Emen pahpa sang Brazil nda: “Se kin uhdahn perenki at Kaudok en Peneinei, oh ma I sohte kauhdi at onopo, se pahn koasoakoasoi lao lel lukepen pwong.” Emen pahpa sang Sapan koasoia me nah kisin pwutako me sounpar 10 sohte kin kehn ahnsou oh men ren pousehlahte. Dahme kahrehda? Pahpao nda: “E kin uhdahn mwekidki oh met kahrehiong en perenki onopo.”

Kaidehn seri koaros kin mwekidki laud arail Kaudok en Peneinei. Ni mehlel, ekei sohte kin perenki. Dahme kahrehda? Emen pahpa sang Togo koasoia: “Atail kaudok ong Siohwa en dehr kapwang.” Ma e kapwang, met sou kohsang mwomwen ahn peneineio wia arail kaudoko? Peneinei tohto diarada me kaudok en peneinei kak kahrehda “peren oh nsenamwahu,” nin duwen me pwuhken Aiseia kasalehda.​—Aiseia 58:13, 14.

Pahpa Kristian kan ese me ma eh peneineio pahn kin perenki arail kaudok en peneinei, e kesempwal ren saledek oh nsenamwahu. Ralf me naineki serepein silimen oh pwutak men, nda me arail kaudok en peneineio sohte kin ihte kihda peidek oh pasapeng kan, ahpw irail koaros kin koasoakoasoipene ni saledek. Mehlel, ekei pak e apwal en kahrehiong koaros en uhdahn perenki de ngoangki dahme re onohnopki. Emen nohno nda: “I sohte kin ahnsou koaros ahneki kehl en wiahiong at kaudok en peneinei en kaperen ni ahl me I men wia.” Ke kak powehdi kahpwal wet?

Emen pahpa sang Sehmen me naineki seri riemen nda: “Se anahne materek.” Natalie, emen nohno me naineki serepein riemen me sounpar 14 oh sounpar 6, nda: “Dahme keieu kesempwal ong at peneineio iei en doadoahngki soangsoangen wiepe kan nan at kaudok en peneinei.” Peneinei tohto kin wia soahng tohto nan arail  kaudok en peneinei. Cleiton, pahpa men sang Brazil me naineki serepein men sounpar 17 oh pwutak men me sounpar 14, koasoia: “Met kahrehiong at onopo en kaperen oh at peneineio pwon kin iang pidada.” Ni peneinei kan arail doadoahngki wiepe wet, pahpa nohno kan kak esehda anahn en emenemen seri ko ma arail sounpar kan uhdahn wekpeseng. Pahpa nohno kan kak koasoiapene anahn en tohn peneineio oh kak materek ni arail pilada dahme re pahn doadoahngki oh ia duwen arail pahn koasoanehdi oh koasoiapene.

Dahme ekei peneinei wia pwehn kamwahwihala arail doadoahngki wiepe teikan? Ekei kin tepikihda koul kan ong Siohwa nan arail kaudok en peneinei. Juan, sang Mexico, nda: “E kahrehda pepehm mwahu oh kaunopada at madamadau ong at onopo.” Eh peneineio kin pilada koul kan me dokedoke dahme re pilada en onopki ni soutiko.

Peneinei tohto kin pilada ehu wasa nan Paipel oh wadekpene. Pwehn doadoahngki wiepe tohto pwehn kaperen, irail kin nehkpeseng nanpwungarail ire kan me pid aramas akan nan Paipel oh wadekpene. Emen pahpa sang Sapan koasoia me ong ih “wiepen wadawad wet ekis ehusoahng nin tapio.” Ahpw nah pwutak riemeno perenki kilang ara pahpa oh nohno iang perenki. Ekei peneinei pil kin kamwomwada ekei poadopoad kan en Paipel. Roger, emen pahpa sang palieir en Aperika me naineki pwutak riemen, koasoia me seri kan “kin kalapw kilangada soahng kan nan poadopoad en Paipel me kitail pahpa nohno kan sohte tehk.”

Pil ehu ahl en wia soahng tohto nan amwail kaudok en peneinei iei en sawaspene oh wiahda soahng kan duwehte warihmw en Noha de tehnpas sarawi me Solomon wiahda. Soangen wiepe wet kin kahrehda amwail wia roporop en kak kaperen. Karasepe, nan Eisia, serepein men me sounpar limau, eh pahpa nohno oh pil eh nohno kahlap wia arail kaudok nan imwarailo. Re wiewia mwadong ehu me poahsoankihda ahn wahnpoaron Pohl eh seiloakseli nin duwen misineri men. Ekei peneinei wiahda mwadong kan me poahsoankihda poadopoad en nan pwuhken Eksodus. Donald, sang Togo me sounpar 19, koasoia me en doadoahngki soangsoangen wiepe kan kin “kamwahwihala oh kahrehda at kaudok en peneinei en kaperen.” Ke kak medewehda soangen wiepe kan me pahn kalaudehla kaperenpen amwail kaudok en peneinei?

Mendahki amwail pahn materek oh doadoahngki soangsoangen wiepe kan pwe amwail kaudok en peneinei en kaperen, e kesempwal koaros en kaunopada mwahu pwe koaros en kak sukuhlki soahng tohto. Ekei pak me pwulopwul kan kin pwangada, eri pahpa kan anahne medewe mahs dahme re pilada ren doadoahngki oh kihong ahnsou en kaunopada mwahu. Emen pahpa nda, “Ni ei kin onopada mwahu, koaros kin paiekihda laud at onopo.” Pahpa men sang Sehmen kin padahkihong eh peneineio dahme re pahn koasoiapene nan wihk kan me pahn kohdo. Ni emen pahpa me naineki seri wenemen nan Benin koasoanehdi eh peneineio en kilang kasdo ehu me audepe kohsang nan Paipel nan arail kaudok en peneinei, e kin kaunopada peidek kan mwowe. Ei, e kin mie wekpeseng laud ma kitail kaunopada mwahu ong atail kaudok en peneinei.

Ni peneinei kan ar kin ese mwowe dahme irail pahn onopki, re kak koasoakoasoia erein wihko, eri met kin kalaudehla arail ngoang. Oh ma emenemen ahneki pwukoa en kihda ire ehu nan arail onopo, e pahn pehm me kaudok en peneineio pein ah.

E kin apwal ong peneinei tohto en kaukaule wia arail kaudok en peneinei.

Pahpa tohto anahne doadoahk awa tohto pwehn apwalih arail peneinei. Karasepe, emen pahpa sang Mexico kin mweselsang imweo kohla doadoahk ni menseng kuloak 6 oh pwurodo kuloak 8 nipwong. Patehng met, ekei pak e kin mie anahnepen en wekidala ahnsou en Kaudok en Peneinei pwehki mwemweit en sounapwalih me kin seiloak, rahnen Kataman de mihting tohrohr wiawi.

Ahpw kitail anahne koasoanehdi teng en kaukaule wia atail kaudok en peneinei. Loïs me sounpar 11 sang Togo ndahki duwen eh peneineio, “Mendahki ma ekei pak se kin pwand en tapiada at kaudok en peneineio pwehki mehkot pwarada erein rahno, se kin ahnsou koaros wia at kaudok en peneinei.” Ke kak wehwehki dahme kahrehda ekei peneinei kin koasoanehdi arail kaudok en peneinei en wiawi ni tepin wihko. Ma mehkot re sohte kasik pwarada, re kak wekidala ahnsoun arail kaudok en peneinei ong ni imwin wihko.

E konehng me koasoandi wet en adaneki “kaudok en peneinei” pwehki e wia kisehn atail kaudok ong Siohwa. Tohn omw peneinei pwon en kapinga mwaren Siohwa wihk koaros. (Oseia 14:2) Ahnsowo anahne wia ahnsou kaperen ehu ong emenemen tohn peneinei, “pwe peren me KAUN-O pahn ketikihong kumwail pahn kakehlakeikumwailla.”​—Nehmaia 8:9, 10.