“Rekareka tikai matou i te au uriurianga i te tuatau o te Akamorianga a te Ngutuare e e maata te taime ka tae atu ki te roaanga po me kare au e akamutu i te reira,” i karanga ai tetai papa i Brazil. Akakite mai tetai upoko o te ngutuare i Tiapani no runga i tana tamaiti e tai ngauru ona mataiti e kare aia e kite e, kua roa te apii e kare aia e inangaro i te akamutu. Eaa te tumu? Karanga te papa e: “E inangaro maata tona i te apii e te tauturu ra teia iaia kia rekareka.”

Tika rai, kare te au tamariki ravarai e inangaro ana i te rave i te akamorianga a te ngutuare e ko tetai pae, kare ratou e reka ana i te reira. No teaa ra? Akakite mai tetai papa i Togo i teia manako meitaki, “Auraka te akamorianga ia Iehova e riro ei mea maromaroa.” Me koia ia, penei ka anoanoia kia taui i te tu e raveia ana te akamorianga a te ngutuare. Maata te ngutuare tangata tei kite e ka rauka te akamorianga a te ngutuare kia riro mei ta Isaia i tuatua no runga i te Sabati, e mea “inangaroia.”—Isa. 58:13, 14.

Kua kite te au metua tane Kerititiano e me ka riro te akamorianga a te ngutuare ei tuatau mataora, ka anoanoia te ngutuare tangata kia ponuiaau. Karanga a Ralf, tetai metua tane e a ana tamariki e e akariro ana aia i ta ratou akamorianga a te ngutuare ei tuatau pukapuka, kare i te akoanga; te o maira te ngutuare katoa ki roto i te uriurianga. E tika, e akaaoanga kia tauturu i te katoatoa kia piri mai e kia mataora te apii. Karanga tetai mama: “Tetai taime, kare oku maroiroi i te akariro i te akamorianga a te ngutuare ei tuatau mataora, mei taku rai i inangaro.” Akapeea koe me akono i teia akaaoanga?

“Ka anoanoia tatou kia puareinga ua i te rave i te au mea ou,” i karanga ai tetai papa i Tiamani, e rua ana tamariki. Karanga a Natalia, tetai mama e rua ana tamariki e: “Te mea puapinga rava atu no toku ngutuare, ko te tamata anga i te au mea  tukeke.” Maata te ngutuare tangata tei akatuanga i ta ratou akamorianga a te ngutuare. “Ka oraora atu te apii e ka inangaro te katoatoa kia piri ki roto i te reira,” i akamarama ai a Cleiton, tetai papa i Brazil e rua ana tamariki mapu. Me akatuangaia te tuatau no te apii, ka rauka i te nga metua i te akono i te anoano o te tamariki tataki tai me e tamariki mapu tetai e te tamariki rikiriki. Pera katoa ka rauka i te nga metua i te iki e eaa te au puka ta ratou ka apii e akapeea ratou me rave i te reira.

Eaa te au mea tukeke ta tetai au ngutuare e rave nei no te akamorianga a te ngutuare? E akamata ana tetai pae na te imene anga kia Iehova. “E tauturu ana teia i te ngutuare kia mataora e kia akapapa ia ratou no te apii,” i karanga ai a Juan i Mexico. E iki ana tona ngutuare i te au imene tei tau ki ta ratou ka apii no te reira aiai.

Tetai au ngutuare tangata, e tatau kapiti ana ratou i tetai tuanga o te Pipiria. E tatau ana te au mema o te ngutuare i te tuanga o te au aronga i roto i tetai papaanga Pipiria. Karanga tetai papa i Tiapani e “i te akamataanga, kua emiemi aia i te tatau mei te reira rai.” Inara e mataora ana tana nga tamariki tamaroa i te kite i to raua nga metua e mataora ra. Tetai au ngutuare tangata, e akatutu ana ratou i te au tua Pipiria. “Maata te taime, e kite ana te tamariki i te au manako i roto i te Pipiria kare te nga metua i kite ana,” i karanga ai a Roger, tetai papa i Aperika Apatonga e rua ana tamariki tamaroa.

Tetai mataara ke i te rave i te au mea tukeke koia oki, kia angaanga kapipiti i te rave i tetai tukuanga angaanga, mei te maani anga i te araka o Noa me kore te iero o Solomona. Ka mataora te ngutuare tangata me raveia tetai kimikimianga no te au tukuanga angaanga. Ei akaraanga, i Asia i roto i te pia maata o tetai ngutuare tangata, ko te tamaine e rima ona mataiti, tona nga metua e te mama ruau. Kua maani ratou i tetai apinga pere toka no runga i te au tere mitinari o te apotetoro ko Paulo. Kua maani tetai au ngutuare tangata ke i te apinga pere toka no runga i te au papaanga i roto i te puka o Exodo. “Kua akaoraora mai te au mea tukeke i ta matou akamorianga a te ngutuare e to matou ngutuare katoa,” i karanga ai a Donald i Togo, e 19 ona mataiti. Ka rauka ainei ia koe i te akamanako no runga i tetai angaanga te ka akariro i taau akamorianga a te ngutuare ei tuatau mataora?

Noatu e mea mataora i te rave i te au mea ou e te tukeke i roto i te akamorianga a te ngutuare, ka anoanoia te katoatoa kia akapapa. Tetai taime e roiroi ana te tamariki rikiriki, no reira ka anoanoia te metua tane kia akamanako meitaki i ta ratou ka apii e kia akapapa meitaki. Karanga tetai papa e, “Me akapapa meitaki au, e mataora ana te katoatoa i te tuatau apii.” E akakite ana tetai papa i Tiamani ki tona ngutuare tangata e eaa ta ratou ka apii i te au epetoma e tu maira. Me akanoo tetai papa i Benin, e ono ana tamariki, i te akara i tetai vitio a te akaaerenga ei tuanga no ta ratou akamorianga a te ngutuare, ka akapapa aia i tetai au uianga no runga i te vitio. Ae, ka mataora atu te akamorianga a te ngutuare me akapapa meitaki te katoatoa.

Me kite te ngutuare tangata e eaa te ka apiiia i te au ra e tu maira, ka rauka ia ratou kia tuatua no runga i te reira i taua epetoma ra. Ka akamaata atu teia i to ratou inangaro i te apii i te reira. E me kua orongaia tetai tukuanga angaanga na te katoatoa, ka manako ratou tataki tai e nona rai teia akamorianga a te ngutuare.

Maata te ngutuare tangata e ngata ia ratou i te rave putuputu i ta ratou akamorianga a te ngutuare.

Maata te metua tane e angaanga no tetai tuatau roa ei angai i to ratou ngutuare tangata. Ei akaraanga, e akaruke ana tetai papa i Mexico i tona kainga i te ora ono i te popongi e ka oki mai i te ora varu i te aiai. Tetai taime, te anoanoia ra kia akanoo akaou i te ra no te Akamorianga a te Ngutuare no tetai tupuanga pae vaerua, mei te atoro anga a te akaaere kotinga me kore te uruoaanga tapere.

Noatu rai, ka anoanoia tatou kia akapapu kia rave putuputuia te akamorianga a te ngutuare. Akakite mai a Loïs, e 11 ona mataiti i Togo i ta tona ngutuare ka tauta i te rave: “Noatu ka akamata matou i te akamorianga a te ngutuare i muri ake i te ora tei akanooia no te mea kua tupu tetai apinga i te reira ra, ka rave ua rai matou i ta matou akamorianga a te ngutuare.” Teia tetai tumu i akanoo ei tetai au ngutuare i ta ratou akamorianga a te ngutuare i te akamataanga o te epetoma. Me tupu tetai apinga poitirere, ka rauka i te ngutuare tangata i te akanoo i te akamorianga a te ngutuare a tetai ra ke mai o te epetoma.

Eaa te tumu i kapiki ei tatou i teia e ko te akamorianga a te ngutuare? No te mea e tuanga te reira no ta tatou akamorianga ia Iehova. No reira kia apai mai te katoatoa i roto i te ngutuare i ‘te atinga o to ratou vaa’ kia Iehova i te au epetoma ravarai. (Hose. 14:2) E kia riro ua rai te reira ei tuatau mataora no te katoatoa i roto i te ngutuare tangata, no te mea “ko te rekareka ra no ko ia Iehova ra to kotou ïa maroiroi.”—Nehe. 8:9, 10.