Tata mosi na Brésil ke tuba nde: “Beto ke kudikotisaka kibeni na masolo yina beto ke solulaka na nkokila ya Lusambu ya Dibuta na mpila nde, mbala mingi yo ke kwendaka tii na mpimpa kibeni kana mono zenga bo ve.” Tata mosi na Japon ke tuba nde mwana na yandi ya bakala ya bamvula 10 ke tulaka ve dikebi na ngunga yina bo me lutisa dezia na kulonguka mpi yandi ke zolaka nde kulonguka kulanda kusalama. Sambu na nki? Tata na yandi ke tuba nde: “Yo ke pesaka yandi kikesa mpi kiese.”

Kansi yo kele kieleka nde, bana yonso ve ke sepelaka na lusambu ya dibuta. Sambu na nki? Tata mosi na Togo ke tuba nde: “Lusambu ya Yehowa fwete lembisa ve.” Kana yo ke lembisa, keti yo kele ve mutindu lusambu ya dibuta ke twadisama? Kaka mutindu Yezaya tubaka nde Kisabatu fwete pesa bantu “kiese,” mabuta mingi ke monaka nde lusambu ya dibuta fwete vanda mutindu yina.—Yez. 58:13, 14.

Batata ke bakisaka nde sambu lusambu ya dibuta kusepedisa mabuta na bo, yo fwete salama na kiese kibeni. Ralf, tata yina kele ti bana tatu ya bankento mpi mosi ya bakala ke tuba nde, lusambu na bo ya dibuta ke vandaka kaka ve sambu na kulonguka mukanda mosi buna; bantu yonso ke kudikotisaka na masolo. Ya kieleka, yo lenda vanda mpasi sambu nde bantu yonso kusepela mpi kudikotisa na kulonguka. Mama mosi ke tuba nde: “Mono ke kukaka ve ntangu yonso kusala nde lusambu ya dibuta kuvanda ya kiese mutindu mono ke zolaka nde yo vanda.” Inki mutindu nge lenda nunga diambu yina?

Tata mosi ya bana zole na Allemagne ke tuba nde: “Beto fwete sobaka malongi.” Natalia, mama mosi ya kele ti bana zole ke tuba nde: “Kima ya kuluta mfunu sambu na dibuta na beto kele nde beto ke sadilaka bametode ya  kuswaswana.” Mabuta mingi ke kabisaka lusambu na bo ya dibuta na bitini mingi. Cleiton, tata ya bana zole ya batoko na Brésil ke tuba nde: “Kusala mutindu yina ke salaka nde kulonguka kuvanda ve madidi-madidi mpi yo ke salaka nde konso muntu na dibuta kumonisa mabanza na yandi.” Kukabula ntangu ya kulonguka na bitini mingi lenda sadisa bibuti na kutula dikebi na bampusa ya konso mwana, mingi-mingi kana bamvula na bo kele ya kuswaswana mingi. Bibuti lenda tubila bampusa ya konso muntu na dibuta, kusoba malongi mpi mabanza yina bo ta tadila.

Inki bametode mabuta ya nkaka ke sadilaka sambu kulonguka kusalama na mutindu ya kuswaswana? Bankaka ke yantikaka lusambu ya dibuta na kuyimbilaka Yehowa. Juan, yina ke zingaka na Mexique ke tuba nde: “Yo ke salaka nde kulonguka kusepedisa muntu yonso mpi yo ke yidikaka mabanza na beto sambu na mambu yina beto ta longuka.” Dibuta na yandi ke ponaka bankunga yina ke wakana ti malongi yina bo ta longuka na nkokila yina.

Mabuta ya nkaka ke tangaka mikapu ya Biblia kumosi. Sambu na kukangama ve na diambu mosi, konso muntu na dibuta ke tangaka masolo ya bantu yina Biblia ke tubila. Tata mosi na Japon ke tuba nde bo “vandaka ve ti kikalulu ya kusala mpidina na ntwala.” Kansi bana na yandi zole ya babakala vandaka na kiese ya kumona bibuti na bo ke sala bonso bo. Mabuta ya nkaka ke salaka bansonga ya Biblia. Roger, tata mosi ya kele ti bana zole ya babakala na Afrique du Sud ke tuba nde: “Mbala mingi, bana ke monaka mambu yina beto bibuti ke tudilaka ve dikebi na disolo mosi ya Biblia.”

Mutindu ya nkaka ya kusadila bametode ya kuswaswana kele ya kusala diambu mosi na kimvuka. Mu mbandu, kusala kifwanisu ya maswa ya Noa to ya tempelo ya Salomo. Kusala mutindu yai ke lombaka nde bantu ya dibuta kusala bansosa ya mbote. Mu mbandu, na dibuta mosi na Azia, mwana mosi ya nkento ya bamvula tanu vandaka na salon ti bibuti na yandi mpi nkaka na yandi ya nkento. Bo vandaka kusala nsaka yina vandaka kumonisa banzietelo ya kimisionere yina ntumwa Polo salaka. Mabuta ya nkaka ke salaka bansonga ya mambu yina mukanda ya Kubasika ke tubilaka. Donald, mpangi mosi ya bamvula 19 na Togo ke tuba nde: “Kusadila bametode ya kuswaswana nataka mambu ya mpa na lusambu na beto ya dibuta, mpi na dibuta na beto.” Keti nge lenda yindula diambu mosi yina lenda sala nde lusambu na beno ya dibuta kusalama na kiese ya mingi?

Ata kusadila bametode ya kuswaswana mpi kusoba malongi ke salaka nde lusambu ya dibuta kuvanda kitoko, bantu yonso na dibuta fwete kudibongisa sambu na kubakila yo mambote. Bantangu ya nkaka bana-fioti ke lembaka, yo yina batata fwete yindula mbote na ntwala malongi yina bo ponaka mpi bo fwete baka ntangu ya kudibongisa mbote. Tata mosi ke tuba nde: “Kana mono me kudibongisa mbote, bantu yonso ke sepelaka na kulonguka.” Tata mosi na Allemagne ke zabisaka dibuta na yandi na ntwala mambu yina bo ta longuka na bamposo yina ke kwisa. Tata mosi na Bénin ya kele ti bana 6 ya baleke ya me lungisa ntete ve bamvula 13, ke yidikaka na ntwala bangiufula yina bo ta sadila kana yandi me sala manaka ya kutala DVD ya masolo ya Biblia, na lusambu na bo ya dibuta. Ya kieleka, kudibongisa ke kumisaka lusambu ya dibuta kitoko mingi.

Kana bantu ya dibuta me zaba na ntwala mambu yina beno ta longuka, bo lenda tubila yo na bunda ya mposo mpidina yo lenda yika kiese na bo. Mpi kana konso muntu na dibuta kele ti devware, yandi ta mona nde lusambu ya dibuta ke tadila yandi.

Mabuta mingi ke monaka mpasi na kusala lusambu ya dibuta mbala na mbala.

Batata mingi ke lutisaka bangunga mingi na kisika ya kisalu sambu na kuzwa bima ya kuzingila. Mu mbandu, tata mosi na Mexique ke basikaka na nzo na 6 heures mpi ke vutukaka na 20 heures. Diaka, bantangu ya nkaka, yo ke lombaka kusoba kilumbu ya lusambu ya dibuta sambu na mambu ya nkaka ya kimpeve.

Kansi, beto fwete vanda ti lukanu ya kusalaka lusambu ya dibuta mbala na mbala. Loïs, leke mosi ya bamvula 12 na Togo ke tuba nde na dibuta na bo, bo me bakaka lukanu yai: “Ata yo ke lombaka nde beto yantika lusambu ya dibuta na nsukinina sambu na diambu mosi yina basikaka kilumbu yina, beto ke sala yo kaka.” Yo yina, mabuta ya nkaka ke sepelaka kusala lusambu na bo ya dibuta na luyantiku ya mposo. Kana diambu mosi ya kukonda kukana me basika, bo lenda sala yo kilumbu ya nkaka, kansi kaka na mposo yina.

Bangogo “lusambu ya dibuta” ke monisa nde, yo kele kitini ya lusambu yina beto ke pesaka na Yehowa. Bika nde bantu yonso ya dibuta na nge kupesa Yehowa ‘makabu ya bana-bangombe ya bikobo na bo’ konso mposo. (Ozea 14:3) Mpi bika nde lusambu ya dibuta kuvanda ntangu ya kiese sambu na konso muntu na dibuta, ‘sambu kiese ya Yehowa kele kisika ya ngolo ya lutaninu na beno.’—Neh. 8:9, 10.