Aman ida iha rai-Brazíl hatete: “Se haʼu la hapara ami-nia Adorasaun Família nian, sei halaʼo toʼo kalan-boot tanba ami-nia adorasaun diʼak tebetebes.” Aman ida iha rai-Japaun hatete katak ninia oan-mane neʼebé tinan sanulu sempre haluha oras no hakarak kontinua adorasaun. Tanbasá? Aman neʼe hatete: “Nia gosta hola parte iha adorasaun, no ida-neʼe aumenta ninia ksolok.”

Maibé laʼós labarik hotu gosta adorasaun família nian. Tanbasá? Aman ida iha rai-Togu dehan: “Tuir loloos, adorasaun ba Jeová la bele halo ema baruk.” Tan neʼe, se ita-nia família sente baruk kona-ba adorasaun família nian, karik neʼe katak ita presiza halo mudansa kona-ba dalan neʼebé ita halaʼo adorasaun. Família barak haree ona katak adorasaun família nian bele sai “buat neʼebé lori ksolok boot” hanesan selebrasaun loron Sábadu nian iha tempu uluk.—Isaías (Yesaya) 58:13, 14.

Aman kristaun sira presiza halaʼo adorasaun família nian iha dalan neʼebé halo família sente ksolok no kmaan hodi sira sei gosta tempu neʼe. Irmaun Ralf, neʼebé iha oan-feto naʼin-tolu no oan-mane ida, hatete katak sira-nia adorasaun família nian mak laʼós hanesan estudu deʼit, maibé hanesan tempu diʼak neʼebé família hotu koʼalia ba malu. Maibé karik ita sente susar atu halo ita-nia família hotu envolve an iha adorasaun neʼe. Inan ida hatete: “Dala ruma haʼu la iha forsa atu halaʼo adorasaun família nian iha dalan neʼebé ema hotu gosta.” Ita bele hadiʼa dalan neʼebé ita halaʼo adorasaun família nian ka lae?

Aman ida iha rai-Alemaña neʼebé iha oan naʼin-rua hatete: “Ita presiza prontu atu uza dalan oioin kuandu halaʼo adorasaun.” Inan ida naran Natalia neʼebé iha oan naʼin-rua mós hatete: “Buat neʼebé importante liu ba ami-nia família mak halo atividade oioin.” Família barak fahe sira-nia adorasaun ba parte balu. Aman ida husi rai-Brazíl naran Cleiton, neʼebé iha oan joven naʼin-rua hatete katak halo  adorasaun hanesan neʼe bele ajuda ninia família hotu sai laran-manas atu envolve an iha sira-nia estudu. Se ita-nia oan ida mak tinan boot no ida seluk tinan kiʼik, fahe tempu estuda nian ba parte balu hodi bele tau atensaun ba oan ida-idak nia presiza. Inan-aman mós bele hanoin didiʼak kuandu sira hili livru neʼebé família sei estuda no dalan neʼebé sira sei estuda ida-neʼe.

Saida deʼit mak família balu halo iha adorasaun família nian? Sira balu hahú sira-nia adorasaun hodi kanta knananuk atu hahiʼi Jeová. Irmaun ida naran Juan iha rai-Méxiku hatete: “Ida-neʼe halo ami kontente no prepara ami atu simu informasaun espirituál.” Ninia família hili knananuk neʼebé liga ho buat neʼebé sira atu estuda iha sira-nia adorasaun.

Família barak lee Bíblia hamutuk. Atu halo istória Bíblia nian sai moris liu, dala ruma sira ida-idak finje sai ema neʼebé iha Bíblia laran. Aman ida iha rai-Japaun hatete katak foufoun kuandu sira lee Bíblia iha dalan hanesan neʼe, nia sente katak neʼe mak dalan foun ba nia. Maski nuneʼe, ninia oan-mane naʼin-rua gosta atu haree inan-aman sai kontente hodi halo ida-neʼe hamutuk ho sira. Família balu mós halo drama kona-ba Bíblia nia istória sira. Aman ida husi rai-Áfrika Súl naran Roger, neʼebé iha oan-mane naʼin-rua hatete katak labarik sira “dala barak hetan pontu husi iha Bíblia neʼebé inan-aman lee liu deʼit”.

Ita mós bele serbisu hamutuk atu halo projetu ida, hanesan halo modelu husi Noé nia ró boot ka templu Salomão nian. Porezemplu, iha Ázia, labarik-feto ida neʼebé tinan lima halo ida-neʼe hamutuk ho ninia avó-feto. Sira prepara hamutuk mapa kona-ba apóstolu Paulo nia viajen no uza ida-neʼe hodi halimar. Família seluk prepara game kona-ba istória iha livru Êxodo (Keluaran). Irmaun Donald iha rai-Tonga neʼebé tinan 19 hatete: ‘Hodi halo atividade oioin, ida-neʼe halo ami-nia adorasaun família nian sai moris liu no ami-nia moris família nian sai diʼak liután.’ Ita mós iha ideia ruma kona-ba projetu neʼebé ita bele halo iha ita-nia adorasaun família nian ka lae?

Maski diʼak atu halo atividade oioin iha adorasaun família nian, maibé neʼe deʼit la toʼo. Atu ita-nia adorasaun família nian bele lori diʼak ba família hotu, ema ida-idak tenke prepara nanis. Tanba labarik no joven sira sai baruk lalais atu estuda ba tempu kleur, aman sira presiza hili didiʼak informasaun neʼebé nia sei uza, no prepara didiʼak ida-neʼe. Aman ida dehan: “Kuandu haʼu badinas hodi prepara, ema hotu sei aprende diʼak liu.” Aman ida iha rai-Alemaña fó-hatene nanis ba ninia família kona-ba informasaun neʼebé sira sei estuda iha fulan tuirmai. Aman ida iha rai-Benín neʼebé iha oan naʼin-neen hatete katak se nia sei uza organizasaun nia DVD, nia fó sai nanis ba ninia família kona-ba pergunta sira neʼebé sira sei koʼalia hamutuk. Sin, preparasaun bele halo ita-nia adorasaun família nian sai diʼak liután.

Kuandu família sira hatene nanis kona-ba informasaun neʼebé sira sei uza, sira bele koʼalia kona-ba neʼe durante semana nia laran, no ida-neʼe halo sira hein namanas ba adorasaun neʼe. No se ema ida-idak iha knaar, sira hotu bele sente katak adorasaun neʼe mak tempu espesiál ba sira.

Família barak sente susar atu halaʼo adorasaun família nian semana-semana. Tanbasá?

Aman barak presiza serbisu tempu naruk atu bele hetan buat neʼebé família presiza. Porezemplu, aman ida iha rai-Méxiku sai husi uma tuku neen dadeer no fila fali tuku ualu kalan. Liután neʼe, ita mós dala ruma presiza troka loron atu halaʼo adorasaun família nian tanba atividade kristaun seluk, hanesan vizita husi katuas área nian ka reuniaun boot.

Maibé, ita presiza hakaʼas an atu halo adorasaun família nian semana-semana. Labarik-feto ida ho tinan 11 iha rai-Togu naran Lois hatete: “Maski dala ruma ami halaʼo ami-nia adorasaun família nian besik kalan-boot tanba buat ruma mosu iha loron neʼe, maibé ami nunka falta atu halo.” Entaun, diʼak atu halaʼo adorasaun família nian kuandu semana foun foin komesa, tanba se buat ruma mosu, ita bele muda ba loron seluk iha semana nia rohan.

Liafuan “adorasaun família nian” hatudu katak neʼe mak parte ba ita-nia adorasaun ba Jeová. Tan neʼe, hanesan ema Izraél iha tempu uluk hasaʼe sakrifísiu “karau-oan” nian, mai ita nuʼudar família ida hasaʼe sakrifísiu hahiʼi nian ba Jeová. (Oséias [Hosea] 14:2) Ami hein katak imi hotu sei kontente ho adorasaun família nian “tanba Jeová nia ksolok mak ita-nia abrigu”.—Neemias 8:9, 10.