“Wéiriti lubuidun wayanuhan wámagua dan le wadügüni Guñoun lánina Áhuduraguni lidan Familia, darí lun furese lan lásügürün dan”, ítara liña lariñagun aban úguchili Brasili. Ariñagati aban lichügüdina familia haponna luagu genegeti lan míchugun lan lisaani le díisibei irumu lau fe luagu lásügürün dan ani súnwandan busén lan lasigirun. Ka uagu? Aba lariñagun úguchili ligía: “Hínsiñeti lun ani gúndaati”.

Inarüni mama lan sun irahüñü lun gúndaabaña lan dan le lidan hamá Áhuduraguni lidan familia. Añahein magundantiña. Ka uagu? Háfuga ladüga masandiragun hamá houngua buidu. Ariñagati aban úguchili Tongo laganawa luagu “mama lan lunti hiru lan lóurate láhudurawagun lun Heowá”. Gama lumoun, anhein ítara liña lubéi lasuseredun, gayarati ladüga lan ligaburi lalidihóun aturiahani ligía? Gíbeeña familia arihiti luagu gayara lan lidaani lan “ugundani” dan ligía, kei waliihani tidan liliburun Isaíasi luáguti luéyuri emeraaguni (Isa. 58:13, 14).

Subudi hamuti agübürigu kristiánu lun lan hagundaarun keisi familia lidan ókaasion ligía mosu ñeinbei lan aransehani le buiti. Ralf, le gasaanigubei ǘrüwa würiña irahüñü luma aban wügüri, ariñagati ítara liña lan áhuduraguni lidan familia hábiñe kei aban ayanuhani sensiyuti, mama kei aban aturiahani; ani súngubei ayanuhatiña. Inarüni gayarati lan hénrengu lan hakipurún sun lílana familia etenira lun ariñahani le akutihóubei. Ariñagatu aban úguchuru: “Mama súnwandan lun here nan lun nadügün lun ítara lan wani guñoun lánina áhuduraguni kei familia kei nabusenruni”. Ka san lunbei hadügüni agübürigu lun gunda hamá hasaanigu lidan ókaasion ligía?

“Mosu waganbuni ka lan habusenrubei wasaanigu hadügün,” liña aban úguchili biámañanu lisaanigu, Yámani. Ariñagatu giñe Natalia, biámañanu tisaanigu würiña: “Le súdinitimabei woun, madügün wamani ligiaméme sagü dan, lun wadügün ámuñegueinarügü katei, katei iseriti. Gíbetiña familia aba hadügün saragu fánreinti lidan ókaasion ligía. “ídehati  katei le lun mabuchadun lan wawagu ani lun gadan lániwa sun wagía”, ítara liña lariñaguni Pleiton, háguchi bián nibureintiña Brasili. Dan le dísegua lan haweinamudun isaanigu, buiti lun lafanreinrawagun lidaani aturiahani lugundun ítara gayarati hetenirun lun hemegeirun kada aban. Gayarati hasaminarun agübürigu luagun lemegeirun kada aban hádangiñe lílana lufamilian ani madere ligíame halurudun luáguti kaba lan ariñahani hakutiha luma ida luba lan ladügǘn aturiahani.

Ka hadügübei fiú iduheñu lun ámuñegueinarügü lan ligaburi hadügüni aturiahani? Añahein aba hagumeserun lau heremuhan uremu lun Heowá. Ariñagati aban Méhikuna gíriti Huan: “Adügati le lun ñein lan ugundani hadan súngubei ani aranse lumutu wasaminan lubá ariñahani le lunbei wakutihani”. Anúadahatiña aban uremu le úarati luma ariñahani le lunbei hakutihani guñoun ligía.

Añahein amu burí iduheñu aliihatiña somu fánreinti tídangiñe Bíbülia úara. Ani lun amu lan ligaburi hadügüni, aba hafanreinraguni lun laliihani kada aban hádangiñe le lariñagubei kada aban hadanngiñe gürigia ha ayanuhabaña lidan fánreinti ligía. Ariñagati aban úguchili haponna luagu ámuti lan meha laganbún aliihani le lun ítara. Gama lumoun, gúndaatiña meha bián hasaanigu lau harihiniña hagübürigu gúndaañu adüga somu katei hama. Añahein iduheñu adügatiña lirahüñü dürama lau abahüdaguni tídangiñeti Bíbülia. Ariñagati Roger le háguchi bián irahüñü le awinwandubei Sudáfrica: “Lidan burí abahüdaguni ligía arihatiña irahüñü katei le buliei hamuti agübürigu”.

Gayarati giñe hawadigimaridun úara lidan somu wadagimanu, kéiburi hadügün aban tiraüraü árüka lani Noé o litenpulun Salomón. Sun akutihani le lunbei hadügüni lidan wadagimanu ligía, barüti ugundani. Asia anuhein aban irahü seingü irumu tau, hama tagübürigu tuma tagütü gumesetiña aban huraraü luáguti luéiyasun apostolu Pábulu. Añahein amu burí familia adügatiña huraraü luáguti abahüdaguni burí le tídanbei líburu to gíriboun Áfuriduni. Donald, aban nibureinti 19 irumu lan Togo, ariñagati: “Kei le ámuñegueinarügü lubéi katei wadügübei lidan waturiahan kei familia buídutimahali ani gúndaatiwa súngubei”. Saminaadün san luagun somu katei lun buídutima lan hadügüni áhuduraguni lidan familia?

Íbini buidu lan lun hadügün ámuñegueinarügü katei ani medere ligíame hilurudun lidan luáguti áhuduraguni lidan familia, súdiniti lun haraserun súngubei lun gayara lan hafurendeirun lídangiñe. Anihein dan aba labuchadun hawagu isaanigu, ligíati lunti lasaminarun úguchili kaba lan haturiaha ani ígira ligíame dan lun laranserun buidu. Ariñagati aban úguchili: “Dan le narannserun buidu, gúndaatimatiña súngubei lidan aturiahani”. Anihein aban lichügüdina familia Yamani, ariñaga lumuti houn tílana luban kaba lan haturiaha lidan burí dimaasu le asigirubei. Lidan ageiraü le gíribei Benin, anihien aban familia sisiñanu hasaanigu ani anihein dan aba lan harihin aban DVD keisi aban fánreinti lidan háhuduragun keisi familia. Ani lun haranserun súngubei, aba líchugun úguchili aban lísüta houn lau álügüdahani. Chóuruti arihúa lan dan le aranse hamá lubá haturiahan.

Dan le subudi hamani súngubei lau dan kaba lan haturiaha, gayarati hayanuhan luagu lidan dimaasu lúntima hagurabahani lidaani aturiahani lau ugundani. Ani anhein anihein lubéi somu katei lunti ladügüni kada aban, súngubei hagía sandiguatiña houngua keisi lílana aturiahani lidan familia ligía.

Gíbetiña familia hénrenguti houn haturiahan keisi familia sagü dimaasu.

Gíbetiña agübürigu mosu hawadigimaridun saragu oura lun hagañeiruni seinsu le hemegeirubei. Ítara liña lásügürün aban úguchili mesiganu, le áfuridubei lúbiñegiñe ladaün sisi binaafin lagiribuda ladürün widü guñoun. Ani anihein dan mosu lan lasansirúniwa Guñoun lánina Áhuduraguni lidan Familia ladüga anihein lan amu katei lunti wadügüni lidan wáhuduragun lun Heowá.

Íbini ítara, lunti desidírü wamá wadügüni áhuduraguni lidan familia súnwandan. Ariñagatu aban irahü 11 irumu tau Togo gíritu Loïs: “Íbini anihein lan dan tarü lan wagumeserun ladüga somu katei asusereduti lidan weyu ligía, súnwandan waturiahan”. Lun meferidirun wamani aturiahani, buiti lun wadügüni lidan lagumeseha dimaasu, lugundun anhein asusereda somu katei le magurabúnti, gayarati ladügǘn amu weyu lidanméme dimaasu ligía.

Kei larufuduni liri, Guñoun lánina Áhuduraguni lidan Familia, ligía aban fánreinti lídangiñe wáhuduragun lun Heowá. Áfaagua humá lun sun lan lílana hufamilian alawahein Heowá ‘lau hayuma’ (Ebü 13:15). Ani adüga humá lun aban lan ókaasion lánina ugundani lugundun “ugundani le líchugubei Bungiu waramudaguagülebei” (Neem. 8:9, 10).