Brasilmanda huauquica ninmi: “Familiahuan Adorana Tutapi tucuicuna cushijushpa parlanajuimandami tiempo yalijtaca na sintinchi” nishpa. Japonmanda huauquipash ninmi, ñuca churica 10 huatacunatami charin. Familiahuan Adorana Tutapica ninandami cushijun, tiempo yalijtapash na sintishpami ashtahuan yachajungapaj munan nishpa.

Shinapash ashtaca huahuacunaca aburririnmi. Togo llactamanda shuj taitaca ninmi: “Jehovamanda yachajushpaca na aburririnachu can” nishpa. Shinaca ¿imamandata aburririn? ¿Taitamamacuna nali yachachijpichu aburririn? Ashtaca familiacunaca ninmi, Isaías libropi nishca shinaca Familiahuan Adorana Tutaca ‘cushijuna punllami’ can nishpa (Is. 58:​13, 14).

Ashtaca taitamamacunaca nishcami tranquilo sintirishpallami Familiahuan Adorana Tutapica cushijuita usharin nishpa. Ralf shuti huauquica quimsa ushicunata shuj churitami charin. Paica ninmi: “Familiahuan Adorana Tutapica tucuicunami parlanchi” nishpa. Tucuicunaman yachachinaca shinllimi can. Shuj paniguca ninmi: “Familiahuan Adorana Tutapi tucuicunaman yachachinaca shinllimi can, shaijushcami sintirini” nishpa. Shinaca huahuacuna cushijushpa yachajuchunga ¿imatata taitamamacunaca rurana can?

Alemaniamanda huauquica ishcai churicunatami charin. Paica ninmi: “Huahuacuna imata minishtijujta ricushpami yachachina canchi” nishpa. Nataliapash ishcai ushicunatami charin. Paica ninmi: “Ñucanchica na siempre chaitallata chaitalla ruranchichu. Shuj shuj cosascunata rurashpami yachajunchi” nishpa. Ashtaca familiacunaca Familiahuan Adorana tiempotaca asha ashami separan. Brasilmanda Cleiton shuti huauquica ishcai joven churicunatami charin. Paica ninmi: “Tucuicuna participangapami esforzarinchi” nishpa. Huahuacuna shuj shuj edadta charijpica cada uno imata minishtijujta ricushpami  tiempotaca separana can. Taitacunaca paipa familiaman imata, imashina yachachinata ricushpami tiempotaca separana can.

Huaquin familiacunaca ama chaitallata chaitallata rurashpa yachajungapami shuj canticota candashpa callarin. Mexicomanda Juan shuti huauquica ninmi: “Ali yachajungapami ñucanchica candashpa callarinchi” nishpa. Juanba familiaca imata yachajugrijujta ricushpami canticotaca agllan.

Cutin shuj familiacunaca Bibliatami tucuicuna tandanajushpa asha asha liin. Japonmanda huauquica ninmi, huaquin textocunataca huahuacunami liin, cutin shuj textocunataca ñucanchimi liinchi. Callaripica na gushtarcanichu. Shinapash tucuicuna tandanajushpa Bibliata asha asha liijpica ñuca ishcai huahuacunaca ninandami cushijun” nishpa. Huaquin familiacunacarin shuj uchila dramata rurashpami Bibliapi textocunata yachajun. Sudáfrica llactamanda Roger shuti huauquica ishcai churicunatami charin. Paica ninmi: “Huahuacunaca ñucanchi na cuenta japishca cosascunatami ricun” nishpa.

Cutin shuj familiacunaca igualmi imatapash ruran. Huaquingunaca Noé rurashca arcatashna o Salomón rurashca templotashnami ruran. Ashtacacuna nishca shinaca, Familiahuan Adorana Tutapi imatapash igual rurashpami tucuicuna cushijun. Asia llactapica 5 huatacunata charij huahuaguca taitamamandi abuelandi tandanajushpami apóstol Pablo maijan llactacunapilla villachishcata yachajungapaca uchilla targetacunata rurarca. Shuj familiacunaca Éxodo libropi ima pasashcata yaringapami imapash pugllaicunata rurashpa yachajun. Togo llactamanda 19 huatacunata charij Donald shuti huauquica ninmi: “Familiahuan Adorana Tutapi imacunatapash rurashpa yachajushpami tucuicuna cushijunchi” nishpa. Quiquinga ¿imatata rurapanguiman?

Familiahuan Adorana Tutapi aliguta yachajungapaca tucuicunami aliguta prepararina canchi. Huaquin jovengunaca shaijunllami. Chaimandami taitacunaca imata yachajunata agllashpa aliguta prepararina can. Shuj huauquica ninmi: “Ñuca aliguta prepararijpica tucuicunami cushijushpa yachajun” nishpa. Alemaniamanda shuj huauquica shamuj semanacunapi imata yachajunatami huahuacunaman villan. Benín llactapi shuj cusahuarmica 6 huahuacunatami charin. Paicunaca shuj videotami huaquinbica ricun. Tucuicuna aliguta prepararichunga, ima tapuicunata yachajunatami villan. Aliguta prepararijpica tucuicunami cushijun.

Imata yachajugrijushcata tucuicunallata yachashpaca tucuicunami imata yachajunata parlanajunga. Shinami tucuicunallata Familihuan Adorana Tuta chayachun shuyanajunga. Chai tutapi cada uno imatapash rurashpaca tuicunami participanga.

Ashtaca familiacunapaca cada semana Familiahuan Adorana Tutata charinaca shinllimi can.

Ashtaca taitacunaca ashtaca horascunata trabajashpami familiataca mantinin. Mexicomanda shuj taitaca tutamanda la 6ta llujshishpa tuta las 8tami huasimanga tigran. Huaquinbica superintendente congregacionda visitajujpi o Quimsa Punlla Jatun Tandanajuimandami chai tutataca shuj punllaman cambiana tucun.

Shinapash cada semanami Familiahuan Adorana Tutataca charina can. Togo llactamanda 11 huatacunata charij Loïs shuti huahuaguca ninmi: “Huaquinbica imapash pasajpimi ashtahuan tutallapi yachajunchi. Shinapash cada semanami Familiahuan Adorana Tutataca charinchi” nishpa. Cada semana familiahuan yachajungapaca semana callarijuj punllacunapi yachajushpami ali can. Shinami imamandapash na yachajui ushashpaca chai semanapi maijanbash punllaman cambiaita usharin.

Familiahuan Adorana Tutaca Jehovata adorangapami can. Chaimandami quiquinba familiapash cada semana paicunapa shimihuan Jehová Diosta alicachichun ayudana capangui (Os. 14:2). Quiquinba familiapi cada unota ayudajpica, paicunapash ‘Mandaj Dios cushijuita cujpimi’ ushaita charishpa cushijunga (Neh. 8:​9, 10).