Wanfala dadi long Brazil sei: “From mifala enjoyim tumas Famili Worship, staka taem study bilong mifala kasem big naet nao sapos mi no stopem study.” Wanfala dadi long Japan sei boy bilong hem wea ten year laek for gohed study nomoa and no warim taem. Why nao olsem? Dadi sei: “Hem interest tumas and datwan mekem hem enjoyim study.”

Bat no evri pikinini enjoyim famili worship, and samfala les for duim tu. Why nao olsem? Wanfala dadi long Togo sei: “For worshipim Jehovah hem mas no samting wea man boring long hem.” Sapos man boring long hem, maet reason for diswan hem bikos wei wea olketa duim famili worship hem no interesting. Profet Isaiah sei wei for keepim Sabbath savve mekem olketa Israelite “barava hapi.” Staka famili luksavve famili worship savve mekem olketa long famili “barava hapi” tu.—Isa. 58:13, 14.

Olketa dadi wea worshipim Jehovah luksavve for evriwan long famili enjoyim famili worship, evriwan mas relax and feel free for story. Ralf wea garem thrifala gele and wanfala boy sei, taem olketa duim famili worship evriwan sidaon and story tugeta nomoa. Nomata olsem, hem no isi for evritaem mekem study interesting for evriwan long famili. Wanfala mami hem sei: “Staka taem mi taed, so samfala taem hem no isi for mekem famili worship interesting.” Wanem nao iu savve duim for helpem evriwan long famili enjoyim famili worship?

Wanfala dadi long Germany wea garem tufala pikinini sei: “Mifala mas duim samting for fitim evriwan long famili.” Natalia wea garem tufala gele sei famili bilong olketa trae for duim samfala difren samting long taem bilong famili worship, and no just duim wanfala samting  nomoa. Staka famili duim samfala difren samting insaed taem wea olketa markem for famili worship. Cleiton from Brazil wea garem tufala teenager sei: “Datwan mekem famili worship interesting and evriwan long famili laek for tekpart.” Sapos age bilong olketa pikinini no semsem, wei for duim samfala difren samting long famili worship savve helpem dadi and mami for mekem famili worship fitim evriwan. Olketa dadi and mami savve chusim wanem for studyim and hao olketa bae studyim for fitim evriwan long famili.

Wanem nao samfala difren samting wea samfala famili duim long famili worship? Samfala startim famili worship long wei for singim olketa Kingdom song. Juan from Mexico sei: “Datwan redyim mind bilong mifala for wanem mifala bae studyim.” Olketa singim olketa song wea fitim information wea olketa bae studyim.

Samfala famili readim samfala chapter long Bible tugeta. For mekem hem interesting, each wan long famili savve readim toktok bilong olketa difren wan wea datfala Bible reading storyim. Wanfala dadi long Japan sei: “Firstaem hem fani lelebet for mi read long wei olsem.” Bat tufala boy bilong hem hapi for lukim wei wea dadi and mami duim datwan witim tufala. Samfala famili actim samfala story long Bible tu. Roger, wanfala dadi from South Africa wea garem tufala boy sei: “Staka taem olketa pikinini lukim samfala interesting information long Bible reading wea dadi and mami no lukim.”

Famili savve waka tugeta long wanfala project tu. Olsem example, for wakem samting wea luk olsem ark bilong Noah or temple wea Solomon wakem. For duim olsem, famili mas duim samfala interesting research. Olsem example, long Asia wanfala gele wea faev year witim dadi, mami and grani bilong hem wakem wanfala board game abaotem olketa missionary gogo bilong aposol Paul. Olketa nara famili savve wakem board game abaotem samfala story long Bible buk Exodus. Donald from Togo, wea hem 19 year sei: “Wei for duim samfala difren samting long famili worship mekem hem interesting, and datwan helpem famili bilong mifala for hapi tu.” Waswe, iu savve tingim eni samting wea famili bilong iu savve duim, for helpem famili enjoyim famili worship?

Wei for mekem famili worship fitim evriwan and for duim samfala difren samting, savve mekem study interesting. Bat for evriwan lanem samting long taem bilong famili worship, hem important for evriwan prepare tu. Samfala taem olketa pikinini savve taed, so olketa dadi mas tingting gud abaotem wanem for studyim and prepare gud for hem. Wanfala dadi sei: “Taem mi prepare, evriwan savve kasem gud samting long famili worship.” Wanfala dadi from Germany savve talem famili firstaem wanem olketa bae storyim long famili worship long olketa week wea bae kamap. Taem wanfala dadi long Benin wea garem sixfala pikinini mekem schedule for famili lukim DVD long famili worship, hem savve givim samfala kwestin abaotem datfala DVD firstaem. Tru nao, wei for prepare savve helpem iumi for kasem gud samting long famili worship.

Taem famili savve firstaem wanem olketa bae storyim long famili worship, olketa savve story raonem and olketa bae luk forward long datwan. And sapos each wan garem assignment, datwan bae helpem evriwan for tinghae long famili worship.

Staka famili faendem hem no isi for evritaem duim famili worship.

Plande dadi mas waka for staka hour mekem olketa savve kasem wanem famili needim. Olsem example, wanfala dadi long Mexico savve go waka long six klok long morning and hem savve kam bak long haos long eit klok long naet. Samfala taem, maet nara spiritual samting hem kamap wea mekem famili mas changem taem for duim famili worship.

Nomata olsem, iumi mas disaed strong for duim famili worship evritaem. Loïs from Togo, wea hem eleven year sei olsem: “Nomata maet mifala leit lelebet for duim famili worship bikos long samfala samting wea happen long datfala day, mifala evritaem duim famili worship.” Samfala famili markem eni day long start bilong week for duim famili worship. Sapos eni samting kamap long day for study, then olketa savve markem nara day long datfala week for duim famili worship.

Datfala nem “famili worship” showimaot diswan hem part long worship bilong iumi for Jehovah. Hem gud for evriwan long famili givim praise long Jehovah evri week, olsem man givim ‘young buluka olsem sakrifaes.’ (Hos. 14:2) And hem gud for evriwan long famili enjoyim famili worship, bikos datwan bae strongim evriwan for worshipim Jehovah. —Neh. 8:9, 10.