1. O ā faamanuiaga mai iā Ieova ua tatou maua ai le fiafia?

E FINAGALO Ieova ia tatou fiafia, ma ua ia foaʻi mai le tele o faamanuiaga e tatou te maua ai le fiafia. O se faataʻitaʻiga o le meaalofa o le ola. O lea, e mafai ona faaaogā o tatou ola e viia ai le Atua, auā ua ia tosina mai i tatou i le tapuaʻiga moni. (Sala. 144:15; Ioa. 6:44) Ua faamautinoa mai e Ieova lona alofa iā i tatou, ma fesoasoani mai iā i tatou ia tumau a o auauna iā te ia. (Iere. 31:3; 2 Kori. 4:16) Ua tatou olioli i le taimi nei i se parataiso faaleagaga o loo iai le tele o meaʻai faaleagaga, se ʻauuso alolofa, faapea le faamoemoe pupula mo le lumanaʻi.

2. O le ā o loo tauivi pea ma nisi o auauna faamaoni a le Atua?

² E ui i le fiafia e maua mai i na faamanuiaga, ae e iai lava nisi auauna faamaoni a le Atua o loo tauivi ma manatu sesē e faatatau iā i latou lava. Atonu e latou te manatu e lē tāua tele i latou ma la latou auaunaga iā Ieova. O ē o loo iai na manatu sesē, e latou te ono manatu o le ola fiafia mo le “tele o tausaga,” ua na o se miti. E latou te lē maua se fiafia ae na o le mafatia.​—Fai. 11:8.

3. O ā mea e mafai ona mapuna aʻe ai ni manatu sesē i o tatou loto?

³ E ono mapuna aʻe manatu sesē faapena ona o mea e leʻi  taulau ai, o maʻi o le tino po o le soifua matua. (Sala. 71:9; Faata. 13:12; Fai. 7:7) E tatau foʻi i Kerisiano uma ona iloa o le loto e taufaaʻoleʻole, ma atonu e faasala i tatou e o tatou loto e ui o loo fiafia mai Ieova. (Iere. 17:9; 1 Ioa. 3:20) Ua tuuaʻia sesē e le Tiapolo auauna a le Atua. O ē e mafaufau e pei o Satani, e latou te ono taumafai e faatalitonu i tatou i le manatu e leai so tatou aogā i le Atua, e pei ona sa manatu ai le tagata lē faatuatua o Elifasa. Peitaʻi, e pepelo lenā manatu.​—Iopu 4:18, 19.

4. O le ā o le a tatou iloiloina i lenei mataupu?

⁴ Ua folafola mai e Ieova, o le a ia faatasi ma i latou o loo “savavali i le vanu e matuā pogisa.” (Sala. 23:4) O se tasi o auala ua ia faia ai faapea, e ala i lana Afioga. Ua faaaogā e le Atua le mana o loo i le Tusi Paia “e lepetia ai mea ua matuā mautū,” e pei o manatu ma vaaiga sesē. (2 Kori. 10:4, 5) O lea, seʻi o tatou iloiloina pe faapefea ona faaaogā le Tusi Paia, e fesoasoani iā i tatou e atiaʻe ma faatumau ai se vaaiga saʻo. Atonu o le a e maua ai aogā ma iloa ai vala e mafai ona e faalaeiau atu ai i isi.

5. O le ā e tatau ona tatou faia ina ia maua ai se vaaiga saʻo?

⁵ Na taʻua e Paulo nisi o auala atonu e fesoasoani iā i tatou e maua ai se vaaiga saʻo. Na ia timaʻi atu i le faapotopotoga i Korinito: “Ia tofotofo pea iā te outou po o outou iai i le faatuatua.” (2 Kori. 13:5) O “le faatuatua,” e faasino atu i talitonuga uma faa-Kerisiano o loo i le Tusi Paia. Pe a ōgatusa a tatou upu ma gaoioiga ma mea o loo aʻoaʻo mai i le Tusi Paia, o lona uiga ua tatou “iai i le faatuatua.” O le mea moni, e lē mafai ona tatou filifili po o fea talitonuga e usitaʻia, a o fea talitonuga e lē usitaʻia. Nai lo o lea, e tatau ona tatou usitaʻia aʻoaʻoga uma faa-Kerisiano o loo i le Tusi Paia.​—Iako. 2:10, 11.

6. Aiseā e tatau ai ona iloilo i tatou lava ʻpo o tatou iai i le faatuatua’? (Tagaʻi i le ata i luga aʻe o le matua.)

⁶ E te ono faatalatū e iloilo oe lava, aemaise pe a e manatu e lē mafai ona e ausia tapulaa faa-Kerisiano. Peitaʻi, e sili atu ona tāua le silafaga a Ieova ma ona manatu nai lo o i tatou. (Isa. 55:8, 9) E suʻesuʻe e Ieova ona tagata tapuaʻi ina ia iloa ai o latou uiga lelei ma fesoasoani i ai, ae e lē ina ia taʻusalaina i latou. E mafai ona iloa e tāua i tatou i le silafaga a Ieova, pe a faaaogā le Afioga a le Atua e iloilo ai i tatou ʻpo o tatou iai i le faatuatua.’ Ua fesoasoani lea e suia ai so o se manatu e faapea, e leai sou aogā i le silafaga a Ieova, auā ua faamautinoa mai i le Tusi Paia e faapea: E matuā tautele oe i le silafaga a Ieova. E pei lenā mea moni o le susulu mai o le lā e faamalamalama ai se potu pogisa.

7. E faapefea ona tatou maua aogā mai i faaaʻoaʻoga a tagata faamaoni o loo i le Tusi Paia?

⁷ O se tasi o auala lelei e iloilo ai i tatou lava, o le manatunatu loloto lea i faaaʻoaʻoga a tagata faamaoni o loo i le Tusi Paia. Ia faatusatusa oe i o latou tulaga ma faalogona, ma vaai pe faapefea ona e gaoioi pe a tuu oe i o latou tulaga. Seʻi o tatou tilofaʻia ni faaaʻoaʻoga se tolu, pe faapefea ona e faaaogā le Tusi Paia e iloa ai o loo e “iai i le faatuatua,” ma atiaʻe ai se vaaiga saʻo iā te oe lava.

8, 9. (a) Sa faapeʻī le tulaga o le fafine mativa? (e) O ā ni manatu sesē sa ono iai i lenei fafine?

⁸ Na vaaia e Iesu se fafine mativa i le malumalu i Ierusalema. E fesoasoani lana faaaʻoaʻoga iā i tatou ina ia faatumau ai se vaaiga saʻo, e ui e tapulaa mea e mafai ona tatou faia. (Faitau le Luka 21:1-4.) Sa  manaʻomia ona onosaia e le fafine mativa le maliu o lana tane, faapea se siʻomaga na pulea e taʻitaʻi lotu, o ē na “faoa fale o fafine ua oti a latou tane,” nai lo o le fesoasoani i tagata vaivai. (Luka 20:47) O le mativa tele o lenei fafine, sa ia foaʻi atu ai i le malumalu ni tupe itiiti sa mafai ona maua e se tagata faigaluega i ni nai minute e faigaluega ai.

⁹ Manatu i faalogona o le fafine mativa, ina ua ulu atu i le lotoā o le malumalu ma ana tupe iti e lua. Pe sa mafaufau o ia i le itiiti o lana foaʻi, pe a faatusatusa i se foaʻi atonu na ia faia a o soifua lana tane? Pe na māsiasi o ia i le vaai atu i le tetelē o foaʻi a isi na muamua atu iā te ia? Pe sa ia taumānatu pe e tāua lana foaʻi? E tusa pe sa iā te ia na faalogona, ae sa ia faia pea le mea sili e na te mafaia mo le tapuaʻiga moni.

10. Sa faapefea ona faaalia e Iesu le tāua iā Ieova o le fafine mativa?

¹⁰ Sa faaalia e Iesu le tāua iā Ieova o le fafine ua oti lana tane faapea lana foaʻi. Na fetalai o ia: ʻE sili atu mea ua lafo e lenei fafine nai lo o i latou uma.’ E ui sa fefiloi faatasi le foaʻi a lenei fafine ma foaʻi a isi, ae sa viiviia e Iesu lenei fafine. E leʻi iloa e le ʻauteutupe na vāai i nei tupe iti e lua, le tāua tele iā Ieova o na tupe iti ma lē na faia le foaʻi. E sili atu ona tāua le silafaga a Ieova, nai lo o manatu o isi tagata po o faalogona o le fafine mativa. Pe e mafai ona faaaogā lenei tala e tofotofo ai oe lava, po o e iai i le faatuatua?

11. O ā lesona e tatou te aʻoaʻoina mai i le tala e faatatau i le fafine mativa?

¹¹ O lou tulaga e mafai ona aafia ai mea e te foaʻi atu iā Ieova. E faatapulaa le taimi e mafai ai e nisi ona talaʻia le tala lelei, ona o le tulaga matua po o le lē atoatoa o le malosi o le tino. Pe e tatau ona latou taumānatu pe manaʻomia ona lipoti itula na latou faaaluina i le faiva? E tusa pe e lē faatapulaa mea e mafai ona e faia, ae atonu e te mafaufau e lē o tele sou sao o faia, pe a  faatusatusa i le tele o le taimi o loo faaalu e auauna a le Atua i tausaga taʻitasi e tapuaʻi ai iā te ia. Peitaʻi, ua tatou aʻoaʻoina mai i le tala i le fafine mativa, e mātauina ma faatāua e Ieova mea o loo tatou faia mo ia, aemaise pe a feagai ma tulaga faigatā. Pe a toe mafaufau i lau tapuaʻiga iā Ieova i tausaga ua mavae, pe sa iai se itula na e faaaluina sa manaʻomia ai ni taumafaiga faapitoa? Afai o le tulaga lenā, e mautinoa e tāua iā Ieova lenā itula na e faaaluina. Pe a e faia le mea sili i le auaunaga iā Ieova e pei o le fafine mativa, e mautinoa e iai māfuaaga tatau e te talitonu ai, ua e “iai i le faatuatua.”

12-14. (a) Sa faapefea ona aafia Elia i ona manatu sesē? (e) Aiseā atonu na oo ai na faalogona iā Elia?

¹² Sa faamaoni ma malosi le faatuatua o le perofeta o Elia iā Ieova. Peitaʻi, sa iai se taimi na ia lotovaivai ai ma ʻaiʻoi atu ai iā Ieova e faapea: “Ua lava lea! Ieova e, ia e aveese loʻu ola.” (1 Tu. 19:4) Atonu e manatu i latou e leʻi tofo i na mafatiaga, o le tatalo a Elia ua na o ni ʻupu e soonafai.’ (Iopu 6:3) Peitaʻi, sa faaleo atu e Elia ona faalogona moni. Mātau, e leʻi otegiaina e Ieova Elia ina ua manaʻo e aveese lona ola, ae sa Ia fesoasoani atu iā te ia.

¹³ Aiseā na oo ai na faalogona iā Elia? Muamua atu, sa taʻimua Elia i se mea na tupu i Isaraelu na faamaonia ai o Ieova o le Atua moni. O lenā mea na tupu na fasiotia ai perofeta e 450 a Paala. (1 Tu. 18:37-40) E ui sa naunau Elia e toe foʻi mai tagata o le Atua i le tapuaʻiga mamā, peitaʻi e leʻi tupu lenā mea. Na auina atu e le masiofo leaga o Iesepela se feʻau iā Elia, e faailoa atu ai o le a fasiotia o ia. O le fefe o Elia na sola atu ai i se toafa i le itu i saute o laueleele o Iuta.​—1 Tu. 19:2-4.

¹⁴ A o iai na o ia i le toafa, na taumānatu Elia e leai se aogā o lana galuega faaperofeta. Na ia faapea atu iā Ieova: “E lē sili atu aʻu i oʻu augātamā.” I ona lava manatu, e lē tāua o ia iā Ieova ma isi tagata, ma e leai sona aogā e pei o efuefu ma ponaivi o ona tuaa ua maliliu.

15. Sa faapefea ona faamautinoa atu e le Atua iā Elia, e tāua pea o ia i lana silafaga?

¹⁵ Sa tāua pea Elia i le silafaga a Lē e ona le malosi uma lava, ma faaauau ona ia faamautinoa atu iā Elia lenā mea moni. Na auina atu e le Atua se agelu e faamalosia Elia. Na ia saunia foʻi meaʻai ma meainu ina ia maua ai pea e Elia le malosi, mo lana malaga mo aso e 40 i le itu i saute o le Mauga o Horepa. Na faasaʻoina foʻi ma le agalelei e le Atua le manatu sesē o Elia, e faapea e leai se tagata Isaraelu na tumau faamaoni iā Ieova. Na talia e Elia faaeaga fou na avatu e le Atua iā te ia. O le fesoasoani a Ieova na ia maua ai aogā, ma toe maua le malosi e faia ai lana galuega faaperofeta.​—1 Tu. 19:5-8, 15-19.

16. O ā nisi o auala ua faatumauina ai i tatou e le Atua?

¹⁶ E fesoasoani le faaaʻoaʻoga a Elia e iloa ai po o tatou iai i le faatuatua, ma uunaʻia ai i tatou ia iai se vaaiga saʻo. Muamua, manatu i auala na faatumauina ai oe e Ieova. Atonu na fesoasoani atu se toeaina po o se isi Kerisiano taʻumatuaina ina ua e manaʻomia se fesoasoani. (Kala. 6:2) Po ua faafouina faaleagaga oe e ala i le Tusi Paia, lomiga ma sauniga a le faapotopotoga? Pe a e maua aogā mai i se tasi o na auala, ia manatua Lē na auala mai ai le fesoasoani, ma faafetai atu iā te Ia i le tatalo.​—Sala. 121:1, 2.

17. O le ā le mea e sili ona tāua iā Ieova mai i ana auauna?

¹⁷ Lona lua, ia manatua, e mafai ona faasesēina i tatou i manatu sesē. Peitaʻi, e sili atu ona tāua le silafaga a le Atua nai lo  o tatou manatu. (Faitau le Roma 14:4.) E lē faamasinoina e Ieova i tatou i mea ua tatou faataunuuina, ae e tāua iā te ia lo tatou tuutoina atu faapea lo tatou faamaoni iā te ia. E pei o le tulaga o Elia, atonu e sili atu mea ua e faia mo Ieova, nai lo o mea na e mafaufauina. Atonu na iai nisi i le faapotopotoga na iai ni aafiaga lelei mai iā te oe, po o nisi foʻi i le oganuu na faalogo i le upu moni ona o au taumafaiga.

18. O le ā ua mafai ona faamaonia i faaeaga ua tuuina mai e Ieova iā i tatou?

¹⁸ O le manatu mulimuli, ia vaai i o tatou faaeaga taʻitasi mai iā Ieova o se faamaoniga o lona finagalo malie mai iā i tatou. (Iere. 20:11) I le pei o Elia, atonu e tatou te lagona le lotovaivai ona o le lē fua mai o la tatou auaunaga, pe ua foliga mai foʻi ua lē taulau nisi o o tatou sini faaleagaga. Peitaʻi, e iai se faaeaga ua tatou maua, e sili atu nai lo o se isi lava mea ua tatou mauaina. O lenā faaeaga, o le talaʻia o le tala lelei ma tauaveina le suafa o le Atua. O lea, ia tutumau faamaoni, auā e pei ona fetalai Iesu, o le a mafai ai ona e ʻolioli faatasi ma lou matai.’​—Mata. 25:23.

19. O ā tulaga na feagai ma le tusitala o le Salamo 102?

¹⁹ Sa “mafatia” le tusitala o le Salamo 102 a lē o mea matuitui o le tino, o le lotomafatia. E leʻi maua foʻi e ia le malosi e fesagaʻia ai ona faafitauli. (Sala. 102, ulutala) E pau le mea na ia mafaufau i ai o ona tigā, le tuua toʻatasi, ma ona lava faalogona. (Sala. 102:3, 4, 6, 11) I lona manatu, na finagalo Ieova e tuulafoaʻia o ia.​—Sala. 102:10.

20. E faapefea ona fesoasoani le tatalo i se tasi o loo tauivi ma manatu sesē?

²⁰ Peitaʻi, sa mafai pea ona faaaogā le ola o le faisalamo e viiviia ai Ieova. (Faitau le Salamo 102:19-21.) E tusa ai ma le Salamo 102, e oo foʻi tigā i ē ua iai i le faatuatua ma faafaigatā ai ona uaʻi atu i se isi lava mea. Sa manatu le faisalamo i ona faalogona, e pei “o se manulele ua tuua toʻatasi i le taualuga o le fale.” Sa ia manatu e na o faafitauli lava ua siʻomia ai o ia. (Sala. 102:7) Pe a mapuna aʻe ni faalogona faapena iā te oe, ia sasaa atu na faalogona iā Ieova e pei o le faisalamo. E fesoasoani le tatalo iā te oe a o e tauivi ma manatu sesē, ma aua neʻi popole pe a e mafaufau e sesē ou manatu. Ia e maufaatuatuaina le folafolaga lenei a Ieova: “E liliu mai lava o ia i le tatalo a ē ua aveesea a latou mea uma, e lē inosia foʻi e ia la latou tatalo.”​—Sala. 102:17.

21. E faapefea i se tasi o loo tauivi ma manatu sesē, ona maua pea se vaaiga saʻo?

²¹ Ua faailoa mai foʻi i le Salamo 102 le auala e ono mafai ai ona e maua se vaaiga saʻo. Na faia faapea e le faisalamo e ala i le uaʻi atu i le la faiā ma Ieova. (Sala. 102:12, 27) Na faamāfanafanaina o ia i le iloa, e faatumauina pea e Ieova ona tagata a o feagai ma faigatā. O lea, pe a faafaigatā pea ona e faia le mea sili i le auaunaga i le Atua ona o manatu sesē, ia tatalo iā Ieova. Ia ōle atu iā te ia e faafofoga mai i lau tatalo ina ia e maua ai se mapusaga i ou mafatiaga, faapea foʻi le ʻfaalauiloaina atu o le suafa o Ieova.’​—Sala. 102:20, 21.

22. E faapefea ona tatou faafiafiaina Ieova?

²² E mafai ona tatou faaaogā le Tusi Paia e faamaonia ai o loo tatou iai i le faatuatua, ma e tāua i tatou i le silafaga a Ieova. E lē mafai ona tatou aveesea manatu sesē uma po o le lotovaivai ona o lenei faiga o mea. Peitaʻi, e mafai e i tatou uma taʻitoʻatasi ona faafiafiaina Ieova ma maua le faaolataga, e ala i le tumau ma le faamaoni i le auaunaga.​—Mata. 24:13.