Jngo nʼai xi Brasil tsʼe itso: “Nga tokuila tinisinjin jme xi tichotʼayaijin sasa fininajin ora”. Ijngo nʼai xi Japón tsʼe kʼoatso nga je tiʼndíle xi jete nóle saʼnda mesale nga skótʼaya nga̱ tsín tsen male nga faʼa je ora. Ánni. Je nʼai jebi kʼoatso nga nʼio tsjoa sʼele je tiʼndíle.

Tonga ali tsa tongatsʼijin je xtiʼndí nga tsjoa sʼele nga kotʼaya. Xi ñaki kjoaixi, tjínkʼa xi tsín tsjoa sʼele nga kotʼayajtín ya niʼyale. Ánni. Kuinga matsʼe. Jngo nʼai xi Togo tsʼe itso: “Kʼianga chotʼayajtían je énle Niná alikui tjínnele koa̱ntsʼe”. Tonga tsa kʼoakjima, a kui kʼoakjimani josʼin nga chotʼayá. Nʼio nkjín familia xi tjíobe nga koa̱n tsjoa sa̱tío tokoán nga chótʼayajtían ya niʼyaná tojo tso librole Isaías (Is. 58:13, 14).

Je xijchá bení nga tokʼia tsjoa sa̱tíole nga skótʼayajtín kʼiatsa nda tjíokao xínkjín. Je Ralf, xi jan mani xtiyánchjínle kʼoa jngo mani tile, kʼoatso nga ñaki fáonajmí ngatsʼi kʼianga kotʼayajtín ya niʼyale. Tonga sakʼoa ñʼai male je xi xijchá ma jokoa̱n sʼin nga tsjoá katasíndosin ngatsʼi jmeni xi tjíokotʼaya kʼoa nga tsínla xin katasíkjaʼaitsjen. Jngo na̱ itso: “Sakʼoa likui kʼoamana nga ñaki naskánasʼin chótʼayajtínjin josʼin mena tsakai”. Jókoa̱n sʼin je xi xijchá ma nga tsín tsa kʼoakatama.

Jngo nʼai xi Alemania tsʼe xi jao mani xtiʼndíle itso: “Chosonnilee jmeni xi machjénle nga jngó jngó”. Kʼoa je Natalia xi jao mani ʼndíxtiyánchjínle itso: “Xi ngisa chjíle kuinga tsín tongóson sʼin chótʼayantsjé, nga  kjaʼaí kjaʼaísʼin chótʼayá”. Nʼio nkjín familia xi nkjín koya tjínni xi kotʼaya nga ñandia ñandia. Je Cleinton xi Brasil tsʼe xi jao mani xtile itso: “Liʼya xi jyó batio, ñaki nchjaa ngatsʼi”. Kʼianga tsín tongóson tjín nóle je ʼndíxti, ma nixkoa̱yaa jmeni xi chotʼayá kʼoa kʼoasʼin ngisa kuenta ma jmeni xi machjénle nga jngó jngó. Je xi xijchá ma koaan sikjaʼaitsjenjin jmeni xi machjénle nga jngó jngó je xi tjío yaniʼyale kʼoa skósonnile jmeni xi skótʼaya kʼoa josʼin skótʼaya.

Jméni xi sʼín kʼa je familia. Tjínkʼa xi cántico se nga bʼétsʼiakaoni. Je Juan xi México tsʼe itso: “Nga kʼoanʼia tsjoa sʼená kʼoa síkʼéjnandaa kjoafaʼaitsjenná jmeni xi chotʼayá”. Je familiale Juan kui kjoejin cántico xi kuinchja̱ni jmeni xi skótʼaya.

Tjínkʼa familia xi kui Biblia bʼéxkia kʼianga kotʼayajtín. Kʼoa ya jñani chjota fáo jngó jngó bʼakaole nga bʼéxkia. Jngo nʼai xi ya Japón tsʼe kʼoatso nga ñʼaixó koanle kʼianga tosʼa títjon kʼoasʼin tsakʼéxkia. Tonga nga jao xtiʼndíle nʼioxó tsjoa kisatiole. Tjínkʼa familia xi saʼnda kʼoasʼínchoya jmeni xi faʼaitʼa ya Biblia. Je Roger xi jao mani je xtiʼndíle xi ya Sudáfrica tsʼe itso: “Je ʼndíxti sakʼoaa kui ngisa kuenta sʼín jmeni xi tsín ʼyaa ñá nga bʼexkiaa Biblia”.

Ijngo koya xi koa̱n sʼiaan kuinga si̱ndajtián tsa jmeni, jolani tsa jmeni xi kʼoasi̱ká jokisʼe je arcale Noé kʼoa tsamaije̱ xi kʼoakji jokisʼe je yo̱ngo̱le Salomón. Nʼio tsjoa koaya tokoán nga kjoásjeyaa xi tʼatsʼe jebi. Ya Asia, jngo tsotiʼndí xi aon nóle, je xijchále kʼoa kao majchále kui kisinda xi ma niskákoaa (juego de mesa) kʼoa yaa kiskoénile jñani tsakʼamje je Pablo nga kitsoyason. Kʼoa tjíokʼa je familia xi ya kjoénile jmeni xi tso libro xi tsʼe Éxodo. Je Donald xi ya Togo tsʼe xi xjaʼaonño nóle itso: “Nga kʼoasʼin nkjín koya bʼendajinjin josʼin chotʼayaijin ya niʼyanajin nʼio tsjoa tjíonajin ngatsʼijin”. A faʼaitsjen jngoli jmeni xi koa̱n sʼiaon nga tsín koa̱ntsʼelao nga chótʼayajtíon énle Niná ya niʼyano.

Ninga nʼio chjíle nga kui chótʼayá xi machjénle nga jngó jngó kʼoa nga nkjín koya josʼin chotʼayá, je xi ngisa machjén kuinga tongini kuiyondaa nga jngó jngoá. Je xti sakʼoaa masile, kuinga machjénsíni nga je xi nʼai ma katasíkjaʼaitsjen jmeni xi skótʼaya kʼoa tongini katabʼejnanda. Jngo nʼai xi i̱ tso: “Kʼianga tongini batejnanda, nʼio tsjoa sʼele ngatsʼi nga chotʼayaijin”. Jngo nʼai xi ya Alemania tsʼe kʼoatso nga tongini kʼoatsole je ʼndíxtile jmeni xi skótʼaya je xomana xi fisani. Ya Benín, jngo familia xi jaon mani xtiʼndíle kui kotsen sakʼoale je pelíkula xi bʼasje naxinandále Niná kʼianga kotʼayajtín ya niʼyale. Je xi nʼai ma tongini bʼétʼaxo̱n jngo jao kjoachjonangi kʼoa kʼiaa tsjoále je ʼndíxtile nga tongini katabationda. Kʼianga nda biyondaa ñaki tsen matsen josʼin chotʼayá.

Kʼiatsa tongini sʼe̱jinle je xi tjío yaniʼya jmeni xi chótʼayá, kui kjaoyani kʼoa ñaki skóyale nga jngó jngó kʼianga chótʼayá. Tsa tsen kʼoaile jmeni xi sʼin nga jngó jngó, nʼio tsjoa sʼe̱le nga skótʼayajtín yaniʼyale.

Nʼio nkjín familia xi ñʼai male nga kotʼaya ntsjaintsjai nga xki̱ xomana.

Nʼio nkjín je xi nʼai ma xi nkjín ora síxá nga bajngiʼa je familiale. Tobʼelañá, jngo nʼai xi México tsʼe las seisxó fisíxá nga tanjio kʼoa saʼnda las ochoxó faʼaini nga manjio. Tsakui nichxin sakʼoa si̱kʼantjaiyaa je nichxin nga chotʼayajtían ya niʼyaná, tobʼelañá, tsa kjoajtíntse sʼe̱ná kʼoa tsa jmesani xále Niná xi kʼia ska̱kjao.

Ningalani sakʼoa kʼoama, tjínnele nga ntsjaintsjai chótʼayajtían. Jngo tsotiʼndí xi tejngo nóle, xi Loïs ʼmi, xi ya Togo tsʼe itso: “Ninga sakʼoa jetojochon bʼetsʼiakoaijin nga chotʼayaijin kʼianga sakʼoa tjín xi ma, nikʼiajin nga tsín chotʼayaijin”. Nga ntsjaintsjai chótʼayá ngisa nda nga kʼia chótʼayá nga sʼa tífitsʼia je xomana, ánni nga koa̱n kjaʼaí nichxin chótʼayasíñá xi tikuini xomana tsa tjín xi kʼoechjoaná nichxin nga tjínndajinná.

Kʼianga chotʼayajtían ya niʼyaná jé Jeobá tiʼyaxkoán. Tʼenelai yaoli nga katabʼasjengʼa Jeobá ngatsʼi je familiali, chʼa̱sjengʼao Jeobá kao ndsoʼbao nga xki̱ xomana (Os. 14:2). Ñaki tsjoa katasʼeno ngatsʼio nga chótʼayajtíon, “nga̱ je xjáo tajano kui kjoatsjoale Jeobá” (Neh. 8:9, 10).