Mũthuri ũmwe kuuma Brazil oigire ũũ: “Hĩndĩ ya hwaĩ-inĩ witũ wa Ũthathaiya wa Famĩlĩ, ndeereti igĩaga cama mũno ũũ atĩ kaingĩ nĩ gũtukaga mũno ingĩaga kuga tũkinyie hau.” Mũthuri ũmwe wa kuuma Japan oigire atĩ kamwana gake ka mĩaka ikũmi gatiendaga marĩkie ũthathaiya wa famĩlĩ. Nĩkĩ? Ithe oigire nĩ tondũ nĩ gakenagĩra mũno.

Ma nĩ atĩ ti ciana ciothe ikenagĩra ũthathaiya wa famĩlĩ. Nĩkĩ hihi? Mũthuri ũmwe kuuma Togo oigire ũũ: “Ũthathaiya wa Jehova ndwagĩrĩirũo nĩ gũkorũo ũrĩ wa kũnogia andũ.” Angĩkorũo nĩ ũranogia andũ-rĩ, no kũhoteke nĩ tondũ wa ũrĩa ũratongorio. Famĩlĩ nyingĩ nĩ cionete atĩ ũthathaiya wa famĩlĩ no ũkorũo na “gĩkeno” o ta ũrĩa Isaia oigire igũrũ rĩgiĩ Thabatũ.—Isa. 58:13, 14.

Athuri thĩinĩ wa famĩlĩ cia Gĩkristiano nĩ mamenyaga atĩ, nĩguo famĩlĩ ciao ikenere ũthathaiya wa famĩlĩ no mũhaka gũkorũo na ũrata. Ralf, ũrĩa ũkoragwo na airĩtu atatũ na kamwana kamwe, oigire atĩ ũthathaiya wao wa famĩlĩ ũkoragwo ũtariĩ ta ndeereti cia o mũthenya handũ ha kũhaana ta arĩ kũmathomithia aramathomithia. Gũtirĩ mũndũ ũtakoragwo na mweke wa kuga ũndũ. O na kũrĩ ũguo, ti hingo ciothe ũkoragwo ũrĩ ũndũ mũhũthũ gũteithia andũ othe mathiĩ na mbere gũkenera na kũrikĩra thĩinĩ wa kĩrĩa mũrathoma. Mũtumia ũmwe oigire ũũ: “Ti hingo ciothe ngoragwo na hinya wa gũtũma ũthathaiya wa famĩlĩ ũkorũo ũrĩ mwega ta ũrĩa ingĩenda.” Hihi no ũhote kũhiũrania na ũndũ ũcio?

Mũthuri ũmwe ũrĩ ciana igĩrĩ wa kuuma Njĩrĩmani oigire atĩ nĩ wega kũgarũrĩra. Nake Natalia, mũtumia ũrĩ ciana igĩrĩ oigire atĩ ũndũ ũrĩa wa bata mũno harĩ famĩlĩ yake nĩ gwĩka maũndũ ngũrani ngũrani. Famĩlĩ nyingĩ  igayanagia ũthathaiya wao wa famĩlĩ icunjĩ cigana ũna. Cleiton, mũthuri ũrĩ tinĩnja erĩ kuuma Brazil oigire atĩ gwĩka ũguo nĩ gũtũmaga ũthathaiya ũgĩe na cama na andũ othe magakorũo na itemi. Angĩkorũo famĩlĩ-inĩ kũrĩ na ciana irĩ na mĩaka ĩtiganĩte, kũgayania ũthathaiya wa famĩlĩ icunjĩ no gũteithie mũciari ahote gũteithia o mwana kũringana na mabataro make. Ningĩ, aciari no magarũrĩre rĩrĩa marabanga kĩrĩa famĩlĩ ĩgaathoma na njĩra ĩrĩa makaahũthĩra.

Famĩlĩ imwe ciĩkaga atĩa nĩguo ikorũo na maũndũ ngũrani ma gwĩka hĩndĩ ya ũthathaiya wao? Imwe ciambaga kũina nyĩmbo cia Ũthamaki. Juan wa kuuma Mexico oigire ũũ: “Ũndũ ũcio ũtũmaga kwagĩre mũno na ũgatũharĩria meciria-inĩ nĩ ũndũ wa kĩrĩa tũrathoma.” Famĩlĩ yake ĩthuuraga nyĩmbo iria ikonainie na maũndũ mamwe marĩa megũthoma hwaĩ-inĩ ũcio.

Famĩlĩ imwe ithomaga gĩcunjĩ kĩa Bibilia hamwe. Nĩguo ũthomi ũcio ũgĩe na cama, andũ ngũrani thĩinĩ wa famĩlĩ magathoma ciugo cia andũ ngũrani arĩa magwetetwo thĩinĩ wa gĩcunjĩ kĩna kĩa Bibilia. Mũthuri ũmwe kuuma Japan oigire atĩ kĩambĩrĩria-inĩ ndoonaga njĩra ĩyo ya gũthoma ĩrĩ njega. Ĩndĩ, tũmwana twake twĩrĩ nĩ twakenaga mũno nĩ ũndũ wa kuona magĩka ũndũ ũcio hamwe na aciari ao. Famĩlĩ imwe ona nĩ ithakaga mĩthako ya Bibilia. Roger, ithe wa tũmwana twĩrĩ kuuma Afrika ya Mũhuro oigire ũũ: “Kaingĩ ciana nĩ cionaga maũndũ thĩinĩ wa Bibilia marĩa tũrĩ aciari tũtekuonete.”

Maũndũ mangĩ matiganĩte mũngĩka mũrĩ hamwe nĩ ta, gwaka mũhaano wa thabina ya Nuhu, kana hekarũ ya Suleimani. Gwaka indo ta icio nĩ kũbataraga ũthuthuria na ũndũ ũcio no ũmũrehere gĩkeno kĩnene. Kwa ngerekano thĩinĩ wa Asia, kairĩtu kamwe ka mĩaka ĩtano marĩ hamwe na aciari ako na cũcũwe nĩ maathakaga mũthako wa kũbanga tũindo rũbaũ-inĩ makĩonania ng’endo cia mũtũmwo Paulo cia ũmishonarĩ. Famĩlĩ ingĩ nacio nĩ ithakaga mĩthako ta ĩyo ya kũbanga indo rũbaũ-inĩ ikĩhũthĩra maũndũ marĩa marĩ ibuku-inĩ rĩa Thama. Donald, ũrĩa ũrĩ na mĩaka 19 kuuma Togo oigire atĩ gwĩka maũndũ matiganĩte nĩ gwĩkĩrĩte cama ũthathaiya wao wa famĩlĩ na gũkagĩria famĩlĩ yao. Hihi inyuĩ nĩ kũrĩ ũndũ mũngĩka mwĩkĩre cama ũthathaiya wanyu wa famĩlĩ?

O na gũtuĩka gwĩka maũndũ matiganĩte, na kũgarũrĩra nĩ gũtũmaga ũthathaiya wa famĩlĩ ũgĩe na cama-rĩ, nĩguo andũ magunĩke, othe nĩ mekũbatara kũhaarĩria. Rĩmwe na rĩmwe ciana nĩ inogaga na ihenya, nĩ ũndũ ũcio aciari nĩ mekũbatara gwĩciria mbere kĩrĩa gĩgaathomwo na meharĩrie wega. Mũthuri ũmwe oigire ũũ: “Rĩrĩa ndĩharĩirie wega andũ othe nĩ magunĩkaga nĩ kĩrĩa tũrathoma.” Mũthuri ũmwe kuuma Njĩrĩmani amenyithagia famĩlĩ yake mbere kĩrĩa megũkorũo magĩthoma ciumia cigana ũna iria irũmĩrĩire. Rĩrĩa abangĩte atĩ famĩlĩ yake ĩkerorera DVD hĩndĩ ya ũthathaiya wa famĩlĩ, mũthuri ũmwe kuuma Benin ũrĩ na ciana ithathatũ itakinyĩtie mĩaka ikũmi na itatũ, aheaga famĩlĩ yake ciũria mbere iria makarĩrĩria. Hatarĩ nganja, kũharĩria nĩ gũtũmaga ũthathaiya witũ wa famĩlĩ wagĩre.

Rĩrĩa andũ thĩinĩ wa famĩlĩ mamenya mbere kĩrĩa gĩgekwo hĩndĩ ya ũthathaiya wa famĩlĩ, no makorũo makĩaria ũhoro ũcio mbere ya mũthenya ũcio ũkinyĩte, na nĩ ũndũ ũcio makũrie mĩĩto. Ningĩ rĩrĩa o mũndũ agaĩirũo ũndũ wa gũgeeka, nĩ eiguaga arĩ na itemi harĩ ũthathaiya wa famĩlĩ.

Ti ũndũ mũhũthũ harĩ famĩlĩ nyingĩ gũkorũo na ũthathaiya wa famĩlĩ itegũtĩrĩria.

Aciari aingĩ nĩ marutaga wĩra mathaa maingĩ mũno magĩethera famĩlĩ ciao mabataro ma kĩĩmwĩrĩ. Kwa ngerekano, mũthuri ũmwe kuuma Mexico, oimaga mũciĩ thinacara cia kĩroko na arĩcoka o thaa igĩrĩ cia ũtukũ. Rĩmwe na rĩmwe Ũthathaiya wa Famĩlĩ no ũcenjio nĩ ũndũ wa maũndũ mangĩ ma kĩĩroho.

O na kũrĩ ũguo, twagĩrĩrũo nĩ gũtigĩrĩra atĩ tũrĩkoragwo na ũthathaiya wa famĩlĩ tũtegũtĩrĩria. Akĩaria ũhoro wa ũrĩa famĩlĩ yao ĩĩrutanagĩria, Loïs ũrĩa ũrĩ na mĩaka 11 kuuma Togo oigire ũũ: “O na gũtuĩka rĩmwe na rĩmwe nĩ twĩkaga ũthathaiya wa famĩlĩ tũrĩ acerere rĩrĩa kwoimĩra ũndũ tũtekwĩrĩgĩrĩire, tũtigagĩrĩra nĩ tweka.” Nĩkĩo famĩlĩ ingĩ cionaga arĩ wega gwĩka ũthathaiya wa famĩlĩ kĩambĩrĩria-inĩ gĩa kiumia. Kũngiumĩra ũndũ ũterĩgĩrĩirũo, no mahote gwĩka ũthathaiya ũcio mũthenya ũngĩ o kiumia-inĩ kĩu.

Nĩ kĩĩ gĩtũmaga tũwĩte “ũthathaiya wa famĩlĩ”? Nĩ tondũ nĩ gĩcunjĩ gĩa ũthathaiya witũ harĩ Jehova. Reke andũ othe thĩinĩ wa famĩlĩ yaku marutagĩre Jehova o kiumia ‘iheo cia mĩromo yao irĩ ta ndegwa cia magongona.’ (Hos. 14:2) Na ningĩ, rekei o mũndũ thĩinĩ wa famĩlĩ onage ihinda rĩu rĩrĩ rĩa gĩkeno tondũ “gũkenera Jehova nĩkuo hinya wanyu.”—Neh. 8:9, 10.