“Ne hagaaki lahi a mautolu ke he tau fakatutalaaga he Tapuakiaga Magafaoa he afiafi ti hoko ke he pō ka nakai taofi e au e magafaoa haaku,” he talahau he matua taane i Parasili. Ne pehē e ulu he magafaoa i Sapanī ko e tama taane haana ne hogofulu e tau ne tuga nakai mailoga e ia e tulā ti manako ni ke matutaki. Ko e ha? “Ne omoomoi lahi a ia, ti lafi e mena ia ke he fiafia haana,” he talahau he matua taane.

Ka e nakai omoomoi oti e tau fanau, ti mooli ai, ko e falu kua liga nakai fiafia ke he tapuakiaga magafaoa. Ka ko e ha? Ne talahau he matua taane i Togo e manatu nai, “Nakai lata e tapuaki ki a Iehova ke ahumate.” Ka ahumate, liga ko e kitiaaga kia a ia he puhala ne taute aki e tapuakiaga magafaoa? Loga e magafaoa ne talahau kua maeke e tapuakiaga magafaoa ke tuga e Sapati ne talahau e Isaia, ko e mena “fiafia.”​​—Isaia 58:13, 14.

Mailoga he tau matua taane ke maeke e magafaoa ke moua e fiafia ka taute e tapuakiaga magafaoa, kua lata ke fakatotoka. Ko Ralf, ne tolu e tama fifine mo e taha e tama taane, ne pehē ko e tapuakiaga magafaoa ha lautolu kua lahi e fetutalaaki nakai tuga e fakaako; ha kua putoia e tau tagata oti. Ka e ke fakatumau e tau tagata oti ke hagaaki ki ai mo e manamanatu ke he vala tala kua liga uka he falu mogo. Taha e matua fifine ne talahau: “Nakai lahi tumau e malolō haaku ke taute e tapuakiaga magafaoa ke fiafia tuga haaku manako.” Maeke nakai a koe ke fehagai ke he paleko ia?

“Kua lata a maua ke hikihiki,” he talahau he matua taane ne tokoua e tama i Sihamani. “Ko e mena ne mua e aoga ke he magafaoa haaku,” he talahau e Natalia, ko e matua fifine ne tokoua e tama “ko e fakakehekehe, fakakehekehe, fakakehekehe.” Loga e magafaoa ne vehevehe e tapuakiaga magafaoa ha lautolu ke he loga e vala. “Taute he mena ia e fakaakoaga  ke fakalagalaga lahi ti putoia e tau tagata oti he magafaoa,” fakamaama e Cleiton, ko e matua taane i Parasili ne tokoua e fuata mui. He vehevehe e tau magaaho fakaako, kua maeke e tau matua ke hagaaki ke he tau mena ma e tau tama takitaha kaeke kua kehekehe lahi e tau tau moui ha lautolu. Maeke e tau matua ke hagaaki ke he tau mena kua lata ma e tau tagata takitaha he magafaoa ti maeke ke hikihiki he fifili e vala tala mo e puhala ke taute aki.

Ko e heigoa he falu magafaoa kua taute ke fakaholo ki mua e fakakehekehe? Falu ne kamata e tapuakiaga magafaoa ha lautolu he lologo ki a Iehova. “Kua fakatū e takatakaiaga totoka mitaki mo e tauteute e manamanatuaga ke lata mo e vala tala,” he talahau e Juan i Mesikō. Ne fifili he magafaoa haana e tau lologo ne matutaki ke he falu vala tala ne fakatoka ma e afiafi.

Loga e magafaoa ne totou auloa e vala he Tohi Tapu. Ke fakakehekehe, igatia e tagata he magafaoa mo e totou e tau vala kehekehe ne talahau he tau tagata takitaha i loto he Tohi Tapu. Pehē e matua taane i Sapanī, ki a ia “ne matakehe lahi he magaaho fakamua ke totou pihia.” Ka kua fiafia e tau tama taane tokoua haana ke kitia e tau matua ha laua ne fiafia he taute mena mo laua. Ne taute he falu magafaoa e tau tala Tohi Tapu. Ko e tau fanau ne “fa kitia e tau mena he tau tala Tohi Tapu ne nakai kitia e maua ko e tau matua,” he talahau e Roger, ko e matua taane ne tokoua e tama taane i Aferika Toga.

Taha puhala ke fakakehekehe ko e gahua auloa he taha matagahua, tuga e talaga he vaka fakatai ha Noa po ke faituga ha Solomona. Ko e tau matagahua pihia kua lata mo e tau kumikumiaga ne fiafia he taute. Ma e fakatai, he lotofale he magafaoa i Asia, ko e tama fifine ne lima e tau mo e tau matua haana mo e tupuna fifine haana. Kua taute a lautolu he lapa pelē ne fakavē ke he tau fenoga misionare he aposetolo ko Paulo. Taute foki he falu magafaoa e tau lapa pelē ne fakavē ke he tau tala he tohi a Esoto. Ko e fakakehekehe kua “tamai e moui foou ke he tapuakiaga magafaoa mo e ke he magafaoa ha mautolu,” he talahau e Donald ne 19 e tau moui i Togo. Maeke nakai a koe ke manamanatu ke he matagahua ka taute e tapuakiaga magafaoa ha mutolu ke lahi atu e fiafia?

Pete ko e fakakehekehe mo e hikihiki kua taute e tapuakiaga magafaoa ke fiafia, ke moua e aoga mooli, kua lata ia lautolu oti ke mautauteute. Ne fa mategūgū a lautolu ne ikiiki, ti lata e tau matua taane ke manamanatu tuai ke he vala tala ka fifili ti fakaaoga fakalahi e magaaho ke mautauteute mitaki. Taha e matua taane ne pehē, “Ka mautauteute au, kua moua he tau tagata oti e aoga lahi he fakaakoaga.” Ko e matua taane i Sihamani ne tala age tuai ke he magafaoa e mena ka fakatutala a lautolu ki ai he tau faahi tapu i mua. Ka fakatoka ke kitekite e DVD faka-Tohi Tapu ko e vala he tapuakiaga magafaoa ha lautolu, ko e matua taane ne tokoono e tama i Benin ne taute tuai e tau hūhū. Mooli, to fai kakano mo e aoga lahi e mautauteute ke he ha mautolu a tapuakiaga magafaoa.

Ka iloa tuai he magafaoa e matakupu ka tutala a lautolu ki ai, maeke a lautolu ke tututala ki ai he faahi tapu, ti fakalagalaga e hakahakau ha lautolu. Ka igatia e tagata mo e kotofaaga, to logona he tau tagata takitaha ko e tapuakiaga magafaoa haana.

Tokologa e tau magafaoa ne mailoga ko e paleko ke taute tumau e tapuakiaga magafaoa ha lautolu.

Tokologa e tau matua taane ne loloa e tau tulā gahua ke leveki e magafaoa. Tuga anei, taha e matua taane i Mesikō ne toka e kaina he matahola ono he pogipogi ti liu mai la ki kaina he matahola valu he afiafi. Falu magaaho ne lata ke hiki e magaaho Tapuakiaga Magafaoa ha ko e taha matagahua fakaagaaga.

Kua lata agaia ia tautolu ke mauokafua ke taute tumau e tapuakiaga magafaoa. Ko Loïs ne hogofulu ma taha e tau he moui ne nofo i Togo ne talahau hagaao ke he fifiliaga he magafaoa haana: “Pete he kamata mule e tapuakiaga magafaoa ha mautolu ha ko e fekau ne tupu he aho, ne taute tumau e tapuakiaga magafaoa ha mautolu.” Maeke ia mutolu ke maama e kakano ati fakatokatoka he falu magafaoa ke taute e tapuakiaga magafaoa ha lautolu he kamataaga he faahi tapu. Ka fai mena fakaofo ne hoko, maeke ia lautolu ke liu fakatoka foki e tapuakiaga magafaoa ha lautolu ke he taha aho he matahiku he faahi tapu.

Kua fakakite mai e tokaaga he “tapuakiaga magafaoa,” ko e taha vala ia he tapuakiaga haau ki a Iehova. Kia igatia e tagata i loto he magafaoa haau mo e ta atu ki a Iehova e ‘tau poa he tau laugutu ha lautolu’ he tau faahi tapu takitaha. (Hosea 14:2) Ti eke e magaaho ia mo magaaho fiafia he tau tagata oti he magafaoa, “ha ko e fiafia kia Iehova ko e malolo ha mutolu haia.”​​—Nehe. 8:9, 10.