«Yootushii maʼin waya wanaa sümaa waʼwaajüin Maleiwa sümaa wapüshi. Alatalaa müsü tü oorakat wojuuna», müshi wanee wawala chakai Brasil. Naashin wanee wawala chakai Japón, eeshi wanee nüchon polooichikai juya, nnojotsü jülüjüin naaʼin tü oorakat, nnojotsü akulajaain naaʼin sünain ekirajawaa. ¿Jamüsü makaʼa nukuwaʼipa chi jintüikai? Müshi chi nüshikai: «Kamalainsü maʼin nümüin ekirajawaa makalaka talatüin maʼin naaʼin».

Nnojoliipejeʼe talatüin naaʼin napüshuaʼa na tepichikana sünain ekirajawaa. Süka jamüin, nakulajaain aaʼin. Naashin wanee wawala chakai Togo, nnojoluinjatü akulajaain naaʼin wanee wayuu sünain aʼwaajaa Jeʼwaa. Sülatüle tia, eesü süpüla sutumasirüin tü sukuwaʼipakat jutuma tü ekirajawaakat. Akatsaʼa naashin waneeinnua wawalayuu, eesü süpüla talatüin maʼin naaʼin sünain aʼwaajaa Maleiwa maʼaka talatapuʼuin naaʼin na judíokana soʼu tü kaʼi neemeraakalü oʼu (Is. 58:​13, 14).

Natüjaa aaʼu na wayuu kachonniikana, talateenain na nachonniikana sünain ekirajawaa müleka anale maʼin sukuwaʼipa natuma. Naashin Ralf, pienchishii nüchonnii, waneeshia toolochon, tü ekirajawaakat namaa müsü aka saaʼin wanee yootirawaa; asouktüshii naya napüshuaʼa. Kapüleesü namüin na wayuukana naaʼinmaainjatüin tü ekirajawaakat. Müsü wanee wawala süchiki tia: «Isasü saaʼin tachiki kamalainjatüin tamüin tü ekirajawaakat sümaa tapüshi». ¿Kasa naaʼinrajatka na wayuukana süpüla nnojoluinjatüin müin nakuwaʼipa?

«Nnojoishii macheʼeinjanain waya süchiirua ekirajawaa sünain waneesia neʼe kasa», müshi wanee wayuu chejeʼewai Alemania piamakai achonnii. Müsü Natalia wanee wayuu piamaka achonnii: «Shia anaka aluʼu wekirajaale süchiki kojuyasü kasa, wekirajaainjatü anain wanee kasa jeketü». Wainma wawalayuu naatawaika atuma shiʼipapaʼa tü nekirajaakalü anain soʼu tü ai naʼwaajakalü oʼu Maleiwa. «Waainjüle tia, nnojotsü akulajaain waaʼin sünain ekirajawaa  otta yootushii waya wapüshuaʼa sünain», müshi Cleiton wanee wayuu chejeʼewai Brasil piamakai achonnii. Naatawaire nouyase na püchonniikana, pütüjaajeerü aaʼu kasain wayuu pikirajüinjanain anain naya müleka naatawaire putuma tü pikirajüinjatkalü anain. Jülüja jaaʼin tü kasa anakat süpüla jikirajaain anain namaa na jüpüshikana waneʼewai nakua. Jülüja jaaʼin jamüinjatüin sukuwaʼipa tü ekirajawaakat.

¿Kasa naaʼinraka waneeinnua wawalayuu süpüla nnojoliinjanain nekirajaain sünain waneesia neʼe kasa sümaa napüshi? Eeshii na oʼttakana sünain eeʼirajaa wanee jayeechi nümüin Jeʼwaa. «Waainjüle tia, anasü sukuwaʼipa tü ekirajawaakat otta watüjaa aaʼu kasainjatüin wekirajaain anain», müshi Juan, chejeʼewai México. Naneeküin na nüpüshikana wanee jayeechi aashajaaka süchiki tü nekirajaainjatkalü anain.

Eeshii na wayuu kottiraakana sünain aashajeʼeraa pütchi suluʼujee tü Wiwüliakat. Süpüla anainjatüin maʼin sukuwaʼipa natuma, nayayaashii na wayuu aashajaanakana achiki suluʼu tü kapiitulo naashajeʼerakat. Naashin wanee wayuu chejeʼewai Japón, mamalainyaasat nümüin aainjaa tia. Aluʼusaʼa na nüchonniikana, talatüshii maʼin süka neʼrüin nüshi sümaa nei sünain aainjaa tia. Otta eeshii na wayuu aainjakana wanee drama süka wanee aküjalaa eekai suluʼuin tü Wiwüliakat. «Neʼrüin na tepichikana sünain wanee aküjalaa tü nnojotkat weʼrüin wayakana», müshi Roger wanee wayuu chejeʼewai Sudáfrica, piamashii nüchonnii.

Wanee kasa eeka süpüla jaainjüin shia müleka jiʼyataale sünain akumajaa wanee kasa maʼaka saaʼin akumajaa shiyaakua tü anua naainjakat Noé jee shiale shiyaakua tü aʼwaajülee naainjakat Salomón. Aneerü maʼin jümüin ekirajawaa sünain tü kasa sünainpünaakat tü kasa jukumajüinjatkat. Anuu tü naainjakat wanee wawala sümaa nüpüshi süpüla nashaittüinjanain. Nepintajüin sünain wanee karaloukta miyoʼu eepünaale nuʼunajaain Pablo sünain eʼikajaa pütchi nüchiki Maleiwa, oʼunajaayaashii naya sainküinpünaa tü mma nüʼütakalü achiki Pablo. Eeshii waneeinnua wawalayuu, epintajakana eepünaajanale noʼunüin na israeliitakana chaa anoouishiipünaa maʼaka süküjüin shia Éxodo. «Anashaatasü wamüin nnojoluin waneesüin tü kasa wekirajaakalü anain», müshi Donald, polooichi mekietsatmüin juya chejeʼewai nia Togo. Jülüja paaʼin tü kasa eekat süpüla paainjüin sümaa püpüshi süpüla anainjatüin maʼin sukuwaʼipa tü ekirajawaakat.

Shiimain nnojoliinjanain macheʼein waya süchiirua ekirajawaa sünain waneesia neʼe kasa. Sotuinjatpejeʼe jaaʼin yapainjatüin jutuma tü jikirajaainjatkalü anain soʼu tü ai juʼwaajakalü oʼu Maleiwa. Eeshii süpüla nakulajaain aaʼin suulia ekirajawaa na tepichikana, makalaka jülüjüinjatüin paaʼin tü pikirajüinjatkalü anain otta yapainjachin pia süpüla tia. Müshi wanee wayuu kachonkai: «Yapale tatuma tü wekirajaainjatkalü anain, kamalainsü maʼin namüin na tapüshikana tü ekirajawaakat». Wanee wawala chejeʼewai Alemania, nüküjüin sümüin nüpüshi kasainjatüin nekirajaain anain. Naainjüin tia wanee semaana süpülapünaa tü kaʼi nekirajaainjatkalü oʼu. Chayaa Benín, eeshii waneeinnua wawalayuu aipiruashiikana achonnii; eʼrajawaishii naya wanee video soʼu tü ai naʼwaajakalü oʼu Maleiwa. Naapüin chi nashikai namüin wanee pütchi nasouktüinjatka eʼipajee. Yapale jutuma tü jikirajaainjatkalü anain, jiʼreerü anain sukuwaʼipa.

Jütüjaale saaʼu tü jikirajaainjatkalü anain, jaashajaweerü achiki shia soʼu tü semaanakat süpüla keeʼireeinjatüin jaaʼin süntüin tü kaʼi jikirajaainjatkalü oʼu. Jüküjüle namüin na jüpüshikana tü kasa naainjüinjatkat soʼu kaʼikat tia, neʼreerü choʼujaain yalain naya jümaa sünain aʼwaajaa Maleiwa.

Eeshii na wayuu isakana achiki naʼwaajüin Maleiwa sümaa napüshi semaanawai.

Eeshii na wayuu aʼyataainjanakana wainma oora shiyaaluʼu napüshi. Wanee wawala chakai México, oʼunüshi nia laseei sünain aʼyatawaa otta aleʼejaleeshia lasoocho aipaʼa. Shiasaʼa müin eere wanee outkajawaa soʼu tü kaʼi naʼwaajakalü oʼu Maleiwa, neeʼiratüin tü sükaliakat.

Eesia süpüla sülatüin tia jümüin, nnojotpajaʼa anain müleka nnojoliire juʼwaajüin Maleiwa sümaa jüpüshi. Müsü sünüiki wanee jintutchon chejeʼewat Togo, polooirü waneemüin juya: «Eeshii woʼttüle tarde sünain aʼwaajaa Maleiwa sümaa wapüshi süka sülatalaa sümüin wanee kasa. Nnojotsü walatirüin wanee semaana sünain nnojoliin wekirajaain». Eesü süpüla jaainjüin tüü: jüneeka wanee kaʼi suʼttiajee tü semaanakat süpüla jikirajaain sümaa jüpüshi. Sülatalaa sümüle wanee kasa, jaainjeerü shia soʼu wanee kaʼi soʼuleʼeya semaanakat tia.

Jüchajaa sukuwaʼipa süpüla naʼwaajüinjachin Jeʼwaa na jüpüshikana semaanawai sükajee nanüiki (Os. 14:2). Jüchajaa sukuwaʼipa süpüla talatüinjatüin naaʼin na jüpüshikana soʼu kaʼikat tia süka talateerüin naaʼin nutuma Jeʼwaa (Neh. 8:​9, 10).