He umwe woko Brasil wati: “Tyina tulinga Efendelo Liombunga tuhole okuhipulula unene iya ovikando ovinyingi inkha hivepopila okuti tutalamei, tulinga alo kounthiki unene.” Omukuatate umwe woko Japão wapopia okuti omona wae womanima ekwi ketyimono okuti tuelilongesale ehimbwe, uhanda vala okutualako. Omokonda yatyi? Wati, “wava omakumbululo, iya otyo tyimuhambukiswa unene.”

Tyotyili, haaveho ovana vahambukwa nefendelo liombunga. Vamwe kavetyihande. Omokonda yatyi? He umwe woko Togo wati: “Okufenda Jeova ñgeno katyilovolwa.” Inkha efendelo liombunga lilovolesa, tyilekesa okuti tyesukisa okulinga omapiluluko konthele yoñgeni efendelo olio lilingwa. Onombunga ononyingi mbaimbuka okuti efendelo liombunga lipondola “okuhambukiswa,” ngetyi ankho Otyasapalo tyihambukiswa ova Isilayeli vamwe.—Isa. 58:13, 14.

Ovohe Ovakristau vesukisa okukala nonthumbi yokuti ombunga yavo ihambukwa mokueenda kuefendelo liombunga. Inkha ovohe valinga ngotyo, ombunga maihambukwa vali unene. Ralf una ovana vekuana wapopia okuti efendelo liavo liombunga kalikala ngatyina omuvo wokulilongesa, mahi likala ngatyina omuvo wokutomphola. Ñgeni ngotyo? Aveho vatomphola. Okutomphola mefendelo liombunga, nokusuka nalio, katyapepukile. Omphange umwe una ovana wati: “Pamwe ndyitupu ononkhono mbokulinga efendelo liombunga monkhalelo ihambukiswa ngetyi muene lina okulingwa.” Okuti upondola okulinga efendelo lienyi liombunga monkhalelo ihambukiswa?

He umwe ko Alemanha wati, “tuna okukala nomutima wapepuka.” Omphange utiwa Natalia, una ovana vevali wati: “Otyipuka tyakolela vali unene mombunga yetu, okulinga ovipuka vielikalaila mefendelo lietu liombunga.” Onombunga ononyingi valinga ononthele  mbelikalaila mefendelo liavo liombunga. Omukuatate utiwa Cleiton woko Brasil una ovana vevali, wati: “Okulinga ngotyo, tyikuatesako okulinga elilongeso lihambukiswa iya aveho mombunga vakala nononthele.” Inkha pena ovana ovatutu, ovohe vapondola okutala komasuka a kese umwe povana pokuyapula omuvo wokulilongesa. Tupu, ovohe vesukisa okukala nomutima wapepuka tyina vaholovona omikanda mavelilongesa, noñgeni mavelilongesavio.

Oityi onombunga mbumwe mbulinga opo velilongese ovipuka vielikalela mefendelo liombunga? Vamwe vahimbika efendelo liavo liombunga noviimbo vihivilika Jeova. Juan woko México, wati: “Otyo tyituhambukiswa unene, nokutupongiya pala etyi matulilongesa.” Ombunga yae iholovona oviimbo vielikuata netyi mavelilongesa.

Onombunga ononyingi vatanga aveho onthele imwe Yombimbiliya. Opo valinge tyimwe tyelikalela, kese umwe mombunga utanga onondaka mbomunthu umwe Mombimbiliya iya umwe atange mbomunthu omukuavo. He umwe ko Japão wapopia okuti, “potete ankho katuetyityiliyile okutanga monkhalelo oyo.” Mahi, ovana vae vevali ovakuendye ankho vahambukwa tyina vatangela kumwe novohe. Onombunga mbumwe vahetekela ovanthu vapopiwa momahipululo Ombimbiliya. Omukuatate utiwa Roger, woko Afrika do Sul una ovana vevali, wapopia okuti ‘ovikando ovinyingi ovana vamona Mombimbiliya ovipuka onthue ovohe tuahamuene.’

Otyipuka tyimwe onombunga tupu vapondola okulinga opo vaundapele kumwe, okutunga owato wa Noe ine o templu ya Salomau. Okuovola oñgeni ovipuka ovio viatungilwe tyipondola okuhambukiswa unene. Mongeleka, omukainthu umwe ko Asia una omanima etano, waovolele okulinga ngotyo kumwe novohe, na ina kulu. Valingile ekuatulu, aveho avahonaikapo ovipuka konthele youngendi wa apostolu Paulu movilinga viae vioumisionaliu. Onombunga ononkhuavo vanyana konthele yomahipululo avasiwa momukanda wa Êxodo. Donald woko Togo una omanima 19 wapopia okuti okulinga ovipuka vielikalela “tyakalesa vali nawa ombunga yetu, nefendelo lietu liombunga.” Okuti upondola okusoka kovipuka mavikukuatesako okulinga efendelo lienyi liombunga monkhalelo ihambukiswa vali?

Namphila okukala nomutima wapepuka, nokulinga ovipuka vielikalela tyikuatesako okulinga efendelo liombunga monkhalelo ihambukiswa, aveho vesukisa okulipongiya. Pamwe ovana tyivepuiya okupumphama nokulilongesa ehimbwe, ngotyo, he una okutala nawa opo aholovone etyi matyihambukiswa ovana, nokulipongiya nawa. He umwe wati: “Tyina nelipongiya nawa, aveho mombunga vanoñgonoka nawa etyi tuelilongesa.” Omukuatate umwe woko Alemanha, upopila ombunga yae etyi mavelilongesa mefendelo liombunga monosimanu ononkhuavo. Ombunga imwe ina ovana epandu ko Benin pamwe vatala ono DVD mbeongano mefendelo liavo liombunga. Oñgeni velipongiya? He uveavela omapulo makalinga. Tyotyili, okupongiya tyitukuatesako okulinga efendelo liombunga lihambukiswa.

Tyina ombunga inoñgonoka etyi matyikapopiwa, vapondola okutomphola konthele yotyo mokueenda kuosimanu, iya otyo tyivekuatesako okukevelela elilongeso olio nehambu. Inkha aveho mombunga vakala nononthele, kese umwe melitehelela okuti olio efendelo liae liombunga.

Onombunga ononyingi tyivepuiya okulinga apeho efendelo liombunga.

Ovohe vamwe vaundapa onoola ononyingi opo vatekule ombunga yavo. Mongeleka, he umwe woko México utunda meumbo ko 6 ola akondoka ko 20 ola. Tupu, ovohe vamwe vesukisa okupilulula onthiki Yefendelo liavo Liombunga mokonda yovilinga ovikuavo mefendelo lia Huku.

Namphila tyipuiya, tuesukisa okutokola okulinga apeho efendelo liombunga. Loïs woko Togo una omanima 11 wapopia oñgeni otyo tyakolela unene mombunga yae. Wati: “Namphila pamwe tuhimbika lietaka efendelo lietu liombunga mokonda yatyimwe tyamonekapo komutenya, mahi apeho tulinga.” Moluotyo, otyiwa okuholovona okulinga efendelo liombunga konthyimbi yosimanu. Mokonda yatyi? Mokonda inkha pamoneka otyipuka tyimwe tyimutyilika, mupondola okulinga onthiki onkhuavo mosimanu oyo.

Omokonda yatyi tupopila okuti “efendelo liombunga”? Omokonda tyina tulilinga, tukahi nokufenda Jeova. Aveho mombunga yove mavaave ku Jeova ‘ovilikutila viomilungu viavo’ onosimanu ambuho. (Osé. 14:2, tala pokatoi) Amuho mombunga hambukilwei efendelo liombunga “mokonda okuhambukilwa Jeova, otyo epameko lienyi.”—Nee. 8:9, 10.