«Нӕ бинонты ахуыры рӕстӕг афтӕ зӕрдиагӕй фӕныхас кӕнӕм, ӕмӕ мӕ бинонтӕн куы нӕ фӕзӕгъын, нӕ ахуыр фӕуӕм, зӕгъгӕ, уӕд нын хатгай ӕмбисӕхсӕвмӕ дӕр ахӕссы»,– зӕгъы иу бинонты хистӕр Бразилийӕ. Японийӕ иу ӕфсымӕр та йӕ 10-аздзыд лӕппуйӕ зӕгъы, зӕгъгӕ, дам, нын бинонты ахуыр куы вӕййы, уӕд, рӕстӕг куыд атӕхы, уый ӕмбаргӕ дӕр нӕ бакӕны ӕмӕ, дам, ӕй нӕ фӕфӕнды, цӕмӕй-иу ӕй фӕуӕм. Цымӕ цӕмӕн? Ӕфсымӕр куыд дзуры, афтӕмӕй йӕ лӕппу сӕ бинонты ахуыры зӕрдиагӕй фӕархайы ӕмӕ уый тыххӕй тынг фӕцин кӕны.

Кӕй зӕгъын ӕй хъӕуы, сывӕллӕттӕй алчи бинонты ахуыры рӕстӕг афтӕ зӕрдиагӕй нӕ фӕархайы. Ӕмӕ сӕ иуӕй-иутӕ та бинонты ахуыр уарзгӕ дӕр нӕ кӕнынц. Цӕуылнӕ? Тогойӕ иу ӕфсымӕр уый тыххӕй мӕнӕ цы зӕгъы: «Йегъовӕйӕн кувынимӕ баст хъуыддӕгтӕй адӕймаг хъуамӕ фӕлмӕцгӕ ма кӕна». Кӕд уӕ сывӕллӕттӕ бинонты ахуыры рӕстӕг сфӕлмӕцынц, уӕд уӕ, чи зоны, куыд ӕй фӕуадзут, уыцы хъуыддаджы цыдӕртӕ фӕивын хъӕуы. Бирӕ бинонтӕ сӕхицӕй зонынц, бинонты ахуыр афтӕ ауадзӕн кӕй ис, цӕмӕй сын уыцы рӕстӕг уа «стыр цины бон», израилӕгтӕн-иу сабатбон куыд уыд, афтӕ (Ис. 58:13, 14).

Чырыстон бинонты хистӕртӕ хъуамӕ бацархайой, цӕмӕй сӕ бинонты ахуыры рӕстӕг мачи мацӕмӕй тыхса. Афтӕмӕй бинонты ахуыр алкӕмӕн дӕр циндзинад хӕсдзӕн. Ӕртӕ чызджы ӕмӕ иу лӕппу кӕмӕн ис, иу ахӕм ӕфсымӕр, Ральф, сӕ бинонты ахуыры тыххӕй афтӕ зӕгъы, зӕгъгӕ, дам, нын фарстатӕ ӕмӕ дзуаппытимӕ ахуыры хуызӕн нӕ вӕййы, фӕлӕ цыма ӕнӕуи ныхас кӕнӕм, афтӕ, ӕмӕ, дам, нӕ алчидӕр йӕ хъуыдытӕ сӕрибарӕй фӕдзуры. Алы хатт ӕнцон нӕ вӕййы афтӕ бакӕнын, цӕмӕй, бинонтӕ цы ахуыр кӕной, уый алкӕй зӕрдӕмӕ дӕр цӕуа ӕмӕ дзы алчидӕр архайа. Иу хо афтӕ зӕгъы: «Бӕргӕ мӕ фӕфӕнды, цӕмӕй нӕ бинонты ахуыр алкӕмӕн дӕр цины хос уа, фӕлӕ мӕм алы хатт уыйбӕрц хъару нӕ вӕййы, цӕмӕй-иу ӕй афтӕ ауадзон». Дӕуӕн та дӕ бон цы у саразын, цӕмӕй уын уӕ бинонты ахуыр фылдӕр циндзинад хӕсса?

Германийы чи цӕры ӕмӕ дыууӕ сывӕллоны кӕмӕн ис, иу ахӕм ӕфсымӕр зӕгъы: «Мах фӕхъӕуы уавӕртӕм гӕсгӕ архайын». Наталийӕ, дыууӕ чызджы мад, зӕгъы: «Махӕн ӕппӕты ахсджиагдӕр у, цӕмӕй-иу нӕ бинонты ахуыр алы хатт уыцы иухуызон ма уа». Бирӕтӕ сӕ бинонты ахуыр цалдӕр  хайыл адих кӕнынц. «Уый фӕрцы бинонты ахуырӕй ничи сфӕлмӕцы ӕмӕ дзы алчидӕр зӕрдиагӕй фӕархайы»,– зӕгъы Клейтон, дыууӕ сывӕллоны фыд Бразилийӕ. Бинонты ахуыр цалдӕр хайыл адих кӕнын хорз уыдзӕн, кӕд сывӕллӕтты ’хсӕн бирӕ ис, уӕд – афтӕмӕй ныййарджытӕн сӕ бон уыдзӕн, сывӕллӕттӕй алкӕй дӕр цы хъӕуы ӕмӕ сӕ алчидӕр цӕуыл тыхсы, ууыл аныхас кӕнын. Уӕдӕ ныййарджытӕн, бинонты ахуыры рӕстӕг цӕуыл ныхас кӕндзысты ӕмӕ йӕ куыд уадздзысты, уыцы хъуыддаджы сӕ бон у уавӕртӕм гӕсгӕ архайын.

Иуӕй-иу бинонтӕ цы саразынц, цӕмӕй сӕ бинонты ахуыр алы хатт уыцы иухуызон ма уа? Чидӕртӕ бинонты ахуыры райдианы Йегъовӕйӕн цалдӕр зарӕджы азарынц. «Уый нӕ бинонты саразы хорз зӕрдӕйы уагыл ӕмӕ нын не ’ргом аздахы, цы ӕрмӕгыл ныхас кӕндзыстӕм, уымӕ»,– зӕгъы Мексикӕйӕ иу ӕфсымӕр, Хуан. Йӕ бинонтӕ рагацау ахӕм зарджытӕ равзарынц, цӕмӕй баст уой, цӕуыл ныхас кӕндзысты, уыимӕ.

Бирӕтӕ сӕ ахуыры рӕстӕг иумӕ бакӕсынц Библийӕ цавӕрдӕр скъуыддзаг. Цӕмӕй алкӕмӕн дӕр цымыдисаг уа, уый тыххӕй йӕ бакӕсынц рольтӕм гӕсгӕ. Японийӕ иу ӕфсымӕр зӕгъы, ахӕм ӕгъдаумӕ гӕсгӕ кӕсын ӕм фыццаг ӕнахуыргомау кӕй каст. Фӕлӕ йӕ дыууӕ фырты тынг цин кодтой, сӕ ныййарджытимӕ иумӕ цыдӕр кӕй аразынц, ууыл. Кӕцыдӕр бинонтӕ та Библийӕ цавӕрдӕр хабӕрттӕ рольтӕм гӕсгӕ хъазгӕ дӕр акӕнынц. Хуссар Африкӕйы чи цӕры ӕмӕ дыууӕ лӕппуйы кӕмӕн ис, иу ахӕм ӕфсымӕр, Роджер, афтӕ зӕгъы, зӕгъгӕ, сывӕллӕттӕ Библийы фыст хабӕртты арӕх фенынц, мах, ныййарджытӕ, цы нӕ бафиппайӕм, уыдӕттӕ.

Бинонтӕн ма сӕ бон у иумӕ саразын, зӕгъӕм, Нойы нау кӕнӕ Соломоны кувӕндон, йе та ӕндӕр ахӕм исты. Уый тыххӕй фӕхъӕуы нӕ литературӕйы фылдӕр ӕрмӕг бацагурын, ӕмӕ уыцы хъуыддаг дӕр бинонтӕн циндзинад фӕхӕссы. Зӕгъӕм, Азийы иу фондзаздзыд чызг йӕ ныййарджытимӕ ӕмӕ йӕ фыдымадимӕ иумӕ сарӕзта стъолыл ӕвӕргӕ хъазт – уыцы хъазт уыди апостол Павелы уацамындон балцыты тыххӕй. Иуӕй-иу бинонтӕ та ахӕм хъӕзтытӕ саразынц Рацыды чиныджы фыст хабӕрттӕм гӕсгӕ. Тогойӕ иу 19-аздзыд лӕппу, Доналд, куыд зӕгъы, афтӕмӕй, сӕ бинонты ахуыр алыхуызӕтты кӕй фӕуадзынц, уый фӕрцы сӕ ахуыр сси бирӕ цымыдисагдӕр ӕмӕ сӕхӕдӕг дӕр кӕрӕдзиимӕ ӕнгомдӕр систы. Сымахӕн дӕр уӕ бон у ахӕм исты саразын, цӕмӕй уын уӕ бинонты ахуыр фылдӕр циндзинад хӕсса?

Бинонты ахуыр алыхуызӕтты ӕмӕ уавӕртӕм гӕсгӕ куы уадзат, уӕд уын фылдӕр циндзинад хӕсдзӕн. Фӕлӕ дзы цӕмӕй истӕуыл сахуыр уат, уый тыххӕй уӕ алчидӕр хъуамӕ йӕхи рагацау цӕттӕ кӕна. Иуӕй-иу хатт сывӕллӕттӕ бирӕ бадынӕй ӕмӕ ахуыр кӕнынӕй афӕллайынц, ӕмӕ-иу уымӕ гӕсгӕ бинонты хистӕр хъуамӕ лӕмбынӕг ахъуыды кӕна, сывӕллӕттӕн цымыдисагдӕр цавӕр ӕрмӕг уыдзӕн, ӕмӕ-иу ӕй хорз бацӕттӕ кӕна. Иу фыд зӕгъы: «Цӕттӕ куы вӕййын, уӕд нӕ бинонты ахуыр алкӕмӕн дӕр фылдӕр пайда ӕрхӕссы». Германийӕ иу ӕфсымӕр йӕ бинонтӕн рагацау фӕзӕгъы, иннӕ къуыриты цы ахуыр кӕндзысты, уый. Бенинӕй иу ӕфсымӕрӕн ис ӕхсӕз сывӕллоны, ӕмӕ сӕ бинонты ахуыры рӕстӕг нӕ организацийы кинонывтӕй искӕцымӕ бакӕсын куы спълан кӕнынц, уӕд уыцы кинонывмӕ рагацау фарстатӕ ныффыссы ӕмӕ сын сӕ ратты. Дзырд дӕр ыл нӕй, нӕ бинонты ахуырмӕ-иу нӕхи куы бацӕттӕ кӕнӕм, уӕд-иу нын бирӕ хуыздӕр рауайдзӕн.

Бинонтӕ, цавӕр ӕрмӕгыл ныхас кӕндзысты, уый рагацау куы зоной, уӕд ыл сӕ бон уыдзӕн уый размӕ бонты дӕр кӕрӕдзиимӕ ныхас кӕнын, ӕмӕ бинонты ахуырмӕ зӕрдиагдӕрӕй ӕнхъӕлмӕ кӕсдзысты. Алкӕмӕн дӕр дзы исты хӕслӕвӕрд куы уа, уӕд бинонты ахуыры рӕстӕг уазӕджы бадт нӕ кӕндзысты.

Бирӕтӕн зын у бинонты ахуыр алы къуыри дӕр уадзын. Цӕмӕн?

Ныййарджыты арӕх ӕрмӕст къӕбӕры фаг бакусыны тыххӕй дӕр фӕхъӕуы ӕнӕхъӕн бон кусын. Зӕгъӕм, Мексикӕйӕ иу ӕфсымӕр куыстмӕ ацӕуы райсомӕй ӕхсӕз сахатыл, ӕмӕ изӕры аст сахатӕй раздӕр не ’рбацӕуы. Афтӕ дӕр вӕййы, ӕмӕ бинонты сӕ ахуыры рӕстӕг фӕивын фӕхъӕуы, ӕмбырд районон цӕстдарӕг куы фӕбӕрӕг кӕны йе та Ӕрымысӕн изӕр кӕнӕ конгресс куы вӕййы, уӕд.

Фӕлӕ уӕддӕр хъуамӕ ӕппӕт хъарутӕй архайӕм, цӕмӕй нын бинонты ахуыр алы къуыри дӕр уа. Тогойӕ иу 11-аздзыд чызг, Лоис, афтӕ зӕгъы: «Нӕ бинонты ахуыр цы бон вӕййы, уыцы бон ӕнӕнхъӕлӕджы исты куы ’рцӕуы, уӕд нӕ ахуыр ӕрӕгмӕ райдайӕм. Фӕлӕ афтӕ никуыма уыд, ӕмӕ йӕ ӕппындӕр ма скӕнӕм». Уӕдӕ иуӕй-иу бинонтӕ сӕ бинонты ахуыр къуырийы райдианы дзӕгъӕлы нӕ фӕуадзынц. Ӕнӕнхъӕлӕджы исты хабар куы ’рцӕуы, уӕд сӕ бон вӕййы сӕ бинонты ахуыр къуырийы ӕндӕр бонмӕ ахӕссын.

Бинонты ахуыр тынг ахсджиаг цӕмӕн у? Уымӕн ӕмӕ уыцы хъуыддаг баст у Йегъовӕйӕн кувынимӕ. Уӕдӕ архайут, цӕмӕй алы къуыри дӕр уӕ бинонтимӕ иумӕ Йегъовӕйӕн, «нывондӕн уӕнгуытӕ куыд ӕрхӕссынц, афтӕ нывондӕн хӕссат уӕ дзыхыныхас – кадджын ӕй кӕнат» (Оси 14:2). Уадз ӕмӕ уӕ алкӕмӕн дӕр бинонты ахуыр циндзинад хӕсса, «уымӕн ӕмӕ, Йегъовӕ цы циндзинад дӕтты, уый у уӕ фидар мӕсыг» (Неем. 8:9, 10).