Wuoro moro modak Brazil wacho niya: “Seche moko ka watimo Lamo mar Joot, wajobedo mamor ma kapo ni ok ang’ade to wanyalo time nyaka chuny otieno.” Wuoro moro e piny Japan wacho ni sama gitimo Lamo mar Joot, wuode ma jahigini apar ohero gik mopuonjore maok odew ni gikawo seche adi. Nikech ang’o? Wuorono wacho niya: “Wechego mulo chuny wuoda kendo mano miyo obedo mamor miwuoro.”

En adier ni ok ni nyithindo duto morga gi lamo mar joot. Ang’o momiyo? Wuoro moro mawuok e piny Togo nowacho kama: “Lamo Jehova ok onego obed gima jogo ng’ato.” Kapo ni lamo mar joot ok kel mor, mano nyiso ni nitie lokruok moko manyaka tim e yo mitimego. Joot mathoth oseyudo ni lamo mar joot nyalo kelo “mor” mana kaka Sabato ne kelo ne Jo-Israel mor.—Isa. 58:13, 14.

Wuone ma Jokristo osefwenyo ni mondo lamo mar joot obed mamoro ji, nyaka time ka ji duto mor. Ralf ma nigi nyithindo ma nyiri adek kod wuowi achiel, wacho ni lamo margi mar joot chalga mana kaka goyo mbaka moriwo ji duto. En adier ni ok yot mondo ji duto omor gi gima utiyogo e timo puonjruok. Miyo moro wacho niya: “Seche moko ajabedo gi olo mang’eny kochopo sa timo lamo mar joot, to mano mona time e yo maber kaka daher.” Ere kaka inyalo loyo pek ma kamago?

Wuoro moro ma nigi nyithindo ariyo e piny Jerman wacho niya: “Dwarore wabed joma nyalo tiyo gi yore mopogore opogore.” Natalia, miyo ma nigi nyithindo ariyo wacho kama: “Gima duong’ makonyowa e lamo marwa mar joot en time e yore mopogore opogore.” Thoth joudi jopogo lamo margi mar joot e kidienje mopogore opogore. Cleiton, wuoro ma nigi nyithindo ariyo ma rowere e piny Brazil wacho  niya: “Timo kamano miyo puonjruok bedo gi ndhadhu kendo mano miyo joot duto chiwo pachgi.” Kapo ni hik nyithindo opogore opogore, jonyuol nyalo pogo seche ma gitiyogo e puonjruok mondo gikony nyathi ka nyathi. Ginyalo ng’iyo chal mar nyithindgi kendo tiyo gi buge mopogore opogore e timo puonjruok ka gitiyo gi yore mopogore.

Joot moko osebedo ka timo nade mondo giti gi yore mopogore opogore e lamo mar joot? Jomoko chako lamo margi mar joot ka giwer ne Jehova. Juan modak Mexico wacho niya: “Timo kamano iko chunywa kod pachwa ne gima wadwaro puonjore.” Joode yieroga wende motudore gi weche ma gidwaro puonjore.

Joot moko to somoga Muma giduto kanyachiel ka gisome e yor drama. Wuoro moro mawuok Japan, wacho ni “ok nong’iyo somo e yo machalo kamano.” Kata kamano yawuote ariyo to ne mor sidang’ neno kaka jonyuolgi somo kodgi. Joot moko to timoga drama kaluwore gi sigana ma gisomo e Muma. Roger, wuoro manigi nyithindo ariyo e piny South Africa wacho ni nyithindo “thothne jofwenyo puonj e sigendni mag Muma ma wan jonyuol ok wane.”

Yo moro machielo ma joot moko tiyogo en loso kata chweyo gik moko machalo kaka yie mar Noa kata gero hekalu mar Suleman. Chweyo kata loso gik ma kamago nyalo moro joot duto. Kuom ranyisi, nyako moro ma jahigini abich mawuok Asia noriwore gi jonyuolne kaachiel gi dane e timo kamano. Ne gigoro map e bod maduong’ manyiso kuonde ma jaote Paulo nowuothoe e tije mar misonari. Joot moko to osegoro map e bod manyiso kaka Jo-Israel nowuotho ka giwuok Misri kaluwore gi bug Wuok. Donald ma jahigini 19 modak Togo wacho ni tiyo gi yore mopogore opogore kamano “osemedonwa ndhadhu e lamo mar joot to ahinya wuon osemedonwa mor e ngimawa kaka joot.” Be inyalo paro gimoro munyalo loso kata goro mondo omi lamo maru mar joot omed bedo gi ndhadhu?

Kata obedo ni gik mopogore opogore kamano miyo lamo mar joot bedo gi ndhadhu, pod nitie gik monego otim mondo ji duto obed mamor. Ji duto onego otim ikruok maber. Seche moko nyalo bedo matek mondo nyithindo opuonjre kuom thuolo malach, omiyo wuoro onego oyier maber weche mabiro moro nyithinde. Kae to otim ikruok maber. Wuoro moro wacho niya, “Seche ma atimo ikruok maber, ji duto bedo mamor gi puonjruok.” Wuoro moro man Jerman janyiso joode chon gik ma gibiro puonjore e jumbe moko mabiro. E piny Benin, wuoro moro ma nigi nyithindo matindo auchiel seche moko jong’iyoga vidio mag sosaiti e lamo margi mar joot. Ere kaka joodno timoga ikruok chon? Wuorono miyogiga penjo moko ma gibiro dwoko sama gitimo lamo mar joot. Timo ikruok chon ne lamo mar joot adier medo ndhadhu e lamono.

Sama joot ong’eyo chon gima gibiro puonjore, ginyalo goyo mbaka e wi wachno kata kapok lamo mar joot ochopo, kendo mano miyo gibedo gi siso. Kendo ka ng’ato ka ng’ato nigi migawo mare e lamono, obiro winjo e chunye ni lamo mar jootno en mare.

Ng’eny joot yudo ka teknegi timo lamo mar joot juma ka juma maok gibare. Nikech ang’o?

Jonyuol mang’eny tiyo gi seche mang’eny ka tich mondo giyud kaka ginyalo rito joodgi. Kuom ranyisi, wuoro moro modak Mexico wuokga e ot sa apar gariyo okinyi to oduogo sa ariyo otieno. Omiyo kinde ka kinde nyalo dwarore utim lokruok kuom sa ma utimoe Lamo mar Joot kapo ni nitie chenro moro machielo kaka limbe mar jarit-alwora kata chokruoge madongo.

Katabed ni ang’o matimore, dwarore watim kinda mondo lamo mar joot kik bare. Loïs ma jahigini apar gachiel e piny Togo wacho kaka joodgi jokawo wachni mapek. Owacho niya, “Katabed ni seche moko chunowa wachak lamo marwa mar joot ka sa olewo nikech gimoro ochochowa godiechieng’, kinde duto wajotimo lamono maok wabare.” Donge koro inyalo neno gimomiyo joot moko chanoga timo lamo margi chon e juma? Ka gimoro otimore mochochogi, pod ginyalo chano odiechieng’ machielo e jumano.

Ang’o momiyo iluonge ni lamo mar joot? Nikech en achiel kuom yore ma walamogo Jehova. We mondo juma ka juma joodi duto okel ne Jehova ‘pak moa e dhoggi e kar ruedhi mag misango.’ (Hos. 14:2) Mad kindego obed kinde mag mor ne ng’ato ka ng’ato kuom joodi, “niwira mor mar Jehova obedo tekou.”—Neh. 8:9, 10.