Wego mo i lobo Brazil owaco ni: “Ka pe ajuko jo me oda ajuka, walungo wiwa i otyeno me Woro pi Jo me Ot wa i cwiny dyewor.” Lawi ot mo i lobo Japan owacci wode me mwaka apar pud nongo mito ni kimedde kadi bed cawa dong okato woko. Pingo? Wonne owaco ni, “Pien en keto cwinye, man kelo bote yomcwiny.”

Ki lok ada, pe ni lutino ducu giketo cwinygi iye, mogo bene pe ginongo mit pa woro pi jo me ot. Pingo meno timme? Wego mo i lobo Togo owaco ni: “Woro Jehovah pe myero obed gin ma olo dano.” Ka ce otimme, tika romo bedo ni peko nongo tye i kit ma kidoro kwede woro pi jo me ot? Lupaco mapol gunongo ni woro pi jo me ot tye “nino me yomcwiny” kit macalo Icaya oloko kwede i kom nino me Cabat-ni.​—Ic. 58:13, 14.

Wege ma Lukricitayo gingeyo maber adada ni wek jo me odigi gunong mit pa woro pi jo me ot, mitte ni dano ducu gubed agonya. Ralf, ma tye ki lutino anyira adek ki awobi acel owaco ni worogi pi jo me ot pol kare bedo calo iwacci gitye ka boko lok; dano weng gimiyo tamgi. Ento, pe yot me kelo wi dano weng wek gubed ki miti kun giketo cwinygi i gin ma kitye ka nyamone. Mego acel owaco ni: “Kare ducu ape ki kero me yubo worowa pi jo me ot wek obed mamit kit ma amito kwede.” Tika iromo lweny ki peko ma kit man?

Wego mo ma tye ki lutino aryo i lobo Germany owaco ni: “Wan pe wanyamo gin acel keken.” Mego mo ma bene tye ki lutino aryo owaco ni: “Gin ma pire tek i worowa pi jo me ot aye bedo ki jami mapat pat me anyama.” Lupaco  mapol gipoko worogi pi jo me ot i dul mapat pat. Cleiton, wego ma tye ki lutino aryo ma mwakagi tye apar ki wiye, i lobo Brazil owaco ni: “Meno weko kwanwa bedo mit dok jo me ot ducu ginywako iye ki cwiny acel.” Ka kipoko cawa me kwan, lunyodo giromo keto cwinygi i kom peko pa latin acel acel ka ce mwakagi kine lac. Lunyodo giromo nyamo peko pa latin acel acel dok myero gubed ka loko jami ma giyero me akwana ki dong yo me kwan.

Lupaco mogo gitye ka timo gin ango wek gibed ki jami mapat pat i worogi pi jo me ot? Jo mukene gicako worogi pi jo me ot ki wero wer bot Jehovah. Juan ma bedo i lobo Mexico owaco ni, “Man weko dano ducu gibedo agonya dok waketo tamwa i gin ma wamito nyamone.” Wode me mwaka 25 ki nyare me mwaka 23 giyero wer ma rwatte ki jami mogo ma kibinyamogi i otyeno meno.

Lupaco mapol gikwano cura mogo manok ki i Baibul. Me bedo ki jami mapat pat me akwana, lumemba me ot moni gikwano lok pa dano mapat pat ma kicoyogi i Baibul kun gileyo aleya. Wego mo i lobo Japan owaco ni enongo “pat mada me kwan kumeno pi tyen mukwongo.” Ento lutino awobene aryo cwinygi obedo yom me neno ni lunyodogi gitye ka nongo mit pa kwan i yo ma kumeno kwedgi. Lupaco mukene gituko goga ma nongo gukwanyo ki i Baibul. Roger, wego ma tye ki lutino awobe aryo i South Africa owaco ni lutino “pol kare gineno jami mogo ma tye i Baibul ma nongo wan lunyodo pe waneno.”

Yo mukene aye me ribbe kacel i yubo jami mogo calo yeya pa Nua nyo ot pa Lubanga ma Solomon ogero. Timo man mito kwedo lok dok bene kelo yomcwiny. Me labolle, i lobo Acia, anyaka mo ma tye ki mwaka abic onongo bedo kacel ki lunyodone ki dong daane i rum me namo i pacogi. Gin onongo gigoyo i karatac kit ma lakwena Paulo obedo ka wot kwede macalo lamiconari. Lupaco mogo gigoyo jami mutimme ma kicoyogi i buk me Nia. Donald ma tye mwaka 19 dok bedo i lobo Togo owaco ni, bedo ki jami mapat pat me anyama “okelo alokaloka i worowa pi jo me ot ki dok i pacowa.” Tika iromo tamo pi yub mo ma romo weko worowu pi jo me ot bedo mit?

Kadi bed loko yo me kwan ki timo jami mapat pat weko woro pi jo me ot bedo mit, ento wek dano gunong pwony ki i iye omyero guyubbe maber. I kine mukene jo matino giol woko, pi meno wege myero gutam i kom gin ma giyero me anyama dok gucwal cawa me yubone maber adada. Wego mo acel owacci, “Ka ayubbe maber, ci dano ducu ginongo adwogi maber.” Wego mo acel i Germany tito bot lupacone gin ma gibinyamo i cabit mogo ma bibino i anyim. Wego mo ma tye ki awobe abic ki anyaka acel i lobo Benin miyo lapeny con bot lupacone ka en oketo yub me nyamo lok i kom DVD ma jenge i Baibul i worogi pi jo me ot. Ki lok adada, yubbe con olo to weko worowa pi jo me ot bedo i rwom ma lamal.

Ka lupaco gungeyo con gin ma kibinyamone, ci gitwero lok i kome i dye cabit, dok man dongo mitigi iye. Ka kimiyo tic bot ngat acel acel, ci dano ducu gibitero woro pi jo me ot calo gin ma kwakke.

Lupaco mapol ginongo tek me bedo ki woro pi jo me ot kare ki kare.

Wege mapol gitiyo pi cawa malac wek ginong ginacama. Me lapore, wego mo acel i lobo Mexico aa ki paco cawa apar wiye aryo me odiko ci dwogo cawa aryo me otyeno. I kine mukene, mitte ni kilok nino ma Woro pi Jo me Ot bedo iye pienni yub mukene calo lim pa laneno me adwol, Nipo, nyo gure madit nongo tye.

Kadi bed kumeno, omyero wamoku tamwa me bedo ki woro pi jo me ot kare ki kare. Loïs, ma mwakane tye aparacel dok bedo i Togo oloko i kom kit ma lupacone gumoko kwede tamgi liking kun wacci, “Kadi bed ni i kine mukene pe wacako worowa pi jo me ot con pienni gin mo ongolle i dyeceng, pol kare watute me nenone ni wabedo kwede.” Man romo konyi me niang gin mumiyo lupaco mogo giketo yub me bedo ki woro pi jo me ot i acakki me cabit. Ka gin mo ongolle atura, gin giromo kobone i nino mukene i cabit meno.

Pien kilwongo ni woro pi jo me ot, man obedo but woro ma imiyo bot Jehovah. Wek jo ducu me paconi gukel bot Jehovah ‘pak macalo gitum ma gityero bot Jehovah’ cabit ki cabit. (Ibru 13:15) Dok bene woro pi jo me ot myero okelo yomcwiny bot jo ducu me ot, “pien yomcwiny pa Rwot [Jehovah] en aye tek mewu.”​—Nek. 8:9, 10.