Enn papa dan Brésil dir: “Nou telman konsantre dan nou bann konversasion pandan nou ladorasion an fami, ki souvan, si mo pa aret mo fami, sa kontigne ziska tar aswar.” Enn papa dan Japon dir ki so garson di-z-an pa remarke ki ler pe pase ek li anvi kontigne. Kifer? Dapre so papa, “li bien motive, ek sa fer li kontan.”

Biensir, pa tou zanfan ki osi motive, ek pou dir fran, kitfwa sertin pa kontan kan fer ladorasion an fami. Kifer? Enn papa ki res Togo partaz sa lopinion-la: “Fode pa ki ladorasion Jéhovah li enn fardo.” Si li enn fardo, eski se pa akoz fason ki nou pe kondir nou ladorasion an fami? Boukou fami finn trouve ki sa moman-la kapav vinn “enn gran plezir,” parey kouma Isaïe ti dir an rapor avek Saba.​—Is. 58:13, 14.

Bann papa ki servi Jéhovah realize ki, si zot anvi zot fami trouv lazwa dan zot ladorasion an fami, fode ena enn bon latmosfer. Ralf, ki ena trwa tifi ek enn garson dir ki zot ladorasion an fami plis kouma enn konversasion ki enn letid; zot tou partisipe. Li vre ki parfwa li pa fasil pou fer zot tou interese ek res konsantre dan seki zot pe etidie. Enn mama rekonet: “Mo pa touletan ena lafors pou fer mo ladorasion an fami vinn osi interesan ki mo ti pou kontan.” Eski ou kapav sirmont sa difikilte-la?

Enn papa ki res l’Allemagne ek ki ena de zanfan dir: “Nou bizin konn adapte nou.” Natalia, enn mama de zanfan dir ki seki pli inportan pou so fami, se varye zot ladorasion  an fami. Boukou fami diviz zot ladorasion an fami an plizir parti. Cleiton, enn papa ki ena de adolesan ek ki res Brésil, dir: “Sa fer nou letid pli interesan ek zot tou dan lafami kapav partisipe.” Kan bann paran diviz zot letid an plizir parti, zot kapav pran kont seki sak zanfan bizin, si ena enn gran diferans laz ant zot. Bann paran kapav pran kont bezwin sak manb lafami ek adapte zot kan zot swazir seki zot pou etidie ek kouma zot pou etidie sa.

Ki sertin fami fer pou varye seki zot etidie? Sertin koumans zot ladorasion an fami kan zot sant bann kantik. Juan, ki res Mexique dir: “Sa kree enn bon latmosfer ek prepar bien nou lespri pou seki nou pou etidie.” So bann zanfan swazir bann kantik ki ena enn rapor avek seki zot pou etidie dan lapremidi.

Plizir fami lir enn porsion Labib ansam. Pou varye, sak manb lafami pran rol enn personaz dan enn porsion Labib ki zot pe lir. Enn papa ki res Japon rekonet ki pou li, “li pa ti fasil pou lir dan sa fason-la o-koumansman.” Me so de garson ti bien kontan pou trouv zot paran apresie pou fer sa avek zot. Ena sertin fami ki mem fer bann ti teat baze lor bann zistwar Biblik. Roger, enn papa ki ena de garson ek ki res an Afrique du Sud, dir : “Souvan [bann zanfan] trouv bann kitsoz dan enn resi Labib ki nou antan ki paran nou pa finn remarke.”

Enn lot fason pou varye seki nou etidie, se kan nou travay ansam lor enn proze, kouma par exanp ranz maket lars Noé ouswa tanp Salomon. Avan nou fer sa kalite proze-la, nou bizin fer bann resers ek sa kapav bien interesan. Par exanp, an Asie, dan salon enn fami, ti ena enn tifi sink an avek so bann paran ek so granmer. Zot ti pe fer enn zwe biblik ki baze lor bann vwayaz misioner lapot Paul. Lezot fami inn fer enn mem kalite zwe ki baze lor seki nou lir dan liv Exode. Donald, ki ena 19 an ek ki res Togo dir: “Nou fer diferan kitsoz, ek sa finn amenn plis lavi dan nou ladorasion an fami ek dan nou fami mem.” Eski ou kapav reflesi lor enn proze ki pou rann ou ladorasion an fami pli interesan?

Mem si ladorasion an fami vinn interesan kan nou fer diferan kitsoz ek kan nou adapte nou, selman, pou nou gagn bann bienfe, li inportan ki nou tou prepar nou alavans. Parfwa, bann zanfan fatige, alor bann papa bizin reflesi alavans lor seki zot pou etidie ek pran letan pou prepar bien. Enn papa dir: “Kan mo prepar mwa, zot tou gagn plis bienfe.” Enn papa ki res l’Allemagne fer so fami kone alavans seki zot pou examine dan bann semenn ki pou vini. Kan li fer program pou get enn DVD ki baze lor Labib dan zot ladorasion an fami, enn papa ki ena sis zenn zanfan ek ki res Bénin donn bann kestion alavans bann manb so fami. Wi, preparasion fer enn gran diferans dan nou ladorasion an fami.

Kan enn fami kone alavans seki zot pou etidie, zot kapav koz lor la dan lasemenn, ek lerla zot kapav ogmant zot lantouziasm. Ek si sakenn ena enn partisipasion, li pou santi ki se so ladorasion an fami.

Ena boukou fami ki gagn problem pou fer zot ladorasion an fami regilierman.

Boukou papa travay ziska tar zis pou zwenn le-de-bout. Par exanp, enn papa dan Mexique kit so lakaz si-z-er gramatin ek pa retourn kot li avan wit-er di-swar. Anplis, li kapav arive ki bizin sanz program ladorasion an fami akoz enn lot levennman spiritiel.

Kanmem, nou bizin bien deside pou fer nou ladorasion an fami regilierman. Loïs, ki ena onz an ek ki res Togo koz lor determinasion ki so fami ena. Li dir: “Mem si parfwa nou bizin koumans nou ladorasion an fami inpe tar akoz enn kitsoz ki’nn arive pandan lazourne, nou touletan ena nou ladorasion an fami.” Ou kapav konpran kifer sertin fami fer zot ladorasion an fami boner dan lasemenn. Koumsa, si enn kitsoz ki zot pa atann arive, zot kapav fer sa plitar dan lasemenn.

Parey kouma so nom montre, “ladorasion an fami” fer parti dan nou ladorasion pou Jéhovah. Li bon ki tou bann manb dan ou fami donn Jéhovah ‘bann zenn toro zot lalev’ sak semenn. (Hosh. 14:2, not) Nou swete ki ladorasion an fami li enn moman agreab pou sak manb ou fami, “parski lazwa Jéhovah li [nou] forteres.”​—Neh. 8:9, 10.