job 4:​18, 19). Chai shimicunaca llullami can.

4. Cai temapica ¿imatata yachajupashun?

⁴ Jehová Diosca ninmi: ‘Llandu pugru pambata rijujpipash’ ñucami cangunahuan casha nishpa (Sal. 23:4). Huaquinbica ñucanchimandallata pandata yashpami llaquilla sintirinchi. Chashna pensamientocunaca ‘shinlli shayajuj patacuna’ cuendami can. Shinapash Jehová Diosca Bibliahuanmi chai pensamientocunataca anchuchisha nin (2 Cor. 10:​4, 5). Shinaca, cushilla causachun Biblia imashina ayudajta, imashina shujcunatapash animachun ayudajta yachajupashun.

5. Cushilla sintirichunga ¿imata ayudanga?

⁵ Cushilla sintiringapaca apóstol Pablopa consejotami catina canchi. Corinto llactamanda huauquipanicunataca nircami: ‘Cangunallatami: “¿Ñachu alipacha crishpa catijuni, narachu alipacha crishpa catijuni?” nishpa tapurina canguichi’ nishpa (2 Cor. 13:​5, NM). “Crishcacuna” nishpaca Bibliapi yachachishcacunamandami parlajun. Ali crishpa catijushcata ricungapaca tapurinami canchi: ¿Bibliapi yachachishcacunata catishpachu parlajuni o causajuni? nishpa. Shinapash na ñucanchi munashcatallachu pactachina canchi. Ashtahuangarin Bibliapi tucui yachachishcacunata, tucui mandashcacunatami pactachina canchi (Sant. 2:​10, 11).

6. ¿Imamandata ‘alipacha crishpachu catijuni’ nishpa tapurina capanchi? (Callari dibujota ricupangui.)

⁶ Huaquinbica manllaimandami ‘alipacha crishpachu catijuni’ nishpaca na tapuringapaj munanchi. Shinapash Jehová Dios ñucanchita ricujujtami yarina canchi. Paipa pensamientocunaca ñucanchi pensamientocunamanda ‘yali jatunmi’ can (Is. 55:​8, 9). Paica ñucanchita nalicachina munaihuanga na ricujunllu, ñucanchita alicachishpa ayudana munaihuanmi ricujun. Shinaca llaqui pensamientocunata mishangapaca Bibliapi textocunata yarishpa tapuripashunchi ‘¿alipacha crishpachu catijuni?’ nishpa. Shina rurashpami Taita Diospa pensamientocunata catishpa, Taita Diosman ashtahuan quimirishun. Jehová Dios ñucanchicunata alicachijta intindishpaca shuj yana yana ucumanda canllaman llujshinshnami sintirishun.

7. Ñaupa tiempocunapi Diosta sirvijcunapa ejemplocunaca ¿imashinata ayudan?

⁷ ‘Alipacha crishpachu catijuni’ nishpa tapuringapaca ñaupa tiempocunapi Jehová Diosta sirvijcunapa ejemplotami yarina canchi. Paicunapa ejemplocunata yarijushpaca pensaripashunchi: “¿Ñucapash shinallatachu causajuni? ¿Shinallatachu sintirijuni? Ñuca chaipi cashpaca ¿imatashi ruraiman carcani?” nishpa. Shinaca Bibliapi quimsa ejemplocunata ricushpa cushilla pensamientocunata charipashunchi.

8, 9. a) Viuda huarmiguca ¿imamandata llaquilla causajurca? b) Viuda huarmiguca ¿ima llaqui pensamientocunatashi charirca?

⁸ Llaquicuna ricurijpipash cushilla sintiringapaca shuj viuda huarmigupa ejemplota ricupashun. Jesusca Jerusalén llactapi Diospa  huasiman yaicujushpami shuj viuda huarmiguta ricurca (Lucas 21:​1-4, liingui). Chai huarmiguca cusa huañujpimi llaquilla causajurca. Ashtahuangarin, chai punllacunapi yachachijcunapash viuda huarmigucunata ayudanapa randica, ansiarishpami viuda huarmicunapa ‘huasicunataca langanshna’ tucuchinajurca (Luc. 20:47). Paica pobregu caimandami shuj trabajador 15 minutocunapilla trabajashca culquiguta churajurca.

⁹ Taita Diospa huasi patioman yaicujushpaca ¿imashinashi chai viuda huarmiguca sintirijurca? ¿Ñuca cusa causajpica yalillagutami churan carcani yashpacha yaicujurca? ¿Chaishuj gentecunaca llashajllatami churanajuj yashpacha pinganayachijurca? ¿Ñucapa culquiguca na imapash sirvinllu yashpacha churajurca? Imata pensarijushca cashpapash paica cushijushpami paipa tucui charishcaguta Taita Diosman curca.

10. Jesusca ¿imashinata ricuchirca viuda huarmiguta Jehová Dios alicachishpa ricujujta?

¹⁰ Jesusca nircami, chai viuda huarmiguta, pai churashca culquigutapashmi Jehová Diosca alicachin nishpa. Chai viuda huarmigupa churashca culqui shujcunapa culquihuan chapurijpipash, chai viuda huarmigutami Jesusca ninanda alicachirca. Chai culquigu Taita Diospa ñaupajpi valishca cashcataca culquita tandachijcunaca na cuenta japircachu. Chai gentecuna imata pensanajujpipash o chai viuda huarmigu imata pensajujpipash Jehová Diospa pensamientocunami ashtahuan importante carca. Shinaca cai viuda huarmigupa ejemplopi pensarishpa tapuripashunchi, ¿‘alipacha crishpachu catijuni’? nishpa.

11. ¿Imatata viuda huarmigupa ejemplomandaca yachajupanchi?

¹¹ Huaquin huauquipanicunaca ungushca caimanda o mayorllagucuna caimandami na ashtaca horascunata villachi ushan. Shinapash mashnaguta villachishcataca informe hojapi churanami can. Cutin shujcunaca na ungushca cashpapash o na mayorllagu cashpapash mundo enteropi mashna horascunata villachishcata ricushpami ñuca villachishca  tiempoca ashalagullami can yan. Shinapash imashinami viuda huarmigupa ejemplopi ricurcanchi llaquilla cashpapash Jehová Diosta ali sirvingapaj esforzarijpica Jehová Diosca cushijushpami ricun. Caina huata villachishcata yaripai. ¿Nachu shuj horasgutallapash villachishpa catingapaj ninanda esforzariparcangui? Shuj horasgutallapash villachingapaj ninanda esforzarishca cajpica Jehová Diospash ninanda cushijushpami ricujurianga. Viuda huarmigushna tucui shunguhuan sirvingapaj esforzarishpaca, ‘alipacha crishpa catijushcatami’ ricuchinajunchi.

12-14. a) Eliasca ¿imashinata sintirirca? b) Eliasca ¿imamandashi llaquilla sintirishcanga?

¹² Profeta Eliasca Jehová Diosta tucuipi cazushpami causarca. Shinlli fetami charirca. Shinapash shuj punllaca ninanda llaquirishpami Jehová Diostaca nirca: ‘Mandaj Dioslla caicamanllami causangapaj munani. Ñuca causaita quichuhuailla’ nishpa (1 Rey. 19:4). Ima horapash na chashna sintirishca cashpaca tal vez yanchipashchari, profeta Eliasca na aliguta pensarishpa ‘ñapash rimaimandallami’ shina nishcanga nishpa (Job 6:3). Shinapash Eliasca ciertopachami llaquilla sintirijurca. Chaimadami Jehová Diosca culiranapa randica Eliasta ayudarca.

¹³ ¿Imamandata Eliasca llaquilla sintirijurca? Eliasca shuj milagrota rurashpami Jehová Dioslla ciertopacha Taita Dios cajta ricuchirca. Chai jipami Baal nishca yanga diospa 450 profetacunaca huañuchi tucurca (1 Rey. 18:​37-40). Chaita ricushpa gentecuna Jehová Diosta ali adorachunmi Eliasca munajushcanga. Shinapash gentecunaca Jehová Diosta ali sirvingapaca na munarcachu. Ashtahuangarin, nali reina Jezabelca huañuchigrinimi nishpa villachunmi cacharca. Chaita uyashpami Eliasca shitashca, chaquishca, peligroso alpacunapi pacajungapaj rirca (1 Rey. 19:​2-4).

¹⁴ Eliasca chai chulunlla pambacunapi pailla cashpami yangami profeta cashcani nishpa Jehová Diostaca nirca: ‘Ñuca ñaupa taitacunata yali ashtahuan alipash na canichu’ nishpa. Eliasca ninanda nali sintierishpami, ñaupa taitacunapa tullu polvoshnami na imapapash sirvini nishpa pensarirca. Eliasca paillata nalicachirishpami Jehová Diospa ñaupajpipash shuj gentecunapa ñaupajpipash na imapajpash sirvijmi cani nishpa pensarirca.

15. Jehová Diosca ¿imashinata profeta Eliasta alicachishcata ricuchirca?

¹⁵ Shinapash Jehová Diosca alicachishpami Eliastaca ricujurca. Paita alicachishcata yachachunmi Jehová Diosca Eliasta animachun shuj angelta cacharca. Shinallata Horeb nishca urcuman 40 punllacunata rishpa aguantachunga micunatapash yacutapashmi cararca. Ashtahuangarin, paillami sirvijuni yajujpimi Jehová Diosca shuj ali sirvijcunapash tianmi nirca. Chai jahuapash mushuj responsabilidadcunata cujpimi Eliasca chai responsabilidadcunata chasquirca. Jehová Dios ayudajpimi Eliasca cutin shinlliyashpa Jehová Diosta sirvi callarirca (1 Rey. 19:​5-8, 15-19).

16. Jehová Diosca ¿imashinata quiquinda ayudashca?

¹⁶ Profeta Eliaspa ejemplomi ñucanchicunataca ‘alipacha crishpami catijuni’ nishpa cushilla sintirichun ayudan. Shinapash ¿imashinata ayudan? Pundapica yaripai ¿imashinata Jehová Diosca quiquinda ayudajushca? ¿Nachu llaquilla caj horascunapica shuj huauqui o shuj anciano ayudashca? (Gál. 6:⁠2.) ¿Nachu Bibliapa ayudahuan, publicaciongunapa ayudahuan o tandanajuicunapa ayudahuan ashtahuan shinlliyashcanchi? Shina ayudashcata cuenta japishpaca Jehová Diosmi ayudajuhuan nishpa Jehová Diosta agradicipai (Sal 121:​1, 2).

17. Jehová Diosca ¿imatata ñucanchicunapica alicachishpa ricujun?

 ¹⁷ Shinallata yaripai, llaqui pensamientocunaca pandachinllami. Chaimandami Jehová Dios ñucanchita imashina ricujta aliguta intindina canchi (1 Samuel 16:7, liingui). Paita juyajpi, cazujpica alicachishpami Jehová Diosca ricujun. Ñucanchicuna ashtacatapacha rurajujtaca na catiriashpa ricuriajunllu. Eliasca na cuenta japishpapash ashtacatami Jehová Diosmandaca rurarca. Quiquinbash tal vez na cuenta japinguichu congregacionbi huauquipanicunataca ninandami ayudariangui. Huaquin gentecunapash quiquin villachingapaj esforzarijpichari Bibliata yachajui callarirca.

18. Imapash asignacionda ñucanchicunaman mingashpaca ¿imatata Jehová Diosca ricuchijun?

¹⁸ Shinallata yaripangui, Jehová Diosca quiquinda juyaimandami imapash asignacionda quiquinman mingashca (Jer. 20:11). Huaquinbica yangami villachijuni, yachachijuni o cai metacunataca na pactachi ushashachu yashpachari desanimaringui. Shinapash yaripangui, cai punllacunapi villachina o testigo de Jehová canaca shuj jatun bendicionmi can. Jehová Diosta cazushpa catipai. Shinami Jesús nishca shinaca cushijushun (Mat. 25:23).

19. Salmo 102ta escribij runaguca ¿imashinata sintirirca?

¹⁹ Salmo capítulo 102​ta escribij runaguca ninan llaquipi cashpami ungushca cuenda irquilla sintirishpa llaquiyajurca. Llaquipi cashpa imata ruranatapash na atinajurcachu (Sal. 102ta callaringapaj shimicuna). Chai runaguca pailla sintirishpami ninanda llaquirijurca (Sal. 102:​3, 4, 6, 11). Jehová Diosca ñana yarihuanllu yashpami chai runaguca shina sintirirca (Sal. 102:10).

20. Llaquicuna shamujpica ¿imashinata Jehová Diosta mañanaca ayudan?

²⁰ Huaquinbica ñucanchicunapashmi Salmo 102ta escribij runagu cuenda ninanda llaquiyashcanchi. Llaquicuna japijpimi Salmo librota escribij runaguca ‘huasi jahuapi pailla shayajuj alasyu animalshna’ sintirijurca (Sal. 102:7). Shinapash chai runaguca shuj oracionda rurashpami Jehová Diosta alabashpa catirca (Salmo 102:​19-21, liingui). Shinaca ninanda llaquilla sintirijushpa o llaqui pensamientocuna shamujpica tucuita Jehová Diosman villashpa oracionda rurapai. Jehovata mañanami chai pensamientocunata mishachun ayudanga. Jehová Diosca nircami, ‘imatapash na rurai ushajcuna mañanajujtaca uyashami. Paicuna ninanda mañanajujtaca na yanga saquishachu’ nishpa (Sal. 102:17). Chai shimicunataca yariami causana capanchi.

21. Cushilla pensamientocunata charingapaca ¿imatata rurana capanchi?

²¹ Salmo 102​ca Jehová Diosman quimirishpa cushilla pensamientocunata charichunmi ayudan (Sal. 102:​12, 27). Llaquicuna shamujpipash Jehová Diosmi paipa sirvijcunataca ayudan yashpami Salmo librota escribij runaguca ali sintirirca. Shinaca llaquilla sintirijuimanda Jehová Diosta na sirvi ushajushpaca Jehová Diosta mañapai. Cushilla sintirinamanda mañashpapash Jehová Diospa shutimanda shujcunaman villachingapami ashtahuanga mañana capangui (Sal. 102:​20, 21).

22.  ¿Imashinata Jehová Diosta cushichita ushapanchi?

²² Imashinami ricupashcanchi, Bibliami ñucanchicunataca ¿ñachu alipacha crishpa catijuni, narachu alipacha crishpa catijuni? nishpa pensarichun ayudan. Shinallata Bibliami Jehová Dios ñucanchicunata alicachishpa ricujujta crichun ayudan. Cai nali mundopi causajuimandaca na tucuilla llaqui pensamientocunata mishai ushashunllu. Shinapash Jehová Diosta aliguta sirvishpaca tucuillacunallatami paita cushichita ushashun, salvaritapash ushashun (Mat. 24:13).