1. Ndi dzifhio phaṱhutshedzo dza Yehova dzine dza nga ri thusa uri ri takale?

YEHOVA u ṱoḓa uri ri takale nahone u ri shululela phaṱhutshedzo nnzhi dzine dza ita uri ri takale. Sa tsumbo, o ri ṋea vhutshilo. Nga zwenezwo, ri nga shumisa vhutshilo hashu u itela u renda Mudzimu, samusi o ri kokodzela kha vhurabeli ha ngoho. (Ps. 144:15; Yoh. 6:44) Yehova u ri khwaṱhisedza uri u a ri funa nahone u ri thusa uri ri konḓelele tshumeloni yawe. (Yer. 31:3; 2 Vhakor. 4:16) Ri takalela paradiso ya muya, hune ra wana zwiḽiwa zwinzhi zwa muya na lufuno lwa vhahashu. Zwiṅwe hafhu, ri na fulufhelo ḽavhuḓi ḽa vhumatshelo.

2. Vhaṅwe vhashumeli vha fulufhedzeaho vha Mudzimu vha lwisana na mini?

² Naho ri na zwenezwi zwiitisi zwa u takala, vhaṅwe vhashumeli vha fulufhedzeaho vha Mudzimu vha lwisana na mahumbulele o khakheaho nga ha vhone vhaṋe. Vha nga vhona u nga Yehova u vha dzhia vha si vha ndeme nahone tshumelo yavho a i thusi tshithu. Vhenevho vhathu vhane vha dzulela u vha na eneo mahumbulele o khakheaho, vha nga vhona u nga ‘miṅwaha yo andaho’ ndi muloro khavho. Vha nga vhona u nga vhutshilo havho ho ḓala thaidzo dzi sa fheli.—Muh. 11:8.

3. Ndi mini zwine zwa nga bveledza maḓipfele o khakheaho?

³ Vhenevho vhahashu vha tshinnani na vha tshisadzini vha nga  vha na mahumbulele o khakheaho nga ṅwambo wa u kulea nungo, malwadze kana vhulala. (Ps. 71:9; Mir. 13:12; Muh. 7:7) Zwiṅwe hafhu, Mukriste muṅwe na muṅwe u tea u ṱhogomela mbuno ya uri mbilu ndi mudzia-tshimbevha nahone i nga ri vhona mulandu naho Mudzimu a tshi ri takalela. (Yer. 17:9; 1 Yoh. 3:20) Diabolo u pomoka vhashumeli vha Mudzimu. Vhane vha vha na mahumbulele a ngaho a Sathane vha nga lingedza u ri shata mavhonele o bulwaho nga Elifasi we a vha e si na lutendo—a uri a ri vha ndeme phanḓa ha Mudzimu. Eneo o vha e mazwifhi a misini ya Yobo samusi zwo tou ralo na ṋamusi.—Yobo 4:18, 19.

4. Ri ḓo ṱhogomela mini kha yeneyi thero?

⁴ Yehova o zwi bvisela khagala Maṅwaloni uri u ḓo vha na vhane vha “tshimbila govhani ḽa dunzi ḽa lufu.” (Ps. 23:4) Iṅwe nḓila ine a vha na riṋe ngayo ndi nga Ipfi ḽawe. Bivhili ndi “maanḓa a Mudzimu a u thutha mitsheṱo ya maswina,” u katela na mavhonele o khakheaho. (2 Vhakor. 10:4, 5) Nga zwenezwo-ha, kha ri ṱhogomele nḓila ine ra nga shumisa ngayo Bivhili u itela u ri thusa uri ri ṱahulele na u dzula ri na mavhonele avhuḓi. Zwenezwi zwi nga ni thusa, khathihi na u wana nḓila dza u ṱuṱuwedza vhaṅwe.

5. Ndi mini zwine zwa nga ri thusa uri ri vhe na mavhonele avhuḓi?

⁵ Muapostola Paulo o ṱalusa zwiṅwe zwithu zwine zwa nga ri thusa uri ri ṱahulele mavhonele avhuḓi. O ṱuṱuwedza tshivhidzo tsha Korinta a ri: “Ni dzule ni tshi ḓiṱolisisa uri ni ḓivhe arali ni tshee no farelela kha lutendo.” (2 Vhakor. 13:5) “Lutendo” ndi pfunzo dza Vhukriste dzi re Bivhilini. Arali zwine ra zwi amba na zwine ra zwi ita zwi tshi tendelana na dzenedzo pfunzo, zwenezwo zwi amba uri ri khou ita zwithu zwavhuḓi nahone ri sumbedza u vha na “lutendo.” Vhukuma, ri tea u vhambedza nḓila ine ra tshila ngayo na pfunzo dzoṱhe dza Vhukriste. A ro ngo tea u ḓikhethela pfunzo dzine ra tea u dzi tevhela.—Yak. 2:10, 11.

6. Ndi ngani ri tshi tea u ḓiṱolisisa u itela u ḓivha ‘arali ri tshee ro farelela kha lutendo’? (Sedzani tshifanyiso tsha u thoma.)

⁶ Ni nga kha ḓi timatima u ḓiṱolisisa, zwihuluhulu arali ni tshi vhona u nga a ni khou ita zwithu nga nḓila yavhuḓi. Fhedzi nḓila ine Yehova a ri dzhia ngayo ndi ya ndeme u fhira nḓila ine ra ḓidzhia ngayo nahone ngelekanyo dzawe a dzi ngi dzashu. (Yes. 55:8, 9) Ha ṱolisisi vhagwadameli vhawe u itela u vha vhona mulandu, fhedzi u vha ṱolisisa u itela u vhona pfaneleo dzavho dzavhuḓi na u vha thusa. Musi ni tshi shumisa Ipfi ḽa Mudzimu u itela u ḓiṱolisisa “uri ni ḓivhe arali ni tshee no farelela kha lutendo,” ni ḓo ḓivhona nga nḓila ine Mudzimu a ni vhona ngayo. Hezwi zwi ḓo ni thusa uri ni bvise mahumbulele naho e afhio a uri a ni tshithu phanḓa ha Mudzimu, nṱhani hazwo, ni ḓo vha na khwaṱhisedzo yo thewaho Bivhilini ya uri Yehova u ni dzhia ni wa ndeme. Hezwi zwi ḓo fana na u vula maxaraḓeni kamarani i re na swiswi, uri hu kone u dzhena ḓuvha.

7. Ri nga vhuyelwa hani nga tsumbo dza vhathu vha fulufhedzeaho vho bulwaho Bivhilini?

⁷ Nḓila i shumaho ya u ḓiṱolisisa ndi ya u elekanya nga ha tsumbo ya vhathu vha fulufhedzeaho vho bulwaho Bivhilini. Vhambedzani zwiimo zwavho kana maḓipfele avho na aṋu nahone ni vhone nḓila ye na vha ni tshi nga vha no aravha ngayo arali no vha ni vhuimoni havho. Kha ri sedze tsumbo tharu dzine dza fanyisa nḓila ine na nga shumisa ngayo Bivhili u itela u khwaṱhisedza uri ni kha “lutendo” nahone na ṱahulela mavhonele avhuḓi nga ha inwi muṋe.

8, 9. (a) Tshilikadzi i shayaho yo vha i vhuimoni vhufhio? (b) Yeneyo tshilikadzi i nga vha yo vha na maḓipfele afhio o khakheaho?

⁸ Musi Yesu e thembeleni Yerusalema, o vhona tshilikadzi i shayaho. Tsumbo yawe i nga ri thusa uri ri vhe na mavhonele avhuḓi hu sa londwi vhushayanungo hashu. (Vhalani Luka 21:1-4.) Ṱhogomelani zwiimo zwa onoyo mufumakadzi wa tshilikadzi. O vha a tshi  tea u konḓelela vhuṱungu ha u felwa nga munna wawe na u vha kha vhurereli vhune vharangaphanḓa vhaho “vha dzhia thundu dza tshilikadzi” nṱhani ha u vha thusa. (Luka 20:47) O vha e mushai lwe muṋeelo we a vha a tshi nga kona u u ṋeela thembeleni wa vha u muholo we mushumi a vha a tshi nga u wana nga murahu ha mimunithi i si gathi.

⁹ Lingedzani u humbula nḓila ye onoyo mufumakadzi wa tshilikadzi a ḓipfa ngayo musi a tshi dzhena muṱani wa thembele o fara vhupeni vhuvhili. Naa o vha a tshi ḓo humbula nga nḓila ine muṋeelo wawe wa vha muṱuku ngayo musi u tshi vhambedzwa na zwe a vha a tshi ḓo vha o kona u zwi ṋeela arali munna wawe a tshi kha ḓi tshila? Naa o vha a tshi ḓo farwa nga ṱhoni musi a tshi vhona miṋeelo mihulwane yo longelwaho nga vha re phanḓa hawe, khamusi a ḓivhudzisa arali wawe u wa ndeme? Naho arali o ḓipfa nga yeneyo nḓila, o ita zwi re maanḓani awe a tshi itela vhurabeli ha ngoho.

10. Yesu o sumbedza hani uri tshilikadzi yo vha i ya ndeme kha Mudzimu?

¹⁰ Yesu o sumbedza uri yeneyo tshilikadzi na muṋeelo wayo zwo vha zwi zwa ndeme kha Yehova. O amba uri yo “longela zwinzhi u fhira [vhapfumi] vhoṱhe.” Muṋeelo wayo wo vha u tshi ḓo ṱangana na ya vhaṅwe, fhedzi Yesu o khoḓa yeneyo tshilikadzi nga ṅwambo wa u ḓikumedza hayo. Vhane vha shuma u vhala tshelede ya mbulungeloni yeneyo vha nga kha ḓi vha vha songo vhona nḓila ine zwenezwo zwipeni na muthu we a zwi ṋeela, zwa vha zwa ndeme ngayo kha Yehova. Naho zwo ralo, mavhonele a Mudzimu ndi one e a vha e a ndeme vhukuma, hu si zwe vhaṅwe vhathu vha zwi humbula kana nḓila ye tshilikadzi ya ḓidzhia ngayo. Naa ni nga shumisa enea mafhungo u itela u ḓiṱolisisa uri ni ḓivhe arali ni tshee no farelela kha lutendo?

11. Ni nga guda mini kha mafhungo a tshilikadzi i shayaho?

¹¹ Zwiimo zwaṋu zwi nga kwama nga ho livhaho zwine na nga zwi ṋeela Yehova. Vhaṅwe vha nga kha ḓi sa kona u fhedza tshifhinga tshinzhi vha tshi khou huwelela mafhungo maḓifha nga ṅwambo wa vhulala kana malwadze. Naa zwi ḓo vha zwo tea uri vha ḓivhudzise arali zwi zwa ndeme uri  vha vhige mushumo wavho? Naho arali ni si na honoho vhuleme, ni nga kha ḓi vhona u nga mushumo waṋu ndi tshipiḓa tshiṱuku tsha awara dzoṱhe dzine vhathu vha Mudzimu vha dzi fhedza ṅwaha muṅwe na muṅwe vha tshi khou mu gwadamela. Naho zwo ralo, ro guda kha mafhungo a tshilikadzi ya mushai uri Yehova u a ṱhogomela na u dzhiela nṱha zwoṱhe zwine ra mu itela zwone, zwihuluhulu musi zwi tshi itwa nga fhasi ha zwiimo zwi konḓaho. Humbulani nga ha zwe na zwi ita vhurabelini ha Yehova mahoḽa. Naa iṅwe ya awara dze na dzi shuma yo ṱoḓa uri ni ḓidzime zwiṅwe zwithu? Arali zwo ralo, ni nga vha na vhungoho ha uri u dzhiela nṱha zwe na mu itela zwone nga yeneyo awara. U fana na tshilikadzi i shayaho, musi ni tshi ita zwi re maanḓani aṋu tshumeloni ya Yehova, ni na zwiitisi zwi pfalaho zwa u tenda uri ni kha “lutendo.”

12-14. (a) Ndi afhio maḓipfele o khakheaho e Elia a vha nao? (b) Ndi ngani Elia o ḓipfa nga yeneyo nḓila?

¹² Muporofita Elia o vha a tshi fulufhedzea kha Yehova nahone e na lutendo lwo khwaṱhaho. Fhedzi ho vha na tshifhinga tshee a kulea nungo lwe a humbela Yehova uri a mu vhulahe, a ri: “Zwo nkhulela zwino. Yehova, dzhia vhutshilo hanga.” (1 Dzikh. 19:4) Vhathu vha sa athu fulufhuwa nga yeneyo nḓila vha nga kha ḓi vhona u nga Elia o tou ‘khakhisea a tshi amba’ thabeloni yawe. (Yobo 6:3) Naho zwo ralo, o ḓipfa nga yeneyo nḓila. Ṱhogomelani uri Yehova o thusa Elia nṱhani ha u mu sasaladza nge a vha a tshi ṱoḓa u fa.

¹³ Zwo ḓa hani uri Elia a ḓipfe nga yeneyo nḓila? Nga phanḓa ha tshenetshi tshiitea, o ranga phanḓa mulingo ngei Isiraele we wa sumbedza uri Yehova ndi Mudzimu wa ngoho nahone zwenezwo zwa ita uri hu vhulahwe vhaporofita vha Baali vha 450. (1 Dzikh. 18:37-40) Zwi vhonala uri Elia o vha o fulufhela uri vhathu vha Mudzimu vha ḓo vhuyelela kha vhurabeli ho kunaho, fhedzi zwenezwo a zwo ngo itea. Isebele Mufumakadzi muvhi o rumela Elia mulaedza wa uri u khou ṱoḓa u mu vhulaha. Elia a shavha nge a vha a tshi khou ofha u fa, a pfuka nga shangoni ḽa Yuda ḽi re henefho tsini, a ya thungo ya tshipembe sogani ḽo omaho na ḽi fhisaho vhukuma.—1 Dzikh. 19:2-4.

¹⁴ Musi e henefho, Elia o humbula nga ha mushumo wawe wa vhuporofita we wa vhonala u tshi nga ndi wa mahandana. A vhudza Yehova a ri: “A thi fhiri vho-khotsi-anga nga zwivhuya.” O vha a tshi khou amba uri o ḓipfa e si tshithu u fana na buse na marambo a vhomakhulukuku wawe vho faho. Zwi re zwone ndi uri o ḓiṱolisisa nga zwilinganyo zwawe nahone a dzhia phetho ya uri o kundwa tshoṱhe, na uri a si wa ndeme kha Yehova kana kha muthu naho e ufhio.

15. Mudzimu o khwaṱhisedza hani Elia uri u kha ḓi mu dzhia e wa ndeme?

¹⁵ Fhedzi Ramaanḓaoṱhe ho ngo dzhia Elia nga yeneyo nḓila. Yehova Mudzimu o dzhia Elia e wa ndeme nahone a dzhia vhukando u itela u mu khwaṱhisedza zwenezwo. Mudzimu o rumela muruṅwa uri a khwaṱhise Elia. Yehova o ṋea Elia zwiḽiwa na maḓi zwe zwa vha zwi tshi ḓo mu khwaṱhisa kha lwendo lwawe lwa maḓuvha a 40 musi a tshi ya tshipembe ha Thavha ya Horebe. Zwiṅwe hafhu, Yehova Mudzimu o khakhulula mahumbulele a Elia a uri a hu na vhaṅwe Vhaisiraele vhe vha dzula vha tshi fulufhedzea khae. Zwa ndeme vhukuma ndi uri Mudzimu o ṋea Elia mushumo muswa nahone a u ṱanganedza. Elia o vhuyelwa nga thuso ya Yehova nahone a dovha a ita mushumo wawe wa vhuporofita e na mafulufulu.—1 Dzikh. 19:5-8, 15-19.

16. Ndi dzifhio dziṅwe nḓila dzine Mudzimu a nga vha o ni thusa ngadzo?

¹⁶ Tshenzhelo ya Elia i nga ni thusa u kona u vhona uri ni kha lutendo nahone i nga ni sudzulusa uri ni vhe na mavhonele avhuḓi. Tsha u thoma, humbulani nga ha nḓila dze Yehova a ni khwaṱhisa ngadzo. Naa muṅwe wa vhashumeli vhawe, khamusi muhulwane kana muṅwe Mukriste o vhibvaho, o ni thusa tshifhingani tsha musi ni tshi ṱoḓa thuso? (Vhagal. 6:2) Naa no kanzwiwa nga lwa muya nga Bivhili, khandiso dzashu dza Vhukriste na miṱangano ya tshivhidzo? Tshifhingani tshi ḓaho musi  ni tshi vhuyelwa nga dzenedzi ndugiselelo, humbulani nga ha hune yeneyi thuso ya bva hone nahone ni livhuhe Yehova nga thabelo.—Ps. 121:1, 2.

17. Ndi mini zwine Yehova a zwi dzhiela nṱha kha vhashumeli vhawe?

¹⁷ Tsha vhuvhili, ṱhogomelani uri mahumbulele o khakheaho a nga ni fhura. Nḓila ine Mudzimu a ri dzhia ngayo ndi yone ya ndeme. (Vhalani Vharoma 14:4.) Yehova u dzhiela nṱha u ḓikumedza na u fulufhedzea hashu khae; ha ri kali u ya nga zwine ra zwi khunyeledza. U fana na Elia, khamusi no khunyeledza zwithu zwinzhi ni tshi itela Yehova u fhira nga he na humbula ngaho. Khamusi vha hone tshivhidzoni vhe na vha ṱuṱuwedza nga nḓila yavhuḓi, khathihi na vhaṅwe tsimuni vhe vha ḓivha ngoho nga ṅwambo wa vhuḓidini haṋu.

18. Mushumo we Yehova a ni ṋea wone u sumbedza mini?

¹⁸ Tsha u fhedza, dzhiani mushumo muṅwe na muṅwe une Yehova a ni ṋea wone u vhuṱanzi ha uri u na inwi. (Yer. 20:11) U fana na Elia, ni nga kha ḓi kulwa nungo nga tshumelo yaṋu ine ya vhonala i si na mitshelo kana nga ṅwambo wa zwipikwa zwaṋu zwa muya zwine zwa vhonala zwi sa swikelelei. Naho zwo ralo, ni na ndugelo khulwane vhukuma—yeneyo ndugelo ndi u huwelela mafhungo maḓifha na u ḓivhadza dzina ḽa Mudzimu. Dzulani ni tshi fulufhedzea. Arali na ita nga u ralo, maipfi a tshifanyiso tsha Yesu a nga shuma na kha inwi: “Dzhena dakaloni ḽa muṋe wau.”—Mat. 25:23.

19. Muṅwali wa Psalme ya 102 o sedzana na vhuimo vhufhio?

¹⁹ Muṅwali wa Psalme ya 102 o vha o hanganea. O vha a tshi khou ‘ṱhuphea,’ a tshi khou pfa vhuṱungu vhuhulwane ṋamani kana kha maḓipfele nahone a si na maanḓa a u sedzana na thaidzo dzawe. (Ps. 102, tshiṱoho tsha ndima) Maipfi awe a ri sumbedza uri o vha a tshi dzula a tshi humbula nga vhuṱungu hawe, vhuludu na maṅwe maḓipfele. (Ps. 102:3, 4, 6, 11) O vha a tshi vhona u nga Yehova u khou ṱoḓa u mu laṱa.—Ps. 102:10.

20. Thabelo i nga thusa hani muthu ane a khou lwisana na maḓipfele o khakheaho?

²⁰ Naho zwo ralo, mupsalme o vha a tshi nga kona u shumisa vhutshilo hawe u renda Yehova. (Vhalani Psalme ya 102:19-21.) Samusi ri tshi zwi vhona kha Psalme ya 102, na vha re kha lutendo vha nga pfa vhuṱungu nahone vha dzula vha tshi humbula nga vhuleme havho. Mupsalme o ḓipfa sa “tshiṋoni tshisiwana kha ṱhanga ya nnḓu,” zwa tou nga u eṱhe na thaidzo dzawe. (Ps. 102:7) Arali na nga vhuya na ḓipfa nga u ralo, tevhulelani Yehova zwi re mbiluni yaṋu u fana na mupsalme. Thabelo dza muṱhuphei—thabelo dzaṋu—dzi nga ni thusa musi ni tshi khou lwisana na mahumbulele o khakheaho. Yehova u fulufhedzisa uri u ḓo “thetshelesa thabelo ya vhatshinyali; ha nga nyadzi thabelo yavho.” (Ps. 102:17) Fulufhelani ḽeneḽo fulufhedziso.

21. Muthu ane a khou lwisana na maḓipfele o khakheaho a nga kona hani u vha na mavhonele avhuḓi?

²¹ Psalme ya 102 i dovha ya sumbedza nḓila ine na nga vha ngayo na maḓipfele avhuḓi. Mupsalme o ita zwenezwo nga u livhisa ṱhogomelo kha vhushaka hawe na Yehova. (Ps. 102:12, 27) O khuthadzwa nga u ḓivha uri Yehova u ḓo dzula a tshi tikedza vhathu vhawe musi vho sedzana na milingo. Nga zwenezwo, arali maḓipfele a si avhuḓi a ni thithisa lwa tshifhinganyana uri ni sa ite zwine na zwi funa tshumeloni ya Mudzimu, rabelani nga hazwo. Humbelani Mudzimu uri a pfe thabelo yaṋu u itela uri ni vhofholowe kha mutsiko waṋu nahone ‘dzina ḽa Yehova ḽi bulwe.’—Ps. 102:20, 21.

22.  Muṅwe na muṅwe washu a nga takadza hani Yehova?

²² Ee, ri nga shumisa Bivhili u itela u sumbedza uri ri tshee kha lutendo nahone ri vha ndeme kha Yehova. Zwi re zwone ndi uri kha ano maitele a zwithu ri nga si kone u fhelisa maḓipfele oṱhe o khakheaho kana u kulea nungo. Naho zwo ralo, muṅwe na muṅwe washu a nga kona u takadza Yehova nahone a tshidzwa nge a konḓelela na u fulufhedzea tshumeloni yawe.—Mat. 24:13.