“Chhûngkuaa Pathian Biakna neih zân chuan kan tui lutuk ṭhîn a, ka tihtâwp mai loh phei chuan zan rei tak kan thleng fo ṭhîn,” tiin Brazil rama chhûngkaw pa ber pakhat chuan a sawi. Japan rama mi ve thung chuan a fapa kum sâwm mi chuan hun pawh ngaihtuah lo angin a lan thu leh chhunzawm zêl a duh thu a sawi. Engvângin nge? “Ani chu a tui hle a, chu chuan a tihlim,” niin a pa chuan a sawi.

Naupangte chu an tui vek lo ngei mai, dik takin ṭhenkhat chuan chhûngkuaa Pathian Biakna neih chu nuam an ti lo mai thei a ni. Mahse, engvângin nge nuam an tih loh? Togo rama pa pakhat chuan: “Jehova biakna chu a ninawm tûr a ni lo,” tiin a chhan a sawi a ni. A ninawm chuan, chhûngkuaa Pathian biakna kaihhruai a nih dân lan chhuahna a ni thei ang em? Chhûngkaw tam takte chuan chhûngkuaa Pathian biakna chu Isaia’n Sabbath chu thil “lâwmawm” tia a sawi ang chu a ni tih an hria a ni.—Is. 58:13, 14.

Kristian pate chuan an chhûngkuain chhûngkuaa Pathian biakna hlim taka hmang thei tûr chuan, boruak hahdam tak a awm a ngai tih an hria a. Fanu pathum leh fapa pakhat nei Ralf-a chuan an chhûngkuaa Pathian biakna neihna chu zirna hun ai mahin titihona ang a ni zâwk mah a; an vaiin chanpual an neih vek thu a sawi. Mi tinte’n tuiawm an tih a, an rilru pe tûra kaihhruai chu a harsat châng a awm ngei mai. Nu pakhat chuan: “Chhûngkuaa Pathian biakna chu ka duh anga nuam nihtîr tûrin chakna ka nei reng lo,” tiin a sawi chhuak a ni. Chutiang harsatna chu i hmachhawn thei em?

German rama awm fa pahnih nei pa pakhat chuan: “Kan insiamrem a ngai ṭhîn a ni,” a ti a. Nu pakhat, fa pahnih nei chuan: “Kan chhûngkaw tâna pawimawh ber chu chi hrang hranga neih hi a ni,” a ti bawk. Chhûngkaw tam takte chuan chhûngkuaa Pathian biakna an neih chu an ṭhen hrang thliah thliah a. Brazil rama fa tleirâwl pahnih nei Cleiton-a chuan  heti hian a sawi: “Chu chuan chhûngkuaa Pathian biakna chu a tinuamin, chhûngkuaa mite chu chanpual a neihtîr ṭheuh a ni,” tiin. An fate chu an kum a inthlau hle a nih chuan a hun ṭhen hranna hmangin, nu leh pate chuan an fate mamawh chu an ngaihsak vek thei a. Nu leh pate chuan chhûngkuaa mi tinte mamawh chu an sawiho theiin, an thil sawihote leh sawiho dân chu an siamrem thei a ni.

Chhûngkaw ṭhenkhat chuan chhûngkuaa Pathian biakna an neiha thil chi hrang hrang an tihte chu a ṭhat lehzual nân eng nge an tih? Ṭhenkhat chuan Jehova fakna hla sain an ṭan a. Mexico rama mi Juan-a chuan: “Chu chuan boruak ṭha a awmtîrin, chu mi zâna sawiho tûr chu rilruin min lo inbuatsaihtîr a ni,” tiin a sawi. A chhûngkua chuan zâna an zirho tûr thu ṭhenkhat nêna inmil hlate chu an thlang bawk a ni.

Chhûngkaw tam takte chuan Bible an chhiarho ṭhîn a. A tih danglam nân, chhûngkaw zînga mi tinte chuan an Bible chhiara mi hrang hrangte thusawi chu an inchhiar chhâwk a. Japan rama pa pakhat chuan “atîrah chuan chutianga chhiar chu pângngai lo deuhva” a ngaih thu a sawi. Mahse, a fapa pahnihte chu an nu leh pate’n nuam ti taka thil an han tihpui chuan an hlim hle a ni. Chhûngkaw ṭhenkhat phei chuan Bible thawnthua mite chu a lem an chang ṭhîn a. Naupangte chuan “nu leh pate’n Bible-a kan hmuh hmaihte hi an hmu fo ṭhîn” tiin South Africa rama fapa pahnih nei Roger-a chuan a sawi bawk a ni.

A chi hranga tih dân dang leh chu Nova lawng emaw, Solomona temple emaw lem sakho ang chi thil tihho ṭhin hi a ni. Chutianga ti tûr chuan zir chianna neih a ngai a, chu chu a phûrawm thei hle. Entîr nân, Asia rama in pakhata inlêng an kawmna pindanah chuan hmeichhe naupang kum nga mi chu a nu leh pa, leh a pi nên an awm a. Anni chuan missionary rawngbâwla tirhkoh Paula zin kawngte chhuia inkhelhna tûr chu an siam a ni. Chhûngkaw dang leh chuan Exodus bua thute ṭanchhana inkhelhna tûr an siam bawk. Togo rama mi Donald-a, fa kum 19 nei chuan, chi hrang hranga tihna chuan “kan chhûngkuaa Pathian biaknaah leh kan chhûngkuaah phûrna thar min pe a ni,” tiin a sawi. In chhûngkuaa Pathian biakna chu a hlimawm lehzual theih nân tih tûr i ngaihtuah chhuak thei em?

Insiamrem theihna leh chi hrang hranga tih kualna chuan chhûngkuaa Pathian biakna chu tiphûrawm hle mah se, zirtîr nei a nih tak zet theih nân mi tin an inpuahchah a ngai a ni. A châng chuan naupangte chuan an ning a, chuvângin pa ber chuan sawiho tûr thu a thlang chhuakin, ngaihtuah lâwkna a hmang thei a, ṭha takin a inpuahchah tûr a ni. Pa pakhat chuan, “Ka inpuahchah hian, zirna awmze nei lehzual kan nei ṭheuh thei a ni,” a ti. German rama pa pakhat chuan chawlhkâr leha an sawiho tûr chu a chhûngte hnênah a hrilh lâwk ṭhîn a. Benin rama fa paruk nei, pa chuan an chhûngkuaa Pathian biaknaa Bible ṭanchan DVD en tûra hun duan a siam hunah, zawhnate chu a lo hrilh lawk ṭhîn a ni. Inbuatsaihna chuan chhûngkuaa Pathian biakna chu a tiṭha zual ngei mai.

Chhûngkuate chuan an sawiho tûr thute an hriat lâwk hian, chu mi chawlhkâr chhûng chuan an lo sawiho thei a, chutiang chuan an intiphûr a ni. Tin, mania chanpual an neih ṭheuh hian, mahni chhûngkuaa Pathian biakna angin an ngai ṭheuh dâwn a ni.

Chhûngkaw tam tak chuan chhûngkuaa Pathian biakna neih ziah chu harsa an ti a ni.

Pa tam tak chuan an chhûngte châwm nân dârkâr rei tak tak hna an thawh a ngai a. Entîr nân, Mexico rama pa pakhat chuan zîng dâr rukah in a chhuahsan a, zân dâr riat hma chuan a haw ngai lo. Chu bâkah, thlarau lam thiltih dang avângin Chhûngkuaa Pathian Biakna an neih hun chu siamrem a ngaih châng a awm thei bawk a ni.

Chuti chung chuan, chhûngkuaa Pathian biakna neih ziah chu kan tum tlat a ngai a. Togo rama kum sâwm pakhat mi Loïs-i chuan an chhûngkuaa thiltih an tum tlat chu a sawi a, “Chhûngkuaa Pathian biakna kan neih nîah chuan, chu mi nia thil thleng engemaw avângin kan ṭan tlai a ngaih châng awm mah se, kan nei ziah tho ṭhîn,” tiin. Chawlhkâra a ni hmasa lama an chhûngkaw Pathian biakna an neih chhan hi i hre thiam thei a. Thil beisei loh deuh a lo thleng a nih chuan chhûngkuaa Pathian biakna chu ni dangah an sawn thei a ni.

“Chhûngkuaa Pathian biaknain” a târ lan angin, hei hi Jehova in biakna pêng pakhat a ni a. I chhûngkaw zînga mi tinte chuan Jehova hnênah ‘an hmui rahte chu bâwngpa aiah hlân’ se la. (Hos. 14:2) ‘LALPA chunga lâwmna chu in chakna a nih’ theih nân, chu chu in chhûngkuaa mi tinte tân hlimna hun ni rawh se.—Neh. 8:9, 10. (w14-E 03/15)