Un tata na Brazil a bisa: ‘Nos Adorashon Komo Famia ta asina interesante ku mayoria di biaha, si mi no pone un paro, nos ta sigui papia te anochi lat.’ Un kabes di famia na Hapon a bisa ku ta parse ku su yu hòmber di dies aña no ta ripará ku tempu ta pasa ora nan ta studia pasobra semper e ke sigui studia bai. Dikon? E tata a bisa ku su yu ta ègt gusta e estudio, p’esei e yu ta disfrutá di dje.

Ta klaru ku no ta tur mucha ta asina entusiasmá ku estudio di famia, i pa nos ta franko, algun kisas no ta gust’é mes. Dikon? Un tata na Togo ku eksperensia a bisa: “Adorashon na Yehova no mester ta laf.” Si esei ta e kaso, kisas e tin di haber ku e manera ku e Adorashon Komo Famia ta ser dirigí. Hopi famia a ripará ku Adorashon Komo Famia por ta dushi, “un delisia,” manera Isaías a bisa enkuanto Sabat.—Isa. 58:13, 14.

Tatanan kristian a realisá ku pa nan famia disfrutá di nan Adorashon Komo Famia, e ambiente mester ta relahá. Ralf, kende tin tres yu muhé i ún yu hòmber, a bisa ku nan Adorashon Komo Famia ta mas un kòmbersashon informal ku un estudio; tur hende ta partisipá. Nos tin ku bisa sí ku tin biaha por ta difísil pa tene tur hende atento i entusiasmá durante e estudio. Un mama a atmití: “No ta tur ora mi tin e energia pa hasi nos Adorashon Komo Famia plasentero manera mi ta deseá.” Awor, kiko di abo? Bo por hasi boso Adorashon Komo Famia mas plasentero?

Un tata na Alemania ku tin dos yu a bisa: “Nos mester ta fleksibel.” Natalia, un mama ku tin dos yu muhé, a bisa: “Loke ta funshoná mihó pa nos famia ta variashon, variashon i mas variashon.” Hopi famia ta parti nan Adorashon Komo Famia den vários seshon. Cleiton, un tata na Brazil ku tin dos yu tiner a bisa: “Esei ta hasi e estudio di famia mas bibu i ta animá henter e famia pa  partisipá. Ora mayornan ta parti e tempu di nan Adorashon Komo Famia den seshon, nan por dediká atenshon na e nesesidatnan di kada yu, spesialmente si entre e yunan tin un diferensia grandi di edat. Ademas, mayornan por ta fleksibel ora di skohe informashon ku nan lo studia i e manera ku nan lo hasi e estudio.

Pero kiko algun famia sa hasi pa varia nan estudio di famia? Wèl, algun ta kuminsá nan adorashon di famia ku kantika di Reino. Un ruman hòmber na México ku yama Huan a bisa: “Esei ta krea un bon ambiente i ta prepará nos mentalmente pa e estudio.” Su famia ta skohe kantika ku tin di haber ku e informashon ku nan ta bai studia e anochi ei.

Hopi famia ta lesa Beibel huntu. I pa variashon, kada miembro di famia ta lesa e porshon di Beibel ku ta korespondé ku un personahe bíbliko. Un tata na Hapon a atmití ku na promé instante e “tabata haña un poko straño pa lesa Beibel di e forma ei.” Pero su dos yu hòmbernan sí tabata disfrutá mashá di e estudio di Beibel huntu ku nan mayornan. Algun famia sa asta hunga papel di personahenan bíbliko. Roger, un tata na Suráfrika ku tin dos yu hòmber, a komentá: “Hopi biaha, mucha ta mira sierto puntonan den un relato bíbliko ku nos mes no a ripará.”

Un otro manera pa varia nos Adorashon Komo Famia ta di traha huntu riba un proyekto. Por ehèmpel, un famia por opta pa traha un réplika di e arka di Noe òf e tèmpel di Sálomon. Pa traha riba un proyekto asina mester hasi investigashon promé, i esaki por ta masha interesante. Na Asia, un mucha muhé di sinku aña huntu ku su mayornan i su wela a purba di hasi algu similar. Nan a usa nan sala pa traha un wega di bòrchi basá riba e biahenan ku Pablo a hasi komo misionero. Algun otro famia a traha weganan di bòrchi basá riba e relatonan den e buki di Éksodo. Donald di 19 aña di edat, kende ta biba na Togo, a bisa ku variashon ‘ta hasi nan Adorashon Komo Famia mas dushi i ta duna nan famia mas bida.’ Abo por pensa riba un proyekto ku por hasi boso Adorashon Komo Famia mas plasentero?

Aunke variashon i fleksibilidat ta hasi nos Adorashon Komo Famia interesante, mas ta nesesario. Tur hende mester prepará. I komo ku mucha sa tin difikultat pa sinta studia pa hopi ratu, tatanan mester skohe informashon ku ta interesante pa mucha i prepará bon. Un tata a bisa: “Ora mi prepará bon, henter e famia ta benefisiá di e estudio.” Un tata na Alemania ta informá su famia di antemano kiko nan lo studia durante henter un luna. Un famia na Benin ku tin seis yu, entre 2 pa 12 aña, sa wak DVD di e organisashon durante nan Adorashon Komo Famia. Ora esei ta e kaso, di antemano e tata ta duna e famia un lista di pregunta basá riba e DVD pa nan prepará. No tin duda, bon preparashon ta mehorá e kalidat di nos estudio di famia.

Si un famia sa di antemano kiko nan lo trata durante nan Adorashon Komo Famia, nan lo por papia tokante e tópiko ei durante henter e siman ei; hasiendo esei, nan lo ta entusiasmá pa e dia di e estudio yega. Anto si henter e famia tin un tarea pa kumpli kuné, kada miembro lo sinti ku e tambe ta forma parti di nan Adorashon Komo Famia.

Hopi famia tin difikultat pa tene nan Adorashon Komo Famia riba un base regular.

Hopi kabes di famia mester traha oranan largu pa perkurá pa e nesesidatnan básiko di nan famia. Un tata na México, por ehèmpel, ta sali kas seis or di mainta p’e bai traha i ta yega kas bèk te ocho or di anochi. Sa sosodé tambe ku nos mester kambia e dia di nos Adorashon Komo Famia debí na un otro evenemento spiritual, manera bishita di sirkuito òf kongreso di distrito.

No opstante, nos mester hasi esfuerso pa tene nos Adorashon Komo Famia riba un base regular. Loïs, un hermanita di diesun aña di edat ku ta biba na Togo, ta splika kon importante nan estudio di famia ta pa su famia. El a bisa: ‘Maske nos tin ku kuminsá mas lat ku nos Adorashon Komo Famia debí na algu ku a pasa durante dia, nunka nos ta keda sin studia.’ Ta di komprondé ku algun famia ta tene nan Adorashon Komo Famia na komienso di siman; si algu inesperá sosodé, nan por programá nan estudio di famia riba un otro dia den e siman ei.

Manera e nòmber mes ta indiká, boso “Adorashon Komo Famia” ta parti di boso adorashon na Yehova. Pues, hasi boso bèst pa komo famia, tur siman boso ofresé Yehova ‘e fruta di boso lepnan.’ (Osé. 14:2) I laga e okashon ei ta un okashon gososo pa henter e famia “pasobra e goso di SEÑOR [Yehova] ta boso fortalesa.”—Neh. 8:9, 10.