„Nofo tron na Osofamiri Anbegi fu wi span so te taki wi e go doro te latilati neti efu mi no e tapu mi osofamiri,” na so wan papa fu Brasyonkondre e taki. Wan osofamiri-edeman fu Yapan e taki dati a gersi leki a boi fu en, di abi tin yari, no e luku a ten te den e studeri èn a wani go doro. Fu san ede? A papa e taki: „Fu di a lobi a studie, meki a wani kon sabi moro èn dati e gi en furu prisiri.”

Ma a no ala pikin de so. A kan srefi taki wan tu fu den no lobi na osofamiri anbegi. Ma fu san ede? Wan papa fu Togo, e taki: „Na anbegi fu Yehovah no musu de wan sani di e meki den pikin fruferi.” Efu disi de so nanga yu osofamiri anbegi, dan kande yu musu pruberi fu hori en na wan tra fasi so taki den lobi en. Furu osofamiri kon si taki te den e anbegi Gado makandra, dan dati de „wan prisiri sani”, soleki fa a buku Yesaya e taki.—Yes. 58:13, 14.

Kresten papa e frustan taki efu den wani taki den osofamiri prisiri na a osofamiri anbegi, dan ala sma musu firi bun. Ralf, di abi dri meisje nanga wán boi, e taki dati den no e hori na osofamiri anbegi leki wan gewoon studie, ma leki wan switi takimakandra pe ala sma abi wan prati. Ma a no makriki fu meki ala sma na ini na osofamiri poti prakseri na den tori di den e luku. Wan mama e taki: „Mi ben o wani taki ala ten mi ben kan du sani fu meki na osofamiri anbegi de wan prisiri sani, ma son leisi mi no abi a krakti fu du dati.” Yu kan meki na osofamiri anbegi gi yu moro prisiri?

Wan papa fu Doisrikondre di abi tu pikin, e taki: „Wi musu fiti wisrefi na wi osofamiri.” Natalia e taki dati a moro prenspari sani gi en osofamiri na fu du difrenti sani te den e hori a studie. Furu osofamiri e prati na osofamiri anbegi na ini difrenti pisi. Cleiton fu Brasyonkondre abi tu tini èn a e taki dati te den e hori a studie na a fasi disi, dan den de nanga moro faya èn ibriwan sma kan abi wan prati. Te papa nanga mama e prati a ten na ini difrenti pisi, dan den kan poti prakseri na san ibri pikin abi fanowdu, spesrutu te den abi bigi pikin nanga yongu pikin.  Papa nanga mama kan fiti densrefi na san ibriwan fu den abi fanowdu, so taki den o sabi fu sortu tori den musu taki èn fa den musu hori a studie moro bun.

San na difrenti sani di son osofamiri e du na a osofamiri anbegi? Sonwan fu den e bigin nanga wan singi gi Yehovah. „Disi e meki taki wi e firi bun èn a e yepi wi fu poti prakseri na den tori di wi o luku,” na so Juan fu Meksikow e taki. Na osofamiri fu en e suku singi di abi fu du nanga wan tu fu den tori di den o taki fu en na a osofamiri anbegi.

Furu osofamiri e leisi wan pisi fu Bijbel makandra. Te den e du dati, dan ibriwan fu den e leisi san den difrenti sma na ini a Bijbel tori e taki. Wan papa fu Yapan e taki dati na a bigin a ben musu gwenti fu leisi Bijbel na a fasi disi. Ma den tu boi fu en ben breiti taki den papa nanga mama ben lobi du wan sani makandra nanga den. Son osofamiri e prei den Bijbel tori leki wan drama. Roger fu Zuid-Afrika, di abi tu boi, e taki: „Nofo tron [den pikin] e si sani na ini wan Bijbel tori di wi leki papa nanga mama no e si.”

Wan tra fasi fa osofamiri kan hori na osofamiri anbegi na te den e meki wan sani makandra, soleki wan pikin ark fu Noa noso wan pikin tempel fu Salomo. Te yu wani du disi, dan yu musu ondrosuku fosi fa den sani ben de èn dati kan gi unu prisiri. Luku na eksempre fu wan osofamiri na ini Asia. A papa, a mama, a meisje fu den fu feifi yari, nanga a granmama ben e sidon na ini a foroisi fu meki wan sani fu prei makandra leki osofamiri. Den ben teken den preikiwaka fu na apostel Paulus na tapu wan pisi karton, dan den prei neleki na densrefi ben waka den pasi dati. Tra famiri du a srefi sani, ma dan den teken fa den Israelsma ben waka na ini a sabana, soleki fa skrifi na ini Eksodes. „Te wi ben e hori na osofamiri anbegi, dan wi ben e du difrenti sani. Dati meki wi no ben e fruferi èn wi alamala ben e prisiri,” na so Donald di abi 19 yari èn di e libi na Togo, e taki. Yu kan luku san yu o meki na a osofamiri anbegi so taki a kan gi yu moro prisiri?

A tru taki te yu e du difrenti sani na a osofamiri anbegi èn yu e fiti yusrefi na san yu osofamiri abi fanowdu, dan a o de wan prisiri okasi. Ma fu leri wan sani fu en, a prenspari taki ala sma sreka densrefi. Son leisi yongu pikin e kon weri. Sobun, papa musu luku na fesi sortu tori den o taki èn den musu teki ten fu sreka densrefi bun. Wan papa e taki: „Efu mi sreka misrefi bun, dan ala sma e leri moro fu a studie.” Wan papa fu Doisrikondre e taigi en osofamiri na fesi san den o luku na ini den wiki di e kon. Wan osofamiri fu Benin di abi siksi yongu pikin e luku den DVD fu wi son leisi na a osofamiri anbegi fu den. Fa na osofamiri disi e sreka densrefi? Wan pisi ten na fesi a papa e meki wan tu aksi èn a e gi na osofamiri. Iya, te sma e sreka densrefi, dan na osofamiri anbegi o hori na wan moro bun fasi.

Te na osofamiri sabi na fesi san den o luku, dan den kan taki fu en na ini a wiki dati. Na so den e bigin prisiri kaba fu den tori di den o luku. Efu ibriwan fu den e kisi wan sani fu du, dan den o abi a firi taki na osofamiri anbegi na spesrutu gi den.

Gi furu osofamiri a no makriki fu hori na osofamiri anbegi ala wiki.

Furu papa abi fu wroko langa fu kan abi a moni di na osofamiri fu den abi fanowdu. Fu eksempre, wan papa fu Meksikow e gowe fu oso siksi yuru mamanten èn a e drai kon baka aiti yuru neti. Son leisi te wan kongres e hori noso te a kring-opziener e kon, dan a musu skoifi na Osofamiri Anbegi go na wan tra dei.

Ma toku wi musu meki muiti fu hori na osofamiri anbegi ala wiki. Loïs, wan meisje fu Togo di abi 11 yari, e fruteri san en osofamiri e du fu no misi na osofamiri anbegi. A e taki: „Srefi te wi musu bigin lati nanga na osofamiri anbegi fu di wan sani pasa a dei dati, toku wi e hori en ala ten.” Yu kan frustan fu san ede son osofamiri e hori na osofamiri anbegi na a bigin fu a wiki. Te wan sani pasa di den no ben fruwakti, dan den kan poti na osofamiri anbegi na wan tra dei fu a wiki.

Soleki fa den wortu „osofamiri anbegi” e sori kaba, dan disi na wan fu den sani di yu musu du fu anbegi Yehovah. Meki den wortu di e komoto na ini a mofo fu yu osofamiri ’de leki yongu mankaw di unu e tyari leki srakti-ofrandi’ gi Yehovah ibri wiki (Hos. 14:2). Meki na osofamiri anbegi de wan prisiri ten gi ibri sma na ini yu osofamiri, „bika a prisiri di Yehovah e gi, de leki wan fortresi gi unu”.—Neh. 8:9, 10.