Taata omu ow’omu Brazil yagamba nti: “Tunyumirwa nnyo okusinza kwaffe okw’amaka ne kiba nti ebiseera ebimu obudde bugenda nga tetutegedde.” Omutwe gw’amaka omu abeera mu Japan agamba nti mutabani we ow’emyaka ekkumi aba tayagala kulekera awo kusoma wadde ng’obudde buba bugenze. Lwaki? Kubanga bye basoma bimunyumira nnyo.

Kya lwatu nti abaana abamu tebatera kunyumirwa kusinza kw’amaka. Lwaki? Taata omu ow’omu Togo agamba nti, “Buli muntu asaanidde okusinza Yakuwa nga musanyufu.” Bwe kiba nti ab’omu maka tebanyumirwa kusinza kw’amaka kiyinzika okuba nga waliwo enkyukakyuka ezeetaaga okukolebwa. Ab’oluganda bangi bakizudde nti okusinza kw’amaka kuleeta essanyu, nga Ssabbiiti bwe yaleeteranga Abaisiraeri “essanyu.”—Is. 58:13, 14.

Abazadde Abakristaayo basaanidde okukijjukira nti okusinza kw’amaka bwe kuba okw’okubeera okunyuvu, basaanidde okuteekawo embeera ennungi. Ralf, alina abawala abasatu n’omulenzi omu, agamba nti bwe baba mu kusinza kwabwe okw’amaka baba ng’abanyumya era buli omu akwenyigiramu. Kyokka ebiseera ebimu tekiba kyangu kuyamba buli omu mu maka kunyumirwa kusinza kw’amaka n’okukwenyigiramu. Maama omu agamba nti: “Ebiseera ebimu nnemererwa okufuula okusinza kw’amaka okunyuvu nga bwe nnandyagadde.” Bw’oba mu mbeera ng’eyo, kiki ky’oyinza okukola?

Taata omu abeera mu Bugirimaani alina abaana ababiri agamba nti: “Tulina okukyusakyusa mu ngeri gye tuyigirizaamu abaana baffe.” Natalia, alina abaana ababiri agamba nti: ‘Nfuba nnyo okukyusakyusa mu ngeri gye njigirizaamu abaana bange.’ Abazadde bangi okusinza kw’amaka bakukutulakutulamu ebitundu eby’enjawulo.  Cleiton, ow’omu Brazil alina abatiini ababiri agamba nti: “Ekyo kiyamba ab’omu maka bonna okunyumirwa okusinza kw’amaka n’okukwenyigiramu.” Abazadde bwe bakola bwe batyo, kibasobozesa okutuukanya okusinza kw’amaka n’ebyetaago by’abaana baabwe ab’emyaka egy’enjawulo. Ate era abazadde basaanidde okukyusakyusa mu bitabo bye basoma ng’amaka n’engeri gye babisomamu.

Kiki ab’omu maka agamu kye bakoze? Abamu batandika okusinza kwabwe okw’amaka nga bayimba ennyimba z’Obwakabaka. Juan ow’omu Mexico agamba nti: “Ekyo kituyamba okuteekateeka ebirowoozo byaffe nga tetunnatandika kusoma.” Ab’omu maka ge balonda ennyimba ezikwatagana n’ebimu ku bintu bye baba bagenda okusoma.

Ab’omu maka agamu basalawo okusomera awamu Bayibuli. Abamu balondayo ekitundu mu Bayibuli ne bakisoma nga buli omu abaako ebigambo by’omuntu ali mu kitundu ekyo by’asoma. Taata omu ow’omu Japan agamba nti: “Mu kusooka, tekyannyanguyira kusoma Bayibuli mu ngeri eyo.” Naye batabani be ababiri baasanyuka nnyo okusomera awamu Bayibuli ne bazadde baabwe mu ngeri eyo. Ab’omu maka agamu basalawo okuzannya obuzannyo obwesigamiziddwa ku Bayibuli. Roger, ow’omu South Africa alina abaana ababiri agamba nti: “Oluusi abaana baffe balaba ebintu mu Bayibuli ffe bye tuba tetusobodde kulaba.”

Ekintu ekirala ekiyinza okufuula okusinza kw’amaka okunyuvu kwe kukolera awamu ebintu gamba ng’okuzimba eryato lya Nuuwa oba yeekaalu ya Sulemaani. Ekyo okusobola okukikola kyetaagisa okunoonyereza. Ng’ekyokulabirako, mu nsi emu ey’omu Asiya akawala akamu ak’emyaka etaano ne bazadde baako awamu ne jjajja waako baasalawo okukuba ekipande ekiraga eŋŋendo za Pawulo ez’obuminsani. Ab’omu maka agamu bakuba ebipande ebiraga ebintu ebitali bimu ebyogerwako mu kitabo ky’Okuva. Donald ow’emyaka 19 abeera mu Togo agamba nti: “Okukyusakyusa mu ngeri gye tusomamu kifudde okusinza kwaffe okw’amaka okunyuvu.” Naawe osobola okukola ebintu ebifaananako bwe bityo okusobola okufuula okusinza kwammwe okw’amaka okunyuvu?

Wadde ng’okukyusakyusa mu ngeri gye tuyigamu kifuula okusinza kw’amaka okunyuvu, bonna mu maka okusobola okuganyulwa mu bujjuvu, kikulu okweteekateeka obulungi. Oluusi abaana abato bakoowa mangu, n’olwekyo emitwe gy’amaka basaanidde okulowooza ennyo ku ebyo ebinaasomebwa era n’okutegeka obulungi. Taata omu agamba nti: “Bwe nteekateeka obulungi, buli omu mu maka aganyulwa nnyo.” Taata omulala abeera mu Bugirimaani ategeeza ab’omu maka ge ebyo bye banaasoma ng’ekyabulayo wiiki eziwerako. Ate taata omulala ow’omu Benin alina abaana omukaaga, okusinza kwabwe okw’amaka bwe kuba nga kunaabaamu okulaba emu ku vidiyo zaffe, awa ab’omu maka ge ebibuuzo bye banaakubaganyako ebirowoozo ng’ekyabulayo ekiseera. Mu butuufu, okweteekateeka kufuula okusinza kw’amaka okunyuvu.

Ab’omu maka bwe bamanya nga bukyali ebyo bye banaasomako, basobola okubyogerako mu wiiki, ekyo ne kibaleetera okwesunga okusinza kw’amaka. Ate singa buli omu aweebwa eky’okukolako, ekyo nakyo kisobola okuleetera ab’omu maka okwesunga okusinza kw’amaka.

Amaka mangi gakisanga nga kizibu okuba n’okusinza kw’amaka obutayosa.

Emitwe gy’amaka bangi kibeetaagisa okukola okumala essaawa nnyingi okusobola okulabirira ab’omu maka gaabwe. Ng’ekyokulabirako, taata omu ow’omu Mexico ava awaka ku essaawa 12 ez’oku makya n’akomawo ku ssaawa bbiri ez’ekiro. Ate ebiseera ebimu kiyinza okwetaagisa okukyusa ekiseera okusinza kw’amaka we kubeererawo olw’enteekateeka endala ez’eby’omwoyo eziba zizzeewo.

Ffenna tusaanidde okufuba okulaba nti tuba n’okusinza kw’amaka obutayosa. Loïs ow’emyaka 11 abeera mu Togo agamba nti: “Wadde ng’ebiseera ebimu kiyinza okutwetaagisa okutandika ng’obudde bugenze olw’ebintu ebitali bimu ebiba biyingiridde ekiseera kyaffe eky’okusinza kw’amaka, tetwosa kuba na kusinza kwaffe okw’amaka.” Ekyo kisobola okutuyamba okulaba ensonga lwaki bangi baasalawo okuba n’okusinza kw’amaka nga wiiki yaakatandika. Bwe wabaawo ebigwa bitalaze, baba basobola okuteeka okusinza kw’amaka ku lunaku olulala.

Okusinza kw’amaka kitundu kikulu eky’okusinza okw’amazima. N’olwekyo, ka ffenna mu maka tufube okuwaayo eri Yakuwa ‘ente ennume ez’emimwa gyaffe’ buli wiiki. (Kos. 14:2) Era ka ekiseera ky’okusinza kw’amaka kibenga kya ssanyu eri buli omu mu maka, kubanga ‘essanyu lya Yakuwa ge maanyi gaffe.’—Nek. 8:9, 10.