Umufyashi umo umwaume uwa ku Brazil atile: “Nga tuli pa Mapepo ya Lupwa tulatemwa sana ukulanshanya ica kuti ilingi line nga nshilandile ukuti tuleke ninshi twalapwisha ubushiku.” Munyinefwe umbi uwa ku Japan alandile ukuti umwana wakwe uuli ne myaka 10 afwaya fye batwalilile ukulanshanya, tasakamana ne fyo nshita ili. Mulandu nshi? Ba wishi batile, “Alitemwa sana ukusambilila kabili ici e cilenga aleipakisha.”

Kwena te bana bonse abatemwa sana amapepo ya lupwa, bambi bena tabayafwaya no kuyafwaya. Cinshi cilenga? Umufyashi umo umwaume uwa ku Togo atile, “Ukupepa Yehova takufwile ukulatendusha.” Nga ca kuti kuletendusha, ninshi nalimo ubwafya bwaba pa fyo amapepo ya lupwa yatungululwa. Indupwa ishingi shasanga ukuti inshita ya mapepo ya lupwa ilingile ukuba ni nshita ya nsansa nga filya Esaya alondolwele ukuti e fyo Isabata lyaleba.—Esa. 58:13, 14.

Abafyashi Abena Kristu balishiba ukuti pa kuti ulupwa lutemwe amapepo ya lupwa, inshita ya mapepo ya lupwa ilingile ukuba ni nshita ya nsansa. Ba Ralf abakwata abana abanakashi batatu no mulumendo umo batile, amapepo yabo aya lupwa tayaba kwati lisambililo baletungulula, yaba fye kwati lyashi baleshimika. Kwena tacayanguka ukulenga aba mu lupwa bonse ukutemwa amapepo ya lupwa no kulabikako amano. ku mapepo ya lupwa no kuyatemwa . Umufyashi umo umwanakashi atile: “Limo ndafilwa ukutungulula bwino amapepo ya lupwa nge fyo mfwaya.” Kuti mwacita shani pa kuti amapepo ya lupwa yalewama?

Umufyashi umo umwaume uwa ku Germany uwakwata abana babili atile, “Tatufwile ukuumina kumo.” Ba Natalia abakwata abana  abanakashi babili batile: “Ukubomfya inshila ishalekanalekana pa mapepo ya lupwa kwalicindama sana mu lupwa lwesu.” Indupwa ishingi shilakanya ifya kusambililapo pa mapepo ya lupwa. Ba Cleiton abena Brazil abakwata abana babili imisepela, batile: “Ukwakanya ifya kusambililapo kulalenga mapepo ya lupwa ukuwama kabili bonse balalandapo.” Ukucita ifi kulafwa abafyashi ukusambilisha bwino umwana umo na umo ukulingana no mushinku wakwe. Kabili abafyashi kuti basala bwino ifya kusambililapo ne nshila balabomfya pa kubasambilisha.

Finshi indupwa shimo shicita pa kuti balesambilila pa fintu ifyalekanalekana? Bamo balemba inyimbo pa kutendeka amapepo ya lupwa. Ba Juan aba ku Mexico batile, “Ukucita ifi kulenga bonse bapekanya umutima no kufwaisha ukusambilila.” Ulupwa lulasala inyimbo ishilelanda pa fyo balatendeka ukusambililapo.

Indupwa shimo babelengela pamo icipandwa cimo ica Baibolo. Ifyo bacita bamo pa kuti ukubelenga kuwame, balalekanina pa kubelenga, mu cipandwa balebelenga, umo kuti abelenga amashiwi yalandile umuntu umo, umbi na o ifyo fine. Wishi umo umwina Japan atile, “nalemona kwati ukubelenga Baibolo muli uyu musango te kuti kubombe.” Lelo abana babo abaume balomfwa bwino sana ukumona uko abafyashi babo batemwa ukucita ifi. Indupwa shimo shilapanga ifisela ifya bantu Baibolo yalandapo. Ba Roger, abena South Africa abakwata abana abaume babili batile, abana “balamona fimo mu fipande ya mu Baibolo ifyo fwe bafyashi tufilwa ukumona.”

Fimbi ifyo mwingacita pa mapepo ya lupwa, kupangako ifintu pamo nga ubwato bwa kwa Noa nelyo itempele lya kwa Solomone. Pa kupanga ifi, mufwile ukufwailisha ifyebo e lyo ukucita ifi kulalenga mapepo ya lupwa ukuwama. Ku ca kumwenako, ku Asia umukashana wa myaka 5 ali na bafyashi bakwe na banakulu mu ng’anda. Balelenga ififulo uko Paulo aleya muli bumishonari na umo alepita. Indupwa shimbi nasho balacita ifi fine ilyo balesambilila pa malyashi yaba mwi buuku lya Ukufuma. Donald uuli ne myaka 19 uwikala ku Togo atile, ukubomfya inshila shalekanalekana “kwalilenga ukuti tuleipakisha sana amapepo ya lupwa kabili kwalenga twaba ne nsansa sana.” Bushe kuliko na fimbi ifyo mwingacita pa kuti amapepo ya lupwa yalewaminako?

Nangu ca kuti ukukanaumina kumo no kubomfya inshila shalekanalekana kwalicindama, pa kuti munonkelemo mu mapepo ya lupwa bonse mulingile ukupekanya. Limo limo abana balanaka, kanshi mwe bafyashi mufwile ukutontonkanya pa fyo mukasambilila no kupekanya bwino. Umufyashi umo atile, “Nga nimpekanya bwino, bonse mu lupwa balanonkelamo mu fyo tulesambilila.” Umufyashi umwaume ku Germany ale-ebela libela ulupwa ifyo bakasambilila pa mapepo ya lupwa mu milungu iili ku ntanshi. Umufyashi umo ku Benin uwakwata abana abanono 6, nga apekanya ukuti bakatambe DVD imo pa mapepo ya lupwa, alepekanya ifipusho no kupeela abana ilyo kucili sana inshita. Kanshi ukupekanya kwalicindama sana pa kuti tunonkelemo mu mapepo ya lupwa.

Aba mu lupwa nga baishibila kabeela ifyo bakalanshanyapo, kuti balefilandapo mu kati ka mulungu, ne ci kuti calenga balafwaisha ukukwata amapepo ya lupwa. Kabili cila muntu nga na bamupeela ifyebo ifyo alingile ukufwaya, akalamona ukuti alingile fye ukusangwako.

Mu ndupwa ishingi tacanguka ukukwata amapepo ya lupwa cila mulungu.

Abafyashi abaume abengi babomba ama-awala ayengi pa kuti balesakamana bwino indupwa shabo. Ku ca kumwenako, umwaume umo uwa ku Mexico aya ku ncito pa 6:00 hrs kabili abwelela pa ng’anda ne nshita ya 20:00 hrs. Na kabili inshita shimo, nalimo kuti cakabilwa ukwalula ubushiku mukwatilapo Amapepo ya Lupwa pa mulandu wa kuti kuli programu na imbi iya ku mupashi.

Lelo tufwile ukulakwata lyonse amapepo ya lupwa. Loïs uuli ne myaka 11 uwa ku Togo atile: “Nangu ca kuti limo tulacelwako ukutendeka amapepo ya lupwa pa mulandu wa fintu fimo ifyacicitika akasuba, tatucilukapo ubushiku nangu bumo.” E mulandu wine indupwa shimo shasalilapo ukulakwata amapepo ya lupwa ku kutendeka kwa mulungu. Nga kwaba ifyalenga ukuti bekwata amapepo ya lupwa pa bushiku basala, kuti bakwata pa bushiku bumbi.

Amapepo ya lupwa yabelako ukuti tulepepa Yehova. Mulekwata amapepo ya lupwa cila bushiku pa kuti aba mu lupwa lwenu ‘balelumbanya Yehova ku milomo yabo’ nga filya aba kale balemulumbanya ku malambo ya ng’ombe ayo baletuula. (Hos. 14:2) Kanshi bonse mu lupwa mulesekelela nga muli pa mapepo ya lupwa, “pantu ukusekelela muli Yehova e bucingo bwenu.”—Nehe. 8:9, 10.