“Dua na ka na levu ni ka keitou dau veivosakitaka ena bogi ni neitou Sokalou Vakavuvale. Keu sega ni tarovi ratou, e rawa ni bogi taucoko na neitou vuli,” e tukuna e dua na tama mai Brazil. E dua na ulunivuvale mai Japani e tukuna ni sega ni dau kauai o luvena tagane yabaki tini ena totolo ni gauna qai via tomana tiko ga. Baleta? E dikeva o tamana, “E gu dina na lomana qai vakamarautaki koya vakalevu.”

E macala ga ni sega ni gone kece ena gu na lomadra, so tale ga era na rairai sega ni marautaka na sokalou vakavuvale. Na cava na vuna? E tukuna e dua na tama mai Togo, “Na sokalou vei Jiova e sega ni dodonu me vakavucesa.” Ke yaco qori, e vinaka me na dikevi tale na sala e caka kina na sokalou vakavuvale. Era raica eso ni sokalou vakavuvale e vaka na ka e kaya o Aisea me baleta na Siga ni Vakacecegu, me “ka e rekitaki.”—Aisea 58:13, 14.

Era kila na tama ni rawa ni kunei na marau ena gauna ni sokalou vakavuvale ke vakilai kina na vakacegu kei na duavata. E tukuna o Ralf, e dua na tama e tolu na luvena yalewa, qai dua na luvena tagane, ni nodratou sokalou vakavuvale e vaka ga na veitalanoa e veisiga, sega ni vaka na vuli; keitou vakaitavi kece. E macala ga ni so na gauna ena dredre toka na kena sagai mera kauai ra qai vakaitavi na lewenivuvale ena ka e vulici. E tukuna e dua na tina: “E levu na gauna e sega vei au na igu me rawa ni marautaki kina na sokalou vakavuvale me vaka au vinakata.” E rawa beka ni o valuta na dredre ya?

“E bibi meda dau yalorawarawa,” e kaya e dua na tama mai Jamani, e rua na luvena. E tukuna o Natalia, e dua na tina e rua na luvena, “Na ka bibi duadua vei keitou vakavuvale me veiveisau na sala me caka kina na neitou sokalou.” Era  dau wasewasea e levu na vuvale na nodra sokalou vakavuvale, ni duidui na ka e vulici kina. E vakamacalataka o Cleiton mai Brazil, e dua na tama e rua na luvena itabagone, “Qori e vakavuna me keitou guta kina na ka e vulici, keitou vakaitavi kece tale ga.” Nira wasewasea na itubutubu na gauna ni vuli, e rawa nira solia nodra gauna vei ira yadudua na luvedra ke veisivi nodra yabaki ni bula. Rawa nira vukei ira yadudua na lewenivuvale na itubutubu, ra qai yalorawarawa ena kena vakatulewataki na ulutaga me vulici kei na sala me caka kina.

Na cava era cakava eso na vuvale mera vakavinakataka na duidui ni ka era vulica? Eso era tekivuna nodra sokalou vakavuvale nira lagasere vei Jiova. “E vakilai kina na vakacegu kei na duavata qai vakarautaka tale ga na neitou vakasama ena ka e vakarau vulici,” e kaya o Juan mai Mexico. Eratou digia na lewenivuvale na sere e lakolakovata kei na ka e vulici ena bogi ya.

Eso na vuvale era wilika vata e dua na iwase ni iVolatabu. Me rawa ni veiveisau na sala e caka kina na vuli, era dui wilika na lewenivuvale yadua na ka era tukuna o ira na volai tiko ena dua na iwase ni iVolatabu. E tukuna e dua na tama mai Japani ni “sega ni matau vua na iwalewale qori ena matai ni gauna e caka kina.” Ia erau marautaka na luvena tagane ni bau dua na ka eratou marautaka vata vakavuvale. Eso tale na vuvale era dramataka eso na italanoa ena iVolatabu. E kaya o Roger mai Sauca Aferika e rua na luvena tagane, ni o ira na gone “era dau raica eso na ka ena italanoa vakaivolatabu eda sega ni raica na itubutubu.”

E dua tale na sala e rawa ni veisautaki kina na iwalewale ni vuli, ya mera cakava vata eso na ka na vuvale, me vaka na nodra tara e dua na ivakatakarakara ni waqa i Noa se na ivakatakarakara ni valenisoro i Solomoni. Qori e rawa ni caka kina eso na vakekeli, ena marautaki tale ga. Kena ivakaraitaki, qori na ka e cakava e dua na goneyalewa yabaki lima mai Esia kei rau na nona itubutubu kei buna. Ratou cakava vata tiko e dua na qito (board game) e yavutaki ena vanua e kaulotu kina na yapositolo o Paula. Era cakava tale ga eso na vuvale na mataqali qito va qori, ia e yavutaki ena ivola na Lako Yani. E tukuna o Donald e vakaitikotiko mai Togo, e yabaki 19, “e vakabulabulataka na neitou sokalou vakavuvale kei na neitou bula vakavuvale” na kena veisautaki na iwalewale ni vuli. O rawa ni vakasamataka eso na ka mo dou cakava me marautaki kina vakalevu na nomudou sokalou vakavuvale?

Me rawa ni marautaki na sokalou vakavuvale, e vinakati me veiveisau na iwalewale ni vuli, ia me rawa ni yaga dina, ena vinakati mera vakavakarau kece na lewenivuvale. Ena so na gauna era na vucesa na gone, ena vinakati vei ira na tama mera vakasamataka vakailiu na ka me na vulici ra qai vakayagataka nodra gauna mera vakarautaka vinaka. E tukuna e dua na tama, “Niu dau vakavakarau vinaka, e vakilai ni yaga vakalevu vei keitou na vuli.” E dau tukuna vakailiu e dua na tama mai Jamani na ka ena veivosakitaki ena vica na macawa e liu. E dua na tama mai Benin e ono na luvena lalai, e dau vakarautaka rawa tu na taro me na vakayagataki ena gauna e saravi kina e dua na DVD vakaivolatabu ena nodratou sokalou vakavuvale. Io, ena yaga sara vakalevu ena sokalou vakavuvale na vakavakarau.

Ke ratou kila vakailiu na lewenivuvale na ka ena veivosakitaki, eratou na veitalanoataka ena loma ni macawa ya, eratou na nanamaki tale ga kina. Ni soli na nodratou dui itavi, eratou na raica qori me vaka sara ga e nodratou dui sokalou vakavuvale.

Era vakila e levu na vuvale ni dredre me dau caka wasoma na nodra sokalou vakavuvale.

Eso na tama era cakacaka ena vica vata na aua me rawa ni qaravi kina na vuvale. Kena ivakaraitaki mai Mexico, e biubiu e vale e dua na tama ena ono na kaloko ena mataka qai suka mai ena walu ena bogi. Ena so na gauna, ena vinakati me veisau na gauna ni Sokalou Vakavuvale ni basika eso tale na noda sosoqoni vakayalo.

Ia e vinakati meda dei tiko ga ena noda cakava wasoma na noda sokalou vakavuvale. E vakaraitaka na nodratou sasaga vakavuvale o Loïs, e dua na goneyalewa yabaki 11 mai Togo, ni kaya, “So na gauna e basika eso na ituvaki ena loma ni siga e tekivu bera kina na neitou sokalou vakavuvale, ia keitou dau saga me caka ga.” Sa rauta mera tuvanaka eso na vuvale me caka na nodra sokalou vakavuvale ena itekitekivu ni macawa. Ke yaco eso na ituvaki tawanamaki, e rawa ni caka malua na sokalou vakavuvale ena dua tale na siga ena macawa ya.

E vakatokai na ituvatuva qo me sokalou vakavuvale, e vakaraitaka gona ni qo e tiki ni noda sokalou vei Jiova. Mera kauta vei Jiova ena veimacawa na lewe ni nomu vuvale kece na ‘imadrali ni tebenigusudra.’ (Osea 14:2) Me gauna marautaki mada ga qori vei ira kece na lewenivuvale, ‘ni sa vu ni nomuni kaukaua na marau e solia o Jiova.’—Niem. 8:9, 10.