Wan papa long Brasil i talem se: “Long taem blong Famle Wosip, sipos mi no stopem famle blong mi, mifala i save storian gogo kasem let long naet.” Wan papa long Japan we pikinini blong hem i gat 10 yia, i talem se pikinini blong hem i no stap tingbaot taem, hem i wantem gohed nomo long famle wosip. ?From wanem? Papa ya i talem se: “Hem i wantem lanem moa samting mo hem i glad tumas.”

I tru, i no evri pikinini we oli laekem famle wosip, samfala oli no wantem lanem moa samting. ?From wanem? Wan papa long Togo i talemaot tingting blong hem, i se: “Wosip we yumi mekem long Jehova, i no blong mekem yumi les.” Sipos yu luk se ol pikinini blong yu, oli les long famle wosip, maet yu save jenisim rod we yu stap folem blong mekem famle wosip. Plante famle oli tingbaot famle wosip, olsem sabat dei we Aesea i talem se, hem i wan taem blong “harem gud.”—Aes. 58:13, 14.

Ol Kristin papa oli mas mekem famle blong olgeta i glad long famle wosip. Ralf i gat tri gel mo wan boe. Hem i talem se, famle wosip blong olgeta i olsem wan storian nomo, we evriwan i joen long hem. Be samtaem i had blong evriwan oli laekem samting we famle i stap tokbaot, no blong oli joen long storian. Wan mama i talem se: “Mi save se famle wosip i wan taem we mifala i mas glad. Be plante taem i no olsem from we mi mi taed tumas.” ?Olsem wanem? ?Yumi save winim ol samting ya?

Wan papa long Jemani we i gat tu boe, i talem se: “Yumi mas rere blong jenisim sam samting.” Natalia, we i gat tu gel, i talem se: “Samting we i moa impoten long famle blong mifala, hemia blong mekem ol defdefren samting.” Plante famle oli seraotem famle wosip blong olgeta long plante defren haf. Cleiton, wan papa long Brasil we i gat tu yangfala, i talem se: “Taem mifala i mekem olsem, mifala i glad moa long famle wosip mo mifala evriwan i joen long hem.” Sipos long wan famle, ol pikinini oli gat ol defren yia, i gud we papa mo mama i tokbaot ol save we i stret long yia blong olgeta  wanwan. Sipos tufala i mekem olsem, bambae tufala i naf blong luksave ol samting we ol pikinini wanwan oli nidim. Olsem nao, tufala i save givhan long olgeta, mo tufala i save jusum wanem buk blong yusum, mo tingbaot olsem wanem blong mekem stadi wetem olgeta.

?Sam famle oli mekem wanem defdefren samting, blong famle wosip i kam gud moa? Samfala oli stat wetem wan singsing. Juan long Meksiko i talem se: “Taem mifala i singsing bifo we mifala i mekem famle wosip, hemia i mekem mifala i harem gud mo mifala i rerem tingting blong mifala long ol samting we bambae mifala i tokbaot.” Famle blong Juan i jusum wan singsing we i laenap wetem samting we bambae oli tokbaot long taem blong famle wosip.

Plante famle oli ridim wan stori blong Baebol wanples, nao ol memba blong famle wanwan oli ridim toktok blong wan man long riding ya. Wan papa long Japan i talem se: “Fastaem mi harem se i narakaen blong rid olsemia.” Be tufala boe ya i glad tumas taem tufala i luk we papa mo mama blong tufala i glad blong mekem samting olsem wetem tufala. Sam famle oli aktem ol stori long Baebol. Roger long Saot Afrika, i gat tu boe. Hem i talem se: “Samtaem ol pikinini oli luk sam samting long ol stori long Baebol we ol papa mo mama oli no luk.”

Wan narafala rod, hemia se evriwan long famle oli joen wanples blong mekem wan samting. Maet, oli bildim sip blong Noa, no oli mekem tempol blong Solomon. Be bifo we oli mekem samting ya, evriwan long famle oli mas mekem risej fastaem. !Hemia wan gudfala taem! Long Esia, wan famle i stap long haos blong olgeta. I gat wan gel blong faef yia i stap wetem papa mo mama blong hem mo abu woman blong hem. Oli mekem wan pleplei we i tokbaot misinari trip blong aposol Pol. Sam narafala famle oli mekem olsem, long ol stori we i stap long buk blong Eksodas. Wan yangfala blong Togo we i gat 19 yia, nem blong hem Donald, i talem se: “Ol defdefren samting we mifala i mekem long famle wosip, oli mekem evriwan long famle oli glad long famle wosip, mo famle blong mifala tu i glad moa.” ?Yu yu tingbaot wan samting we yufala i save mekem long famle wosip, blong yufala evriwan i glad moa?

Sipos yu jenisim ol samting we yu mekem long famle wosip mo yu mekem ol defdefren samting, hemia i pulum intres blong evriwan. Be blong famle wosip i givhan gud long famle, evriwan i mas rere gud. Samtaem, ol smol pikinini oli taed, taswe ol papa oli mas tingting gud fastaem long samting we bambae oli jusum mo oli mas rere gud. Wan papa i talem se: “Taem mi mi rere gud, evriwan long famle oli glad long famle wosip.” Wan narafala papa long Jemani, i talemaot fastaem long famle blong hem, samting we bambae oli tokbaot long wik blong famle wosip. Wan moa papa long Benin, i gat sikis pikinini. Taem hem i mekem plan blong famle i wajem wan DVD blong yumi long famle wosip, hem i mekemrere sam kwestin fastaem, mo i givim long olgeta. Taem evriwan long famle oli rere gud, famle wosip i gud moa.

Taem evriwan long famle oli save fastaem samting we bambae oli tokbaot long famle wosip, bambae oli glad tumas blong stap long dei ya. Mo sipos ol memba blong famle wanwan, oli gat wan haf blong mekem long taem ya, bambae evriwan i harem se famle wosip ya i blong hem.

Plante famle oli faenem i had blong mekem famle wosip evri wik.

Plante papa oli mas wok blong givim ol samting we famle blong olgeta i nidim. Wan papa long Meksiko i go long wok long sikis klok long moning, mo i kambak long haos long eit klok long naet. Taswe samtaem i had blong oli mekem famle wosip evri wik. Mo tu, sipos i gat spesel wik no asembli long dei we famle i makemaot blong mekem Famle Wosip, famle i mas jenisim taem blong olgeta.

Yumi evriwan i mas gat strong tingting blong mekem famle wosip evri wik. Wan yangfala blong Togo, i gat 11 yia nem blong hem Loïs, i tokbaot strong tingting we famle blong hem i gat. Hem i se: “Samtaem i gat sam samting i hapen long dei, we i mekem mifala i mas statem famle wosip blong mifala let. Be nating se i olsem, oltaem mifala i mekem famle wosip.” Taswe, i gud blong mekem famle wosip long stat blong wik. ?From wanem? From we, sipos i gat wan samting we oli no tingbaot i kamaot, oli save muvum famle wosip i go long wan narafala dei long wik.

?From wanem yumi singaot dei ya se “famle wosip”? From we hem i wan haf blong wosip we yumi mekem i go long Jehova. I gud we evri wik, olgeta memba blong famle oli joen long famle wosip blong presem God long ol toktok blong olgeta. Hemia i olsem we ‘oli kilim yangfala buluk blong givim long Jehova.’ (Hos. 14:2, NW) Mo famle wosip, i mekem se evriwan long famle oli glad, mo oli “strong.”—Neh. 8:9, 10.