“Pag banggi nin Pampamilyang Pagsamba, wiling-wili kami sa pag-urulay kaya kun dai ko pinapapundo an pamilya ko, parati kaming inaabot nin matanga,” an sabi nin sarong ama sa Brazil. Sinabi nin sarong ama sa Hapon na garo dai naririsa kan diyes anyos niyang aking lalaki an oras asin gusto pang magpadagos. Taano? “Ganado siya, asin nakakadagdag iyan sa kaugmahan niya,” an sabi kan ama.

Siyempre, bakong gabos na aki ganado. An totoo, may mga dai nauugma sa pampamilyang pagsamba. Taano daw? Ini an obserbasyon nin sarong ama sa Togo, “An pagsamba ki Jehova dapat na bakong mabublay.” Kun iyo, bako daw na posibleng dahil iyan sa paagi kan pagkondukta kan pampamilyang pagsamba? Naeksperyensiyahan nin dakul na pamilya na an sinabi sa libro nin Isaias manungod sa Sabbath totoo man sa pampamilyang pagsamba; puwede iyan na magin gikanan nin “labi-labi nanggad na kaugmahan.”—Isa. 58:13, 14, NW.

Narealisar nin mga ama na para magin maugma an pampamilyang pagsamba, dapat na nakakarelaks iyan. Sinabi ni Ralf, na may tulong aking babayi asin sarong aking lalaki, na an pampamilyang pagsamba ninda mas ikakaagid sa impormal na pag-urulay kisa sa pag-adal; an gabos kabali. Totoo, kun beses tibaad sarong angat kun paano mapapagdanay na interesado an gabos asin nagpapartisipar. Inadmitir nin sarong ina: “Gusto kong pirming magin maugma an pampamilyang pagsamba, pero kun beses dai akong gana na gibuhon iyan.” Mapapangganahan mo daw an angat na iyan?

“Dapat na madali kaming bumagay sa kamugtakan,” an sabi nin sarong ama sa Alemania na may duwang aki. Si Natalia, na ina nin duwang aki, nagsabi: “An pinakaimportante para sa pamilya mi iyo an paggamit nin lain-lain na paagi.” Binabaranga-banga nin dakul na pamilya an saindang  pampamilyang pagsamba sa nagkapirang kabtang. “Nakakatabang iyan na magin mas buháy an pag-aadal asin makapartisipar an gabos,” an paliwanag ni Cleiton, ama nin duwang tin-edyer sa Brazil. Paagi sa pagbaranga-banga kan panahon para sa pag-adal, an mga magurang nakakapagtao nin atensiyon sa pangangaipo kan lambang aki kun magkakalain an edad ninda. Maaasikaso kan mga magurang an pangangaipo kan lambang miyembro kan pamilya asin makakapili sinda nin pag-aadalan asin nin format sa pag-adal.

Ano an ginigibo nin nagkapirang pamilya para makagamit nin lain-lain na paagi? Pinupunan kan iba an pampamilyang pagsamba paagi sa pag-awit nin mga kanta ki Jehova. “Marahay an epekto kaiyan asin inaandam kaiyan an isip mi sa pag-aadalan,” an sabi ni Juan na taga Mejico. Minapili an pamilya niya nin mga awit na konektado sa nagkapirang pag-aadalan ninda sa bangging iyan.

Dakul na pamilya an iribang binabasa an sarong kabtang kan Bibliya. Tanganing mapaiba an paagi nin pagbasa, iba-ibang miyembro kan pamilya an nagbabasa kan mga sinabi kan lain-lain na karakter sa sarong kabtang kan Bibliya. Inadmitir nin sarong ama sa Hapon na para sa saiya “kan inot medyo kakaiba an arog kaiyan na pagbasa.” Pero nauugma an duwa niyang aking lalaki na mahiling an saindang mga magurang na nawiwili kaiba ninda. Iinaakto pa ngani nin nagkapirang pamilya an mga istorya sa Bibliya. An mga aki “parating may mga puntong nahihiling sa sarong kasaysayan sa Bibliya na dai mi nahihiling bilang mga magurang,” an sabi ni Roger, ama nin duwang aking lalaki sa South Africa.

An saro pang paagi iyo an iribang paggibo nin sarong proyekto, arog kan paggibo nin modelo kan arka ni Noe o templo ni Solomon. An siring na mga proyekto nangangaipo nin pag-research na puwedeng magin nakakaugma. Halimbawa, sa sala nin sarong pamilya sa Asia, sarong singko anyos na aking babayi, kaiba an saiyang mga magurang asin lola, an naggibo nin board game basado sa pagbiyahe ni apostol Pablo bilang misyonero. An ibang pamilya naggibo nin mga board game basado sa mga kasaysayan sa libro nin Exodo. An paggamit nin lain-lain na paagi “nagtao nin bagong buhay sa samong pampamilyang pagsamba asin sa pamilya mi,” an sabi kan 19 anyos na si Donald, na taga Togo. May naiisip ka daw na proyekto na makakatabang na magin mas nakakaugma an saindong pampamilyang pagsamba?

Dawa ngani an paggamit nin lain-lain na paagi asin an pagbagay sa kamugtakan nakakatabang na magin interesante an pampamilyang pagsamba, an gabos kaipuhan na mag-andam para magin nakakapagtukdo iyan. Kun beses madaling mapagal an mga aki, kaya kaipuhan kan ama na pag-isipan asin pag-andaman na marhay an pag-aadalan. Sabi nin sarong ama, “Pag nakapag-andam ako, an pag-aadal nagigin mas makahulugan para sa gabos.” Patiinot na sinasabi nin sarong ama sa Alemania kun ano an pag-aadalan kan pamilya sa masurunod na semana. Ginagamit kan sarong pamilya sa Benin, na may anom na aki, an satong mga DVD sa pampamilyang pagsamba ninda. Para makapag-andam an pamilya, patiinot na nagtatao nin mga hapot an ama. An pagigin andam talagang may epekto sa kalidad kan pampamilyang pagsamba.

Kun aram na nin patiinot kan pamilya kun ano an pag-aadalan, mapag-uulayan ninda iyan durante kan semana, kaya magigin entusiyastiko sinda. Asin kun an lambang saro may asignasyon, mamamatian kan balang saro na kabali siya sa pampamilyang pagsamba.

Dakul na pamilya an nadidipisilan na gibuhon na regular an saindang pampamilyang pagsamba.

Dakul na ama an kaipuhan na magtrabaho nin dakul na oras tanganing maitao an pangangaipo kan pamilya. Halimbawa, sarong ama sa Mejico an minahali sa harong nin alas sais nin aga asin alas otso na nin banggi kun minapuli. May beses man na kaipuhan liwaton an oras kan Pampamilyang Pagsamba huli sa iba pang espirituwal na aktibidad.

Pero, kaipuhan kitang magin determinadong gibuhon na regular an pampamilyang pagsamba. Ini an sinabi kan onse anyos na si Loïs na taga Togo manungod sa determinasyon kan saiyang pamilya: “Dawa ngani kun beses dai nakakapuon sa tamang oras an samong pampamilyang pagsamba huli sa dai inaasahan na pangyayari sa aldaw na iyan, pirmi kaming igwa nin pampamilyang pagsamba.” Kaya iiniiskedyul kan nagkapirang pamilya sa kapinunan kan semana an saindang pampamilyang pagsamba ta kun may dai linalauman na mga pangyayari, puwede nindang gibuhon iyan sa ibang aldaw kan semanang iyan.

Arog kan ipinaparisa kan mismong mga tataramon na “pampamilyang pagsamba,” parte iyan kan saindong pagsamba ki Jehova. Lugod na an gabos na miyembro kan saindong pamilya magdara ki Jehova nin ‘torilyo kan saindang mga ngabil’ kada semana. (Os. 14:2, nota sa ibaba kan NW) Asin magin lugod magaya-gayang panahon iyan para sa lambang saro sa pamilya, ‘huli ta an kaugmahan ni Jehova iyo an saindong kakusugan.’—Neh. 8:9, 10.