Peteĩ túva oikóva Brasílpe heʼi: “Rojapo jave pe Aty Jastudia Hag̃ua Ñande Rogayguándi entéronte opartisipa ha igustoiterei, upévare ni noroñandúi ohasávo pe óra”. Ambue túva oikóva Japónpe orekóva peteĩ itaʼýra de 10 áño, heʼi: “Che raʼýpe ogustaiterei pe estúdio ha ndoipotái voi opa. Haʼe oñeñandu porã ha ovyʼaiterei rostudia jave”.

Péro heta mitã ndahaʼéi la ostudiasetereíva, jaʼe porãsérõ g̃uarã oĩ voi família naikyreʼỹietéva ojapo jave pe Aty Jastudia Hag̃ua Ñande Rogayguándi. ¿Mbaʼérepa? Omongaigue rupi chupekuéra. Peteĩ túva oikóva Tógope heʼi voi: “Nañandekaiguéi vaʼerã ñamombaʼeguasu jave Jehovápe”. Péro oimérõ upéicha, tekotevẽ jajapo igustove hag̃uáicha ñande estúdio. Proféta Isaías heʼi vaʼekue Jehová siervokuéra omombaʼe ha ovyʼa vaʼerãha pe sábado, koʼág̃arupi avei heta família ohechakuaa ikatuha javyʼa jastudiávo ñande rogayguándi (Is. 58:13, 14).

Oĩ sy ha túva ohechakuaáva ifamiliakuéra ovyʼavetaha ojapórõ pe estúdio igustove hag̃uáicha. Ralf, peteĩ túva orekóva mbohapy mitãkuña ha peteĩ mitãkuimbaʼe, heʼi: “Rostudia jave enterovéva omombeʼu umi mbaʼe opensáva, upévare haʼete voi ku roñemongetánteva oñondivepa”. Péro sapyʼánte ijetuʼu tuvakuérape oipytyvõ hag̃ua ifamíliape oñatende hag̃ua pe informasión ojestudiávare. Peteĩ sy heʼi voi: “Che ajapo porãse pe estúdio de família ikatu hag̃uáicha igústo, péro sapyʼánte nameʼẽvéima”. ¿Mbaʼépa rejapokuaa ani hag̃ua ikaigue nde estúdio de família?

Peteĩ túva Alemaniagua orekóva mokõi mitã, heʼi: “Ani jajopyeterei ñane familiakuérandi  térã jastudia peteĩ hendáichante”. Natalia, orekóva mokõi mitãkuña, omombeʼu: “Oréve g̃uarã iñimportanteterei rokambia mimi jepi rostudia lája”. Oĩ família ojapóva ijestúdio ikatu hag̃uáicha ideprovécho enterovépe. Upéicha ojapo Cleiton, oikóva Brasílpe ha orekóva mokõi mitãrusu, haʼe heʼi: “Upéva orepytyvõ igustove hag̃ua ore estúdio ha avei enterovévante opartisipa”. Ogapýpe oĩramo orekóva diferénte eda, tuvakuéra ohecha vaʼerã mbaʼépa oikotevẽ káda uno ha oiporavo porã umi informasión ostudiátava hendivekuéra, avei opensa porã vaʼerã mbaʼéichapa okonvenivéta ojapo pe estúdio.

¿Mbaʼépa ojapo heta ermáno igustove hag̃ua ijestúdio de família? Oĩ oñepyrũre opurahéiva kántiko. Juan oikóva Méxicope heʼi: “Upéva orepytyvõ roñeñandu porã ha oreprepara rohesaʼỹijo hag̃ua pe informasión rostudiátava”. Haʼekuéra oheka voi umi kántiko ohótava umi téma ostudiátavare.

Oĩ avei família oleéva la Biblia oñondivepa ha igustove hag̃ua chupekuéra káda uno olee peteĩ párte ha orrepresenta peteĩ personáhepe. Peteĩ túva oikóva Japónpe heʼi ñepyrũrã ndojepokuaaiete hague olee péicha la Biblia, péro umi mokõi mitã orekóva ovyʼaiterei ohechávo mbaʼéichapa ituvakuéra kyreʼỹme ojapo upéva. Heta família katu ojapo voi teatroʼi umi istória oĩvagui la Bíbliape. Roger, peteĩ túva oikóva Sudáfricape ha orekóva mokõi mitã, heʼi: “Umi mitã ohecha jepi heta detálle oĩva umi istóriape, ñande tuvakuéra ndajapilláiva”.

Jajapokuaa avei oñondivepa peteĩ tembiapo, por ehémplo, peteĩ arkaʼi Noé ojapo vaʼekueichagua térã pe témplo Salomón omopuʼã vaʼekue. ¡Ajépa igustoitéta ñainvestiga jajapo hag̃ua koʼã tembiapo! Ásiape, peteĩ mitãkuñaʼi orekóva cinco áño, ijavuéla ha ituvakuéra ojapo peteĩ huégo umi viáhe ojapo vaʼekuégui apóstol Pablo. Heta família katu ojapo peteĩ huégo umi rreláto oĩvagui lívro de Éxodope. Donald, orekóva 19 áño ha oikóva Tógope, heʼi: “Rojapo rupi heta mbaʼe ore estúdio de famíliape igustoiterei ha orembovyʼa”. ¿Mbaʼépa repensa rejapo igustove hag̃ua nde estúdio de família?

Iporã ningo ñakambia mimi jastudia lája, péro ideprovécho hag̃ua tekotevẽ enterove jajeprepara porã. Sapyʼánte mitãnguéra pyaʼeterei ikaneʼõ, upévare tuvakuéra opensa vaʼerã mbaʼéichapa ojapóta pe estúdio ha oñemotiémpo ojeprepara porã hag̃ua. Peteĩ túva heʼi: “Ajeprepara porãramo, enterovénte ikyreʼỹ ha ovyʼa pe estúdio aja”. Peteĩ ermáno Alemaniagua oavisa jepi voimi ifamiliakuérape mbaʼépa ostudiáta umi semána oúvape. Benínpe, peteĩ família oĩháme seis mitã, ohecháta jave hikuái umi DVD ijestúdio de famíliape, pe túva omeʼẽ chupekuéra voi porã umi porandu ombohovái vaʼerã pe estúdio aja. Jajeprepara porãramo, katuete igustovéta ñande estúdio de família.

Enterove oikuaáramo voimi mbaʼépa ojestudiáta, ikatúma oñeñemongeta hína hese pe semána aja, péicha enterovéva opensátama hína umi mbaʼe ojestudiátavare. Ha káda uno orekóramo peteĩ párte ojapo vaʼerã, opavavénte oñeñandu porãta pe estúdio aja.

Heta famíliape ijetuʼu ojapo hag̃ua ijestúdio káda semána.

Heta túva ningo ombaʼapo jejopy vaʼerã omantene hag̃ua ifamíliape. Por ehémplo, Méxicope peteĩ túva oho hag̃ua ombaʼapo, osẽ las seis de la mañána ha kaʼarupytũ las ocho ae og̃uahẽ hógape. Sapyʼánte katu oĩ tembiapo tuvakuéra ojapo vaʼerã kongregasiónpe, upéicha jave okambiámante pe día ojapo hag̃ua ijestúdio de família.

Upéicharõ jepe, jajedesidi vaʼerã jajapo káda semána ñande estúdio de família. Peteĩ mitãkuñaʼi oikóva Tógope, hérava Loïs ha orekóva 11 áño, heʼi: “Sapyʼánte ningo oiko peteĩ mbaʼe rohaʼarõʼỹva, upéicha jave roñepyrũ tardemie ore estúdio, péro katuete rojapo”. Upévare pono jajavy, iporãta jajapo ñande estúdio oñepyrũre voi pe semána, upéicharõ oikóramo peteĩ mbaʼe ñahaʼarõʼỹva ikatu jajapo ótro día upe semánape.

Jajapóvo ñande estúdio de família ñamombaʼeguasu Jehovápe. Upévare, ñañehaʼã vaʼerã káda semána jastudia ñande rogayguándi (Os. 14:2). Ha jajapo pe estúdio enterove oñeñandu porã hag̃uáicha, péicha pe ‘vyʼa oúva Jehovágui katuete ñanemombaretéta’ (Neh. 8:9, 10, NM).