Brasil markankir mä awkejj akham siwa: “Familiana Diosar Yupaychañataki Aruman yatjjattʼapkta ukan wali sumpun parltʼasipjjta, ukat horanakas jankʼakiw pasi”. Japón markankir mä familia pʼeqtʼirejj akham siwa: ‘10 maran jiskʼa wawajajj tiempon jankʼak pasatap janiw amuyaskiti ukat yateqañ munaskakiwa’. ¿Kunatsa? Jilatajj akham siwa: “Wal yatjjattʼañ muni ukat ukaw wal kusisiyi” sasa.

Janiw taqe wawanakajj ukhampun yateqañ munapkiti. Uka toqet qhan parlkasajja, yaqhepajj familjam yatjjattʼapki ukan janiw kusisit jikjjatasipkiti. Kunattejj ratukiw qarjtapjje. Kunjamtï Togo markankir mä awkejj siskejja, “Diosar yupaychañajj janiw maynir qariyañapäkiti”. Ukhamächi ukhajja, ¿familjam yatjjataski ukati jan sum sarayaskpacha? Walja familiaw uka aruman ‘kusisiñ’ jikjjatapjjatap amuyapjje, kunjamtï Isaías chachajj sábado urut siskäna ukhama (Isa. 58:13, 14).

Familian sumankañ utjani ukhakiw uka arumajj sum yatjjatasini, ukwa walja cristian awk taykanakajj amuyapjje. Ralf jilatajj kimsa phuchani ukat mä yoqaniwa, jupanakan familjam Diosar yupaychañ arumajja, yatjjatañat sipansa, jupanakkam maynit maynikamwa parlakiptʼasipjje, ukan taqeniw arstʼapjje. Cheqas kuna toqettï yatjjatapki uk yatjjatañ munapjjañapataki ukat ukar chuym uchapjjañapatak yanaptʼañajj chʼamakïspawa. Ukat mä taykajj akham siwa: “Kunjamtï familjam kusisit yatjjattʼañ munkta, ukham lurañatakejj janiw chʼamajj utjaskapuniti”. Awk taykanaka, ¿kunsa kusisit yatjjatapjjañamatak lurapjjasma?

“Wakischi ukhajj mayjtʼayasiñapawa”, sasaw Alemania markankir pä wawan mä awkejj arstʼi. Ukatsti pä phuchani Natalia kullakajj akham sarakiwa: “Nanakatakejj jan sapakuti pachpa luraña ukat kunayman toqet yatjjatañaw wakiskirejja”. Walja familianakajj kuna toqettï yatjjatapkani uk waljaruw jaljapjje. “Ukaw taqenin arstʼanipjjañapatak yanaptʼi” sasaw Brasilan jakasir Cleiton pä qʼajjo waynan  awkipajj qhanañchtʼi. Wawanakajj walja marat apasipki ukhajja, sapa maynejj kunan yanaptʼatäñsa munapjje ukan yanaptʼañatakiw tiempo jalanoqañajj yanaptʼi. Sapa maynejj kunan yanaptʼatäñsa muni ukwa awk taykanakajj amuykiptʼapjjaspa ukat kuna toqetsa yatjjatasini ukat kunjamsa yatjjatasini uk ajllkasajj awisajj mayjtʼayapjjaspawa.

Yaqhepanakajj kunayman toqet yatjjatañatakejja, ¿kunsa lurapjje? Jehová Diosar qʼochusaw qalltapjje. México markankir Juan jilatajj akham sasaw arstʼi: “Ukajj yatjjatañatakejj wali sum yanaptʼi ukat kuna toqettï yatjjatapkä uk sum amuytʼañatakiw wakichtʼapjjetu”. Familiapajj kunanakattï uka arumajj yatjjatapkani ukarjamaw qʼochunak ajlltʼapjje.

Yaqhepajj familpachaw Bibliat mä qawqha liytʼapjje. Ukat yatjjatäwejj jan mä kikpakïñapatakejja, Biblian jikjjataski uka chacha warminakan arunakap arsuyañatakiw may may jalanoqasipjje. Japón markankir mä awkejj ukham liyiñajj qalltan mayjïriwa sasaw säna. Ukampis pä jiskʼa wawapatakejj jupanakamp ukham lurañajj wali kusiskayänwa. Ukat yaqhep familiajj Biblian utjki uka sarnaqäwinak mä jiskʼa dramäkaspas ukham lurapjje. “Biblian qellqatapat yaqhep cheqanak jan amuyapkta, ukwa wawanakajj amuyapjje” sasaw Sudáfrica cheqan jakir Roger jilatajj arstʼi, jupajj pä wawaniwa.

Ukat taqpachaniw kuns luraraksna, sañäni, Noé chachajj mä arca lurkäna ukar uñtasita mä jiskʼa arca jan ukajj Salomonan templopar uñtasit mä jiskʼa templwa lurapjjaspa. Ukanak lurañatak yatjjattʼañajj wali kusiskañäspawa. Asia cheqan phesqa maran mä jiskʼa imillampi awk taykapampi ukat awichapampejja, Pablojj kawkhanakarutï viajkäna ukarjamaw mesan anatañatak mä anatañ apsupjjäna. Mayni familianakajj Éxodo qellqatarjamaw mesan anatañatak anatañanak apsupjje. Togo markankir 19 maran Donald jilatajj akham siwa: “Kunayman toqenakat yatjjatañaw Diosar yupaychañan wali sum apasiñapatak yanaptʼawayi ukat taqeniw kusisitäpjjta” sasa. Familjam Diosar kusisit yupaychañatakejja, ¿kunanakampsa lurasma?

Kunayman toqenakat yatjjatañasa ukat mayjtʼayañas familjam kusisit yatjjatañatak yanaptʼkchejja, ukampis askinak apsuñatakejj taqeniw sum wakichtʼasipjjañapa. Awisajj wayn tawaqonakajj qaripjjewa, ukatwa awkejj kunsa lurapjjani uk amuytʼañapa ukat sum wakichtʼasiñatakis tiempo apstʼasiñapa. Mä awkejj akham siwa: “Kunapachatï wakichtʼaskta ukhajja, taqeniw kusisita yatjjatapjje”. Alemaniankir mä jilatajja, kuna toqetsa jutïr semananakajj yatjjatapjjani ukwa janiräkipan familiapar yatiyi. Benín markanjja, sojjta wawan mä familiajj awisajj mä video familjam yupaychapki ukan uñtapjje. Ukat taqen wakichtʼasipjjañapatakejja, awkejj janiräkipan mä listar apsut jisktʼanak churi. Kunapachatï maynejj sum wakichtʼaski ukhajja, jan kikpätapajj qhanaw amuyasi.

Janiräkipan kuna toqetsa yatjjatasini uk taqeni yatipjjani ukhajja, uka toqetwa semanan parltʼapjjaspa, ukhamatwa wal yatjjatañ munapjjani. Ukat sapa maynitï mä luräw katoqapjjanejja, taqeniw familjam yupaychapki ukan yanaptʼañ munapjjani.

Walja familianakatakejj sapa semana jan jaytas yatjjatañajj chʼamawa.

Walja awk taykanakaw familiapar sum uñjañatakejj walja horanak irnaqañapa. México markankir mä awkejja, sojjta alwa horasaw utapat mistu ukat kimsaqallqo aruma horasas janïraw utar purkiti. Ukat awisajj Diosan markapan kuna lurañanak utjki ukhajj Familiana Diosar Yupaychañataki Aruman yatjjatañajj mayjtʼayañaw wakisispa.

Ukhamäni ukhasa, familjam Diosar yupaychañ jan jaytas lurañatak chʼamachasiskakiñasawa. Togo markankir 11 maran Loïs sat jiskʼa imillajj akham siwa: “Awisajj kunanak utjipan janis horasapar qalltapkstjja, janipuniw familjam yateqañ may kutis jaytapkti”. Phoqañatakejja, seman qallta uru yatjjatañaw askïspa, kunattejj mayjtʼayañ wakisini ukhajj uka pachpa semanan yaqha ururuw jittayasispa.

¿Kunatsa familian Diosar yupaychaña sasin sistanjja? Kunattejj Jehová Diosar yupaychktan ukanak taypinkiwa. Ukhamasti taqpach familiamamp Diosar ‘yupaychapjjañapataki’ sapa semana chʼamachasim (Ose. 14:2). Ukat ukajj taqenin wali kusisit yatjjatapjjañapatakïpan, kunattejj “Tatitusti kusisiñapampiw jiwasar chʼamañchistani” (Neh. 8:9, 10).