Na faapea mai se tamā mai i Pasili, o le fiafia tele o lona aiga i la latou tapuaʻiga i nisi pō, a lē taofia e toetoe oo la latou tapuaʻiga i le vaeluaga o le pō. Na faapea mai se tane mai i Iapani, e lē popole lona atalii e sefulu tausaga i le taimi, ma manaʻo ai e faaauau la latou tapuaʻiga a le aiga. Aiseā? Na ia faapea atili mai: “Sa faalaeiauina ai o ia, ma o le isi lenā māfuaaga sa ia fiafia ai.”

E lē o tamaiti uma e naunau ma fiafia i le tapuaʻiga a le aiga. Aiseā? Na faapea mai se tamā mai Togo: “E tatau ona fiafia le auala e fai ai le tapuaʻiga iā Ieova.” O le auala foʻi la lenā e tatau ona fai ai tapuaʻiga a le aiga. O le tele o aiga e “matuā fiafia” i a latou tapuaʻiga, e tai pei ona taʻua i le tusi o Isaia.​—Isa. 58:13, 14.

Ua iloa e tane Kerisiano, e maua le fiafia i le tapuaʻiga a le aiga pe a faia i se siʻomaga filemu. O Ralf o se tane e toʻatolu ona afafine ae toʻatasi lona atalii. Na ia faapea mai e fai la latou tapuaʻiga e pei o se talanoaga faasamasamanoa, ae e lē pei o se suʻesuʻega, ma e faaaofia ai i latou uma. Atonu o se luʻi i nisi taimi le taumafai ia fiafia ma faaaofia tagata uma i le talanoaga. Na faapea mai se tasi tinā: “O loʻu lēlavā i le tele o taimi, e masani ona lē maua ai le fiafia i la matou tapuaʻiga a le aiga e pei ona ou naunau i ai.” E faapefea ona foʻia lenā luʻi?

Na faapea mai se tamā e toʻalua lana fanau i Siamani: “Sa tatau ona matou fetuutuunaʻi.” Ae na faapea mai Natalia o se tinā e toʻalua lana fanau: ʻO le mea e sili ona tāua i lo matou aiga, o le fesuisuiaʻi o le auala e fai ai la matou tapuaʻiga.’ O le tele o aiga e vaevae la latou tapuaʻiga i vaega eseese. Na faapea  mai Cleiton mai Pasili, o se tamā e toʻalua lana fanau talavou: ʻO le fesuisuiaʻi o le auala e faia ai le suʻesuʻega e mafai ona faaaofia ai tagata uma.’ O le vaevae o le taimi e fai ai le tapuaʻiga, e mafai ai ona uaʻi atu mātua i manaʻoga o le fanau, aemaise pe afai e eseese o latou tausaga. E mafai e mātua ona taulima manaʻoga o sui taʻitasi o le aiga ma fetuutuunaʻi, i le auala e filifilia ai le mataupu ma le auala e faia ai.

O le ā ua faia e nisi aiga ina ia faia ai se suiga i la latou tapuaʻiga? O nisi aiga e amata i le usuina o pese iā Ieova. Na faapea mai Juan mai Mekisikō: ʻO le faia o lenā vala, e saunia ai se amataga lelei ma saunia ai o matou mafaufau mo le tapuaʻiga.’ O lea, e filifili e lona aiga pese e fetaui ma le mataupu o le a talanoaina.

O le tele o aiga e faitauina faatasi se vaega o le Tusi Paia. O nisi aiga e tofi tagata e faitauina vaega a tagata eseese o se tala o le Tusi Paia, ina ia fesuisuiaʻi ai le faiga o la latou tapuaʻiga. Na faamatala e se tamā mai i Iapani, o le faitauina o le Tusi Paia i lea auala, “sa pei e lē masani ai i le taimi muamua na fai ai.” Peitaʻi sa fiafia ona atalii e toʻalua i le vaaia o o la mātua o loo latou fiafia faatasi. O nisi aiga e latou te faatinoina tala faale-Tusi Paia. Na faapea mai Roger, o se tamā e toʻalua ona atalii i Aferika i Saute, e masani ona taʻua e tamaiti se manatu e faatatau i se tala faale-Tusi Paia, ae e lē o iloa e mātua.

O se tasi o auala e mafai ona fai ai se suiga, o le galulue faatasi lea e faia se galuega faatino, e pei o le fausia o le vaa o Noa po o le malumalu o Solomona. O na faatinoga e aofia ai ni saʻiliʻiliga. O se faataʻitaʻiga, sa faia e se teineitiiti e lima tausaga mai i Asia ma ona mātua, ma le tinā o lona tamā, se taaloga e faatatau i malaga faamisionare a Paulo. O nisi aiga e faia ni taaloga e faavae mai i tala o loo i le tusi o Esoto. Ua faapea mai Donald, o se talavou e 19 tausaga mai Togo, o le fesuisuiaʻi o le auala e fai ai la latou tapuaʻiga, “ua faaleleia ai la latou tapuaʻiga faapea lo latou aiga.” Pe mafai ona e mafaufau i se poloketi e mafai ona fiafia uma ai lou aiga e faatino?

E ui e tāua le fesuisuiaʻi ma le fetuutuunaʻi ina ia fiafia le auala e faia ai le tapuaʻiga a le aiga ma maua ai aogā, peitaʻi, e tatau lava ona faia sauniuniga. O nisi taimi e lē lavavā tamaiti, o lea e tatau ai i le tane ona mafaufau i le mataupu o le a talanoaina, ma faaalu se taimi e sauniuni lelei ai. Na faapea mai se tasi tamā, “Pe a ou sauniuni lelei, e tofu sao uma tagata i le talanoaga.” E vave ona faailoa atu e se tamā i Siamani i lona aiga, le mataupu e talanoaina i le vaiaso e sosoo ai. I se tasi aiga i Benin, pe a fuafua le tamā o le aiga e matamata se DVD faale-Tusi Paia i le tapuaʻiga a le aiga, e vave ona ia avatu fesili i lana fanau lāiti e toʻaono e sauniuni ai. O lea, o sauniuniga e mafai ona faaleleia ai le auala e faia ai le tapuaʻiga a le aiga.

Pe a iloa e le aiga le mataupu o le a talanoaina i le tapuaʻiga a le aiga, e mafai ona latou talanoa ai a o faagasolo le vaiaso ma faaosofia ai lo latou naunau. Pe a tofia i tagata taʻitasi ni a latou vaega i le tapuaʻiga a le aiga, o le a atili ai ona naunau o ia i le tapuaʻiga a lona aiga.

O le tele o aiga, o se luʻi le faia e lē aunoa o la latou tapuaʻiga a le aiga.

O le toʻatele o mātua e galulue mo le tele o itula e tausia manaʻoga faaletino o le aiga. O se faataʻitaʻiga, e tuua e se tamā i Mekisikō le fale i le ono i le taeao, ae faatoʻā foʻi mai i le valu i le afiafi. E iai foʻi nisi taimi e ono manaʻomia ai ona fetuunaʻi le taimi e fai ai le tapuaʻiga a le aiga, ina ia faia ai nisi mea faaleagaga.

Peitaʻi, e tatau lava ona tatou maumauaʻi e faia e lē aunoa le tapuaʻiga a le aiga. Na faapea mai Loïs e 11 tausaga mai Togo: “E ui e tuai ona fai la matou tapuaʻiga a le aiga i nisi taimi ona o se mea e lē maʻalofia, peitaʻi e faia lava e lē aunoa.” O nisi aiga atonu e faatulaga la latou tapuaʻiga e fai i le amataga o le vaiaso. Ae a iai se mea e lē maʻalofia e tulaʻi mai, e mafai ona toe faatulaga i se isi aso o le vaiaso.

O le faaupuga “tapuaʻiga a le aiga,” ua faailoa mai ai o lea vala o se vaega o lau tapuaʻiga iā Ieova. O lea e tatau ai i sui uma o le aiga ona ofo atu se taulaga o “tamaʻi povi taanoa” iā Ieova. O lona uiga ia vivii atu iā Ieova i vaiaso taʻitasi. (Ho. 14:2, fpl.) Atonu e avea foʻi o se taimi mo sui taʻitasi o le aiga e olioli ai, “auā o le olioli ma iā Ieova, o lo outou malosi lea.”​—Nee. 8:9, 10.