Ete kiet ke Brazil ọdọhọ ete: “Mbubreyo Utuakibuot Ubon nnyịn esinen̄ede enem; edieke mmendọhọke ẹsuana, imekeme ndineme nneme tutu eyo ọsọn̄.” Ete kiet ke Japan ọdọhọ ke eyen imọ erenowo emi edide isua duop isisehe n̄kanika isinyụn̄ iyomke ẹsuana. Ntak-a? Enye ọdọhọ ete: “Utuakibuot Ubon nnyịn esinenem enye.”

Edi idịghe kpukpru nditọwọn̄ ke Utuakibuot Ubon esinem, ndusụk mmọ isikam imaha-ma. Ntak emi mîsinemke mmọ? Ete kiet ke Togo etịn̄ ntak kiet. Enye ọdọhọ ete: “Inaha utuakibuot Jehovah efefek owo.” Edieke efekde-fek owo, ekeme ndidi oto nte ẹnịmde. Ediwak ubon ẹkụt ke Utuakibuot Ubon edi usen “ata idatesịt,” ukem nte Sabbath ekedide usen idatesịt ọnọ ndusụk nditọ Israel.—Isa. 58:13, 14.

Ediwak ete ẹkụt ke nditọ mmimọ ẹsima Utuakibuot Ubon edieke ẹnamde enenem kpukpru owo. Ralf emi enyenede nditọiban ita ye eyen erenowo kiet ọdọhọ ke Utuakibuot Ubon mmimọ isitiehe nte ukpepn̄kpọ, ke esidi nneme, ndien ke kpukpru owo ẹsitiene ẹsịn uyo. Edi isimemke ndinam se ẹnemede enem kpukpru owo. Mma kiet ọdọhọ ete: “Idịghe kpukpru ini ke nsikeme ndinam Utuakibuot Ubon nnyịn enem nte n̄kpamade enye enem.” Ndi ẹmekeme ndinam eke mbufo enem?

Ete kiet ke Germany emi enyenede nditọ iba ọdọhọ ete: “Imenyene nsio nsio usụn̄ oro isinịmde Utuakibuot Ubon nnyịn.” Natalia, mma kiet emi enyenede nditọ iba, ọdọhọ ete: “Imesinam nsio nsio n̄kpọ ke ini Utuakibuot Ubon nnyịn.” Ediwak ubon ẹsinịm Utuakibuot Ubon mmọ ke ikpehe ke ikpehe. Ete kiet ke Brazil emi ekerede Cleiton enyene nditọ iba; kiet edi isua 14, enye eken edi isua 17. Ete emi ọdọhọ ke ndinịm ke ikpehe ke ikpehe  esinam ukpepn̄kpọ mmimọ enem onyụn̄ anam kpukpru owo ke ubon ẹtiene ẹbuana. Edieke n̄kpri ye ikpọ nditọ ẹdude ke ubon, mme ete ye eka ẹkeme ndibahade Utuakibuot Ubon nsịn ke ikpehe ke ikpehe. Mmọ ẹkeme n̄ko ndimek nsio nsio n̄kpọ oro ẹdinamde ke Utuakibuot Ubon mmọ.

Nso ke ndusụk ubon ẹnam man ẹnyene nsio nsio nti n̄kpọ emi ẹkpenamde ke Utuakibuot Ubon? Ndusụk ubon ẹsitọn̄ọ ye ndikwọ ikwọ nnọ Jehovah. Juan emi odude ke Mexico ọdọhọ ete: “Emi esinem kpukpru nnyịn onyụn̄ anam ifiọk se iyomde ndikpep mban̄a.” Mmọ ẹsimek ikwọ emi enyenede n̄kpọ ndinam ye se mmọ ẹyomde ndineme mbubreyo oro.

Ndusụk ubon ẹsitie kiet ẹkot Bible. Ke ini ẹkotde mbụk Bible, owo kiet kiet ke ubon esikot se nsio nsio owo ke mbụk oro ẹketịn̄de, ndien emi isiyakke efefek owo. Ete kiet ke Japan ọdọhọ ke imọ ikenen̄ekede ima ke nsonso oro. Edi ekenenem nditọ esie iba ndikụt nte enemde ete ye eka mmọ nditie ye mmọ nnam n̄kpọ. Ndusụk ubon ẹsikot mbụk Bible ekem ẹda ẹnam drama. Roger emi enyenede nditọ iba ke South Africa ọdọhọ ke nditọwọn̄ “ẹsiwak ndikụt mme n̄kpọ ke mbụk Bible emi nnyịn mme ete ye eka mîsikwe.”

Usụn̄ en̄wen emi ẹkemede ndinam nsio nsio n̄kpọ man Utuakibuot ubon enem edi ubon ndidiana kiet nnam n̄kpọ, utọ nte ndikọn̄ ubom Noah m̀mê ndibọp temple Solomon. Esinem etieti ndinam ndun̄ọde man ẹkeme ndinam utọ n̄kpọ emi. Ke uwụtn̄kpọ, ke Asia, ekpri eyenan̄wan isua ition ye ete ye eka esie ye eka ete esie ẹma ẹdiana kiet ẹnam utọ n̄kpọ emi. Mmọ ẹma ẹnịm akamba kad ke ufọtufọk mmọ ẹnyụn̄ ẹdrọ nte isan̄ isụn̄utom Paul eketiede. Mmọ ẹsida kad emi ẹbre mbre emi etiede nte nsa obukpọk. Mme ubon en̄wen ẹsida n̄wed Exodus ẹdrọ nte nditọ Israel ẹkesan̄ade ẹnyụn̄ ẹda enye ẹbre nsa n̄ko. Donald emi edide isua 19 onyụn̄ odụn̄de ke Togo ọdọhọ ke ndinam nsio nsio n̄kpọ ntem anam Utuakibuot Ubon mmimọ enen̄ede enem onyụn̄ anam ubon mmimọ etetịm adiana kiet. Ndi ọmọfiọk se akpanamde man Utuakibuot Ubon mbufo enen̄ede enem?

Kpa ye emi ndinam nsio nsio n̄kpọ ekemede ndinam Utuakibuot Ubon nnyịn enem, ana kpukpru owo ẹtịm idem man enye enyene ufọn ọnọ kpukpru owo. Ekeme ndikak nditọwọn̄ nditie itie kiet n̄kpep n̄kpọ ke anyan ini, ntem ete ekpenyene nditie n̄kere se idinemde nditọ esie. Ndien ana enye enen̄ede etịm idem. Ete kiet ọdọhọ ete: “Ukpepn̄kpọ Ubon nnyịn esinen̄ede enem kpukpru owo ke ini nnen̄erede ntịm idem.” Ete kiet ke Germany esisian ubon esie se mmọ ẹdinemede ke Utuakibuot Ubon mmọ ke ọfiọn̄ oro etienede. Ete en̄wen ke Benin Republic emi enyenede n̄kpri nditọ itiokiet esitie ye ubon esie ese vidio esop Abasi ke ini Utuakibuot Ubon mmọ. Didie ke mmọ ẹsitịm idem? Ete oro esinọ mmọ mme mbụme emi enye edibụpde ẹma ẹse vidio oro ẹma. Ke akpanikọ, ntịmidem esinam Utuakibuot Ubon enen̄ede enem.

Edieke kpukpru owo ke ubon ẹfiọkde se ẹdinemede, mmọ ẹkeme ndineme oro ofụri urua oro. Emi ayanam Utuakibuot Ubon enen̄ede ọdọn̄ mmọ. Ndien edieke ẹnọde owo kiet kiet n̄kpọ anam ke Utuakibuot Ubon, idụhe owo emi edidọhọde ke ibeheke imọ.

Ediwak ubon isikemeke ndinịm Utuakibuot Ubon kpukpru urua.

Ediwak ete ẹnyene ndinam utom ediwak hour man ubon mmọ ẹnyene se ẹdiade. Ke uwụtn̄kpọ, ete kiet ke Mexico esiwọrọ ke ufọk ke n̄kanika itiokiet usenubọk, ọnyọn̄ edi ke n̄kanika itiaita okoneyo. N̄ko-n̄ko, enyene ini emi esiyomde ẹkpụhọ ini Utuakibuot Ubon ke ntak n̄kpọ Abasi en̄wen.

Kpa ye oro, akpana inen̄ede ibiere ndisinịm Utuakibuot Ubon kpukpru urua. Kop se Loïs emi edide isua 11, emi onyụn̄ odụn̄de ke Togo, etịn̄de mi aban̄a nte ubon mmọ ẹbierede ndisinịm Utuakibuot Ubon: “Imesinịm Utuakibuot Ubon nnyịn kpukpru urua, idem ọkpọkọm n̄kpọ anam itọn̄ọ ke idiọk ini.” Ntem ọfọn isinịm Utuakibuot Ubon ke ntọn̄ọ ntọn̄ọ urua. Ntak-a? Sia edieke n̄kpọ etịbede, imekeme ndisio nnịm usen efen ke urua oro.

Sia ẹkotde enye “Utuakibuot Ubon,” enye edi ini emi isidade ituak ibuot inọ Jehovah. Yak kpukpru owo ke ubon mbufo ẹnọ Jehovah “mfri n̄kpọkinua” mmọ. (Hos. 14:2) Yak ini oro edi ini idatesịt ọnọ kpukpru owo ke ubon, “koro idatesịt Jehovah edide odudu mbufo.”—Neh. 8:9, 10.