Ataataasoq Brasiliamiu ima oqarpoq: “Ilaqutariittut atuaqqissaaqatigiinnermi oqaloqatigiinnitsinni tiguartisimasangaaratta ilakka unitsinngikkaangakkit unnussuarmut oqaloqatigiittarpugut.” Ataataasoq Japanimiu oqaluttuarpoq ernermi qulinik ukiullip nalunaaquttap qassinngornera maluginngitsoortaramiuk suli sivisunerusumik atuaqqissaarusuttartoq. Sooq? Ataataasup ernini ‘piumassuseqarnini pissutigalugu nuannisarnerartarpaa’.

Soorunami meeqqat ilaasa ilaqutariittut atuaqqissaaqatigiinneq kajungerineq ajorpaat, ilaasalu allaat nuannarineq ajorpaat. Sooq taamaappa? Ataataasoq Togomiu ima oqarpoq: “Jehovamik pallorfiginninneq pikkunaatsuusariaqanngilaq.” Ilaqutariittut atuaqqissaaqatigiinneq pikkunaappat imaassinnaavoq ingerlatseriaaseq allanngortinneqartariaqartoq. Israelikkut sabbatimik nuannarinnittarnerattut ilaqutariittut atuaqqissaaqatigiinnerup nuannaarutaangaarsinnaanera ilaqutariippassuit paasisimavaat. — Es 58:13, 14.

Ataataasut kristumiut ilaqutariittut atuaqqissaaqatigiinnermi ilaquttamik eqqissisimasutut misiginissaat qulakkeertariaqarpaat. Ataataasut taamaaliorpata ilaqutariit atuaqqissaaqatigiinneq nuannarinerulissavaat. Ralf, pingasunik panilik ataatsimillu ernilik, oqaluttuarpoq ilaqutariittut atuaqqissaaqatigiittarnertik atuaqqissaarnerunani oqaloqatigiinnerusartoq. Taamaaliortarput ilaqutariinniittut tamaasa oqalliseqataatinnerisigut. Ilaqutaasut tamaasa nuannisartinnissaat peqataalluartinnissaallu ilaannikkut sapernarsinnaasarpoq. Anaanaasoq ima nassuerpoq: “Ilaqutariittut atuaqqissaaqatigiinnerup kissaatigisattut nuannersuutinnissaa ilaannikkut nukissaqarfigineq ajorpara.” Ilaqutariittut atuaqqissaaqatigiittarnersi nuannernerulersissinnaavisiuk?

Ataataasoq, Tysklandimiu marlunnik qitornalik, ima oqarpoq: “Naleqqussaasinnaasariaqarpugut.” Natalia, marlunnik qitornalik, ima oqarpoq: ‘Allanngorartitsiuarneq ilaquttatsinnut pingaaruteqarnerpaavoq.’ Ilaqutariippassuit ilaqutariittut atuaqqissaaqatigiinnertik immikkoortunut assigiinngitsunut agguartarpaat. Cleiton, ataataasoq Brasiliamiu marlunnik inuusuttuaraatilik, oqaluttuarpoq taamaaliornikkut atuaqqissaaqatigiinneq pissanganarnerulertarlunilu “ilaqutariinniittunik tamanik peqataatitsinerulertartoq”. Atuaqqissaaqatigiinnerup immikkoortunut aggorneratigut angajoqqaat  meeqqamik, ukiumikkut nikingasorujussuuppata, ataasiakkaat pisariaqartitaannik isumassuilluarnerusinnaapput. Angajoqqaat aamma ilaqutariinnit atuaqqissaarneqartussanik toqqaaleraangamik qanorlu atuaqqissaartoqarnissaanik aalajangernialeraangamik naleqqussaasinnaapput.

Ilaqutariit ilaat ilaqutariittut atuaqqissaaqatigiinnerminnik allanngorartitsisinnaajumallutik qanoq iliortarpat? Ilaasa ilaqutariittut atuaqqissaaqatigiinnertik Jehovamut erinarsornermik aallarnertarpaat. Juan Mexicomiu ima oqarpoq: “Taamaaliornikkut nuannisaqatigiilertarlutalu atuaqqissaarnissatsinnut piareertutut misigisarpugut.” Taassuma ilaqutai erinarsuutinik atuaqqissaaqatigiissutigineqartussanut tulluartunik toqqaasarput.

Ilaqutariit amerlasuut Biibilimik atuaqatigiittarput. Ilaqutariit allanngorartitsisinnaajumallutik inuit Biibilimi oqaluttuarineqartut ilaartuusaartarpaat. Ataataasup Japanimiup ‘aallaqqaammut taamatut atuarneq eqqumiigisimanerarpaa’. Taassumali ernerisa ilaqutariittut nuannisaqatigiissinnaanertik nuannaarutigaat. Ilaqutariit ilaasa allaat Biibilimi oqaluttuat isiginnaagassiarisarpaat. Roger, Sydafrikamiu marlunnik ernilik, oqaluttuarpoq ‘Biibilimi oqaluttuani angajoqqaatut maluginiarsimanngisatik meeqqamik amerlanertigut maluginiartaraat’.

Ilaqutariit allanngorartitsisinnaajumallutik ataatsimoorlutik suliniummik, soorlu Noap umiarsuaanik Salomollu naalaffianik assiliillutik sananermik, aallutaqartarput. Suliniutinut taakkununnga tunngatillugu misissueqqissaarneq pissanganarsinnaavoq. Ilaqutariit Asiami najugallit assersuutigeriartigit. Niviarsiaqqap tallimanik ukiullip angajoqqaani aananilu apustilip Paulusip ajoqersuiartortitatut angalaneri pillugit pinnguaasioqatigai. Ilaqutariit allat Mosesimik allakkat aappaanni oqaluttuat tunngavigalugit pinnguaasiorsimapput. Donaldip, 19-inik ukiullip Togomiup, allanngorartitsisinnaaneq ‘ilaqutariittut atuaqqissaaqatigiinnerminnik inuunerminnillu soqutiginarnerulersitsisimanerarpaa’. Suliniummik ilaqutariittut atuaqqissaaqatigiinnissinnik nuannernerulersitsisinnaasumik eqqaasaqarsinnaavit?

Allanngorartitsisarneq naleqqussaanerlu ilaqutariittut atuaqqissaaqatigiinnermik soqutiginarnerulersitsisaraluartut ilaqutaasut tamarmik ilikkagaqarluarsinnaajumallutik piareersarsimasariaqarput. Ilaannikkut meeqqat qasulertarmata ataataasut sammineqartussat eqqarsaatigeqqissaartariaqarlugillu piareersarluarnissaminnut piffissaqartariaqarput. Ataataasoq ima oqarpoq: “Piareersarsimagaangama ilakka tamarmik siunertaqarluartumik atuaqqissaarsinnaanngortarput.” Ataataasup Tysklandimiup ilaquttani qaammatip tulliani suut ilaqutariittut atuaqqissaaqatigiissutigineqarnissaannik ilisimatittarpai. Ataataasup Beninimiup arfinilinnik ukiukitsunik qitornallip ilaqutariittut atuaqqissaaqatigiinnerminni DVD-utitsinnik isiginnaarnissartik pilersaarusioraangamiuk DVD-nnginnerminni apeqqutissani allattoreertarpai. Aap, piareersarneq ilaqutariittut atuaqqissaaqatigiinnermik pissarsiaqarnarnerulersitsisarpoq.

Ilaqutariit sammisassatik pillugit paasitinneqarsimagunik sapaatip-akunnerata ingerlanerani eqqartortarsinnaallugillu qilanaalersinnaapput. Ilaqutariinniittullu tamarmik suliassinneqarsimagunik ilaqutariittut atuaqqissaaqatigiinnermut peqataasutut misigissapput.

Ilaqutariit amerlasuut ilaqutariittut atuaqqissaaqatigiittarnermik aalajangiusimanninnissartik sapernartittarpaat. Sooq?

Angajoqqaat amerlasuut ilaquttaminnik pilersuisinnaajumallutik sivisuumik sulisariaqartarput. Assersuutigalugu Mexicomi ataataasoq ullaakkut arfinermut suliartoraangami unnukkut arfineq-pingasunut aatsaat angerlartarpoq. Imaassinnaavoq anersaakkut allamik sammisaqarnissaq, soorlu ilagiinnik nakkutilliisumit tikeraarneqarneq ataatsimeersuarnissarluunniit, pissutigalugu ilaqutariittut atuaqqissaaqatigiinnissaq ullormut allamut nuutsinneqartariaqartoq.

Unamminiarnartoqaraluartorli ilaqutariittut atuaqqissaaqatigiinnermik aalajangiusimannittariaqarpugut. Loïsip Togomiup aqqanilinnik ukiullip ilaqutariittut tamatuminnga pingaartitsinertik ima nassuiarpaa: “Ullup ingerlanerani allamik pisassaqalersimaneq pissutigalugu ilaqutariittut atuaqqissaaqatigiinneq kingusissukkut aallartittaraluarlutigu tamatigut ilaqutariittut atuaqqissaaqatigiittarpugut.” Taamaattumik sapaatip-akunnerata aallartinnerani ilaqutariittut atuaqqissaaqatigiittoqartarpat pitsaassaaq. Sooq? Naatsorsuutiginngisamik pisoqarpat sapaatip-akunnerani kingusinnerusukkut ilaqutariittut atuaqqissaaqatigiittoqarsinnaaniassammat.

Soorlu taaguummit ‘ilaqutariittut atuaqqissaaqatigiinnermit’ ersersinneqartutut pisoq Jehovamik pallorfiginninneruvoq. Ilaqutariittut “qarlutta inerititaannik” pilliuteqarsinnaavugut, tassa Jehovamik unnersiutiginnissinnaavugut. (Hos 14:3) Jehovami ‘nuannaarneq ilissi nakuussutigigassiuk’ qanortoq tamassi ilaqutariittut atuaqqissaaqatigiinneq nuannaarutigigisiuk. — Neh 8:9, 10.