Omunye ubaba waseBrazil wathi: “Siyakukholisa kakhulu uKukhonza Kwemuli kwantambama okokuthi nxa ngingasayimisanga imuli yami siyaxoxa kuze kube sebusuku.” Kanti njalo enye inhloko yemuli eJapan yathi umntanayo ongumfana oleminyaka elitshumi uyabe engakuboni lokuthi isikhathi sesihambile, uyabe elokhu efuna ukuqhubeka. Ngani? Inhloko yemuli le ithi, “uyakukholisa kakhulu ukufunda okokuthi kumenza athokoze.”

Kodwa akusibo bonke abantwana abakuthandayo ukukhonza kwemuli, futhi kuliqiniso ukuthi abanye bangabe bengakukholisi. Ngani? Omunye ubaba weTogo uthi yena, “Ukukhonza uJehova akumelanga kube yinto edinayo.” Nxa kuyikuthi kuyadina kungabe kutshengisa ukuthi kumele kulungiswe indlela ukukhonza kwemuli okwenziwa ngayo. Kodwa izimuli ezinengi sezakubona ukuthi ukukhonza kwemuli kungaba “yintokozo” njengalokhu u-Isaya akutsho mayelana leSabatha.​—⁠Isaya 58:​13, 14.

Obaba abangamaKhristu bayakunanzelela ukuthi ukuze izimuli zabo zikholise ukukhonza kwemuli, kumele wonke umuntu akhululeke. URalf ubaba olabantwana abathathu abangamantombazana kanye lomfana oyedwa uthi ekukhonzeni kwabo kwemuli bayabe bezixoxela nje, njalo wonke umuntu uyabe ekhululekile ukukhuluma. Kodwa kwesinye isikhathi kungaba nzima ukwenza ukuthi wonke umuntu akholise okufundwayo. Omunye umama uthi: “Kwesinye isikhathi ngizizwa ngingelamandla okwenza ukuthi ukukhonza kwemuli kuthokozise ngendlela engifisa ngayo.” Lingakwenza njani ukuthi kuthokozise?

Ubaba ohlala eGermany olabantwana ababili uthi, “Kumele sizwisise.” UNatalia, umama olabantwana ababili uthi “into eqakatheke kakhulu emulini yabo yikuhlala bentshintshantshintsha.” Izimuli ezinengi zenza ukuthi ukukhonza kwazo  kwemuli kube yizingxenye ezitshiyeneyo. Ubaba olabantwana ababili abasakhulayo ohlala eBrazil okuthiwa nguCleiton, uthi: “Lokhu kwenza senze izinto ezehlukeneyo njalo kwenza wonke umuntu emulini abe lokuthile akwenzayo.” Ukwenza ukuthi isifundo sibe yizingxenye ezitshiyeneyo kuzakwenza ukuthi abazali bancedise umntwana munye ngamunye ikakhulu nxa iminyaka yabo itshiyene kakhulu. Bangenza njalo, kuzaba lula ukubona ukuthi ilunga ngalinye elisemulini lifuna ukuncediswa ngaphi njalo bangakhetha ukwenza izinto ezitshiyeneyo.

Ezinye izimuli zikwenza njani lokhu? Abanye baqalisa ukukhonza kwabo kwemuli ngokuhlabela izingoma zoMbuso. UJuan ohlala eMexico uthi: “Lokhu kwenza sonke sikhululeke njalo silungisise izingqondo zethu singakaqalisi ukufunda.” Imuli yakhe ikhetha izingoma ezihambelana lalokho okuzafundwa ntambama.

Izimuli ezinengi zibala iBhayibhili ndawonye. Ukuze zikukholise lokhu zikhetha indaba ethile eseBhayibhilini, umuntu munye ngamunye abesebala engumlingiswa othile. Ubaba ohlala eJapan uthi, “ekuqaliseni ukubala sisenza njalo kwakungani kunzima ukukujayela.” Kodwa abafana bakhe ababili kwakubathabisa ukubona abazali babo bekholisa ukwenza lokhu kanye labo. Ezinye izimuli zenza imidlalo yezindaba eziseBhayibhilini. URoger, ubaba ohlala eSouth Africa olamadodana amabili wathi abantwana “bajayele ukunanzelela ezinye izinto thina abazali eziyabe zisikhuthile endabeni ethile eseBhayibhilini.”

Okunye elingakwenza ukuze lintshintshantshintshe yikusebenza ndawonye lisenza okuthile, ngokwesibonelo ukwakha umkhumbi kaNowa kumbe ithempeli likaSolomoni. Lokhu kungathokozisa sibili ngoba kuyabe kumele kube lokuchwayisisa nxa kusenziwa. Ngokwesibonelo, umntwana oyintombazana oleminyaka emihlanu ohlala e-Asia wayesendlini yokuphumula elabazali bakhe kanye logogo wakhe. Babedweba egwalibeni izindawo ezahanjwa nguPhawuli ngesikhathi engumnali besebedlala besebenzisa abakudwebileyo. Ezinye izimuli zenza lokhu ngokudweba izindlela ezahanjwa ngama-Israyeli ehlane eziku-Eksodusi. UDonald ohlala eTogo oleminyaka engu-19 uthi ukuntshintshantshintsha “kwenza ukukhonza kwemuli yethu kwathokozisa njalo kwasinceda lathi njengemuli.” Ungacabanga yini ngelingakwenza ukuze ukukhonza kwemuli yenu kukhwabitheke?

Kuliqiniso ukuthi ukuzwisisa kanye lokuntshintshantshintsha kwenza ukukhonza kwemuli kube mnandi. Kodwa ukuze kusincede sibili, kumele wonke umuntu alungiselele. Kwezinye izikhathi abantwana abancane bayadinwa, yikho obaba kumele bacabangisise ngalokho abakukhethayo njalo bazinike isikhathi sokulungiselela kuhle. Omunye ubaba uthi, “Wonke umuntu uyancedakala kakhulu nxa ngilungiselele.” Omunye ubaba ohlala eGermany utshela imuli yakhe kuseselesikhathi ukuthi kuzafundwani emavikini alandelayo. Omunye ubaba oseBenin olabantwana abayisithupha abasesebancane nxa ehlela ukuthi kubukelwe i-DVD esekelwe eBhayibhilini ekukhonzeni kwabo kwemuli, uhle anike imuli yakhe imibuzo ezasetshenziswa kuseselesikhathi. Kuyacaca-ke ukuthi ukulungiselela kwenza ukuthi ukukhonza kwemuli kuncede kakhulu.

Nxa imuli itshelwa kuseselesikhathi ukuthi kuzaxoxwa ngani, ingathola isikhathi sokukhuluma ngakho besekusenza ukuthi ikulindele ngabomvu lokho okuzafundwa. Kanti njalo nxa umuntu munye ngamunye emulini ephiwa okumele akwenze, kuzamthokozisa ukuthi laye ulakho akulethayo ekukhonzeni kwemuli.

Ezimulini ezinengi kunzima ukuthi ukukhonza kwemuli kwenziwe zikhathi zonke.

Obaba abanengi basebenza okwamahola amanengi ukuze banakekele izimuli zabo. Ngokwesibonelo, omunye ubaba ohlala eMexico usuka endlini ngo-6 ekuseni aze aphenduke ngo-8 ntambama. Kanti njalo kwezinye izikhathi kuyabe kumele lintshintshe isikhathi elenza ngaso uKukhonza Kwemuli ngenxa yezinye izinhlelo eziphathelane lokukhonza.

Lanxa kunjalo, kumele sizimisele ukwenza ukukhonza kwemuli zikhathi zonke. Ekhuluma ngokuzimisela kwemuli yangakibo, uLoïs waseTogo oleminyaka engu-11 uthi: “Lanxa kwezinye izikhathi siyake siphuze ukuqalisa ukukhonza kwethu kwemuli ngenxa yokunye okuyabe kuvukile lelolanga, asiyekeli ukuba lokukhonza kwemuli.” Lokhu kungenza sizwisise ukuthi kungani ezinye izimuli zikhetha ukwenza ukukhonza kwemuli ekuqaliseni kweviki. Nxa kungavuka okuthile abangakulindelanga, bangakhetha elinye ilanga lokwenza ukukhonza kwemuli kuleloviki.

Umutsho othi ukukhonza kwemuli utshengisa ukuthi lokhu lakho kuyingxenye yokukhonza kwethu uJehova. Kungaba kuhle ukuthi iviki yinye ngayinye wenze ukuthi wonke amalunga emuli yakho anike uJehova ‘isithelo sezindebe zawo.’ (Hos. 14:⁠2) Sifisa ukuthi lokhu kube yisikhathi sokuthi wonke umuntu emulini athokoze “ngoba ukuthokoza kukaJehova kungamandla enu.”​—⁠Neh. 8:​9, 10.