Chisemi walunga wamuBrazil ahanjikile ngwenyi: “Tweji kuwahililanga chikuma hachingoloshi Chakulemesa Kalunga mwaTanga. Nge kangweshi kuvalweza ngwami kunahuko, kaha tunahase kutwalaho lika swi namukachi kaufuku.” Kaha nawa lunga umwe wakuJapan uze apwa mutwe watanga ambile ngwenyi mwanenyi walunga wamyaka likumi keshi kumona ngwenyi lwola lunakumuko, oloze eji kufwilanga kutwalililaho lika kulinangula. Mwomwo ika? Ise ambile ngwenyi: “Eji kwivwanga kuwaha mwomwo yakulinangula.”

Chikupu vene keshi nge vana vosena veji kuwahililanga hakupwa kukulemesa Kalunga mwatangako. Mwomwo ika? Chisemi walunga wamuTogo ahanjikile ngwenyi, “Kulemesa Yehova kachatela kuneha uliko.” Nge kulemesa Kalunga mwatanga nachineha uli, kaha mwatela kwalumunako vyuma vimwe hakutetekela chilongesa kana. Jitanga jajivulu jinawane nge kulemesa Kalunga mwatanga chapwa ‘chamwaza chikuma’ ngana muze vaIsalele valivwishilenga kuwaha likumbi lyaSambata.—Isa. 58:13, 14.

Visemi vaka-Kulishitu vatela kumona ngwavo tanga yavo yinaundu chakuzeneka kulizakamina hakulemesa Kalunga mwatanga. Ralf uze atwama navana vamapwevo vatatu nawalunga umwe ambile ngwenyi vosena veji kushimutwilangaho hakulemesa Kalunga mwatanga. Eyo lwola lumwe kachapwa chachashi vosena kuwahilila nakwazanamoko. Chisemi umwe wapwevo ambile ngwenyi: “Kangweshi kupwa nangolo lwola lwosena lwakulingisa chilongesa chakulemesa Kalunga chipwenga chakuwahilila ngana muze ngweji kusakangako.” Kutala munahase kulingisa chilongesa chenu chakulemesa Kalunga kupwa chakuwahilila tahi?

Chisemi walunga akwechi vana vavali wamuGermany ambile ngwenyi: “Twatela kwalumunangako vyuma vimwe.” Kaha nawa Natalia uze atwama navana vavali ambile ngwenyi, “Chuma chachilemu twatela kulinga natanga yetu shina kulinganga vyuma vyakulisezaseza.” Jitanga jajivulu jeji  kuhandununanga chilongesa chakulemesa Kalunga mwatanga muvihanda. Cleiton, chisemi walunga wakuBrazil uze akwechi vana vavakweze vavali ambile ngwenyi kulinga ngocho cheji kulingisanga chilongesa chiwahe “nakulingisa vosena mutanga vazanemo.” Nge vana valihandununa chikuma mumyaka yakusemuka, kaha visemi vatela kuzakama mwana himwana hakupangununa lwola lwachilongesa muvihanda. Kaha nawa visemi vatela kusakula kanawa mikanda yize navalinangula hachilongesa chatanga namujila navayizachishilamo.

Vyuma muka jili nakulinga jitanga jimwe mangana valinge vyuma vyakulisezaseza? Vamwe veji kuvangilanga kwimba myaso yakwalisa Yehova shimbu kanda vaputuke chilongesa chavo chakulemesa Kalunga mwatanga. Juan wamuMexico ambile ngwenyi: “Kwimba myaso cheji kulingisanga tanga kupwa yakulizanga vyachilongesa navapwa nacho.” Tanga yenyi yeji kusakulanga myaso yize yinalitombola navyuma vize navalinangula hachilongesa chavo.

Jitanga jajivulu jeji kutangilanga hamwe chihanda chamuMbimbiliya. Hakusaka chilongesa chavo chiwahe, mutu himutu mutanga eji kutanganga chihanda chamutu umwe wamuMbimbiliya. Chisemi walunga wamuJapan ambile ngwenyi “hakavanga chapwile chachikalu kutanga mujila yangana.” Oloze vana vavo vavali vawahililile hakumona visemi javo vali nakulivwisa kuwaha kulemesela hamwe Kalunga mwatanga. Jitanga jimwe jeji kulinganga vimweso havihande vyamuMbimbiliya. Roger, chisemi walunga wakuSouth Africa wavana vavali ambile ngwenyi vana “kakavulu veji kumonanga vyuma vimwe vyamuMbimbiliya vize etu visemi katweshi kumonako.

Jila yikwavo yize jitanga jinahase kulingisa chilongesa chavo chipwenga chamwaza shina kuzachila hamwe mulimo wakutunga wato waNowa chipwe tembele yaSolomone. Kuhehwojola mwakulingila milimo kana cheji kwivwisanga kuwaha. Chakutalilaho, muAsia mwana wapwevo wamyaka yitanu, nanaye nakaka yenyi vesekele kuzata mulimo kana. Vatwamine hamwe muzuvo nakuputuka kuhema chakufunjika maungeji akaposetolo Paulu aumishonali. Kaha jitanga jikwavo jinahemenga kuhema chakufunjika mivwimbimbi yamumukanda waKulovoka. Donald wamyaka 19 wakuTogo ambile ngwenyi: “Kulinga vyuma vyakulisezaseza chalingishile chilongesa chetu chakulemesa Kalunga mwatanga kupwa chakuwahilila.” Kutala munahase kuzatako mulimo umwe uze naulingisa kulemesa chenu chatanga kupwa chakuwahilila tahi?

Kwasakiwa chuma chikwavo nawa numba vosena mutanga vawahilile, keshi kwalumunanga kaha vyuma chipwe kulinga vyuma vyakulisezasezako. Chuma kana shina kuliwahishila chimweza. Lwola lumwe vanyike veji kuzeyanga, ngocho visemi vamalunga vatela kuliwahisa kanawa hakushinganyeka havyuma navakalinangula vize navikevwisa vana kuwaha. Chisemi umwe walunga ambile ngwenyi: “Nge ngunaliwahishila chimweza, kaha vosena veji kunganyalanga chikuma.” Chisemi walunga wamuGermany alwezelele chimweza tanga yenyi vyuma navakalinangula mukakweji mwezaho. Shimbu jimwe, tanga yimwe yize yikwechi vana vavandende 6 muBenin yeji kutalanga jiDVD jamuliuka lyetu kupwa chihanda chimwe chakulemesa Kalunga mwatanga. Uno eyi tanga yeji kuliwahisanga ngachilihi? Sevo eji kuvahananga chimweza mukana wavihula vize navakakumbulula. Chikupu vene, kuliwahishila chimweza cheji kulingisanga chilongesa chetu chakulemesa Kalunga mwatanga kupwa chamwaza.

Nge tanga yinatachikiza vyuma navakalinangula chalumingo nachizaho, kaha veji kushimutwilanga havyuma kana nakufwila kukapwako. Kaha nawa nge mutu himutu vanamuhane vyuma vyakulinga, kaha mutu himutu mutanga mwalivwa nge chilongesa kana chinapu chenyi.

Jitanga jajivulu cheji kuvakaluhwilanga kupwa nachilongesa chakulemesa Kalunga chalumingo hichalumingo. Mwomwo ika?

Visemi vamwe veji kuzatanga jola jajivulu mangana vazakame jitanga javo kumujimba. Chakutalilaho chisemi umwe walunga muMexico eji kufumanga hembo nalwola lwa 6:00 nachimene nakuhiluka na 20:00 naufuku. Shimbu jimwe vamwe veji kwalumunanga likumbi lyakulinangula mwomwo yavyuma vikwavo vyakushipilitu, vyakufwana nge kuvatambukila kuli kalama wakujinguluka chipwe kukunguluka changalila.

Chipwe ngocho, twatela kupwanga nachilongesa chakulemesa Kalunga mwatanga lwola lwosena. Loïs wamyaka yakusemuka 11 wamuTogo ahanjikile omu kulinga ngocho chapwa chachilemu mutanga yenyi. Ambile ngwenyi: “Numba tuhu lwola lumwe tweji kukotokelanga kuputuka chilongesa chakulemesa Kalunga mwatanga mwomwo yavyuma vimwe vyakututangula, oloze tweji kufwilanga lwola lwosena kupwanga nachilongesa kana.” Chapwa chamwaza kunoneka likumbi lyakupwa nachilongesa kana kumaputukilo achalumingo. Mwomwo nge kunasoloka vyuma vimwe vyakukasumuna, kaha munahase kukapwa nachilongesa kana likumbi lyeka muchalumingo kana.

Mwomwo ika twachivulukila ngwetu “kulemesa Kalunga mwatanga”? Mwomwo yapwa hijila yimwe tweji kulemeselangamo Yehova. Hamwe kaha mwatanga tweji kuhananga “mavuvu javangombe,” kulumbununa kwalisa Yehova. (Hoze. 14:2) Ngachize, muvosena mujitanga mwatela kuwahililanga hakupwa kukulemesa Kalunga mwatanga mwomwo “chisambo chaYehova chinapu ngolo jenu.”—Nehe. 8:9, 10.