1. Gini amaku Yekova afuhe furani nasarani ani du na ngbarago?

YEKOVA naida ani du na ngbarago, na ko nafu dungu amaku furani nasarani ani du na ngbarago. Gu sa dagbaha yo nga ani ni unga rani. Sidu, ani rengbe ka mangasunge na gaani raka tipa ka taasarimo Mbori mbiko ko ye na ani ku rogo ndikidi irisombori. (Tam. 144:15; Yo. 6:44) Yekova nakido rani nga ko nakpinyemu rani na ko naundo rani tipa ani hipai ti ngba gako sunge. (Yere. 31:3; 2 Kor. 4:16) Ani rogo gu paradizo nga ga toro du na gu riahe nga ga toro rogoho kpaima gbiati agu awirinarani nakpinyemu rani. Gu ngba berewe gbe nga ani na maabangirise tipa raka ku mbatayo.

2. Ginipai kura ga Mbori amoyambu asota na ni?

² Wa vura duhe nga gi nduapai re du nasarani ani du na ngbarago, kura ga Mbori amoyambu na wene bipai tipa tiyo te. I rengbe ka berãha nga Yekova abingo yo watadu gu sunge i amangaha fuko na nyanyakipa ha te. Aguyo niima ima na gi bipai re, i nabihe nga padu boro na ngbarago mbiko “dungu agarã” nga pa musumo gbua. I ima rengbe ka bihe nga akpakarapai naye rogo raka timburu kuraha.—Batu. 11:8.

3. Gini apai rengbe ka sa boro ní tona du na gbegberẽ bipai?

³ Gberarago, akaza, na zanga manga kura apai mbiko gbinza  nasa awirinarani i tona kadu na gbegberẽ bipai. (Tam. 71:9; Snz. 13:12; Batu. 7:7) Kurigure, si naida aKristano dunduko ini gupai nga kpotoboro yo nangihe kisusi na si ima rengbe ka kitangbaanga rani ka si vura du vurũ nga Mbori na ngbarago na ani. (Yere. 17:9; 1 Yo. 3:20) Bakitingbanga nakitangbaanga ga Mbori amoyambu rogo wia yo. Na agu aboro du na gu berãpai nga ga Satana, i rengbe ka gbarasa rirani yo na gu ngbatunga bipai gu zanga idipase nangia Erifaza adu na ni nga Mbori abinga rani na sunge te. Gu bangisa ziree naadu ti rago Eyobo kinaha du areme a.—Eyo. 4:18, 19.

4. Ginipai ani nika wisigoho rogo gi kekeapai re?

⁴ Rogo Ziazia Kekeapai, Yekova naya ko nika du na agu aboro ‘nata rogo ngbungumu kirima kpio.’ (Tam. 23:4) Gene sa dagba agu agene du ko ngbaha na ani nga rogo Fugoko yo. Ziazia Kekeapai ‘na tandu barangba Mbori na si rengbe na bafa nyanyaki agbata.’ (2 Kor. 10:4, 5) Sidu tie, ani bingo wai rengbe ani ka mangasunge na Ziazia Kekeapai si undo rani ani du na wene bipai na kini bandaha. Ani ima rengba ka gbia undo behe na ki gbia gene tipa ka ngarasa kura aboro.

5. Ginipai rengbe ka undo rani tipa ani du na wene bipai?

⁵ Gu mokedi nangia Pauro afura tipa bete agu ahe rengbe ka undo rani tipa ani sonosi wene bipai. Ko azungodi gu dungurati naadu Korinda yo nga: “Oni wísigi tironi si ngia oni rogo idapase yo.” (2 Kor. 13:5) “Idapase” nga gu bangua aida dunduko aKristano naidi kutini rogo Ziazia Kekeapai. Kangia gaani mangapai na afugo nandu sa na agu aida re, gure yuguhe nga ani rogo “idapase yo.” Kina rengo ngaha nga, si naida ani asadi ka raka ringbisihe kuti gu yugupai nga ga aKristano. Si naida ani gisangba agu ayugopai dunduko nga ga aKristano rogo Ziazia Kekeapai.—Yak. 2:10, 11.

6. Tipagine si aida ani wisigi tirani ti ni tipa ka ino ‘singia ani rogo idapase yo’? (Oni bi gu sura du ti tonatonaha.)

⁶ Boro ima rengba ka ká i ba asada funi ka si du nga ní bihe nga ní nika ti gu asada re ati. Ono tie, gu bipai du Yekova na ni tipa rani ima nyaka kisusi gaani, na gako berã kuari ti gaani. (Yes. 55:8, 9) Ko awisigongo airisiko tipa ka sarangbanga yo te, ono tipa ka bi gu wene asino du tiyo na ki undo yo. Ho oni amangasunge ni na Fugo Mbori tipa ka ino singia “oni rogo idapase yo,” oni rengbe ka bi tironi wa gu Mbori abi roni. Gipai re rengbe ka undo roni ka oni berẽnga gupai nga sunge tironi ya te, na oni tingidi gupai nga Mbori nabi roni nga: Paroni ima nyaka bangiriko. Sangbanaha rengbe kadu wa dia kpuguru kusayo wa ka rago ha ku dimoyo.

7. Wai rengbe ani ka gbia undo be agu akpiapai nga ga agu aboro naadu ni ruru yo?

⁷ Gu wene gene rengbe oni ka wisigo tironi ngbaha nga ka berãkurii gu kpiapai nga ga gu ruru aboro du payo rogo Ziazia Kekeapai. Oni asadi ka wisigo agu apai naadu tipa yo na agu du tipa roni na ki bi singia ginipai ka oni amangihe ka oni adu yo. Oni bingo akpiapai biata nayugo wai rengbe oni ka mangasunge na Ziazia Kekeapai tipa ka ino singia “oni rogo idapase yo” tipa wa ka oni sonosi wene bipai tipa tironi.

8, 9. (a) Ginipai naadu tipa dekurugbo? (b) Gini gbegberẽ bipai si awira wa ri adu na ni?

⁸ Ho Yesu adu ni yekaru Yerusarema yo, ko abi rungorungo dekurugbo. Gari kpiapai rengbe ka undo rani ani du na wene bipai tipa tirani akpakarapai ki vura du tirani vurũ. (Oni gedi Ruka 21:1-4.) Ani bingo  gupai naadu tipa ri. Ri ahi rungo pakpio kumbari gbiati gu gbegberẽ mangapai agbia pambori anaamangaha nga ka “rita ga adekurugbo ahe.” (Rk. 20:47) Gari rungo aima kio mbiko ri aba kina wiri tooni marã nga gu amangisunge anaabihe kina vuru bete aminiti yo gbua.

⁹ Oni wisigingo gipai re berã roni yo wa gi dekurugbo re arimo ku yekaru yo na rukutu marã sirigi beri ue. Ya mo ri naasada ka wisigo gi tooni marã ri andu ka baha re na gu ri anaabaha ho kumbari adu ni ti unga? Ya mo ri adu na zee mbiko bi ri kura aboro i niba bakere marã, singia ka berãha nga sunge ti gari gamahe te? Kangia ri adu na bipai wa gure, ri amangi kina gupai narẽ bangiri ka songoda ndikidi irisombori.

10. Waigu Yesu ayuguhe nga dekurugbo adu na kikiipa ri bangiri Mbori?

¹⁰ Yesu abi gupai nga gu dekurugbo re gbiati gari gamahe adu na nyanyakipa ha bangiri Yekova. Ko aya “ri ba ra kii ti agu yo [aboro kumuko] dunduko.” I akodi gari gamahe na gu kura aboro afuhe, ono wa si avura duwo, Yesu aima tambua gari gamahe. Si nawira wa ho bangerefuo marã abi gu rukutu marã re ni dagba akuraha, ko ainongo wai paha na gu boro nafuhe anyaki bangiri Yekova te. Ono tie, gu bipai nga ga Mbori paha anyaki kisusi, angianga gu kura aboro adu na ni watadu gu nangia ga dekurugbo ya. Ya mo mo rengbe ka mangasunge na gi pangbanga re ka ino singia mo rogo idapase yo?

11. Ginipai rengbe mo ka wirikaha ti gu pangbanga nga ga dekurugbo?

¹¹ Agu apai du tipa roni ima rengba kadu na ome kurii gupai oni aida ka mangaha fu Yekova. Kangia oni ima nyaka watadu oni nga gbarigbari boro, oni arengbanga ka tungusapai wa gu kura aboro amangaha te. Ya mo oni rengbe ka berãha nga ndupai ho tipa ka fu gaoni fuo sunge nga ga tungusapai te mbiko sunge ti ni te? Ka si vura du nga apai ata dingisongo roni kusande te, oni rengbe ka berãha nga gu ome oni amangaha gene tungusapai yo, si gbua ni kina wiri umbaha ti gu kura ga  Mbori amoyambu amangaha rogo agarã ni basasa. Ono wa vura duhe wo, ani nawirikapai ti gu pangbanga du tipa dekurugbo nga Yekova nabi gupai ani amangaha na nyanyakipa ha, gbe ho ani amangaha ni rogo akpakarapai. Oni berẽnga kurii wai oni anaairiso Yekova mbata kusayo. Ya mo regbo aduho mo ambupa kura gamo apai tipa ka mangasunge fuko? Mo du na kido nga ko nabi gupai abi mo amangihe fuko ti gu regbo re na nyanyakipa ha. Ka mo aamanga ga Yekova sunge na omero dunduko wakina gu rungorungo dekurugbo re, mo na kina ndupai bero ka ida kuti gupai nga mo “rogo idapase yo.”

12-14. (a) Wai gbegberẽ bipai adu na ome kurii Eriya? (b) Tipagine Eriya aabi tiko ti ni wa gure?

¹² Gu nebi nangia Eriya adu ni ruruko fu Yekova na kidu na nyanyaki idapase. Ono tie, regbo adu kinaho ko abi tiko nga sunge ti ko berewe te na ko ki sana Yekova tipa ko nyasi riipa ko niya: “Ako Yekova, pai di be re; mo di ungare ti re awere.” (1 Aba. 19:4) Agu aboro naagbianga tiyo na ngbatungapai wa gure mbata ya, i rengbe ka bihe nga ga Eriya pai re angia fugo “aura” gbua. (Eyo. 6:3) Ono tie, pai du naada tiko. Oni kparia gupai nga, Mbori aabiranga ko tipa ida ko ka kpi te, kuba gure, ko aundo ko.

¹³ Ginihe naasa Eriya ko bi tiko wa gure? Ngbutuko mbata fu gipai re, Eriya amangi iiriwopai nayugo gupai nga Yekova nga ndikidi Mbori, na si asa gupai nga anebi 450 nga ga Bara yo kpi. (1 Aba. 18:37-40) Si nawira wa Eriya aaberãha nga ga Mbori aboro nika tona ndikidi irisombori nibasa fuo gipai re, ono si amanganga wo te. Gu gbegberẽ nakindo nangia Izebere akedi sunge fuo Eriya ka pe gupai fuko nga ri naida ka imoko. Eriya agunde na ki oro ku rogo gu ngbakungbo nga ga Yuda nangia ugu rago tipa ka batasa unga ko.—1 Aba. 19:2-4.

¹⁴ Eriya adu nisako ngbakungbo yo na ko ki tona ka berã gupai nga gako sunge nebi nga kungbopai gbua. Ko aya fu Yekova wẽ: “A nga mi ngba ti abuba te.” Ko abi tiko nga sunge tiko te na ko wakina kungbo sende watadu meme kangba atitako. Ko aberã gupai tigako nga ko na diabese berewe te na Yekova watadu kura aboro abingo ko na kikiipa ko te.

15. Waigu Mbori akido Eriya nga ko nabiko kindi na kikiipa ko?

¹⁵ Ono Mbori Tanduapai Dũ adu na gu kura bipai kia tipa ko. Eriya adu na kikiipa ko bangiri Mbori, na Mbori ki yuguhe fuko nga wo ko abiko. Mbori akedi maraika ko nyakasi ko. Mbori afu riahe a fuko na ime ko mbirihe si undo ko tipa agu aˈuru 40 ko adihe kurii nduge tipa ka ndu ku Bagangara Orebe yo. Kurigure, Mbori arugu Eriya ti gu iraira bipai ko adu na ni nga boro ho nye ni ruru ní fu Yekova dagba aYisaraere yo te. Nirengo, Mbori afu vovo sunge fu Eriya ko ki dihe kugume. Eriya agbia undo ti ga Yekova undohe, na ki tona gako sunge nebi berewe.—1 Aba. 19:5-8, 15-19.

16. Gini bete agene Mbori aundongo ro ngbaha?

¹⁶ Gupai naadu tipa Eriya rengbe ka undoro tipa mo ini singia mo rogo idapase yo na ki fõngbaduroyo tipa mo du na wene bipai. Bambata pai nga, mo berẽnga kurii wai Yekova aundo ro. Ya mo gako moyambu sa watadu bakumba aundongo ro ti gu regbo mo aaida na undo? (Gara. 6:2) Ya mo Ziazia Kekeapai, gaani awaraga, watadu adunguratise aundongo ro? Ka mo gbia undo rogo gu kura uru sa be agi apai re, mo asadi ka ino wari ye gu undo re ni na ki tambua Mbori tipaha.—Tam. 121:1, 2.

17. Ginipai Yekova abihe na nyanyakipa ha rogo gako amoyambu yo?

¹⁷ Uehe nga, gbegberẽ bipai ima rengba  ka nanga roni. Gupai nyakipaha nga Mbori wisigi rani. (Oni gedi ARomo 14:4.) Yekova nabipa gu sunge ani amangaha fuko na nyanyakipa ha, anga parani nanyaka bangiriko mbiko gu sunge ani amangaha fuko te. Nirengo, a wa si adu tipa Eriya, oni ima manga dungu apai fu Yekova zanga oni inihe. Aboro kinaho rogo dungurati gaoni kpiapai naima undo yo, kodihe na agu aboro du rogo gaoni dagbarago gii rengo kango gaoni bakere asadatise.

18. Gu sunge Yekova afuhe furoni nayugo ginipai?

¹⁸ Ni yangaraha, oni bi agu asunge Yekova afuhe furoni nga ko na kina roni. (Yere. 20:11) A wa si adu tipa Eriya, rago ima rengba ka gberã tironi mbiko oni nabihe nga gu sunge oni amangaha wene surungbaha ti ni te watadu gu kura asasa nga ga toro kinaho oni adanga ti ni ya. Ono tie, oni kindi na kikiipa roni kina wai du ani na ni ni basasa nga ka tungusa wene pangbanga na i niyambu roni narimo Mbori rironi. Oni nye ni ruru roni. Sidu, rẽarẽ tie ani pe agu afugo Yesu tipa roni ko apehe ki ya: “Mo rimi ku rogo ga bairaro ngbarago.”—Mt. 25:23.

19. Ginipai bake papara Atambuahe 102 agbiatiko na ni?

¹⁹ Bake papara Atambuahe aima du ni fudifudi ko. Ko ‘adu ngbapai’ kini rungo ni kerehe ka ko adunga na ngbarago gbiati ome tipa ka mangapai kuti gako akpakarapai ya. (Gu bangua riipai du bari Atambuahe 102) Afugoko nayugoho nga ko adu rogo bakere imisiri, na ki du na gberarago mbiko sungo nisako. (Tam. 102:3, 4, 6, 11) Ko aaberãha nga Yekova naida ka bako kusayo.—Tam. 102:10.

20. Wai rengbe kparakpee ka undo gu boro du na iraira bipai?

²⁰ Ono tie, ko amangisunge na gako raka tipa ka taasarimo Yekova. (Oni gedi Atambuahe 102:19-21.) A wa bi ani he rogo Atambuahe 102, idipase rengbe kadu rogo imisiri na kini bihe nga apai ima gberã nabaha funi. Bake papara Atambuahe abi tiko “wa bavurukporo ni sa ru ri bambu yo,” na kini bihe nga kina gako fudifudiapai du pati ko. (Tam. 102:7) Kangia wo mo abi tiro, mo pe agu apai du ngbaduroyo fu Yekova wa bake atambuahe amangihe. Gamo kparakpee ima rengba ka undo ro tipa mo sovura kuti gu iraira bipai du mo na ni re. Yekova nakidohe nga “ko agia gu kpetambuahe nga ga aboro ngera vurũ, ko apayasi nga pa gayo kpetambuahe te.” (Tam. 102:17) Mo kido kuti gu gako kidohe re.

21. Wai rengbe gu boro nasota na iraira bipai ka tona du na wene bipai?

²¹ Atambuahe 102 naundo rani a tipa wai rengbe ani kadu na wene bipai ni bakerehe. Gupai re bake atambuahe amangihe na ki tona ka berãpa gako pagume na Yekova. (Tam. 102:12, 27) Si adu fuko nipa wasa ka ino gupai nga Yekova ti aregbo dunduko barambeda ka undo gako aboro ti regbo kpakaraapai. Ka si du nga akpakarapai naká na oni ti manga sunge fu Yekova ni bakerehe, oni kpari fuko tipaha. Ka oni kparingo fu Mbori tipa kina gupai nga ko undo roni na gu kpakarapai du oni rogoho ya, ono tipa “aboro taki pande rimo” ko a.—Tam. 102:20, 21.

22. Wai rengbe ani ni basasa ka fu ngbarago fu Yekova?

²² Nirengo, ani rengbe ka mangasunge na Ziazia Kekeapai tipa ka yugo na ni nga ani rogo idapase na parani ni nyanyakihe bangiri Yekova. Nirengo, rogo gi zegino re, ani arengbanga ka nyasa riipa gu iraira bipai re dunduko watadu agu agberarago du tirani te. Sidu, ani dunduko ni basasa rengbe arengba ka fu ngbarago fu Yekova na ki gbia bata ni hi ani pai ti ngba gako sunge.—Mt. 24:13.