“Mani-enjoy kamin maong ed Panagdayew na Pamilya mi kanian no maminsan et nasabi mi anggad lablabi la no agko itunda,” so kuan na sakey ya ama ed Brazil. Imbaga na sakey ya ulo na pamilya ed Japan ya singa agnalilikas na anak ton samploy taon so oras tan agto labay so ontunda. Akin? “Labalabay to itan, tan malikeliket,” so kuan na ama.

Siempre aliwan amin ya ugugaw et labalabay day panagdayew na pamilya, tan diad tua et ag-itan nai-enjoy na arum. Antoy rason? Oniay imbaga na sakey ya ama ed Togo: “Nepeg ya aliwan boring so panagdayew ed si Jehova.” No boring itan, ompan say rason et say paraan na pangikokondukta yod panagdayew na pamilya yo. Apaneknekan na dakel a pamilya a say panagdayew na pamilya et nayarin magmaliw ya ‘makapaliket,’ a singa impaneskribe nen Isaias ed Sabaton nensaman.—Isa. 58:13, 14.

Amoria na saray Kristianon ama ya pian maliket so panagdayew na pamilya, kaukolan ya relaks so amin. Imbaga nen Ralf, ya walay taloran anak ton bibii tan sakey ya laki, ya singa labat ira mantotongtong diad panagdayew na pamilya ra, aliwan poppormal ya manaaral, tan mibibiang so amin. Tua, aliwan mainomay ya pansiansiaen ya interesado tan akapokus so amin. Oniay imbaga na sakey ya ina: “No maminsan anggapoy biskeg kon gawaen ya makapaliket so panagdayew na pamilya mi anggano labay ko komon.” Anto sirin so gawaen yo?

“Kaukolan ya amta tayon itukoy so aralen,” so inkuan na sakey ya ama diad Germany ya duaray anak to. “Importante ed pamilya mi ya aliwan apasakey so aralen,” so kuan nen Natalia ya duaray anak to. Wala ray pamilyan  aapagen day panagdayew na pamilya ra diad nanduruman parte. “Lapud satan et mabilabilay so panagaral mi tan mibibiang so amin,” so kuan nen Cleiton, ama na duaran tinedyer diad Brazil. No apagen so oras na panaral, naikday imano na atateng so pankaukolan na kada anak da no nandurumay edad da. Sarag dan itukoy so aralen da tan say paraan na panaral da diad pankaukolan na kada membro.

Antoy gagawaen na arum a pamilya pian aliwan apasakey so panagdayew na pamilya da? Say arum et igapo da itan diad pangansion dad si Jehova. “Ipaparaan na satan so puso tan isip mi parad aralen mi,” so kuan nen Juan a taga Mexico. Pipilien da ray kansion ya walay koneksion tod aralen da.

Wala met iray pamilya ya saniba dan babasaen so sakey ya parte na Biblia. Pian aliwan apasakey, akaasain so kada membro na pamilya a manbasa ed dialogue na nanduruman karakter. Imbaga na sakey ya ama ed Japan ya “nen unaan et ag-apasal ed ontan ya panagbasa.” Balet malikeliket iray duaran anak dan lalaki ya nanengneng iray atateng dan mani-enjoy kaiba ira. Wala ingen iray pamilyan idradrama da ray istoryad Biblia. Saray ugugaw et “wala ray naiimano dad istoryad Biblia ya agmi naimano ya atateng,” so kuan nen Roger, ama ya taga South Africa ya duaray anak ton laki.

Say sakey nin paraan et manggawa kayoy sakey ya project, singa say pangalig ed biong nen Noe odino templo nen Solomon. Kaukolay research ed satan kanian eksayting. Singa bilang, diad sala na sakey a pamilyad Asia, kaiba na limay taon ya ugaw so atateng tan bai to, tan manggagawa iray board game ya base ed saray nakar nen apostol Pablo diad impanmisionero to. Say arum ya pamilya et nanggaway board game base ed saray salaysay ed libro na Exodo. Lapud nanduruma so paraan, “nagmaliw ya mas maliket so panagdayew na pamilya mi tan say mismon pamilya mi,” so kuan na 19 años ya si Donald ed Togo. Wala tay nanonotan mon project ya gawaen yod panagdayew na pamilya yo pian mas na-enjoy yo itan?

Importante ya nanduruma tan matukoy so aralen ed panagdayew na pamilya pian makapainteres, balet kaukolan ya manprepara so amin pian minabang irad satan. No maminsan, mainomay ya onsawa iray ugugaw kanian kaukolan ya nonoten a maong na ama so aralen da tan iparaan ton maong. Imbaga na sakey ya ama: “No akaparaan ak, mas makagunggona so panaral mi.” Masakbay lan ipapaamta na sakey ya ama ed Germany no anto ray aralen dad onsublay iran simba. Wala met so ama ed Benin ya anemiray anak to ya masakbay to lan iiter iray tepet no say akaeskedyul ya gawaen da et pambantay na DVD ya base ed Biblia. On, baleg so nagawaan na preparasyon pian mas makagunggona so panagdayew na pamilya.

No amta lan masakbay na pamilya so aralen da, napanistoryaan da la itan pigaran agew antis ni na panagdayew na pamilya, kanian eksayted la rad satan. Tan no kada membro et walay asainmin to, nalikna na balang sakey ya sikatoy kabiangan na satan a panagdayew na pamilya.

Wala ray pamilyan nanairapan ya gawaen a regular so panagdayew na pamilya da.

Dakel so ama ya kaukolan day mantrabahoy andukey ya oras pian nitaryay pankaukolan na pamilya da. Alimbawa, walay sakey ya ama ed Mexico ya alas sais ni labat ed kabuasan et onaalis lad abung tan manga alas otso lad labi so isesempet to. Sakey ni, wala ray pankanawnawan kaukolan ya i-adjust so eskedyul na Panagdayew na Pamilya no walay arum ya espiritual ya aktibidad.

Balet nepeg ya determinado itayon pansiansiaen ya regular so panagdayew na pamilya. Oniay imbaga na 11 años ya si Loïs a taga Togo: “Anggano no maminsan et atrasado mi lan igapoy panagdayew na pamilya mi ta walay biglan agawa, ituloy min ituloy itan.” Atan so rason no akin ya iyi-eskedyul na arum so panagdayew na pamilya ra kagapo ni labat na simba. No walay nagawan ag-iilaloan, sarag dan gawaen itan diad ontumbok iran agew.

Say mismon tawag ya “panagdayew na pamilya” et pakapatnagan ya kabiangan itan ed panagdayew yod si Jehova. Abuloyan yon amin ya membro na pamilya yo et sinimban makapangiyapay ed si Jehova na ‘baka a kalakian na bibil da.’ (Os. 14:2) Tan komon et panliketan itan na kada membro na pamilya yo, “ta say liket nen Jehova sikato so biskeg yo.”—Neh. 8:9, 10.