1. Bensaun saida deʼit mak Jeová fó mai ita atu bele sente kontente?

 MAROMAK JEOVÁ hakarak ita sente kontente, no nia fó bensaun barak mai ita hodi halo ita haksolok. Bensaun ida mak ita-nia moris. Ita bele uza ita-nia moris hodi fó hahiʼi ba Maromak, tanba nia dada ita hodi adora nia iha dalan neʼebé loos. (Salmo [Mazmur] 144:15; João 6:44) Jeová hatudu nia domin mai ita no ajuda ita atu kontinua halo ninia serbisu. (Jeremias [Yeremia] 31:3; 2 Korinto 4:16) Ita haksolok tanba ita hetan ai-han espirituál barak no iha maun-alin iha mundu tomak. Liután neʼe, ita iha esperansa kapás iha futuru.

2. Maromak nia atan balu sente oinsá?

² Maski ita iha razaun barak atu sente kontente, maibé Maromak nia atan balu la sente kontente kona-ba sira-nia an. Karik sira sente katak Aman Jeová la hafolin sira ka sira-nia serbisu. Ba ema neʼebé kontinua sente hanesan neʼe, karik sira la fiar katak ema bele haksolok ba “tinan barak”. Sira sente katak moris mak hanesan rai neʼebé nakukun.—Eclesiastes (Pengkhotbah) 11:8.

3. Saida deʼit mak bele book ita atu sente la kontente?

³ Karik ita sente hanesan neʼe tanba laran-tun, moras, ka idade ona. (Salmo [Mazmur] 71:9; Provérbios [Amsal] 13:12;  Eclesiastes [Pengkhotbah] 7:7) Liután neʼe, ita hotu hatene katak laran mak “makerek”, no dala ruma ita-nia laran bele fó-sala ba ita maski Maromak kontente ona ho ita. (Jeremias [Yeremia] 17:9; 1 João 3:20) Diabu mós habelar lia-bosok kona-ba Maromak nia atan sira. Iha Job nia tempu, Satanás book Elifaz atu hatete katak Job la iha folin ba Maromak. Maibé, ida-neʼe mak lia-bosok, no Satanás uza lia-bosok hanesan neʼe toʼo ohin loron.—Jó (Ayub) 4:18, 19.

4. Iha lisaun neʼe ita sei koʼalia kona-ba saida?

⁴ Iha Bíblia, Maromak Jeová hatete ho klaru katak nia sei hamutuk ho ema sira neʼebé sente laran-tun. (Salmo [Mazmur] 23:4) Dalan ida neʼebé nia hamutuk ho ita mak liuhusi ninia Liafuan. Bíblia mak “kbiit husi Maromak hodi sobu rahun moru neʼebé metin”, neʼe inklui mós ideia sala no hanoin neʼebé halo ita laran-tun. (2 Korinto 10:4, 5) Tan neʼe, mai ita hanoin kona-ba oinsá mak ita bele uza Bíblia atu ajuda ita nafatin sente kontente. No ida-neʼe sei lori diʼak ba ita-nia an rasik no mós ajuda ita atu fó laran-manas ba ema seluk.

5. Atu nafatin kontente hodi serbí Jeová, ita presiza koko kona-ba saida?

⁵ Apóstolu Paulo fó sai kona-ba buat balu neʼebé bele ajuda ita atu nafatin kontente hodi serbí Jeová. Nia dehan ba kongregasaun Korinto: “Kontinua koko imi-nia an atu hatene se imi hela iha fiar ka lae.” (2 Korinto 13:5) Fiar neʼe mak hanorin kristaun nian hotu neʼebé mai husi Bíblia. Se ita-nia liafuan no hahalok tuir duni hanorin sira-neʼe, ida-neʼe katak ita sei “hela iha fiar”. Klaru katak ita labele hili hanorin balu deʼit neʼebé ita gosta. Ita tenke halo tuir hanorin kristaun nian hotu husi Bíblia.—Tiago 2:10, 11.

6. Tanbasá mak ita tenke koko ita-nia an atu ‘hatene se ita hela iha fiar ka lae’? (Haree dezeñu iha pájina 12.)

⁶ Karik ita taʼuk atu koko ita-nia an, liuliu se ita sente katak ita sei hetan buat barak neʼebé ladiʼak. Maski nuneʼe, Jeová nia haree kona-ba ita mak importante, no ninia hanoin mak aas liu fali ita-nian. (Isaías [Yesaya] 55:8, 9) Nia haree didiʼak ninia atan sira laʼós atu duun sira, maibé atu buka sira-nia hahalok diʼak no ajuda sira. Kuandu ita uza Maromak nia Liafuan atu koko ita-nia an hodi ‘hatene se ita hela iha fiar ka lae’, ita sei haree ita-nia an hanesan Maromak haree. Ida-neʼe sei ajuda ita atu halakon hanoin sala katak ita la iha folin, tanba tuir Maromak nia haree, ita folin-boot iha ninia oin. Ida-neʼe sei halo ita kontente hanesan kuandu ita loke janela no loro-matan tama iha kuartu neʼebé nakukun.

7. Oinsá mak Maromak nia atan sira-nia ezemplu iha Bíblia bele ajuda ita?

⁷ Dalan ida atu koko ita-nia an mak hodi hanoin kleʼan kona-ba Maromak nia atan sira-nia ezemplu iha Bíblia. Kompara sira-nia situasaun ka sentimentu ho ita-nian, no hanoin toʼok saida mak ita sei halo kuandu ita mak iha sira-nia situasaun. Mai ita haree ezemplu tolu kona-ba oinsá mak ita bele uza Bíblia atu ‘hatene se ita hela iha fiar ka lae’. Hodi halo ida-neʼe sei ajuda ita atu sente kontente kona-ba ita-nia an rasik.

8, 9. (a) Feto-faluk kiak neʼe nia situasaun oinsá? (b) Karik nia sente oinsá?

⁸ Agora mai ita hanoin kona-ba feto-faluk kiak ida neʼebé Jesus haree iha templu iha Jeruzalein. Feto neʼe nia ezemplu bele ajuda ita atu nafatin kontente maski ita la bele halo buat hotu neʼebé ita hakarak halo. (Lee Lucas 21:1-4.) Hanoin toʼok kona-ba feto-faluk neʼe nia situasaun: Nia presiza tahan susar sira hanesan ninia laʼen mate no nia mós moris iha tempu neʼebé ulun-naʼin  relijiaun sira hakarak deʼit atu “hadau feto-faluk sira-nia sasán” duké ajuda sira. (Lucas 20:47) Feto neʼe kiak tebetebes toʼo ninia kontribuisaun nia folin mak hanesan osan neʼebé ema baibain hetan hodi serbisu ba minutu 15 deʼit.

⁹ Hanoin toʼok oinsá feto-faluk neʼe sente nuʼudar nia tama ba área templu nian hodi lori ninia osan kiʼik rua. Karik nia hanoin kona-ba oinsá ninia kontribuisaun neʼebé nia fó agora kiʼik liu fali buat neʼebé uluk nia fó kuandu nia laʼen moris hela. No karik nia sai moe tanba haree ema sira neʼebé iha nia oin fó kontribuisaun neʼebé boot liu no haree katak ninia kontribuisaun la iha folin. Maski ita la hatene saida mak nia sente, maibé nia hakaʼas an atu apoia adorasaun neʼebé loos.

10. Oinsá mak Jesus hatudu katak feto-faluk neʼe folin-boot ba Maromak?

¹⁰ Jesus hatudu katak Jeová hafolin feto-faluk neʼe no ninia kontribuisaun. Nia dehan katak feto-faluk neʼe tau barak liu fali ema riku sira hotu. Maski ninia kontribuisaun sei kahur ho osan neʼebé ema seluk fó, maibé Jesus hafolin feto neʼe nia laran-metin ba Jeová. Tuir loloos, ema neʼebé halibur kontribuisaun la hatene katak osan kiʼik rua neʼe no ema neʼebé fó kontribuisaun kiʼik neʼe mak folin-boot duni ba Jeová. Maibé Maromak nia hanoin mak importante liu, laʼós ema nia hanoin ka feto-faluk neʼe nia hanoin. Ita bele uza istória neʼe atu koko se ita “hela iha fiar ka lae”?

11. Saida mak ita aprende husi istória kona-ba feto-faluk?

¹¹ Dala ruma buat neʼebé ita fó ba Maromak depende ba ita-nia situasaun. Tanba ita balu idade ona ka moras, karik tempu neʼebé ita uza atu haklaken mak uitoan deʼit. No maski ita balu la hasoru situasaun hanesan neʼe, maibé dala ruma ita sente katak ita-nia relatóriu mak kiʼik deʼit se kompara ho oras hotu neʼebé Maromak nia atan sira uza atu halo serbisu ba nia. Neʼe katak ita la presiza fó relatóriu haklaken nian ka lae? Istória kona-ba feto-faluk kiak neʼe hatudu katak Jeová haree no hafolin buat kiʼik  hotu neʼebé ita halo ba nia, liuliu kuandu ita halo ida-neʼe maski hasoru susar. Hanoin fali kona-ba ita-nia adorasaun ba Jeová iha tinan ida liubá nia laran. Ita presiza husik ita-nia hakarak rasik hodi uza oras balu atu halo serbisu ba Maromak ka lae? Se nuneʼe, ita bele fiar katak Maromak hafolin buat neʼebé ita halo ba nia iha oras sira-neʼe. Kuandu ita banati-tuir feto-faluk neʼe hodi halo buat hotu neʼebé ita bele halo iha Jeová nia serbisu, ita bele hatudu duni katak ita “hela iha fiar”.

12-14. (a) Kuandu Elias sente laran-tun, oinsá mak nia hanoin? (b) Tanbasá mak Elias sente hanesan neʼe?

¹² Profeta Elias laran-metin ba Jeová no nia iha fiar neʼebé boot. Maibé, loron ida Elias sente laran-tun tebes toʼo nia husu ba Jeová atu oho nia hodi dehan: “Toʼo ona! Agora, oh Jeová, hasai tiha haʼu-nia moris.” (1 Reis [Raja-Raja] 19:4) Ema neʼebé seidauk hasoru susar boot karik hanoin katak Elias halo orasaun hodi koʼalia naranaran deʼit. (Jó [Ayub] 6:3) Maibé Elias sente duni hanesan neʼe. No Jeová ajuda Elias duké sai hirus ba nia.

¹³ Tansá mak Elias sente hanesan neʼe? Lakleur antes neʼe, nia halo milagre neʼebé hatudu katak Jeová mak Maromak neʼebé loos, no tuirmai ema Izraél oho profeta Baal nian hamutuk naʼin-450. (1 Reis [Raja-Raja] 18:37-40) Iha tempu neʼebá, karik Elias hein katak Maromak nia povu sei fila fali ba adorasaun neʼebé loos, maibé ida-neʼe la mosu. No Liurai-Feto Jezabel neʼebé aat haruka mensajen ba Elias katak nia sei oho Elias. Tanba taʼuk mate, Elias halai ba rai-fuik iha Judá.—1 Reis (Raja-Raja) 19:2-4.

¹⁴ No kuandu Elias mesamesak, karik nia sente katak ninia knaar nuʼudar profeta mak saugati deʼit. Nia hatete ba Jeová: “Haʼu hanesan deʼit ho haʼu-nia beiʼala sira.” Elias sente katak nia la konsege halo buat ida hanesan deʼit ho rai-rahun no ruin husi ninia beiʼala sira neʼebé mate ona. Tuir ninia hanoin, nia la vale ida, no la iha folin ba Jeová no ema seluk.

15. Oinsá mak Maromak ajuda Elias atu hatene katak nia nafatin iha folin-boot?

¹⁵ Maibé, Maromak Aas Liu nia hanoin la hanesan ho Elias nian. Elias mak ema neʼebé nafatin folin-boot iha Jeová nia oin, no Jeová hatudu sai ba nia kona-ba neʼe. Maromak haruka anju ida atu hametin Elias. Jeová mós fó ai-han no hemu ba nia hodi ajuda nia iha ninia viajen durante loron 40 atu bá Foho Horeb. Liután neʼe, ho laran-diʼak Maromak hadiʼa Elias nia hanoin neʼebé sala katak la iha ema ida iha Izraél neʼebé laran-metin ba Jeová. No Maromak mós fó knaar foun ba Elias no nia simu ida-neʼe. Elias simu Jeová nia ajuda no hetan forsa liután atu kontinua halaʼo ninia knaar nuʼudar profeta.—1 Reis (Raja-Raja) 19:5-8, 15-19.

16. Iha dalan saida deʼit mak Maromak ajuda ita?

¹⁶ Elias nia esperiénsia bele ajuda ita atu koko ita-nia fiar no nafatin kontente hodi serbí Jeová. Primeiru, mai ita hanoin kona-ba dalan sira neʼebé Maromak Jeová tau matan ba ita. Porezemplu, Jeová uza ona katuas kristaun ka maluk kristaun ida atu ajuda ita kuandu ita presiza ka lae? (Galásia 6:2) Karik ita mós sente katak Jeová sei tau matan ba ita kuandu ita estuda Bíblia, lee ita-nia livru sira, no tuir reuniaun kristaun nian. Aban bainrua kuandu ita hetan ajuda ruma husi dalan sira-neʼe, diʼak atu hanoin kona-ba buat diʼak sira-neʼe nia Hun no halo orasaun hodi fó-agradese ba Jeová.—Salmo (Mazmur) 121:1, 2.

17. Saida mak Jeová hafolin iha ninia atan sira?

¹⁷ Segundu, hanoin-hetan katak ita-nia laran bele lohi ita atu iha hanoin neʼebé laloos. Maibé Maromak nia hanoin kona-ba ita mak importante liu. (Lee Roma 14:4.) Jeová hafolin ita-nia adorasaun no ita-nia laran-metin ba nia. Nia hafolin ita laʼós tuir  deʼit rezultadu neʼebé ita hetan husi ita-nia serbisu ba nia. Hanesan Elias, karik ita mós halo ona buat barak ba Jeová maski ita rasik la hanoin hanesan neʼe. Karik ita ajuda ona ema balu iha kongregasaun liuhusi ita-nia hahalok diʼak, no karik ema iha ita-nia haklaken-fatin hetan oportunidade atu hatene lia-loos tanba ita-nia hakaʼas-an.

18. Knaar neʼebé Jeová fó ba ita hatudu saida?

¹⁸ Ikusliu, haree knaar hotu husi Jeová nuʼudar prova katak nia hamutuk ho ita. (Jeremias [Yeremia] 20:11) Hanesan Elias, dala ruma ita laran-tun tanba ita sente katak ita-nia serbisu la lori rezultadu diʼak ka tanba ita la bele kumpre ita-nia planu balu iha Jeová nia serbisu. Maski nuneʼe, ita sei hola parte hela ba knaar espesiál liu, neʼe mak haklaken liafuan diʼak no lori Jeová nia naran. Entaun, se ita nafatin laran-metin, ita bele ‘tama ba ita-nia naʼi nia ksolok’ hanesan Jesus hatete.—Mateus 25:23.

19. Situasaun saida mak ema neʼebé hakerek Salmo 102 hasoru?

¹⁹ Ema neʼebé hakerek Salmo 102 sente laran-susar tebes. Nia hetan “terus” iha isin no neon, no nia mós “la iha ona kbiit” atu tahan hasoru ninia terus. (Salmo [Mazmur] 102, haree ba liafuan iha salmu neʼe nia leten) Ninia liafuan sira hatudu katak nia sente moras, sente mesak, no mout iha ninia hanoin sira. (Salmo [Mazmur] 102:3, 4, 6, 11) Nia sente katak Jeová hakarak atu soe tiha nia.—Salmo (Mazmur) 102:10.

20. Oinsá mak orasaun bele ajuda ita atu kontra hasoru ita-nia neon-susar?

²⁰ Maski nuneʼe, ema neʼebé hakerek salmu neʼe kontinua uza ninia moris atu hahiʼi Jeová. (Lee Salmo [Mazmur] 102:19-21. a) Salmo 102 hatudu katak, dala ruma ema ida neʼebé “hela iha fiar” mós bele sente laran-tun no susar atu iha hanoin neʼebé loos. Ema neʼebé hakerek salmu neʼe sente katak nia “hanesan ho manu ida neʼebé mesamesak iha kakuluk leten”, katak nia sente ninia maluk la iha, só problema deʼit mak haleʼu nia. (Salmo [Mazmur] 102:7) Se ita mós sente hanesan neʼe, diʼak atu entrega ita-nia laran tomak ba Jeová hanesan ema neʼebé hakerek salmu neʼe halo. Ita-nia orasaun bele ajuda ita atu kontra hasoru ita-nia neon-susar. Jeová promete katak “nia sei see tilun ba orasaun husi ema neʼebé terus; nia sei la hakribi sira-nia orasaun”. (Salmo [Mazmur] 102:17) Tau fiar ba promesa neʼe.

21. Se ita sente laran-tun, oinsá mak ita bele iha hanoin neʼebé loos hodi nafatin kontente?

²¹ Salmo 102 mós hatudu kona-ba oinsá mak ita bele haburas hanoin neʼebé loos hodi nafatin kontente. Ema neʼebé hakerek salmu neʼe deside atu hanoin kona-ba ninia relasaun ho Jeová. (Salmo [Mazmur] 102:12, 27) Kuandu nia hatene katak Jeová sempre ajuda Ninia povu atu tahan hasoru susar oioin, ida-neʼe fó kmaan ba nia. Entaun, se ita sente laran-tun no ida-neʼe hanetik ita atu halo buat barak iha Jeová nia serbisu, halo orasaun kona-ba neʼe. Husu Maromak nia ajuda laʼós deʼit atu ita sente kmaan, maibé mós atu fó sai Jeová nia naran.—Salmo (Mazmur) 102:20, 21.

22. Oinsá mak ita hotu bele halo Jeová kontente?

²² Sin, ita bele uza Bíblia atu prova katak ita sei “hela iha fiar” no katak ita folin-boot ba Jeová. Klaru katak iha mundu aat neʼe ita la bele halakon ita-nia neon-susar hotu. Maibé, ita hotu bele halo Jeová kontente no hetan moris rohan-laek se ita tahan toʼo rohan iha ninia serbisu.—Mateus 24:13.