1. Ngutiphi tibusiso letivela kuJehova letingasenta sihlale sijabulile?

JEHOVA ufuna sijabule futsi usipha netibusiso letinyenti letingasenta sijabule. Kwekucala nje siyaphila. Ngaleso sizatfu, singasebentisa kuphila kwetfu kute simdvumise njengobe kunguye lowasidvonsa kutsi simkhonte. (Hla. 144:15; Joh. 6:44) Jehova uyasicinisekisa kutsi uyasitsandza futsi uyasisita kute sicinisele njengobe simkhonta. (Jer. 31:3; 2 Khor. 4:16) Sijabulela kuba nekuthula naNkulunkulu njengobe sifundziswa nguye futsi sinebudlelwane lobuhle nebazalwane betfu labasitsandzako. Ngetulu kwako konkhe, sinelitsemba leliligugu lesikhatsi lesitako.

2. Letinye tinceku taNkulunkulu letetsembekile tihlushwa yini?

² Nangetulu kwekuba naletizatfu tekujabula, letinye tinceku taNkulunkulu letetsembekile tisahlushwa yimicabango yekutikhobosa. Tingase tive shengatsi atikabaluleki kuJehova, tona kanye nemsebenti wato letimentela wona. Kulabo labahlale banemuva lonjalo, umbono wekuhlala ujabulile “iminyaka leminyenti” ungabonakala uliphupho nje. Kubo kuphila kungabonakala kungemalanga nje lamanyenti ebumnyama.—Shu. 11:8.

3. Yini lengase ibangele imiva yekutikhobosa?

³ Lokungabangela bazalwane nabodzadze kutsi babe nemiva yekutikhobosa kungaba kudvumateka, kugula, nome letinye timphawu tekuguga. (Hla. 71:9; Taga 13:12; Shu. 7:7, NW.) Nanobe kunjalo, umKhristu ngamunye kufanele alivume liciniso lekutsi inhlitiyo  iyayengana futsi ingasilahla ngisho nome Nkulunkulu ajabula ngatsi. (Jer. 17:9; 1 Joh. 3:20) Develi umangalela tinceku taNkulunkulu ngemanga. Labo labacabanga njengaSathane bangetama kusenta sibe nembono lonjengalowo Elifazi lobekete kukholwa labenawo—umbono wekutsi sitintfo letingenamsebenti kuNkulunkulu. Njengobe lawo bekungemanga ngesikhatsi saJobe, nalamuhla kusengiwo.—Jobe 4:18, 19.

4. Sitawucoca ngani kulesihloko?

⁴ Jehova ukwenta kucace emiBhalweni kutsi utawuba nalabo ‘labahamba esigodzini lesinelitfunti lekufa.’ (Hla. 23:4) Lenye indlela layisebentisako kute abe natsi liVi lakhe. ‘Ngenca yaNkulunkulu liBhayibheli linemandla ekubhidlita tintfo letimbelwe tacina,’ letifaka ekhatsi imibono leliphutsa nalengakalungi. (2 Khor. 10:4, 5) Nyalo-ke asesicabangele indlela lesingalisebentisa ngayo liBhayibheli kute lisisite sibe nesimo sengcondvo lesihle futsi sisilondvolote. Ungazuza kuloku futsi utfole netindlela tekukhutsata labanye.

5. Ngukuphi kutihlola lokungasisita sibe nesimo sengcondvo lesihle?

⁵ Umphostoli Pawula wakhuluma ngaletinye tintfo letingasisita sibe nesimo sengcondvo lesihle. Wakhutsata libandla laseKhorinte watsi: “Chubekani nitihlola kutsi nisekukholweni yini.” (2 Khor. 13:5) ‘Kukholwa,’ kungito tonkhe tinkholelo tebuKhristu letembulwe eBhayibhelini. Nangabe emavi etfu kanye netento tetfu kuhambisana naleto tinkholelo, sitawube siphumelele kuloluhlolo futsi sitawukhombisa kutsi ‘sisekukholweni.’ Kuliciniso kutsi kufanele sicatsanise kuphila kwetfu kanye nato tonkhe timfundziso tebuKhristu. Akukafaneli sikhetse kutsi ngukuphi lesitakulalela.—Jak. 2:10, 11.

6. Kungani kufanele sitihlole ‘kutsi sisekukholweni yini’? (Buka sitfombe lesisekucaleni kwalesihloko.)

⁶ Ungase ungabate kutihlola, ikakhulukati nangabe ucabanga kutsi utawehluleka. Nanobe kunjalo, indlela Jehova lasibona ngayo ibaluleke kakhulu kunendlela tsine lesitibona ngayo, futsi kucabanga kwakhe kuphakeme kakhulu kunekwetfu. (Isa. 55:8, 9) Tikhonti takhe utihlola ngenjongo yekutsi abone lokuhle kuto futsi atisite, hhayi ngenjongo yekutsi atilahle. Nawusebentisa liVi laNkulunkulu kute utihlole ‘kutsi usekukholweni yini,’ utawutibona ngendlela Nkulunkulu lakubona ngayo. Loku kungakusita ungacabangi kutsi awukabaluleki kuNkulunkulu kodvwa esikhundleni saloko ube nanasi sicinisekiso lesisekelwe eBhayibhelini: Ubaluleke kakhulu kuJehova. Umphumela waloku utawufana nekuvula emakhethini kute kungene kukhanya ekamelweni lelimnyama.

7. Singazuza njani etibonelweni letiseBhayibhelini tebantfu labetsembekile?

⁷ Indlela lephumelelako yekutihlola kutsi uzindle ngetibonelo tebantfu labetsembekile lokukhulunywa ngabo eBhayibhelini. Kufanele ucatsanise timo tabo kanye netakho nobe indlela labebativa ngayo nendlela wena lotiva ngayo, kute ubone kutsi bewungenta njani kube bewusesimeni sabo. Asesihlole tibonelo letintsatfu letiveta indlela longalisebentisa ngayo liBhayibheli kute uhlole ‘kutsi usekukholweni yini,’ futsi ngaleyo ndlela ukwati kutibona ngendlela lefanele.

8, 9. (a) Besinjani simo salomfelokati lophuyile? (b) Ngumiphi imiva lengakafaneli lokungenteka lomfelokati abenayo?

⁸ Ngesikhatsi asethempelini eJerusalema, Jesu wabuka umfelokati lophuyile. Sibonelo salomfelokati singasisita kutsi sihlale sinesimo sengcondvo lesihle nangetulu kwetimo lesikuto. (Fundza Lukha 21:1-4.) Asewucabange ngetimo talomfelokati: Akudzingekanga kutsi abeketelele lusizi lwekufelwa yindvodza yakhe nje kuphela, kodvwa kwadzingeka abeketelele nebaholi benkholo ‘lebebadla tindlu tebafelokati’ esikhundleni sekutsi babasite.  (Luk. 20:47) Abephuye kakhulu kangangekutsi ethempelini abekhona kunikela ngemali lelingana naleyo sisebenti lebesingayitfola ngemizuzu nje lembalwa.

⁹ Asewucabange nje ngendlela lomfelokati lativa ngayo nakangena emabaleni elithempeli aphetse tinhlavu letimbili temali. Kungenteka yini abecabanga ngekutsi imali labetayinikela yincane kangakanani nayicatsaniswa naleyo lebekayinikela ngesikhatsi indvodza yakhe isaphila? Abetawutiva anemahloni yini nakabona imali lenyenti lenikelwa ngulabo labasembikwakhe, mhlawumbe aze atibute nekutsi umnikelo wakhe ubalulekile yini vele? Ngisho nobe kungenteka kutsi abetiva ngaleyo ndlela, wenta konkhe lokusemandleni akhe kute asekele kukhonta kweliciniso.

10. Jesu wakuveta njani kutsi lomfelokati abebalulekile kuNkulunkulu?

¹⁰ Jesu waveta kutsi lomfelokati abebalulekile kuJehova, kanye nemnikelo wakhe. Watsi “ufake lokunyenti kwendlula bonkhe [labanjingile].” Umnikelo wakhe bewutawuhlanganiswa newalabanye, kodvwa Jesu wawubonga lomnikelo wakhe. Labo labebatsatsa iminikelo emabhokisini bebatawutfola letinhlavu letimbili temali kodvwa bebangeke bati kutsi tibaluleke kangakanani kuJehova, tona kanye naloyo lotinikele. Nobe kunjalo, umbono waNkulunkulu ngiwo lobewubaluleke kakhulu, hhayi loko labanye lebebakucabanga, ngisho nendlela lomfelokati labetibona ngayo. Ungayisebentisa yini lendzaba kute utihlole kutsi usekukholweni yini?

11. Yini longayifundza endzabeni yalomfelokati?

¹¹ Timo takho tingase tikutsintse ngalokucondzile loko longakhona kukwentela Jehova. Ngenca yekukhula nobe kugula, sincane kakhulu sikhatsi labanye labakhona kusicitsa ekushumayeleni tindzaba letimnandzi. Kungaba kuhle yini bacabange kutsi loko labakwentile kuncane kakhulu kutsi bangakubika? Ngisho nobe ungaguli nobe ungakakhuli kangako, ungase ubone shengatsi imetamo yakho mincane kakhulu kunawo onkhe ema-awa bantfu baNkulunkulu labawacitsa umnyaka nemnyaka bamkhonta. Nobe kunjalo, kulendzaba yemfelokati lophuyile sifundza kutsi Jehova uyakunaka konkhe lesimentela kona futsi  kuligugu kuye, ikakhulukati nangabe sikwente sisetimeni letimatima. Asewucabange ngekukhonta kwakho Jehova kulomnyaka lophelile. Akhona yini ema-awa lowawasebenta lapho kwadzingeka kutsi utidzele khona? Nangabe kunjalo, ciniseka kutsi Nkulunkulu ukutsatsa njengalokubalulekile loko lowamentela kona. Nawulingisa lomfelokati lophuyile ngekwenta konkhe lokusemandleni akho emsebentini waJehova, unesizatfu lesicinile sekuciniseka kutsi ‘usekukholweni.’

12-14. (a) Imiva lengakafaneli yamenta wativa njani Elija? (b) Yini lokungenteka yabangela Elija kutsi ative ngalendlela?

¹² Umphrofethi Elija abetsembekile kuJehova futsi abenekukholwa lokucinile. Kodvwa ngalesinye sikhatsi wakhatsateka kakhulu kangangekutsi wacela kuJehova kutsi afe, watsi: “Simakadze, sekwenele, sale utsatsa kuphila kwami.” (1 Khos. 19:4) Labo labangakase bahlangabetane nesimo lesinjena bangasheshe bacabange kutsi umthantazo wa-Elija bewumane nje ungemavi langasho lutfo. (Jobe 6:3, NW.) Kodvwa-ke abekhatsateke mbamba. Kepha naka kutsi esikhundleni sekutsi Jehova amtsetsise ngekufuna kwakhe kufa, wamsita.

¹³ Yini leyabangela Elija kutsi ative ngaleyo ndlela? Abesandza kwenta intfo leyafakazela kuma-Israyeli kutsi Jehova unguNkulunkulu weliciniso, futsi loku kwaphumela ekutseni kubulawe baphrofethi baBhali labangu-450. (1 Khos. 18:37-40) Kungenteka abenelitsemba lekutsi bantfu baNkulunkulu bebatawubuyela ekukhonteni kweliciniso, kodvwa akuzange kube njalo. Jezebeli indlovukazi lembi, watfumela umlayeto ku-Elija watsi uhlela kutsi abulawe. Ngesizatfu sekutsi bekesabela kuphila kwakhe, Elija wabalekela eningizimu wancamula eveni lakaJuda lebelisedvute waya ehlane.—1 Khos. 19:2-4.

¹⁴ Njengobe abeyedvwa azindla, Elija wacabanga ngekutsi umsebenti wakhe wekuba ngumphrofethi bewungakabaluleki. Watsi kuJehova: “Kute lengincono ngako kunabokhokho bami.” Ngekusho njalo abebona shengatsi akakabaluleki, ufana nje nelutfuli kanye nematsambo abokhokho bakhe. Ecinisweni abetihlole ngetakhe timiso wase ubona kutsi usehluleki, futsi akakabaluleki kuJehova nakunobe ngumuphi lomunye umuntfu.

15. Nkulunkulu wamcinisekisa njani Elija kutsi abesolo abalulekile kuye?

¹⁵ Kodvwa-ke Somandla abembona ngalenye indlela Elija. Abesolo abalulekile kuNkulunkulu, futsi Jehova wamcinisekisa ngaloku. Nkulunkulu watfumela ingilosi kute icinise Elija. Waphindze wamlungiselela kudla kanye nekwekunatsa kute atewuchubeka neluhambo lwakhe lwemalanga langu-40 loluya ngaseningizimu eNtsabeni iHorebe. Ngetulu kwaloko, ngemusa Nkulunkulu wawulungisa umbono loliphutsa wa-Elija wekutsi kute lamanye ema-Israyeli letsembekile kuJehova. Lokubaluleke kakhulu kutsi Nkulunkulu wamnika leminye imisebenti Elija futsi wayemukela. Wazuza kakhulu ngelusito lalunikwa nguJehova, ngako wabuyela emsebentini wakhe wekuba ngumphrofethi emandla akhe asavuselelekile.—1 Khos. 19:5-8, 15-19.

16. Ngutiphi letinye tindlela lokungenteka Nkulunkulu ukusekele ngato?

¹⁶ Indzaba ya-Elija ingakusita uhlole kutsi usekukholweni yini futsi ikwente ube nembono lofanele. Kwekucala, cabanga ngetindlela Jehova lakusekele ngato. Kungenteka yini kutsi lenye yetinceku takhe, mhlawumbe lomdzala welibandla nobe umKhristu lovutsiwe wake wakusita ngesikhatsi udzinga lusito? (Gal. 6:2) Uke wasitfola yini sikhutsato eBhayibhelini, etincwadzini tetfu tebuKhristu nobe emihlanganweni yelibandla? Nawuphindze uzuza kuloku, cabanga ngaloyo longuMtfombo welusito lwakho bese uyathantaza umbonge.—Hla. 121:1, 2.

17. Yini Jehova layitsatsa njengalebalulekile etincekwini takhe?

¹⁷ Kwesibili, kufanele wati kutsi simo sengcondvo lesingakafaneli singakukhohlisa.  Indlela Nkulunkulu lasibona ngayo ngiyo lebalulekile. (Fundza Roma 14:4.) Jehova ukutsatsa njengalokubalulekile kutinikela nekwetsembeka kwetfu kuye; akabuki kutsi kungakanani lesikufezile. Njenga-Elija, kungenteka kutsi nawe umentele lokunyenti Jehova kunaloko lokwatiko. Kungenteka nekutsi bakhona bantfu lobasitile ebandleni, kanye nebantfu labasensimini labafundze liciniso ngenca yemetamo yakho.

18. Umsebenti lowunikwe nguJehova ufakazela ini?

¹⁸ Kwekugcina, tabelo letivela kuJehova titsatse njengebufakazi bekutsi uyakusekela. (Jer. 20:11) Njenga-Elija, kungenteka kutsi utiva uphelelwa ngemandla ngobe umsebenti wakho ubonakala ungatseli nobe leminye imigomo yekukhonta Nkulunkulu ibonakala ingafinyeleleki. Kodvwa unelilungelo lelikhulu kakhulu sonkhe lesingaba nalo, lekushumayela tindzaba letimnandzi kanye nekubitwa ngelibito laNkulunkulu. Ngako-ke hlala wetsembekile. Ngaleyo ndlela, lamavi Jesu lawasho kulomunye umfanekiso wakhe angashiwo nakuwe: “Jabula kanye nami.”—Mat. 25:23.

19. Ngusiphi simo umbhali weTihlabelelo 102 labekuso?

¹⁹ Umbhali weTihlabelelo 102 abesesimeni lesimatima. ‘Abehluphekile,’ acindzeteleke kakhulu enyameni nasemoyeni futsi angasakhoni nekubeketelela tinkinga takhe. (Hla. 102, umbhalo longenhla) Emavi akhe asenta sibone kutsi abesebuhlungwini lobukhulu, ativa ayedvwa, futsi ahlushwa yimiva yakhe. (Hla. 102:3, 4, 6, 11) Abeciniseka ngekutsi Jehova ufuna kumlahla.—Hla. 102:10.

20. Umthantazo ungamsita njani umuntfu lolwisana nemicabango lengakafaneli?

²⁰ Kodvwa-ke lomhlabeli wachubeka asebentisa kuphila kwakhe kute advumise Jehova. (Fundza Tihlabelelo 102:19-21.) Njengobe kuvetwa kuTihlabelelo 102, ngisho nebantfu labasekukholweni bangaba sebuhlungwini lobukhulu futsi bakutfole kumatima kucabanga ngaletinye tintfo. Umhlabeli weva shengatsi ‘ufanana nenyoni ledliwa situnge, lehleti etikwendlu,’ kwaba shengatsi intfo lebeyikhona nje bekutinkinga takhe kuphela. (Hla. 102:7) Nangabe kwenteka utiva ngaleyo ndlela, tfululela sifuba sakho kuJehova njengobe kwenta umhlabeli. Imithantazo yakho nawuhluphekile ingakusita nawulwisana nemicabango lengakafaneli. Jehova wetsembisa kutsi ‘utayinaka imikhuleko yalabangenabani, angayibukeli phansi imithantazo yabo.’ (Hla. 102:17) Kufanele usetsembe lesetsembiso.

21. Umuntfu lolwisana nemiva lengakafaneli angenta njani kute abe nesimo sengcondvo lesihle?

²¹ Tihlabelelo 102 tiphindze tisikhombise loko lesingakwenta kute sibe nesimo sengcondvo lesihle. Umhlabeli wakwenta loku ngekutsi anake buhlobo bakhe naJehova. (Hla. 102:12, 27) Wadvudvuteka kakhulu ngekwati kutsi Jehova utawuhlale abasekela bantfu baKhe nabavivinywa. Ngako-ke, nangabe kuba nemiva lengakafaneli kukuphatamisa kwesikhashana ekwenteni loko lobewungafisa kukwenta emsebentini waNkulunkulu, kufanele uthantaze ngako. Cela Nkulunkulu kutsi awuve umthantazo wakho, kungabi ngenjongo yekutsi ukhululeke ekucindzetelekeni kwakho kuphela kodvwa “kuze bantfu bavakalise libito laSimakadze.”—Hla. 102:20, 21.

22. Ngamunye wetfu angamjabulisa njani Jehova?

²² Ngako-ke singasebentisa liBhayibheli kute sibone kutsi sisekukholweni futsi sibalulekile kuJehova. Kuliciniso kutsi kulelive lesiphila kulo kungenteka singakhoni kucedza yonkhe imiva lengakafaneli nobe kudvumateka. Nanobe kunjalo, ngamunye wetfu angakhona kujabulisa Jehova futsi asindziswe ngekuchubeka ngekwetsembeka acinisela emsebentini wakhe.—Mat. 24:13.